Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Ieremia 37:1-21

37  Ua pule le tupu o Setekaia+ le atalii o Iosia+ e sui iā Konia+ le atalii o Ioakima,+ o lē na tofia e Nepukanesa le tupu o Papelonia e fai ma tupu i le nuu o Iuta.+  Ae e leʻi faalogo o ia, o ana auauna, ma tagata o le nuu i afioga a Ieova+ na fetalai mai ai e ala i le perofeta o Ieremia.+  Ona aauina mai lea e le tupu o Setekaia o Iukali+ le atalii o Selemia, ma Sefanaia+ le atalii o Maaseia+ le faitaulaga i le perofeta o Ieremia, ua faapea mai: “Ia e tatalo faamolemole iā Ieova lo tatou Atua mo i matou.”+  A ua fealuaʻi saʻoloto Ieremia i totonu o le nuu,+ auā latou te leʻi tuuina o ia i le falepuipui.  Ua ō mai le ʻautau a Farao mai i Aikupito;+ ma ua faalogo i ai le ʻau Kaletaia o ē na siʻomia Ierusalema i le tala e uiga iā i latou. Ona latou tuumuli ai lea mai i Ierusalema.+  Ua oo mai foʻi le afioga a Ieova i le perofeta o Ieremia, ua faapea mai:  “O le mea lenei ua fetalai mai ai Ieova le Atua o Isaraelu, ‘O le mea lenei ia outou fai atu ai i le tupu o Iuta, o lē na aauina mai outou iā te aʻu e fesili mai iā te aʻu:+ “Faauta! O le ʻautau a Farao o loo ō mai e fesoasoani iā te outou, e toe foʻi atu lava i latou i lo latou nuu o Aikupito.+  E toe foʻi mai lava le ʻau Kaletaia ma tau faasaga i lenei aai, e faatoʻilaloina ma susunuina i le afi.”+  O le mea lenei ua fetalai mai ai Ieova: “Aua neʻi faasesēina outou i le faapea ane,+ ‘E ō ese lava le ʻau Kaletaia mai iā i tatou,’ auā e lē ō ese i latou. 10  Auā pe ana fai tou te fasiotia ʻautau uma a le ʻau Kaletaia o ē na tau ma outou,+ ma ua totoe iā i latou o ē na matuā manunuʻa,+ e taʻitasi i latou ma tulaʻi i lona faleʻie ma susunu i le afi lenei aai.”’” 11  Ina ua ō ese le ʻautau a Kaletaia mai i Ierusalema+ ona o le ʻautau a Farao,+ 12  ona alu atu ai lea o Ieremia mai i Ierusalema i le nuu o Peniamina,+ ina ia maua e ia lona fanua i inā i totonu o le nuu. 13  A o iai o ia i le Faitotoʻa o Peniamina,+ o le taimi foʻi lea sa iai i inā le alii pule, o lona igoa o Iria le atalii o Selemia, o le atalii o Hanania. Ona ia puʻe lea o le perofeta o Ieremia ma faapea atu: “O lenā o le a e sola atu i le ʻau Kaletaia!” 14  A ua faapea atu Ieremia: “E sesē!+ Ou te lē o sola atu i le ʻau Kaletaia.” A ua lē faalogo o ia iā Ieremia. Ua taofia pea e Iria o Ieremia ma avatu o ia i perenise. 15  Ona feita lea o perenise+ iā Ieremia,+ ua latou fasia o ia+ ma tuuina atu i le falepuipui,+ i le fale o Ionatana+ le failautusi, auā o i inā na latou faia ma falepuipui.+ 16  Ina ua ulu atu Ieremia i le fale ua iai le vaieli+ ma sela o loo iai, ona nofo ai pea lea o Ieremia i inā mo le tele o aso. 17  Ua feʻau mai o ia e le Tupu o Setekaia ma aumaia o ia, ona tuufesili lea o le tupu iā te ia i se mea lilo i lona fale.+ Ua ia faapea mai: “Pe e iai ea se afioga mai iā Ieova?” Ona fai atu lea o Ieremia: “E iai!” Ua ia toe faapea mai foʻi: “E tuuina atu lava oe i le lima o le tupu o Papelonia!”+ 18  Ona fai atu lea o Ieremia i le Tupu o Setekaia: “O le ā laʻu agasala ua ou agasala ai iā te oe, o au auauna, ma lenei nuu,+ ua outou tuuina ai aʻu i le falepuipui? 19  O fea nei o iai a outou perofeta o ē na vavalo iā te outou e faapea, ‘E lē sau le tupu o Papelonia e siitaua mai iā te outou ma lenei nuu’?+ 20  O lenei, loʻu alii e le tupu, inā faafofoga+ mai ia faamolemole. Tau ina ia oo atu i ou luma laʻu talosaga mo lou finagalo malie, ma ia aua neʻi toe auina atu aʻu i le fale o Ionatana+ le failautusi, ina ia ou lē oti ai i inā.”+ 21  Ona poloaʻi atu lea o le Tupu o Setekaia, ma ua latou taofia ai Ieremia i le Lotoā o le Leoleo;+ ua avatu foʻi iā te ia se falaoa lapotopoto i aso taʻitasi mai i le auala o le ʻaufaifalaoa,+ seʻia oo ina lē toe iai se falaoa mai i le aai.+ Ua nofo ai pea Ieremia i le Lotoā o le Leoleo.+

Faamatalaga Pito i Lalo