Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Ieremia 51:1-64

51  O le mea lenei ua fetalai mai ai Ieova: “O aʻu lava ou te faaosoina atu se matagi mataʻutia e faaumatia ai Papelonia+ ma ē o loo nonofo i Lepa-kaima;+  ou te aauina atu foʻi i Papelonia o tagata faasavili saito, o ē o le a faasaviligia o ia, ma faagaogaoina lona nuu;+ auā e latou te tau ma ia i itu uma i le aso o le puapuaga.+    “O lē e loloʻu lana ʻaufana, aua le loloʻuina.+ Aua foʻi neʻi tulaʻi se tasi i lona ofutau uʻamea. “Aua neʻi outou alolofa mutimutivale i ona tauleleʻa.+ Ia faaumatia lana ʻautau uma.+  E paʻuʻū i latou ua fasiotia i le nuu o le ʻau Kaletaia,+ ma ua matuā manunuʻa i ona auala.+  “Auā e lē tuua lava Isaraelu ma Iuta+ e lo latou Atua, o Ieova o ʻau, e leʻi avea i latou e pei o fafine ua oti a latou tane.+ Auā ua matuā nofosala lo latou nuu i le silafaga a Lē e Paia o Isaraelu.+  “Inā outou sosola ese ia mai i totonu o Papelonia,+ ma ia taʻitasi ma faasaoina lona lava ola.+ Aua neʻi faaumatia ai i lana mea sesē.+ Auā o le taimi lea o le tauimasui a Ieova.+ Ua ia taui atu iā te ia e tusa ma ana mea na fai.+  Ua avea Papelonia ma ipu auro i le aao o Ieova,+ ua ia faaonā le lalolagi uma.+ Ua feinu atunuu i lana uaina.+ O le mea lea ua amio vālea ai atunuu.+  Ua faafuaseʻi lava ona paʻū Papelonia, ma ua gau ai o ia.+ O outou le nuu e, inā uiō ia ona o ia.+ Ia avatu se pasama* i lona tigā.+ Atonu e mālōlō ai o ia.”  “Sa ono mafai ona tatou faamālōlōina Papelonia, ae e leʻi mālōlō ai o ia. O outou le nuu e, inā tuu ai pea ia o ia,+ ma ia taʻitasi i tatou ma alu i lona lava nuu.+ Auā ua oo atu i le lagi lona faamasinoga, ma ua oo aʻe foʻi i le lagi puaoa.+ 10  Ua tuuina mai e Ieova galuega o le amiotonu mo i tatou.+ Inā ō mai ia, seʻi o tatou taʻutaʻu atu i Siona galuega a Ieova lo tatou Atua.”+ 11  “Inā faaiila ia aū.+ Ia outou faatutumu talita lapotopoto. Ua faaoso e Ieova le agaga o tupu o Metai,+ auā ua finagalo o ia e faasagatau iā Papelonia,+ ina ia fano ai o ia. Auā o le tauimasui lea a Ieova, o le tauimasui mo lona malumalu.+ 12  Inā sii aʻe ia se faailoilo i pā o Papelonia.+ Ia faamalosia le leoleoga.+ Ia tofia ni tagata leoleo. Ia sauni i latou o loo lalafi.+ Auā e lē gata ua finagalo i ai Ieova, ae na te faia lava le mea ua ia fetalai ai faasaga i ē o loo nonofo i Papelonia.”+ 13  “O oe lenā le fafine o loo nofo i luga o vai e tele,+ ua tamaoaiga i oloa,+ ua oo mai lou iʻuga ma le iʻuga o le fua+ o au polofiti.+ 14  Ua tautō Ieova o ʻau iā te ia lava,+ ‘Ou te faatumuina oe i tagata e pei o sē akerise,+ e latou te pepese fiafia atu foʻi ona o oe.’+ 15  O ia o Lē na faia le lalolagi i lona mana,+ o Lē na matuā faatumauina le laueleele+ i lona atamai,+ ma o Lē foʻi na fofola le lagi+ i lona malamalama.+ 16  O le tulei mai o lona siʻufofoga ua taalili ai vai i le lagi, ma ua ave aʻe e ia o ausa mai i le tuluʻiga o le lalolagi.+ Ua faia foʻi e ia faitotoʻa mo le timu,+ ma ua aumaia e ia le matagi mai i ona fale teuoloa. 17  Ua gaoioi ma le valelea tagata uma, ua latou lē iloa ai se mea.+ Ua māsiasi foʻi tufuga fai uʻamea uma ona o le faatusa ua tā;+ auā o le mea pepelo lana faatusa uʻamea,+ ma e leai foʻi se ola iā i latou.+ 18  E faatauvaa ia mea,+ o le galuega e tauemua.+ E fano lava i le taimi e asia ai i latou.+ 19  “E lē pei le Tofi o Iakopo o nei mea,+ auā o ia o le Mataisau o mea uma,+ e oo foʻi i le tootoo o lona tofi.+ O Ieova o ʻau o lona suafa lea.”+ 20  “O oe o laʻu uatogi, o auupega o le taua,+ ou te tuʻimomomoina atunuu e ala iā te oe, ou te faaumatia foʻi malo e ala iā te oe. 21  Ou te tuʻimomomoina le solofanua ma lē o loo tiʻetiʻe ai e ala iā te oe, ou te tuʻimomomoina foʻi le kariota o le taua ma lē o loo tiʻetiʻe ai e ala iā te oe.+ 22  Ou te tuʻimomomoina le tane ma le fafine e ala iā te oe, ou te tuʻimomomoina le toeaina ma le tamaitiiti e ala iā te oe, ou te tuʻimomomoina foʻi le tauleʻaleʻa ma le taupou e ala iā te oe. 23  Ou te tuʻimomomoina le leoleo mamoe ma lana lafu e ala iā te oe, ou te tuʻimomomoina le faifaatoʻaga ma ana manu sua fanua e ala iā te oe, ou te tuʻimomomoina foʻi kovana ma sui pule e ala iā te oe. 24  Ou te taui atu iā Papelonia ma ē uma o loo nonofo i Kaletaia, e tusa ma a latou mea leaga uma na latou faia i Siona i o outou luma,”+ ua fetalai mai ai Ieova. 25  “Faauta, ou te faasagatau atu iā te oe,+ o oe lenā le mauga na te faaumatia,”+ ua fetalai mai ai Ieova, “o oe o lē e na te faaumatiaina le lalolagi atoa;+ ou te faaloaloa atu loʻu lima iā te oe ma fuliese oe mai i papa, ma faia oe ma mauga mū.”+ 26  “E lē avea foʻi e tagata se maa mai iā te oe e fai ma tulimanu po o se maa mo le faavae,+ auā e avea oe ma mea ua faatafunaina e oo i le faavavau,”+ ua fetalai mai ai Ieova. 27  “Inā outou sii aʻe ia se faailoilo i le nuu.+ Ia ili le pū i atunuu. Ia sauniuni*+ atunuu e tau ma ia. Ia aami malo o Ararata,+ o Meni, ma Asekeneso+ e tau ma ia. Ia tofia se tagata tau e faasagatau iā te ia. Ia ō aʻe foʻi iā te ia ni solofanua+ e pei o tamaʻi sē akerise. 28  Ia sauniuni* atunuu e tau ma ia, o tupu o Metai,+ o ona kovana, o ona sui pule uma, ma le nuu uma e taʻitasi ma pule ai. 29  Ia lūlūina le laueleele ma ia matuā tigā,+ auā ua aʻe se finagalo iā Ieova e faasaga iā Papelonia, ina ia faia le nuu o Papelonia ma mea e ofo ai, e leai foʻi se isi e nofo ai.+ 30  “Ua tuua le taua e tagata malolosi o Papelonia. Ua latou nonofo pea i nofoaga malolosi. Ua mavae atu lo latou malosi.+ Ua avea i latou ma fafine.+ Ua susunuina i le afi ona fale. Ua gauia foʻi ona faamau faalava.+ 31  “Ua momoʻe atu le tasi tagata tamoʻe e faafetaiaʻi i le isi tagata tamoʻe, o le tasi foʻi avefeʻau e faafetaiaʻi i le isi avefeʻau,+ ina ia taʻu atu i le tupu o Papelonia ua faatoʻilaloina lona aai i itu uma,+ 32  ua punitia asaga,+ ua latou susunu i le afi vaa e fai i ū, ma ua atuatuvale foʻi tagata o le taua.”+ 33  O le mea lenei ua fetalai mai ai Ieova o ʻau, o le Atua o Isaraelu: “Ua pei le tama fafine a Papelonia o le mea e soli ai saito.+ Ua oo i le taimi e matuā solia ai o ia. Peitaʻi, e toeitiiti ona oo mai lea o le taimi mo ia e seleseleina ai.”+ 34  “Ua ʻaina aʻu e Nepukanesa le tupu o Papelonia;+ ua ia faafenuminumiaʻi iā te aʻu. Ua ia faia aʻu e pei o se ipu e lē o iai se mea. Ua ia foloina aʻu e pei o se gata telē;+ ua ia faatumu lona manava i aʻu mea matagofie. Ua ia fufulu ese foʻi iā te aʻu. 35  E faapea ane lē o loo nofo i Siona, ‘Ia i luga o Papelonia faiga sauā na faia iā te aʻu ma loʻu tino!’+ E faapea ane foʻi Ierusalema, ‘Ia i luga o ē o loo nonofo i Kaletaia loʻu toto!’ ”+ 36  O lea ua fetalai mai ai Ieova: “Ou te faia lau finauga,+ ma ou faaoo atu lava le tauimasui mo oe.+ Ou te faamateina lona sami, ma ou faamamate foʻi i ona vaieli.+ 37  E avea Papelonia ma faupuʻega maa,+ o le mea e nonofo ai taʻifau ʻaivao,+ o le mea e ofo ai, o se mea foʻi e tuufaaili ai, e leai se isi e nofo ai.+ 38  E fetagisi faatasi i latou uma e pei o leona taanoa. E atigū lava i latou e pei o tamaʻi leona.” 39  “Pe a malolosi o latou tuʻinanauga, ou te saunia a latou faigaʻai ma ou faainu i latou ia onanā ina ia olioli ai;+ e momoe foʻi i latou i le momoe e faavavau, e lē toe feala mai ai i latou,”+ ua fetalai mai ai Ieova. 40  “Ou te ave ifo i latou e pei o mamoe poʻa o le a fasia, e pei o mamoe poʻa faatasi ma ʻoti poʻa.”+ 41  “E! ua puʻea Sesaka,+ ma ua maua foʻi le Viiga a le lalolagi atoa.+ E! ua avea foʻi Papelonia ma mea e ofo ai atunuu.+ 42  Ua alu aʻe le sami i luga o Papelonia. Ua ufitia ai o ia i le tele o ona galu.+ 43  Ua avea ona aai ma mea e ofo ai, o se nuu naumati ma o se toafa.+ E lē toe nofo ai se tasi i lea nuu, e lē ui ane ai foʻi se atalii o le tagata.+ 44  Ou te uaʻi atu iā Pele+ i Papelonia, ma ou te aumaia mai i lona gutu mea na ia foloina.+ E lē toe gasolo atu foʻi iā te ia atunuu.+ E soloia foʻi le pā o Papelonia.+ 45  “Loʻu nuu e, inā ō ese ia mai iā te ia,+ ma ia taʻitasi ma saunia se mea e sao+ ai o ia mai i le toʻasā aasa o Ieova.+ 46  Ina neʻi vaivai o outou loto,+ ma outou fefefe ai ona o le tala e faalogo ai i le nuu. Ae e oo mai lava le tala i lea tausaga, e mulimuli ane foʻi le tala i le tasi tausaga, o le a iai le sauā i le nuu ma e faasagatau foʻi le tasi pule i le isi pule. 47  O le mea lea, faauta! e oo mai aso, ou te taui atu ai i faatusa ua tā a Papelonia;+ e māsiasi lona nuu uma, ma e paʻuʻū foʻi ona tagata uma ua fasiotia i totonu iā te ia.+ 48  “E alalaga fiafia le lagi, o le lalolagi ma mea uma o loo iai ona o Papelonia,+ auā e ō mai iā te ia o ē e faoa mea mai i le itu i mātū,”+ ua fetalai mai ai Ieova. 49  “E lē gata o Papelonia le pogai o le paʻuʻū o tagata ua fasiotia o Isaraelu,+ ae o Papelonia foʻi na paʻuʻū ai tagata ua fasiotia o le lalolagi uma.+ 50  “O outou o ē ua sao mai i le pelu, inā ō pea ia. Aua le tutū.+ Ia manatua Ieova+ mai i le mea mamao, ma tau ina ia manatua Ierusalema i o outou loto.”+ 51  “Ua faamāina i matou,+ auā ua matou faalogo i le faalumaina.+ Ua ufitia o matou mata i le māsiasi,+ auā ua ō atu tagata ese faasaga i mea paia o le fale o Ieova.”+ 52  “Faauta! O le mea lea, e oo mai aso,” ua fetalai mai ai Ieova, “ou te uaʻi atu i ona faatusa ua tā,+ ma e ōi foʻi lē ua matuā manuʻa i lona nuu uma.”+ 53  “E tusa lava pe alu aʻe Papelonia i le lagi,+ e tusa foʻi pe faia e ia le mea maualuga o lona malosi ia lē sao i ai se isi,+ ae e ō atu iā te ia o ē e faoa mea mai iā te aʻu,”+ ua fetalai mai ai Ieova. 54  “Faalogo! Ua iai le alaga mai i Papelonia,+ ma le faaumatiaga tele mai i le nuu o le ʻau Kaletaia,+ 55  auā ua faoa e Ieova mea a Papelonia, e faaumatia lava e ia le leotele mai iā te ia,+ e fesouaʻiina foʻi o latou galu e pei o vai e tele.+ E na te faamutaina lo latou leotetele. 56  Auā e sau iā te ia, i luga o Papelonia, o lē e faoa mea,+ ma e puʻea lava ona tagata malolosi.+ E gauia ana ʻaufana,+ auā o Ieova o le Atua o le tauimasui.+ E tauia lava e ia.+ 57  Ou te faainu ia onanā ona perenise ma ona tagata atamamai, o ona kovana ma ona sui pule, ma ona tagata malolosi,+ e momoe lava i latou i le moe e faavavau, e lē toe feala i latou,”+ ua fetalai mai ai le Tupu,+ o lona suafa o Ieova o ʻau.+ 58  O le mea lenei ua fetalai mai ai Ieova o ʻau: “E talepe lava i lalo le pā o Papelonia, e ui ina lautele;+ e faamūina foʻi i le afi ona faitotoʻa, e ui ina maualuluga.+ E galulue fua tagata,+ e galulue fua foʻi nuu mo le afi;+ e vaivai ai i latou.” 59  O le upu na poloaʻi mai ai le perofeta o Ieremia iā Seraia le atalii o Neria,+ le atalii o Maseia,+ ina ua alu atu o ia faatasi ma Setekaia le tupu o Iuta i Papelonia, i le tausaga lona fā talu ona fai o ia ma tupu; o Seraia foʻi o le alii e pule i mea a le tupu. 60  Na tusia e Ieremia i le tusi e tasi,+ le mala uma o le a oo i Papelonia, o nei upu uma na tusia e faasaga iā Papelonia. 61  Ua fai atu foʻi Ieremia iā Seraia: “Afai e te oo atu loa i Papelonia ma vaai i ai, ia e faitau leotele atu nei upu uma.+ 62  Ia e faapea atu, ‘Ieova e, o oe lava na e fetalai mai faasaga i lenei mea, ina ia faaumatia ma leai se isi e nofo ai,+ o se tagata po o se manu lata foʻi, ae e avea o ia ma mea ua faatafunaina e faavavau.’ 63  Afai e uma ona e faitauina lenei tusi, ia e nonoa ai i se maa ma e lafo i totonu o Eufirate.+ 64  Ia e faapea atu foʻi, ‘E faapea ona goto o Papelonia ma lē toe ea aʻe ona o le malaia o le a ou faaoo i ona luga;+ e vaivai ai lava i latou.’ ”+ Ona gata ai lea o upu a Ieremia.

Faamatalaga Pito i Lalo

Tagaʻi i le Faaopoopoga e 13.
I le gagana Eperu, “ia faapaia atunuu ina ia tau ma ia.”
I le gagana Eperu, “ia faapaia atunuu ina ia tau ma ia.”