Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Ieremia 50:1-46

50  O le afioga na fetalai mai ai Ieova e ala i le perofeta o Ieremia, e faatatau iā Papelonia+ ma le nuu o tagata Kaletaia:+  “Ia taʻu atu i atunuu ma faalauiloa atu i ai.+ Ia sii aʻe foʻi se faailoilo;+ ma faalauiloa atu. Aua neʻi o outou natia se mea. Ia fai atu foʻi, ‘Ua faatoʻilaloina Papelonia.+ Ua faamāina Pele.+ Ua matataʻu Merota. Ua faamāina ona faatusa.+ Ua matataʻu foʻi ona tupua inosia.’  Auā e alu aʻe mai i le itu i mātū se atunuu e tau ma ia.+ O le atunuu lea e faia lona laueleele ma mea e ofo ai, ina ia leai se isi e nofo ai.+ Ua sosola uma tagata ma manu lalata.+ Ua ō ese i latou.”+  “I na aso ma i lenā foʻi taimi,”+ ua fetalai mai ai Ieova, “e ō mai ai le fanauga a Isaraelu, o i latou faatasi ma le fanauga a Iuta.+ E savavali i latou, ma fetagisi a o latou savavali,+ e latou te saʻili foʻi iā Ieova lo latou Atua.+  E latou te fesili atu pea mo le auala i Siona, e faasasaga foʻi o latou mata i lenā itulagi,+ ma faapea, ‘Inā ō mai ia, seʻi faatasi atu i tatou iā Ieova, ma osia se feagaiga e tumau e lē mafai ona galo.’+  Ua avea loʻu nuu o se lafu mamoe ua sē.+ Ua faafeoaʻi solo i latou e o latou lava leoleo mamoe.+ Ua latou taʻitaʻiina ese i latou i mauga.+ Ua latou ō atu mai i lea mauga i lea aʻega. Ua galo foʻi iā i latou le mea e latou te mālōlō ai.+  Ua ʻaina i latou e ē uma na maua i latou,+ ua faapea ane foʻi o latou fili,+ ‘E tatou te lē nofosala lava,+ talu ai ua latou agasala iā Ieova, o le mea e mau ai o lē e amiotonu+ ma o le faamoemoe o o latou augātamā,+ o Ieova.’ ”  “Inā outou sosola ese ia mai i totonu o Papelonia, ma ō atu mai i le laueleele o le ʻau Kaletaia,+ ia avea foʻi outou e pei o ni manu o loo taʻimua i luma o le lafu.+  Auā ou te faaoso ma ave aʻe e tau ma Papelonia se faapotopotoga o atunuu tetele mai i le nuu o le itu i mātū,+ e latou te saunia foʻi i latou e tau ma ia.+ E puʻeina ai o ia i inā.+ O aū a se tasi e pei o aū a le tagata malosi, e faapogaia ai le faavauvau o tamaiti, e lē foʻi fua mai.+ 10  E fai Kaletaia ma vete.+ E faamalieina foʻi i latou uma e vetea o ia,”+ ua fetalai mai ai Ieova. 11  “Auā ua olioli pea outou,+ auā ua fiafia pea foʻi outou ina ua faoa loʻu tofi.+ Auā ua outou osooso solo e pei o se tamaʻi povi fafine i le vao muʻa,+ ma ua outou fetagisi pea e pei o ni solofanua malolosi.+ 12  Ua matuā māsiasi lava lo outou tinā.+ Ua faanoanoa o ia o lē na fanaua outou.+ Faauta! o ia lava e aupito faatauvaa i atunuu, o se laufanua naumati ma o se toafa.+ 13  Ona o le toʻatamaʻi o Ieova ua lē ʻainā ai o ia,+ e avea foʻi ma mea ua faatafunaina atoa.+ A o se tasi e ui ane ai i Papelonia, e pulatoʻa atu ma le ofo tele ma tuufaaili ona o ona mala uma.+ 14  “Inā outou sauniuni ia e tau ma Papelonia i itu uma,+ o outou uma o ē e loloʻu le ʻaufana.+ Inā fana atu ia iā te ia.+ Aua neʻi tuua se aū, auā ua ia agasala iā Ieova.+ 15  Inā alaga ia i le alaga o le taua faasaga iā te ia i itu uma.+ Ua siilima o ia.+ Ua paʻuʻū ona poutū. Ua lepetia i lalo ona pā.+ Auā o le tauimasui lea a Ieova.+ Ia outou taui atu iā te ia. E pei ona faia e ia, ia faapea foʻi ona faia iā te ia.+ 16  Ia vavaeese o lē e lūlū fatu mai i Papelonia,+ ma lē e uuina le selesaito i le taimi o le seleselega. Ona o le sauā o le pelu, ua taʻitasi i latou ma liliu atu i lona lava nuu, ua taʻitasi foʻi i latou ma sola atu i lona laueleele.+ 17  “O Isaraelu o mamoe+ ia ua salalau solo. Ua faataapeapeina e leona.+ I le taimi muamua, na ʻai ai o ia e le tupu o Asuria,+ ae i le taimi mulimuli, na gali ai ona ponaivi e Nepukanesa le tupu o Papelonia.+ 18  O le mea lea ua fetalai mai ai Ieova o ʻau, o le Atua o Isaraelu, ‘O lenei, ua ou liliu atu i le tupu o Papelonia ma lona nuu, e pei lava ona ou liliu atu foʻi i le tupu o Asuria.+ 19  Ou te toe faafoʻisia Isaraelu i lona laufanua,+ ma e ʻai lava o ia i Karamelu+ ma Vasana;+ e faamalieina foʻi o ia i vaega maugā o Efaraima+ ma Kiliata.’ ”+ 20  “I na aso ma i lenā foʻi taimi,”+ ua fetalai mai ai Ieova, “e saʻilia ai le mea sesē a Isaraelu,+ ae e leai lava; o agasala foʻi a Iuta,+ ae e lē maua, auā ou te faamagaloina i latou o ē ua ou faatotoeina.”+ 21  “Inā alu aʻe ia e tau ma le nuu o Merataimo+ ma ē o loo nonofo i Pekota.+ Ia mulimuli atu iā i latou le fasi tele ma le faaumatiaga,” ua fetalai mai ai Ieova, “ma ia faia e tusa ma mea uma ua ou poloaʻi atu ai iā te oe.+ 22  Ua iai le leo o le taua i le nuu, ma le faatamaʻiaga tele.+ 23  E! ua gauia ma nutililiia+ le samala+ a le lalolagi uma. E! ua avea Papelonia ma mea e ofo ai atunuu.+ 24  Papelonia e, na ou tuu se mailei mo oe ma ua puʻea ai oe, ae e te leʻi iloaina.+ Ua maua oe ma ua taofia, auā ua e siitaua iā Ieova.+ 25  “Ua tatala e Ieova lona fale teuoloa, ma aumaia ai auupega o lana faasalaga.+ Auā e iai le galuega a le Alii Pule Silisili Ese+ o Ieova o ʻau, i le nuu o Kaletaia.+ 26  Inā ō mai ia iā te ia mai i le mea e sili ona mamao.+ Ia tatala ona fale e tuu ai saito.+ Ia outou faafaupuʻe iā te ia e pei o i latou e faia faupuʻega saito,+ ma ia faaumatia o ia.+ Aua neʻi iai nisi e totoe iā te ia.+ 27  Ia fasia ona tamaʻi povi poʻa uma.+ Ia ō ifo i latou i le mea e fasi ai.+ Oi talofa iā i latou, auā ua oo mai lo latou aso, o le taimi e asia ai i latou!+ 28  “Ua lagona le alaga a i latou o loo sosola ma i latou ua sao mai i le nuu o Papelonia,+ e taʻu atu i Siona le tauimasui a Ieova lo tatou Atua,+ o le tauimasui mo lona malumalu.+ 29  “Ia outou poloaʻi atu i tagata fanafana aū ina ia tau ma Papelonia, o ē uma e loloʻu le ʻaufana.+ Ia tolauapi faataamilo iā te ia. Aua neʻi iai nisi e sao mai ai.+ Ia taui atu iā te ia e tusa ma ana gaoioiga.+ Ia faia iā te ia e tusa ma mea uma na ia faia.+ Auā ua ia faamaualuga iā Ieova, o Lē e Paia o Isaraelu.+ 30  O le mea lea e paʻuʻū ai ona tauleleʻa i ona nofoaga faitele,+ e fasiotia foʻi ona tagata uma o le taua i lenā aso,”+ ua fetalai mai ai Ieova. 31  “Faauta! Ou te faasagatau iā te oe,+ o oe o Lē e faamaualuga,”+ ua fetalai mai ai Ieova o ʻau, o le Alii Pule Silisili Ese,+ “auā e oo mai lou aso, o le taimi ou te uaʻi atu ai iā te oe. 32  E tautevateva ma paʻū ai o Lē e Faamaualuga,+ e leai foʻi se isi e na te faatulaʻi iā te ia.+ Ou te faamū le afi i ona aai, ma faaumatia mea uma o siʻomia ai o ia.”+ 33  O le mea lenei ua fetalai mai ai Ieova o ʻau: “Ua sauāina faatasi le fanauga a Isaraelu ma le fanauga a Iuta, ma ua taofia foʻi i latou e ē uma na aveina faapagota i latou.+ Ua mumusu i latou e tuuina atu i latou e ō.+ 34  E malosi Lē e toe faatauina mai i latou,+ o Ieova o ʻau lona suafa.+ E faia lava e ia lo latou faamasinoga,+ ina ia avatu ai e ia le mālōlōga i le nuu,+ ma faaatuatuvale ai o ē o loo nonofo i Papelonia.”+ 35  “E faaumatia e le pelu le ʻau Kaletaia,”+ ua fetalai mai ai Ieova, “ma ē o loo nonofo i Papelonia,+ o ona perenise,+ ma ona tagata atamamai.+ 36  E faaumatia e le pelu tagata e tautatala i mea e lē aogā,+ e latou te gaoioi foʻi ma le vālea.+ E faaumatia e le pelu ona tagata malolosi,+ ma e matataʻu foʻi i latou.+ 37  E faaumatia e le pelu a latou solofanua+ ma a latou kariota o le taua, ma tagata eseese uma o loo iai iā te ia,+ ma e avea lava i latou ma fafine.+ E faaumatia e le pelu ana oloa,+ ma e faoa lava. 38  E faaleagaina ona vai ma mamate ai.+ Auā o le nuu o faatusa ua tā,+ ma ua latou gaoioi foʻi ma le vālea ona o a latou vaaiga mataʻutia. 39  O le mea lea, e nonofo faatasi ai manu i vaipanoa naumati ma manu o loo uiō leotetele, e nonofo ai foʻi iaena;+ ma e lē toe nofo ai se tasi, pe toe nofoia i lea tupulaga ma lea tupulaga.”+ 40  “E pei o le faaumatiaina e le Atua o Sotoma ma Komoro+ ma ona aai tuaoi,”+ ua fetalai mai ai Ieova, “e lē nofo ai se tagata i inā, pe nofo ai foʻi se atalii o le tagata o se tagata ese.+ 41  “Faauta! E ō mai se nuu mai i le itu i mātū; e faaosoina mai foʻi se atunuu tele+ ma tupu+ sili mai i vaega pito sili ona mamao o le lalolagi.+ 42  E latou te uu le ʻaufana ma le tao.+ E latou te sauā foʻi ma lē alolofa mutimutivale.+ O lo latou leo e pei o le sami ua fesouaʻiina,+ e latou te tiʻetiʻe foʻi i solofanua;+ e sauniuni e pei o se tagata e toʻatasi e siitaua mai iā te oe, le tama fafine a Papelonia e.+ 43  “Ua faalogo le tupu o Papelonia i le tala e uiga iā i latou,+ ona vaivai ai lea o ona lima.+ Ua mafatia o ia! Ua ogotia o ia i tigā matuitui e pei o se fafine o le a fanau.+ 44  “Faauta! E alu aʻe se tasi e pei o se leona mai i vao lauolaola i tafatafa o Ioritana, i le mea tumau e mau ai o ia,+ ae ua toeitiiti ona ou faasosola ese lea o i latou mai iā te ia.+ Ou te tofia foʻi o lē ua ou filifilia e pule iā te ia.+ Auā o ai ea sē e pei o aʻu,+ o ai e na te tofotofo mai iā te aʻu,+ o ai foʻi nei le leoleo mamoe e mafai ona tū i oʻu luma?+ 45  O le mea lea, inā outou faalogologo mai ia i le filifiliga+ a Ieova ua ia faia iā Papelonia,+ ma lona finagalo ua ia finagalo ai i le nuu o tagata Kaletaia.+ E moni, e fetosoaʻiina solo o ē e iti o le lafu.+ E moni foʻi, e na te faia le mea latou te nonofo ai ma mea ua faatafunaina ona o i latou.+ 46  I le leo pe a osofaʻia Papelonia, e matuā gatete ai le lalolagi,+ e lagona foʻi le alaga i atunuu.”+

Faamatalaga Pito i Lalo