Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Ieremia 29:1-32

29  O upu nei o le tusi na auina atu e le perofeta o Ieremia mai i Ierusalema, i ē na totoe o toeaina o le nuu na aveina faapagota, ma i ositaulaga, i perofeta, ma le nuu uma o ē na ave faapagota e Nepukanesa mai i Ierusalema i Papelonia,+  ina ua mavae ona ō atu mai i Ierusalema o Iekonia+ le tupu, o le saʻo tamaʻitaʻi,+ o tagata aloaʻia, o perenise o Iuta ma Ierusalema,+ o tufuga, ma ē e fauina pā.+  O le lima o Eliasa le atalii o Safana+ ma Kimaria le atalii o Hilikia, o ē na aauina atu e Setekaia+ le tupu o Iuta i Papelonia, na tuuina atu ai lenei tusi iā Nepukanesa le tupu o Papelonia, e faapea:  “O le mea lenei ua fetalai mai ai Ieova o ʻau, o le Atua o Isaraelu i le nuu uma na ave faapagota, o ē na ou ave faapagota+ mai i Ierusalema i Papelonia,  ‘Ia outou fau fale ma nonofo ai, ma ia totō togālaau ma aai i o latou fua.+  Inā fai avā ia ma fananau mai ai atalii ma afafine;+ ia aumaia foʻi ni avā mo o outou atalii ma avatu o outou afafine i tane, ina ia latou fananau mai ai ni tama ma ni teine; ia faatoʻateleina ai i inā, ae aua le faatoʻaitiitia.  Ia outou saʻili foʻi i le filemu o le aai na ou ave faapagota i ai outou, ma ia tatalo iā Ieova mo le aai, auā o lona filemu e tou te filemu ai foʻi.+  Auā o le mea lenei ua fetalai mai ai Ieova o ʻau, o le Atua o Isaraelu: “Aua neʻi faasesēina outou e o outou perofeta o ē ua iā te outou, ma ē e faia valovaloga faataulāitu ua iā te outou,+ aua foʻi neʻi outou faalogo atu i a latou miti ua latou miti ai.+  Auā ‘ua latou vavalo mai i mea pepelo iā te outou i loʻu igoa. Ou te leʻi aauina atu i latou,’+ ua fetalai mai ai Ieova.” ’ ” 10  “Auā o le mea lenei ua fetalai mai ai Ieova, ‘Pe a atoa tausaga e fitu sefulu i Papelonia, ona ou liliu atu lea iā te outou,+ ma ou faataunuuina iā te outou laʻu upu lelei i le toe faafoʻisia mai o outou i lenei mea.’+ 11  “ ‘Auā ua ou iloa lelei manatu ua ou manatu ai iā te outou,’+ ua fetalai mai ai Ieova, ‘o manatu o le filemu ae e lē o le malaia,+ ma ia avatu iā te outou se lumanaʻi ma se faamoemoe.+ 12  E tou te valaau mai lava iā te aʻu, ma ō mai ma tatalo mai iā te aʻu, ona ou faalogo atu ai lea iā te outou.’+ 13  “ ‘E tou te saʻili mai iā te aʻu ma outou maua aʻu,+ auā e tou te saʻili mai iā te aʻu ma o outou lotoatoa.+ 14  E tou te maua lava aʻu,’+ ua fetalai mai ai Ieova. ‘Ou te faapotopoto foʻi outou o ē na ave faapagota, ma aoaoina faatasi outou mai i atunuu uma ma mea uma na ou faataapeape i ai outou,’+ ua fetalai mai ai Ieova. ‘Ou te toe aumaia outou i le mea na ou ave faapagota i ai outou.’+ 15  “A ua outou fai mai, ‘ua faatūina e Ieova mo i tatou ni perofeta i Papelonia.’ 16  “Auā o le mea lenei ua fetalai mai ai Ieova i le tupu o loo tiʻetiʻe i le nofoālii o Tavita,+ ma le nuu uma o loo nonofo i lenei aai, o o outou uso e leʻi ō atu faatasi ma outou ina ua ave faapagota outou,+ 17  ‘O le mea lenei ua fetalai mai ai Ieova o ʻau: “O aʻu lava, ou te auina atu iā i latou le pelu,+ o le oge,+ ma le faamaʻi,+ ou te faia foʻi i latou e pei o mati ua pala, ua lē mafai ona ʻaina ona ua leaga.” ’+ 18  “ ‘Ou te tuliloa i latou i le pelu, o le oge, ma le faamaʻi, ou te tuuina atu foʻi i latou ia gatete ai malo uma o le lalolagi,+ e avea i latou ma mala, o se mea e ofo ai, o se mea e tuufaaili ai, ma tauemuga i atunuu uma ou te faataapeape i ai i latou,+ 19  auā latou te leʻi faalogo i aʻu upu,’ ua fetalai mai ai Ieova, ‘na ou auina atu iā i latou e ala i aʻu auauna le ʻauperofeta, ua alapō ma aauina atu i latou.’+ “ ‘Ae e tou te leʻi faalogo+ lava,’ ua fetalai mai ai Ieova. 20  “A o outou, ia faalogo mai i le afioga a Ieova, o outou uma ua ave faapagota,+ o ē na ou aauina atu mai i Ierusalema i Papelonia.+ 21  O le mea lenei ua fetalai mai ai Ieova o ʻau, o le Atua o Isaraelu, e faatatau iā Aapo le atalii o Kulaia, ma Setekaia le atalii o Maaseia, o ē na vavalo atu mea pepelo iā te outou i loʻu igoa,+ ‘Ou te tuuina atu i laʻua i le lima o Nepukanesa le tupu o Papelonia, ma e na te fasiotia lava i laʻua i o outou luma.+ 22  E avea foʻi i laʻua ma faaaʻoaʻoga pe a faamalaia se tasi e ē uma na ave faapagota o Iuta o loo i Papelonia, e faapea: “Tau ina ia faia oe e Ieova ia pei o Setekaia ma ia pei foʻi o Aapo,+ o ē na tunupaʻu e le tupu o Papelonia i le afi!”+ 23  auā na la faia mea valea i Isaraelu,+ ma mulilulua pea ma avā a a laʻua aumea,+ ma tautatala pea i mea pepelo i loʻu igoa, o le upu ou te leʻi poloaʻi atu ai iā i laʻua.+ “ ʻ “O aʻu lava, o Lē ua iloa ma molimau i ai,”+ ua fetalai mai ai Ieova.’ ” 24  “E te fai atu foʻi iā Semaia+ le Neelami, 25  ‘O le mea lenei ua fetalai mai ai Ieova o ʻau, o le Atua o Isaraelu: “Ona ua e aauina atu i lou igoa o tusi+ i le nuu uma o loo i Ierusalema, o Sefanaia+ le atalii o Maaseia le faitaulaga, ma ositaulaga uma, e faapea, 26  ‘Ua faia e Ieova oe ma ositaulaga nai lo o Ioiata le ositaulaga, ina ia faia o ia ma ovasia sili i le fale o Ieova+ i so o se tagata ua valea ma amio+ e pei o se perofeta, ia e tuu foʻi o ia i laau faamau;*+ 27  o lenei, aiseā ua e lē aʻoaʻia ai Ieremia le Anatota,+ o lē o loo amio e pei o se perofeta iā te outou?+ 28  O le mea lea ua auina mai ai lana feʻau iā i matou i Papelonia, e faapea: “Ua leva tele ona ave faapagota outou! Ia outou fai fale ma nonofo ai, ma totō togālaau ma aai i o latou fua,+—” ’ ” ’ ” 29  Ona faitau lea e Sefanaia+ le ositaulaga o lenei tusi, a o faalogo le perofeta o Ieremia. 30  Ona oo mai lea o le afioga a Ieova iā Ieremia, e faapea: 31  “Ia e auina atu se feʻau i le nuu uma na ave faapagota,+ e faapea, ‘O le mea lenei ua fetalai mai ai Ieova e faatatau iā Semaia le Neelami: “Ona ua vavalo atu Semaia iā te outou, ae ou te leʻi auina atu o ia, ma ua ia taumafai foʻi e faatupu lo outou faatuatua i mea pepelo,+ 32  o le mea lea ua fetalai mai ai Ieova, ‘Ou te taui atu iā Semaia+ le Neelami ma lana fanau.’+ “ ʻ “ ‘E lē iai iā te ia se tagata e nofo i totonu o lenei nuu;+ e lē vaai foʻi o ia i mea lelei ou te faia mo loʻu nuu,’+ ua fetalai mai ai Ieova, ‘auā ua ia tautala ma le matuā fouvale iā Ieova.’ ” ’ ”+

Faamatalaga Pito i Lalo

I le uluaʻi gagana, e lua upu o loo faaaogā, o le tasi e faasino atu i “faamau mo vae” a o le isi o “faamau mo lima ma le ulu.”