Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Ieremia 52:1-34

52  E lua sefulu tasi tausaga o Setekaia+ ina ua fai o ia ma tupu,+ ma e sefulu tasi tausaga na fai ai o ia ma tupu i Ierusalema.+ O le igoa o lona tinā o Hamutala+ le afafine o Ieremia mai i Lipena.+  Ua ia faia pea mea leaga i le silafaga a Ieova,+ e tusa ma mea uma na faia e Ioakima.+  Na tupu lenei mea iā Ierusalema ma Iuta ona o le toʻasā o Ieova, seʻia oo ina lafoaʻia e ia o i latou mai i ona luma.+ Ona fouvale ai lea o Setekaia i le tupu o Papelonia.+  Mulimuli ane, ua oo i le tausaga lona iva o lana nofoaiga o se tupu+ i le masina lona sefulu, o le aso lona sefulu o le masina, na sau ai Nepukanesa le tupu o Papelonia, o ia ma lana ʻautau uma e siitaua iā Ierusalema,+ ua latou tolauapi ma ati se pā e siʻo faataamilo ai o ia.+  Ona siʻomia ai lea o le aai seʻia oo i le tausaga lona sefulu tasi o le nofoaiga a le Tupu o Setekaia.+  I le masina lona fā, i le aso lona iva o le masina,+ na matuā tetele ai le oge i le aai, ua leai foʻi ni meaʻai mo tagata o le nuu.+  Mulimuli ane, ua osofaʻia le aai;+ ona sosola+ ai lea o tagata uma o le taua ma ō atu mai i le aai i le pō, e ui atu i le ala i le faitotoʻa i le va o pā e lua i tafatafa o le togālaau a le tupu,+ a o siʻomia faataamilo e ʻau a Kaletaia le aai; ua latou ō atu pea i le ala o le Arapa.+  Ua tuliloa e le ʻautau a Kaletaia le tupu,+ ma ua latou maua atu Setekaia+ i fanua laugatasi o le toafa o Ieriko; ua taapeape foʻi lana ʻautau uma sa iā te ia.+  Ua latou puʻeina le tupu ma avatu o ia i le tupu o Papelonia+ i Ripelu+ i le nuu o Amato,+ ina ia faamasinoina ai e ia o ia.+ 10  Ua fasiotia e le tupu o Papelonia o atalii o Setekaia i ona luma,+ ua ia fasiotia foʻi perenise uma o Iuta i Ripelu.+ 11  Ua ia faatauasoina Setekaia,+ ona fusifusi lea o ia i faamau ʻapamemea e le tupu o Papelonia+ ma ave o ia i Papelonia, ma tuu i le fale e taofia ai seʻia oo i le aso e oti ai o ia. 12  O le masina lona lima o le aso lona sefulu o le masina, o le tausaga lona sefulu iva lea o le nofoaiga a le Tupu o Nepukanesa+ le tupu o Papelonia, na sau ai i Ierusalema o Nepusatana+ le taʻitaʻi o leoleo, o lē na tū i luma o le tupu o Papelonia. 13  Ua ia susunu le fale o Ieova,+ o le fale o le tupu, ma fale uma o Ierusalema;+ ua ia susunu foʻi i le afi fale tetele uma.+ 14  Ua lepeti foʻi pā uma na siʻomia ai Ierusalema e ʻautau uma a Kaletaia, o ē na faatasi ma le taʻitaʻi o leoleo.+ 15  A o nisi tagata faatauvaa o le nuu, o isi o le nuu na totoe i le aai, o ē na sosola na sosola atu i le tupu o Papelonia,+ ma isi tufuga popoto, na ave faapagota e Nepusatana le taʻitaʻi o leoleo.+ 16  A o nisi o ē e faatauvaa o le nuu, na tuu pea e Nepusatana le taʻitaʻi o leoleo ina ia galulue i vine, ma faia galuega mamafa.+ 17  O poutū+ ʻapamemea foʻi sa i le fale o Ieova, o taavale toso,+ ma le vai ʻapamemea+ sa i le fale o Ieova, na nutililii e ʻau a Kaletaia, ma latou ave ʻapamemea uma i Papelonia.+ 18  Na latou ave foʻi ʻapa, o suō,+ o seleulu,+ o ipu faaofuofu,+ o ipu tī, ma ipu ʻapamemea uma na latou faaaogā i le auaunaga.+ 19  Na ave foʻi e le taʻitaʻi o leoleo o tanoa,+ o salefu,* o ipu faaofuofu,+ o ʻapa, o tuugāmolī,+ o ipu tī, ma ipu faaofuofu ua faia i le auro+ māoʻi ma le siliva+ māoʻi.+ 20  O poutū+ e lua, o le vai e tasi,+ o povi+ poʻa ʻapamemea e sefulu lua sa i lalo ifo o le vai, ma taavale toso na faia e le Tupu o Solomona mo le fale o Ieova.+ E leʻi mafai ona fuatia le mamafa o le ʻapamemea o nei mea uma.+ 21  A o poutū, e sefulu valu kupita le maualuga o poutū taʻitasi,+ e faataamilo ai foʻi le filo e sefulu lua kupita;+ o lona mafiafia e tusa lea ma le umī o le tamaʻimaʻilima, e ʻōʻō totonu. 22  O le ulupou sa i ona luga e faia i le ʻapamemea,+ o le maualuga o le ulupou e tasi e lima kupita;+ e ʻapamemea foʻi le mea valavala ma rimoni na faataaliʻoliʻo ai i le ulupou;+ e faapena foʻi ona iai nei mea i le poutū lona lua, atoa foʻi ma rimoni.+ 23  E iva sefulu ono rimoni i itu, e selau rimoni e faataamilo i le mea valavala.+ 24  Na ave foʻi e le taʻitaʻi o leoleo, o Seraia+ le faitaulaga sili, ma Sefanaia+ le faitaulaga lona lua, ma leoleo faitotoʻa e toʻatolu,+ 25  na ia ave foʻi mai i le aai le tagata aloaʻia e toʻatasi o lē na pule i tagata o le taua, o tagata e toʻafitu o ē na iloa fofoga o le tupu+ sa iai i le aai, o le failautusi a le taʻitaʻiʻau, o lē e faapotopotoina tagata o le nuu, ma tagata e toʻaono sefulu o le nuu na maua i totonu o le aai.+ 26  Ona ave lea o i latou nei e Nepusatana+ le taʻitaʻi o leoleo ma avatu i le tupu o Papelonia i Ripelu.+ 27  Ona fasia lea o i latou nei e le tupu o Papelonia,+ ua ia fasiotia i latou i Ripelu+ i le nuu o Amato.+ A ua ave faapagota Iuta mai i lona laueleele.+ 28  O tagata nei na ave faapagota e Nepukanesa i le tausaga lona fitu, e toʻatolu afe lua sefulu tolu tagata Iutaia.+ 29  I le tausaga lona sefulu valu o le nofoaiga a Nepukanesa,+ e toʻavalu selau tolu sefulu lua tagata mai i Ierusalema. 30  I le tausaga lona lua sefulu tolu o le nofoaiga a Nepukanesa, na ave faapagota ai e Nepusatana le taʻitaʻi o leoleo tagata Iutaia e toʻafitu selau fā sefulu lima.+ O tagata uma e toʻafā afe ono selau. 31  Pe tusa o le tausaga lona tolu sefulu fitu talu ona ave faapagota Ioakina+ le tupu o Iuta, i le masina lona sefulu lua i le aso lona lua sefulu lima o le masina, na faaeaina ai le ulu+ o Ioakina le tupu o Iuta e Evile-marota le tupu o Papelonia i le tausaga na fai ai o ia ma tupu, ma na tatala ai o ia mai i le falepuipui. 32  Ua ia tautala atu ma le agalelei iā te ia, ua ia faasili foʻi lona nofoālii nai lo o nofoālii o isi tupu na faatasi ma ia i Papelonia.+ 33  Ona ia aveesea lea o ona ofu na faafalepuipui ai,+ ua ʻai+ foʻi o ia e lē aunoa i ona luma i aso uma o lona ola.+ 34  A o ana meaʻai, na tuuina atu e lē aunoa iā te ia e le tupu o Papelonia i lea aso ma lea aso, i aso uma o lona ola seʻia oo i le aso na oti ai.+

Faamatalaga Pito i Lalo

O se mea e pei o se tamaʻi suō e aveese ai malala mai i le afi.