Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Ieremia 2:1-37

2  Ua oo mai le afioga a Ieova iā te aʻu,+ ua faapea mai:  “Inā alu ia ma valaau atu i Ierusalema, e faapea, ‘O le mea lenei ua fetalai mai ai Ieova:+ “Ou te manatua lelei oe, i lou alofa faamaoni a o e talavou,+ o lou alofa i le taimi na e faamau ai o le a e faaipoipo,+ ma lou mulimuli mai iā te aʻu i le toafa, i le nuu e leʻi lūlūina i ai ni fatu.+  O Isaraelu o se mea e paia iā Ieova,+ o uluaʻi fua iā te Ia.” ’+ ‘O i latou uma e ʻaina o ia, e taʻusalaina i latou.+ E oo mai iā i latou le mala,’ ua fetalai mai ai Ieova.”+  Le aiga e, o Iakopo,+ inā faalogologo mai ia i le afioga a Ieova, ma outou o aiga uma o le fanauga a Isaraelu.+  O le mea lenei ua fetalai mai ai Ieova: “O le ā ea se mea lē tonu na maua e o outou tamā iā te aʻu,+ ua latou taumamao ese ai mai iā te aʻu,+ ma latou mulimuli atu ai pea i atua e lē aogā,+ ma lē aogā ai i latou?+  Ua latou lē faapea ane foʻi, ‘O fea o iai Ieova, o Lē na aveina aʻe i tatou mai i le nuu o Aikupito,+ o Lē na taʻitaʻia i tatou i le toafa, o le nuu o fanua laugatasi+ ma lua, o se nuu e leai ni vai+ ma le pogisa tele,+ o le nuu e leʻi uia e se tagata, ma e leʻi nofo ai foʻi se tasi?’  “Na iʻu ina ou aumaia outou i le laufanua o togālaau ina ia aai i ona fua ma mea lelei.+ A ua outou ō mai ma faaleaga loʻu laueleele; ma ua outou faia foʻi loʻu tofi o se mea e inosia.+  E leʻi fai ane ositaulaga, ‘O fea o iai Ieova?’+ E leʻi iloa foʻi aʻu e i latou na aʻoaʻo atu le tulafono;+ na faia e leoleo mamoe solitulafono faasaga iā te aʻu,+ e oo foʻi i perofeta ua latou faia valoaga i le igoa o Paala,+ ma ua latou mulimuli atu i ē e lē maua mai ai ni mea aogā.+  “ ‘O le mea lea ou te saga finau ai ma outou,’+ ua fetalai mai ai Ieova, ‘ou te finau foʻi ma fanau a a outou fanau.’+ 10  “ ‘A ia sopoʻia atu i nuu tū matafaga o Kitimo+ ma vaavaai i ai. Ioe, ia auina atu se feʻau i Kitara,+ ma ia outou iloilo totoʻa ma iloa ai pe na tupu se mea faapenei.+ 11  Pe e iai se atunuu na suia o latou atua,+ i mea e lē o ni atua?+ A ua suia e loʻu nuu loʻu mamalu i mea e lē aogā.+ 12  Le lagi e, inā pulatoʻa ia ma le ofo i lenei mea; ia gatete lava ma ia matuā fememeaʻi,’ ua fetalai mai ai Ieova,+ 13  ‘auā e lua mea leaga ua faia e loʻu nuu: Ua latou tuua aʻu+ le puna o le vai ola,+ ina ia latou eli mo i latou o vaieli, o vaieli māvaevae e lē mafai ona tali ai ni vai.’ 14  “ ‘Po o Isaraelu ea o se auauna,+ po o se pologa na fanau mai i le aiga? Aiseā ea ua avea ai o ia o sē ua ave faapagota? 15  Ua fetagisi atu iā te ia o tamaʻi leona taanoa;+ ua leotetele atu i latou.+ Ua faia foʻi e i latou lona laueleele ma mea e ofo ai. Ua susunuina ona aai, ma ua leai se isi e nofo ai.+ 16  E oo foʻi i le fanauga a Nafi+ ma Tapenesa,+ ua latou ʻaina pea lou tumuaʻi.+ 17  Pe e lē o le mea ea lenei na e faia iā te oe lava, ina ua e tuua Ieova lou Atua+ i le taimi na ia taʻitaʻiina ai oe i le ala?+ 18  A o lenei, o le ā le mea e te manatu ai fua i le ala o Aikupito,+ ina ia e inu ai i vai o Seora?+ O le ā foʻi le mea e te manatu ai i le ala o Asuria,+ ina ia e inu ai i vai o le Vaitafe? 19  Ia faasaʻo oe e au mea leaga,+ ma ia aʻoaʻia oe e au gaoioiga lē faamaoni.+ Ia e iloa ma vaai, o lou tuua o Ieova lou Atua o se mea leaga ma tigā,+ ma ua e lē mataʻu iā te aʻu,’+ ua fetalai mai ai Ieova o ʻau, le Alii Pule Silisili Ese.+ 20  “ ‘Auā na ou gauililiia lau amo i aso anamua;+ na ou motusi ese foʻi ou noanoataga. A ua e faapea mai: “Ou te lē auauna atu iā te oe,” auā ua e taoto taliaga+ i luga o aʻega maualuluga uma ma lalo o laau lauolaola uma,+ ma e talitane ai.+ 21  A o aʻu, na ou totōina oe o se vine mūmū lelei,+ o le fatu māoʻi lava. A ua faapefea ona suia oe iā te aʻu, e avea ma tātupu leaga o le vine ese?’+ 22  “ ‘Ae peitaʻi, e tusa lava pe e te faamamā iā te oe i le neteri* ma fasimoli+ e tele, e tumau pea ona e lē mamā i oʻu luma ona o lau mea sesē,’+ ua fetalai mai ai Ieova le Alii Pule Silisili Ese. 23  E faapefea ona e fai mai, ‘Ou te leʻi leaga.+ Ou te leʻi mulimuli atu foʻi iā Paala’?+ Vaai i lou ala i le vanu.+ Ma iloa ai lau mea na fai. O le tamaʻi kamela fafine televave ua fetamoeaʻi solo i ona ala; 24  o se solofanua tusitusi+ ua masani i le toafa, o le manaʻo o lona loto ua sosogi ai i le matagi;+ i le taimi e taulalā ai, o ai ea e mafai ona toe faafoʻi maia o ia? E lē tigāina i latou uma e saʻili iā te ia. E latou te maua o ia i lona masina. 25  Inā taofi ia ou vae ina neʻi lē faaseevaeina, ma lou faaʻī neʻi fia inu.+ A ua e faapea ane, ‘E lē aogā!+ E leai, auā ua ou alofa i tagata ese,+ ma ou te mulimuli atu iā i latou.’+ 26  “E pei ona māsiasi o se gaoi pe a maua o ia, e faapea foʻi ona māsiasi+ i latou o le aiga o Isaraelu, o i latou, o o latou tupu, o o latou perenise, o o latou ositaulaga, ma o latou perofeta.+ 27  Ua latou fai atu i le laau, ‘O oe o loʻu tamā,’+ ma le maa, ‘O oe na e fanaua aʻu.’ A ua ū mai o latou tuāua iā te aʻu, ae e lē o o latou mata.+ Ma i le taimi o o latou puapuaga, e latou te faapea mai ai, ‘Inā tulaʻi ia ma faaola iā i matou!’+ 28  “A o fea ou atua na e faia mo oe lava?+ Inā tutulaʻi mai ia i latou, pe mafai ona latou faaola iā te oe i taimi o lou puapuaga.+ Iuta e, auā o le aofaʻiga o ou aai, o le aofaʻiga foʻi lea o ou atua.+ 29  “ ‘Aiseā e tou te finau mai ai pea iā te aʻu?+ Aiseā foʻi ua outou solitulafono uma mai ai iā te aʻu?’+ ua fetalai mai ai Ieova. 30  Na ou fasia a outou fanau,+ ae e leai se aogā. E latou te leʻi talia se aʻoaʻiga.+ Ua fasiotia e o outou pelu a outou perofeta, e pei o se leona e na te faaumatia.+ 31  Le tupulaga e, inā outou mafaufau ia i le afioga a Ieova.+ “Po ua avea ea aʻu e na o se toafa iā Isaraelu,+ po o se nuu e matuā pogisa? Aiseā ea ua fai mai ai loʻu nuu, ‘Ua matou feoaʻi solo. E matou te lē toe ō atu iā te oe’?+ 32  Pe e mafai ea ona galo i se taupou ana teuga, pe e galo ea foʻi i se tamaʻitaʻi faaipoipo ona fusi? A o loʻu lava nuu, ua latou faagaloina aʻu i le tele o aso.+ 33  “O oe le fafine e, aiseā ua e faaleleia ai lou ala ina ia saʻili ai se tasi e alofa iā te oe? O le mea lea ua e aʻoaʻo ai ou ala i mea leaga.+ 34  Ua iloa foʻi i ou pito ofu le toto o ola+ o tagata matitiva e lē sala.+ E lē faapea ona sa latou osofaʻi atu na ou iloa ai, ae ua iai i ia mea uma.+ 35  “A ua e fai mai, ‘Ou te mamā lava. E moni ua liliuese lona toʻasā mai iā te aʻu.’+ “A o lenei ua ou faia se finauga ma oe, ona ua e faapea mai, ‘Ou te leʻi agasala.’+ 36  Aiseā ua e manatu māmā ai i le suia o lou ala?+ E māsiasi foʻi oe ona o Aikupito, e pei lava ona e māsiasi+ ona o Asuria.+ 37  O le mea foʻi lea e te alu atu ai ma ou lima i luga o lou ulu,+ auā ua teena e Ieova mea ua e faatuatua i ai, ma e te lē manuia ai i na mea.”

Faamatalaga Pito i Lalo

O se ituaiga o pauta e faaaogā e faamamā ai mea.