Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Ieremia 32:1-44

32  Ua oo mai le afioga a Ieova iā Ieremia i le tausaga lona sefulu o le nofoaiga a Setekaia le tupu o Iuta,+ o le tausaga lona sefulu valu lea o le nofoaiga a Nepukanesa.+  O le taimi lenā na osofaʻia ai Ierusalema e ʻautau a le tupu o Papelonia;+ a o taofia le perofeta o Ieremia i le Lotoā o le Leoleo,+ i le maota o le tupu o Iuta;  auā na taofia ai o ia e Setekaia le tupu o Iuta,+ ua faapea mai: “Aiseā ua e vavalo ai e faapea,+ ‘O le mea lenei ua fetalai mai ai Ieova: “Ou te tuuina atu lenei aai i le lima o le tupu o Papelonia, ma e na te faatoʻilaloina lava;+  e lē sao foʻi Setekaia le tupu o Iuta mai i lima o le ʻau Kaletaia, ae e tuuina atu lava o ia i le lima o le tupu o Papelonia, e la te tautatala faafesagaʻi ma ia, ma fevaaiaʻi foʻi o laʻua mata”’;+  ‘e ave e ia o Setekaia i Papelonia, ma e iai pea o ia i inā seʻia ou liliu atu iā te ia,’+ ua fetalai mai ai Ieova; ‘e ui lava ina outou faasagatau pea i le ʻau Kaletaia, ae e tou te lē manumalo ai’?”+  Ua faapea atu Ieremia: “Ua oo mai le afioga a Ieova iā te aʻu, e faapea,  ‘O lea e sau iā te oe Hanameali le atalii o Saluma le uso o lou tamā, e faapea: “Ia e faatau mo oe loʻu fanua o loo i Anatota,+ auā ua iā te oe le aiā e toe faatau mai ai.”’”+  Ona sau lea iā te aʻu o Hanameali le atalii o le uso o loʻu tamā, i le Lotoā o le Leoleo,+ ma faapea mai iā te aʻu e tusa ma le afioga a Ieova: “Inā e faatau ia loʻu fanua faamolemole o loo i Anatota,+ o loo i le nuu o Peniamina,+ auā o loo iā te oe le aiā e faatau ai, ma o loo iā te oe foʻi le pule e toe faatau mai ai. Ia e faatau mo oe.” Ona ou iloa ai lea, o le afioga lea mai iā Ieova.+  Ona ou faatau ai lea mai iā Hanameali+ le atalii o le uso o loʻu tamā o le fanua o loo i Anatota.+ Na ou fuaina atu iā te ia o tupe,+ e fitu sekeli ma sekeli siliva e sefulu. 10  Ona ou tusia lea i se tusi+ ma faamaufaailogaina,+ na ou aumaia foʻi ni molimau+ a o oʻu fuaina tupe i le fua.+ 11  Mulimuli ane ona ou ave lea o le tusi o le faatau, o le tusi ua faamauina e tusa ma le poloaʻiga ma tulafono,+ ma le tusi e leʻi faamauina; 12  ona ou avatu lea o le tusi o le faatau iā Paruka+ le atalii o Neria+ o le atalii o Maseia, i luma o Hanameali le atalii o le uso o loʻu tamā, ma luma o molimau, o ē na saini i le tusi o le faatau,+ ma luma foʻi o Iutaia uma o ē o loo nonofo i le Lotoā o le Leoleo.+ 13  Ona ou poloaʻiina lea o Paruka i o latou luma, e faapea: 14  “O le mea lenei ua fetalai mai ai Ieova o ʻau, o le Atua o Isaraelu, ‘Ia e ave nei tusi, o le tusi o le faatau, lea ua faamauina, ma le isi tusi e leʻi faamauina,+ ia e tuu i totonu o se fagu omea, ina ia tumau ai mo aso e tele.’ 15  Auā o le mea lenei ua fetalai mai ai Ieova o ʻau, o le Atua o Isaraelu, ‘E toe faatauina mai fale, o fanua, ma togāvine i lenei nuu.’”+ 16  Ina ua uma ona ou avatu le tusi o le faatau iā Paruka+ le atalii o Neria,+ ona ou tatalo+ lea iā Ieova e faapea: 17  “Auē, Ieova e, le Alii Pule Silisili Ese!+ O oe lava na e faia le lagi ma le lalolagi i lou mana tele+ ma lou aao faaloaloa.+ E lē faigatā iā te oe lenei mea,+ 18  o Lē e faaalia le alofa faamaoni i afe o tupulaga,+ ma taui atu i mea sesē a o latou tamā i fatafata o a latou fanau pe a mavae atu i latou,+ o le Atua moni, o Lē e sili,+ o Lē e malosi,+ o Ieova o ʻau,+ o lona suafa lea,+ 19  e sili i fautuaga,+ e silisili foʻi i mea na faia,+ o loo silasila ou fofoga i ala uma o le fanau a tagata,+ ina ia avatu iā i latou taʻitoʻatasi e tusa ma ona ala, e tusa foʻi ma le fua o ana amioga;+ 20  o oe na e faatutūina faailoga ma faia vavega i le nuu o Aikupito ua oo mai i aso nei, o le nuu foʻi o Isaraelu ma tagata,+ ina ia e faia se suafa mo oe lava e pei ona iai i le aso nei.+ 21  Ona e aumaia lea o lou nuu o Isaraelu mai i le nuu o Aikupito,+ faatasi ma faailoga ma vavega,+ i le aao malosi ma le aao faaloaloa ma le mataʻutia tele.+ 22  “Mulimuli ane, na e foaʻiina atu iā i latou o lenei laueleele na e tautō ai i o latou augātamā e avatu iā i latou,+ o se laueleele e tafe ai le suāsusu ma le meli.+ 23  Ona latou ō mai lea ma fai mo i latou,+ ae e latou te leʻi faalogo i lou siʻufofoga, latou te leʻi savavali foʻi i lau tulafono.+ E latou te leʻi faia mea uma na e poloaʻi ai iā i latou e fai,+ o le mea lea ua e faaoo ai lenei malaia iā i latou.+ 24  Faauta! Ua ō mai tagata e osofaʻi le aai+ e ala i mea mautiʻetiʻe+ na tanu e siʻomia ai, ma e tuuina atu lava le aai i lima o le ʻau Kaletaia o ē o loo tau faasaga i ai,+ ona o le pelu,+ o le oge,+ ma le faamaʻi;+ ma ua tutupu foʻi mea na e fetalai i ai, ua e silasila lava i ai.+ 25  A o oe lava Ieova e, le Alii Pule Silisili Ese, na e fetalai mai iā te aʻu, ‘Ia e faatau mo oe le fanua i tupe+ ma ave ni molimau,’+ e ui lava e tuuina atu le aai i lima o le ʻau Kaletaia.”+ 26  Ona oo mai lea o le afioga a Ieova iā Ieremia, ua faapea mai: 27  “O aʻu o Ieova, o le Atua o tagata uma.+ Pe e iai ea se mea e faigatā tele iā te aʻu?+ 28  O le mea lea ua fetalai mai ai Ieova, ‘Ou te tuuina atu lenei aai i lima o le ʻau Kaletaia ma le lima o Nepukanesa le tupu o Papelonia, ma e faatoʻilaloina lava e ia.+ 29  E ō mai foʻi le ʻau Kaletaia o ē o loo tau faasaga i lenei aai ma faamū lenei aai i le afi, ma susunu ai lava,+ atoa foʻi ma fale na faamū ai taulaga iā Paala i o latou luga, ma liligi atu ai taulaga i meainu i isi atua ina ia faatigā mai ai iā te aʻu.’+ 30  “‘Auā e na o mea leaga lava ua faia e le fanauga a Isaraelu ma le fanauga a Iuta i oʻu luma, e mai lava i lo latou talavou;+ auā ua faatigā mai foʻi le fanauga a Isaraelu iā te aʻu i galuega a o latou lima,’+ ua fetalai mai ai Ieova. 31  ‘Auā talu mai lava le aso na fausia ai lenei aai e oo mai i le aso nei, e na o le faatupu ai o loʻu ita+ ma loʻu ita tele, ina ia ou aveesea ai lenei aai mai i oʻu luma,+ 32  ona o mea leaga uma na faia e le fanauga a Isaraelu+ ma le fanauga a Iuta+ e faatigā mai ai iā te aʻu,+ o i latou, o o latou tupu,+ o o latou perenise,+ o o latou ositaulaga,+ o o latou perofeta,+ o tagata o Iuta, ma ē o loo nonofo i Ierusalema. 33  Ua ū mai pea o latou tua iā te aʻu ae e lē o o latou mata;+ e ui lava ina ou aʻoaʻoina i latou, ou te alapō ma aʻoaʻo atu, ae e leai se tasi o i latou na faalogo ina ia talia le aʻoaʻiga.+ 34  Ua latou tuu a latou mea inosia i le fale ua taʻua ai loʻu igoa, ina ia faaleagaina ai.+ 35  Ua latou fausia foʻi mea maualuluga iā Paala+ i le vanu o le atalii o Hinoma,+ ina ia latou faaui ane ai o latou atalii ma o latou afafine i le afi+ iā Moloka,+ o se mea ou te leʻi poloaʻi atu ai iā i latou,+ ou te leʻi manatu foʻi i loʻu loto e faia lea mea inosia,+ ina ia faatupu ai le agasala iā Iuta.’+ 36  “O lea, o le mea lenei ua fetalai mai ai Ieova le Atua o Isaraelu e faatatau i lenei aai, na outou fai mai ai e tuuina atu lava i le lima o le tupu o Papelonia e ala i le pelu, o le oge, ma le faamaʻi,+ 37  ‘Ou te faapotopoto faatasi i latou mai i nuu uma na ou faataapeape i ai i latou i loʻu ita, o loʻu ita tele, ma loʻu tigā tele;+ ou te toe aumaia foʻi i latou i lenei mea ma faanonofo ai ma le saogalemu.+ 38  E avea lava i latou ma oʻu nuu,+ e avea foʻi aʻu ma o latou Atua.+ 39  Ou te foaʻiina atu iā i latou le loto e tasi+ ma le ala e tasi ina ia latou matataʻu ai pea iā te aʻu, ina ia lelei ai i latou ma a latou fanau, pe a mavae atu i latou.+ 40  Ou te osia foʻi se feagaiga+ ma i latou e faavavau lava, ou te lē toe liliuese mai iā i latou, ou te faia foʻi mea lelei mo i latou;+ ma ou te tuu i o latou loto le mataʻu iā te aʻu ina ia latou lē liliuese ai mai iā te aʻu.+ 41  O le a ou olioli lava iā i latou+ ma o le a ou faia mea lelei mo i latou, ou te totōina foʻi i latou i lenei laueleele+ i le faamaoni ma loʻu lotoatoa ma loʻu malosi atoa.’” 42  “Auā o le mea lenei ua fetalai mai ai Ieova, ‘E pei lava ona ou faaoo i lenei nuu o lenei mala tele, e faapea foʻi ona ou faaoo iā i latou o mea lelei uma ua ou fai atu ai e faatatau iā i latou.+ 43  E faatauina mai lava fanua i lenei nuu,+ ua outou faapea ane ai: “Ua faatafunaina+ e lē o iai se tagata po o ni manu lalata. Ua tuuina atu i lima o le ʻau Kaletaia.”’+ 44  “‘E faatau mai lava e le nuu fanua i tupe, e tusia foʻi i le tusi+ ma faamaufaailogaina, e aumai foʻi molimau+ i le nuu o Peniamina,+ o nuu o loo siʻomia ai Ierusalema,+ o aai o Iuta,+ o aai i vaega maugā, o aai o le fanua maulalo,+ ma aai i le itu i saute,+ auā ou te toe aumaia i latou na ave faapagota,’+ ua fetalai mai ai Ieova.”

Faamatalaga Pito i Lalo