Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Ieremia 27:1-22

27  I le amataga o le pulega a le malo o Ioakima le atalii o Iosia,+ o le tupu o Iuta, na oo mai ai le afioga lenei a Ieova iā Ieremia, ua faapea mai:  “O le mea lenei ua fetalai mai ai Ieova iā te aʻu, ‘Ia e faia mo oe ni noanoaga ma ni amo,+ ma ia e tuu i lou ua.+  Ia e avatu na mea i le tupu o Etoma,+ o le tupu o Moapi,+ o le tupu o le fanauga a Amoni,+ o le tupu o Turo,+ ma le tupu o Saitonu,+ e ala i lima o avefeʻau o ē e ō mai i Ierusalema iā Setekaia le tupu o Iuta.  Ia e avatu se poloaʻiga iā i latou mo o latou matai, e faapea: “ ʻ “O le mea lenei ua fetalai mai ai Ieova o ʻau, o le Atua o Isaraelu;+ o le mea lenei tou te fai atu ai i o outou matai,  ‘O aʻu lava, na ou faia le lalolagi,+ o tagata,+ ma manu+ o loo i luga o le fogāeleele, i loʻu mana tele+ ma loʻu lima faaloaloa;+ ma ua ou tuuina atu ai i lē ua ou iloa e tatau i ai.+  A o lenei, o aʻu lava, ua ou tuuina atu nei nuu uma i le lima o Nepukanesa le tupu o Papelonia,+ o laʻu auauna;+ ua ou tuuina atu foʻi ma manufeʻai o le fanua e auauna iā te ia.+  E auauna foʻi atunuu uma iā te ia,+ o lona atalii, ma le atalii o lona atalii, seʻia oo mai le taimi o lona lava nuu,+ e faaaogā foʻi o ia e fai ma auauna a atunuu e tele ma tupu sili.’+  “ ʻ “ ‘A o le atunuu ma le malo e lē auauna atu iā te ia, o Nepukanesa lea le tupu o Papelonia; ma lē e na te lē tuu atu lona ua i le amo a le tupu o Papelonia, ou te faasalaina lenā atunuu i le pelu,+ o le oge,+ ma le faamaʻi,’+ ua fetalai mai ai Ieova, ‘seʻia ou faaumatia i latou i lona lima.’+  “ ʻ “ ‘A o outou, aua tou te faalogo i o outou perofeta,+ o o outou tagata e faia valovaloga faataulāitu, o o outou faimiti,+ o o outou tagata o ē e faia faiga faaagaga, ma o outou taulāitu,+ o ē e fai atu iā te outou: “E tou te lē auauna i le tupu o Papelonia.”+ 10  Auā ua latou vavalo atu iā te outou mea pepelo, ina ia ave mamao ese ai outou mai i lo outou laueleele; ma ou faataapeape ai loa outou ma faaumatia ai outou.+ 11  “ ʻ “ ‘A o le atunuu e tuu atu lona ua i le amo a le tupu o Papelonia ma auauna lava iā te ia, ou te faia o ia ina ia nofo ai pea i lona laueleele,’ ua fetalai mai ai Ieova, ‘e galulue ai foʻi i latou ma nonofo ai.’ ” ’ ”+ 12  Na ou tautala atu foʻi iā Setekaia+ le tupu o Iuta e tusa ma nei upu uma,+ e faapea: “Ia tuu atu o outou ua i le amo a le tupu o Papelonia, ia auauna iā te ia ma lona nuu ma ola ai pea.+ 13  Aiseā e te fia oti ai ma lou nuu i le pelu,+ o le oge,+ ma le faamaʻi,+ e tusa ma le mea na fetalai mai ai Ieova i le atunuu e lē auauna i le tupu o Papelonia? 14  Aua neʻi faalogo atu i upu a perofeta ua faapea mai iā te outou, ‘E tou te lē auauna i le tupu o Papelonia,’+ auā ua latou vavalo atu mea pepelo iā te outou.+ 15  “ ‘Auā ou te leʻi aauina atu i latou,’ ua fetalai mai ai Ieova, ‘a ua faia e i latou valoaga pepelo i loʻu igoa, o le mea lea ou te faataapeapeina ai outou,+ ma fano foʻi outou,+ o outou ma le ʻauperofeta o loo vavalo atu iā te outou.’ ”+ 16  Na ou fai atu foʻi i ositaulaga ma lenei nuu uma, e faapea: “O le mea lenei ua fetalai mai ai Ieova, ‘Aua neʻi outou faalogo atu i upu a o outou perofeta ua vavalo atu iā te outou, e faapea: “Faauta! Ua toeitiiti nei ona toe aumaia lea o ipu o le fale o Ieova mai i Papelonia!”+ Auā ua latou vavalo atu mea pepelo iā te outou.+ 17  Aua neʻi faalogo atu iā i latou. Ia auauna i le tupu o Papelonia ma ola ai pea.+ Aiseā o le a fai ai lenei aai ma mea e faatafunaina?+ 18  Ae afai o ni perofeta i latou ma afai foʻi ua iā i latou le afioga a Ieova, seʻi o latou ʻaiʻoi atu iā Ieova o ʻau,+ ina ia lē avatua i Papelonia ipu o loo totoe i le fale o Ieova, ma le fale o le tupu o Iuta, ma Ierusalema.’ 19  “Auā o le mea lenei ua fetalai mai ai Ieova o ʻau e faatatau i poutū,+ o le vai,+ o taavale toso,+ ma e faatatau foʻi i ipu o loo totoe o loo iai pea i lenei aai,+ 20  o mea e leʻi avea e Nepukanesa le tupu o Papelonia, ina ua ia ave faapagota Iekonia+ le atalii o Ioakima, o le tupu o Iuta, mai i Ierusalema i Papelonia, faatasi ai ma tamālii uma o Iuta ma Ierusalema;+ 21  auā o le mea lenei ua fetalai mai ai Ieova o ʻau, o le Atua o Isaraelu e faatatau i ipu o loo totoe pea i le fale o Ieova, ma le fale o le tupu o Iuta, ma Ierusalema,+ 22  ʻ “E aveina atu lava na mea i Papelonia,+ ma e iai pea i inā seʻia oo i le aso ou te manatua ai i latou,”+ ua fetalai mai ai Ieova. “Ou te ave aʻe na mea ma toe faafoʻisia mai i lenei nofoaga.” ’ ”+

Faamatalaga Pito i Lalo