Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Ieremia 8:1-22

8  O loo fetalai mai Ieova: “I lenā taimi e aumai ai foʻi e tagata ponaivi o tupu o Iuta, o ponaivi o ona perenise, o ponaivi o ositaulaga, o ponaivi o perofeta, ma ponaivi o ē o loo nonofo i Ierusalema mai i o latou tuugamau.+  E latou te folasia lava i le lā, le masina, o ʻau uma o le lagi na latou fiafia i ai, ma latou auauna i ai, ma latou mulimuli i ai,+ ma latou saʻili i ai, ma latou ifo atu foʻi i ai.+ E lē aoaoina mai pe tanuina foʻi. Ae e fai i latou ma otaota i luga o le laueleele.”+  “E filifili e le vaega totoe le oti nai lo o le ola,+ o i latou na totoe o lenei aiga leaga i mea uma na nonofo ai o ē na totoe, o le a ou faataapeape i ai i latou,”+ ua fetalai mai ai Ieova o ʻau.  “Ia e fai atu foʻi iā i latou, ‘O le mea lenei ua fetalai mai ai Ieova: “Pe e paʻuʻū ea i latou ae e lē toe tutū i luga?+ Pe afai e liliu le tasi, pe e lē liliu foʻi ma le isi?+  Aiseā ea ua lē faamaoni ai lenei nuu o Ierusalema, ma tumau ai pea ona lē faamaoni? Ua taofi mau pea i latou i lo latou taufaaʻoleʻole;+ ma ua lē mananaʻo i latou e toe liliu mai.+  Ua ou uaʻi atu+ ma ou faalogologo atu pea.+ E leʻi saʻo le auala na latou tautatala ai pea. E leai se tagata na salamō ona o lana amioleaga,+ ma faapea mai, ‘O le ā laʻu mea na fai?’ Ua taʻitasi ma toe foʻi i le ala na mulimuli i ai isi,+ e pei o se solofanua ua oso atu i le taua.  E oo lava i le kasita* i le lagi, ua ia iloa lelei ona taimi atofaina;+ o le manutagi,+ o le peʻapeʻa, ma le manulele o le akuru, ua latou iloa lelei foʻi le taimi e taʻitasi ai ma ō mai. A o loʻu nuu, e latou te leʻi iloa le faamasinoga a Ieova.”’+  “‘Pe e faapefea ona outou fai mai: “E atamamai i matou, ma o loo iā i matou foʻi le tulafono a Ieova”?+ E moni lava, ua faaaogā le peni+ sesē a failautusi e tusia ai mea pepelo.  Ua faamāina o ē e atamamai.+ Ua matataʻu i latou ma ua maua i latou. Faauta! Ua latou teena le afioga a Ieova, ma o le ā foʻi se atamai o iā i latou?+ 10  O le mea lea ou te tuuina atu ai a latou avā i isi tamāloloa, ma o latou fanua iā i latou o le a aveina;+ auā e mai i lē e sili ona faatauvaa e oo atu i lē ua silisili, ua taʻitasi ma maua polofiti mai i faiga lē saʻo;+ e mai i le perofeta e oo atu foʻi i le ositaulaga, ua amio pepelo i latou uma lava.+ 11  Ua latou taumafai e faatalapelo ona faamālōlō le manuʻa o le tama fafine a loʻu nuu,+ i le faapea ane: “Ua filemu! Ua filemu!” ae e leai se filemu.+ 12  Pe na latou māsiasi ea ona ua latou faia le mea inosia?+ E tasi le mea, e latou te leʻi lagona lava le māsiasi; a o le isi mea, e leʻi oo ina latou iloa le faalogona o le faalumaina.+ “‘O le mea lea, e paʻuʻū ai i latou faatasi ma ē ua paʻuʻū. O le aso foʻi ou te uaʻi atu ai iā i latou,+ e latou te tautevateva ai,’ ua fetalai mai ai Ieova.+ 13  “‘Pe a ou aoaoina i latou, ou te faaumatia i latou,’ ua fetalai mai ai Ieova.+ ‘E leai ni vine i luga o vine,+ e leai ni mati i luga o laau o mati, ma e mamae foʻi ona lau. E mavae ese atu foʻi mai iā i latou mea na ou foaʻiina atu iā i latou.’” 14  “Aiseā ea ua tatou saga nofonofo ai? Inā faapotopoto ia outou, ma seʻi o tatou ulu atu i aai malupuipuia+ ma fano ai i inā. Auā ua finagalo Ieova lo tatou Atua ia fano i tatou,+ ma ua ia aumaia iā i tatou o vai oona e feinu ai,+ auā ua tatou agasala iā Ieova. 15  Sa tatou faamoemoe i le filemu, ae e leai se mea lelei na maua;+ sa tatou faamoemoe foʻi i le taimi e faamālōlō ai, ae faauta! e na o le mataʻu!+ 16  Ua lagona mai i Tanu+ le faafogifogi o ana solofanua. Ona o le leo o le fetagisi foʻi o ana solofanua malolosi, ua galulu ai le laueleele atoa.+ Ua latou ō mai ma faaumatia le nuu ma mea o tumu ai, o le aai ma tagata o loo nonofo ai.” 17  “O le mea lea, ou te aauina atu ai iā te outou o gata, o gata uogo,+ auā e lē mafai ona faalataina,+ ma e latou te ūtia lava outou,” ua fetalai mai ai Ieova. 18  Ua oo mai iā te aʻu le tigā e lē mafai lava ona togafitia.+ Ua maʻi foʻi loʻu loto. 19  O lenei ua oo mai le leo o le alaga mo se fesoasoani a le tama fafine a loʻu nuu mai i se nuu mamao:+ “Pe e lē o iai ea Ieova i Siona?+ Pe e lē o iai ea lona tupu iā te ia?”+ “O le ā ea le mea ua latou faatigā mai ai iā te aʻu, i a latou faatusa ua tā ma o latou atua ese e lē aogā?”+ 20  “Ua mavae atu le seleselega, ua oo i le iʻuga o le tau māfanafana; a ua lē faaolaina lava i tatou!”+ 21  O le manuʻa+ o le tama fafine a loʻu nuu, ua nutimomoia ai aʻu.+ Ua ou faanoanoa lava. Ma ua ou matuā ofo lava.+ 22  Pe e leai ea se pasama* i Kiliata?+ Pe e leai sē e faia faamālōlōga i inā?+ Aiseā ua lē faamālōlō+ ai loa le tama fafine a loʻu nuu?+

Faamatalaga Pito i Lalo

O le “kasita” e uumi ona vae ma e masani ona savali i vai. E taʻua i le faa-Peretania o le stork.
Tagaʻi i le Faaopoopoga e 13.