Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Ieremia 7:1-34

7  Na oo mai le afioga a Ieova iā Ieremia, ua faapea mai:  “Ia e tū i le faitotoʻa o le fale o Ieova, ma ia e folafola atu i inā le upu lenei, ia e faapea atu,+ ‘Ia outou faalogo mai i le afioga a Ieova, o outou uma Iuta o ē o ulu mai i nei faitotoʻa e ifo atu iā Ieova.  O le mea lenei ua fetalai mai ai Ieova o ʻau, o le Atua o Isaraelu: “Ia fai ia lelei o outou ala ma a outou amio, ona ou tuu pea lea o outou e nonofo i lenei mea.+  Aua tou te faatuatua i upu pepelo, e faapea,+ ‘O le malumalu o Ieova, o le malumalu o Ieova, o le malumalu lenei o Ieova!’  Auā afai e tou te fai ia lelei o outou ala ma a outou amio, afai e tou te faia lava le faamasinogatonu o le tagata ma lana aumea,+  afai foʻi tou te lē faasauā i le tagata ese, o le tama ua leai se tamā, ma le fafine ua oti lana tane,+ ma outou lē sasaa le toto o lē ua lē sala i lenei mea,+ ma outou lē mulimuli atu foʻi i isi atua e malaia ai outou,+  ona ou tuu ai pea lea o outou e nonofo i lenei mea, i le nuu na ou foaʻiina atu i o outou augātamā, i aso uma lava e oo i le faavavau.”’”+  “O lenei, ua outou tuu lo outou faatuatuaga i upu pepelo, ma e matuā lē aogā lava.+  Pe e tou te gāoi ea,+ fasioti tagata,+ faia le mulilua,+ tautō pepelo,+ faamū taulaga iā Paala,+ ma mulimuli atu i isi atua e tou te lē iloaina,+ 10  pe e tou te ō mai ea ma tutū i oʻu luma i lenei fale ua taʻua ai loʻu igoa,+ ma outou faapea mai, ‘E laveaʻiina lava i matou,’ e ui ina faia nei mea inosia uma? 11  Po ua avea ea lenei fale ua taʻua ai loʻu igoa+ ma ana o ē e faomea i la outou vaai?+ O aʻu lava ua ou vaai i ai,” ua fetalai mai ai Ieova.+ 12  “‘Ae peitaʻi, inā outou ō ia i le mea na ou iai i Sailo,+ o i inā na ou tuu muamua ai loʻu igoa,+ ma vāai i le mea na ou faia i ai ona o le leaga o loʻu nuu o Isaraelu.+ 13  A o lenei, ona ua outou faia pea o nei galuega uma,’ ua fetalai mai ai Ieova, ‘ma na ou tautala atu pea iā te outou, na ou alapō ma tautala atu,+ ae e tou te leʻi faalogo mai lava,+ na ou valaau atu pea foʻi iā te outou, ae e tou te leʻi tali mai,+ 14  e faapea foʻi ona ou faia i le fale ua taʻua ai loʻu igoa,+ lea e tou te faatuatua i ai,+ ma le nofoaga na ou avatu iā te outou ma o outou augātamā, e pei lava ona ou faia i Sailo.+ 15  Ou te lafoaʻi outou mai i oʻu luma,+ e pei lava ona ou lafoaʻia o o outou uso uma, o le fanauga atoa a Efaraima.’+ 16  “A o oe, aua neʻi e tatalo mai mo lenei nuu, aua foʻi e te tulaʻi e ʻaiʻoi mai mo i latou, pe tatalo, pe ōle mai foʻi iā te aʻu,+ auā ou te lē faalogo atu lava iā te oe.+ 17  Pe e te lē o vaai atu ea i mea o loo latou faia i aai o Iuta ma auala o Ierusalema?+ 18  Ua aoaoina e atalii fafie, ae faaola e tamā le afi, ua lomi e avā le paluga falaoamata e fai ai keke o taulaga i le ‘masiofo o le lagi’;+ ma ua latou liligi foʻi taulaga o meainu+ i isi atua ina ia faatigā mai ai iā te aʻu.+ 19  ‘Po o aʻu ea lea ua latou faatigā mai i ai?’ ua fetalai mai ai Ieova.+ ‘Pe e lē o i latou lava, ina ia latou māsiasi ai?’+ 20  O le mea lea ua fetalai mai ai Ieova le Alii Pule Silisili Ese, ‘Faauta! Ou te sasaa atu loʻu ita ma loʻu tigā i lenei mea,+ i luga o tagata, o manu lalata, i luga o laau o le fanua+ ma fua o le laueleele; e susunuina lava e lē mafai foʻi ona tineia.’+ 21  “O le mea lenei ua fetalai mai ai Ieova o ʻau, o le Atua o Isaraelu, ‘Ia faaopoopo atu a outou taulaga mū i a outou taulaga, ma ia aai ai lava outou.+ 22  Auā ou te leʻi tautala atu i o outou augātamā, ou te leʻi poloaʻi atu foʻi iā i latou i le aso na ou aumaia ai i latou mai i le nuu o Aikupito, e faatatau i taulaga mū ma isi taulaga.+ 23  A o le upu lenei na ou poloaʻi atu ai iā i latou, e faapea: “Ia outou faalogo mai i loʻu leo,+ ona avea ai lea o aʻu ma o outou Atua,+ ma avea foʻi outou ma oʻu nuu; ia outou savavali i le ala uma+ ou te poloaʻi atu ai iā te outou, ina ia manuia ai outou.”’+ 24  Ae e latou te leʻi faalogo mai, e leʻi uaʻi mai foʻi o latou taliga,+ a ua latou savavali e tusa ma a latou lava filifiliga ona o le maaa ma le leaga o o latou loto,+ ua latou solomuli ai ae lē agaʻi i luma,+ 25  talu mai le aso na ō mai ai o outou augātamā mai i le nuu o Aikupito seʻia oo mai i le aso nei;+ na ou aauina atu pea iā te outou o aʻu auauna uma o perofeta, ou te alapō i aso taʻitasi ma aauina atu i latou.+ 26  Ae e latou te leʻi faalogo mai iā te aʻu, e leʻi uaʻi mai foʻi o latou taliga,+ a ua faauamaaa pea i latou.+ Ua sili atu ona leaga a latou amio nai lo o o latou augātamā!+ 27  “E te fai atu nei upu iā i latou uma,+ ae e latou te lē faalogo mai iā te oe; e te valaau atu foʻi iā i latou, ae e latou te lē tali mai iā te oe.+ 28  Ia e fai atu iā i latou, ‘O le nuu lenei e leʻi faalogo ona tagata i le siʻufofoga o Ieova lo latou Atua,+ ma e leʻi talia foʻi aʻoaʻiga.+ Ua mavae atu le faamaoni, ua teʻa ese foʻi mai i o latou gutu.’+ 29  “Inā sele ia lou lauulu uumi ma lafoaʻi ese,+ ia e lagi foʻi se pese faanoanoa i luga o aʻega,+ auā ua teena ma o le a lafoaʻiina e Ieova+ le tupulaga ua ia toʻasā i ai.+ 30  ‘Auā ua faia e le fanauga a Iuta mea leaga i oʻu luma,’ ua fetalai mai ai Ieova. ‘Ua latou faatutū a latou mea inosia i le fale ua taʻua ai loʻu igoa, ina ia faaleagaina ai.+ 31  Ua latou faia foʻi mea maualuluga i Tofeta,+ o loo i le vanu o le fanauga a Hinoma,+ ina ia susunu ai o latou atalii ma o latou afafine i le afi,+ o le mea ou te leʻi poloaʻi atu ai ma e leʻi alu aʻe foʻi i loʻu loto.’+ 32  “‘O le mea lea, faauta! o le a oo mai ai ona aso,’ ua fetalai mai ai Ieova, ‘e lē toe faapea ane ai, o Tofeta ma le vanu o le atalii o Hinoma, a o le vanu e fasiotia ai;+ latou te tanumia foʻi i Tofeta seʻia lē toe ofi.+ 33  E avea tino oti o lenei nuu ma meaʻai a manufelelei o le lagi ma manu o le fanua, e leai foʻi se tasi e faamataʻu iā i latou.+ 34  Ou te aveesea mai i aai o Iuta ma auala o Ierusalema le leo o le fiafia ma le leo o le olioli, o le leo o le alii faaipoipo ma le leo o le tamaʻitaʻi faaipoipo;+ auā o le a avea le laueleele ma faatafunaga.’”+

Faamatalaga Pito i Lalo