Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Ieremia 44:1-30

44  O le upu na oo mai iā Ieremia mo tagata Iutaia uma na nonofo i le nuu o Aikupito,+ o ē na nonofo i Mekatala,+ o Tapenesa,+ o Nafi,+ ma le nuu o Patoro,+ e faapea:  “O le mea lenei ua fetalai mai ai Ieova o ʻau, o le Atua o Isaraelu, ‘Ua outou vaaia le mala uma na ou aumaia i luga o Ierusalema+ ma luga o aai uma o Iuta, ma ua avea nei o se mea ua faatafunaina i le aso nei, ua leai foʻi se isi e nofo ai.+  Ona o mea leaga na latou faia e faatigā mai ai iā te aʻu, i le ō atu ma faamū le taulaga+ ma auauna atu i isi atua o ē e latou te leʻi iloa, e leʻi iloa foʻi e outou po o o outou augātamā.+  Na ou aauina atu pea iā te outou aʻu auauna uma o le ʻauperofeta, na ou alapō ma aauina atu,+ e faapea: “Faamolemole, aua lava neʻi o outou faia lenei mea inosia ou te ʻinoʻino i ai.”+  Ae e latou te leʻi faalogo mai,+ e leʻi uaʻi mai foʻi o latou taliga ina ia liliuese mai i a latou mea leaga, i le lē faamūina o le taulaga i isi atua.+  O lea, ua liligi atu ai loʻu ita tele ma loʻu ita, ma ua mū ai aai o Iuta ma auala o Ierusalema;+ ua avea o se mea ua faatafunaina, o se mea foʻi ua faagaogaoina e pei ona iai i le aso nei.’+  “O le mea lea ua fetalai mai ai Ieova, o le Atua o ʻau, o le Atua o Isaraelu, ‘Aiseā ua outou faatupu ai lenei mala tele iā te outou lava,+ ina ia faaumatia ai mai iā te outou o le tane ma le fafine, o le tamaitiiti ma le tamameamea+ mai i totonu o Iuta, ina ia leai ai o sē e totoe mai iā te outou;  i le faatigā mai iā te aʻu i galuega a o outou lima, i le faamū o le taulaga i isi atua+ i le nuu o Aikupito, lea ua outou ō atu e nonofo ai o ni tagata ese; ina ia faaumatia ai outou ma ia avea ai outou ma malaia, ma mea e faalumaina ai i atunuu uma o le lalolagi?+  Po ua galo ea iā te outou amioleaga a o outou augātamā,+ o amioleaga a tupu o Iuta,+ o amioleaga a a latou avā,+ o a outou lava foʻi amioleaga, ma amioleaga a a outou avā,+ na latou faia i le nuu o Iuta ma auala o Ierusalema? 10  E oo mai lava i le aso nei, latou te leʻi faamaulalo iā i latou,+ e leʻi fefefe+ pe savavali foʻi i laʻu tulafono+ ma aʻu faatonuga, na ou tuuina atu i o outou luma ma luma o o outou augātamā.’+ 11  “O le mea lea ua fetalai mai ai Ieova o ʻau, o le Atua o Isaraelu, ‘Ou te faasaga atu oʻu mata iā te outou, ina ia malaia ai ma faaumatia ai Iuta uma.+ 12  Ou te ave ē o loo totoe o Iuta, o ē ua maumauaʻi e ō atu i le nuu o Aikupito e nonofo ai o ni tagata ese,+ ma e faaumatia ai foʻi i latou uma i le nuu o Aikupito.+ E paʻuʻū i latou i le pelu; e faaumatia foʻi i latou i le oge,+ o tagatānuu atoa ma alii; e oti i latou i le pelu ma le oge. E avea i latou ma mala, o se mea e ofo ai, o le malaia ma o se mea e faalumaina ai.+ 13  Ou te taui atu i latou o loo nonofo i le nuu o Aikupito e pei ona ou taui atu o Ierusalema, i le pelu, o le oge, ma le faamaʻi.+ 14  E leai se isi e sola ese ai pe e faasaoina o ē o loo totoe o Iuta, o ē ua ō atu e nonofo ai i inā o ni tagata ese i le nuu o Aikupito,+ pe toe foʻi atu i le nuu o Iuta i le mea ua latou mananaʻo tele e toe foʻi e nonofo ai;+ auā e lē toe foʻi i latou, seʻi vaganā ai nisi e sosola ese.’” 15  Ona tali mai lea iā Ieremia o tane uma o ē na iloa ua faamū e a latou avā le taulaga i isi atua,+ o avā uma o ē na tutū o se faapotopotoga tele, ma tagata uma o ē sa nonofo i le nuu o Aikupito+ i Patoro,+ e faapea: 16  “O le upu ua e tautala mai ai iā i matou i le suafa o Ieova, e matou te lē faalogo atu ai iā te oe;+ 17  ae e matou te faia lava upu uma ua matou fai atu ai,+ ina ia faamū le taulaga i le ‘atua fafine o le lagi’+ ma sasaa atu iā te ia taulaga i meainu,+ e pei ona faia e i matou,+ o o matou augātamā,+ o o matou tupu,+ ma o matou perenise, i aai o Iuta ma auala o Ierusalema, sa masani ona matou maoona ai i meaʻai ma manuia ai, e matou te leʻi iloa lava foʻi se mala.+ 18  Ae talu mai le taimi na matou lē faamū ai le taulaga i le ‘atua fafine o le lagi’+ ma sasaa atu ai iā te ia taulaga i meainu, na matou matitiva i mea uma, ua faaumatia foʻi i matou i le pelu ma le oge.+ 19  “Ina ua matou faamū foʻi le taulaga i le ‘atua fafine o le lagi’+ ma sasaa atu iā te ia taulaga i meainu,+ pe na matou faia ea ni keke o taulaga mo ia e aunoa ma le fesili atu i a matou tane, ina ia faia ai sona faatusa, ma sasaa atu ai iā te ia taulaga i meainu?”+ 20  Ona fai atu lea o Ieremia i le nuu uma, i tane malolosi, o avā, ma le nuu uma, o ē na tali mai iā te ia i lea upu, ua faapea atu: 21  “O le taulaga na outou faamū i aai o Iuta ma auala o Ierusalema,+ o outou,+ o o outou augātamā,+ o o outou tupu,+ o o outou perenise,+ ma tagata o le nuu, po ua lē manatua ea e Ieova lenei mea ma ua alu aʻe i lona loto?+ 22  Mulimuli ane, ua lē mafai ona toe onosaia e Ieova ona o le leaga o a outou mea na fai, ona o mea inosia foʻi na outou faia,+ o lea ua avea ai lo outou nuu ma mea ua faatafunaina, o se mea e ofo ai, o se mala ma ua lē toe iai se isi e nofo ai, e pei ona iai i le aso nei.+ 23  Ona ua outou faamū le taulaga+ ma ua outou agasala ai iā Ieova,+ tou te leʻi faalogo foʻi i le siʻufofoga o Ieova,+ ma tou te leʻi savavali i lana tulafono,+ o ana faatonuga, ma ana faamanatuga, o le mea lea ua oo ai lenei mala iā te outou, e pei ona iai i le aso nei.”+ 24  Ua fai atu foʻi Ieremia i le nuu uma ma fafine uma: “Inā faalogo mai ia i le afioga a Ieova, o Iuta uma o ē o loo i le nuu o Aikupito.+ 25  O le mea lenei ua fetalai mai ai Ieova o ʻau, o le Atua o Isaraelu, ‘O outou tane ma a outou avā,+ o outou fafine foʻi ua tautatala mai i o outou gutu (ua outou faataunuuina foʻi i o outou lima,) e faapea: “E matou te faia lava a matou tautoga ua matou tautō ai,+ e faamū le taulaga i le ‘atua fafine o le lagi’+ ma sasaa atu iā te ia taulaga i meainu.”+ O outou fafine, e faia lava e outou a outou tautoga, ma e tou te faataunuuina lava a outou tautoga.’ 26  “O le mea lea, inā faalogo mai ia i le afioga a Ieova, o Iuta uma o ē o loo nonofo i le nuu o Aikupito,+ ʻ“O aʻu lava ua ou tautō i loʻu igoa sili,”+ ua fetalai mai ai Ieova, “e lē toe taʻua lava loʻu igoa i le gutu o so o se tagata o Iuta+ o loo iai i le nuu o Aikupito, e faapea, ‘O loo soifua Ieova le Alii Pule Silisili Ese!’+ 27  O aʻu lava, ua ou mataala ina ia malaia i latou ae lē manuia;+ e faaumatia foʻi tagata uma o Iuta o loo i le nuu o Aikupito, i le pelu ma le oge seʻia lē toe iai lava i latou.+ 28  A o ē ua sosola ese mai i le pelu, e toe foʻi i latou mai i le nuu o Aikupito i le nuu o Iuta, ua toʻaitiiti lo latou aofaʻi;+ ma o i latou uma foʻi o ē ua totoe o Iuta, o ē ua ō mai i le nuu o Aikupito e nonofo ai o ni tagata ese, e latou te iloa lava po o le upu a ai e moni, po o le upu mai iā te aʻu po o i latou.”’”+ 29  “‘O le faailoga lenei iā te outou,’+ ua fetalai mai ai Ieova, ‘ou te liliu atu iā te outou i lenei mea, ina ia outou iloa ai e taunuu lava aʻu upu iā te outou ina ia malaia outou:+ 30  O le mea lenei ua fetalai mai ai Ieova: “Ou te tuuina atu Farao Hofero le tupu o Aikupito,+ i lima o ona fili ma lima o i latou o loo saʻili e fasiotia o ia,+ e pei lava ona ou tuuina atu Setekaia le tupu o Iuta i le lima o Nepukanesa le tupu o Papelonia, o lona fili, ma o lē na saʻili e fasiotia o ia.”’”+

Faamatalaga Pito i Lalo