Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Ieremia 14:1-22

14  O le mea lenei na tupu ina ua oo mai le afioga a Ieova iā Ieremia, e faatatau i lāmala:+  Ua faavauvau Iuta,+ ma ua solofa i lalo ona faitotoʻa.+ Ua lafoina i latou i le eleele,+ ma ua alu aʻe foʻi le alaga o Ierusalema.+  Ua aauina atu e o latou alii sili o latou tagata faatauvaa mo ni vai.+ Ua oo i latou i vaieli. Ae e latou te leʻi maua ai ni vai.+ Ua toe foʻi i latou ma a latou fagu e leai ni vai o iai. Ua faamāina+ i latou ma ua lē fiafia, ua latou ufiufi i o latou ulu.+  Ona ua māvaevae le palapala auā ua leai ni timuga i le laueleele,+ ua māsiasi ai le ʻaufaifaatoʻaga; ma ua ufiufi ai foʻi o latou ulu.+  E oo lava i le ʻaila i le fanua ua fanau, a ua tuua e ia lana tama auā ua leai se vao muʻa.  Ua tutū pea foʻi solofanua tusitusi+ i luga o aʻega taalaelae; ua latou sosogi i le matagi e pei o ni taʻifau ʻaivao; ma ua puaoa la latou vaai ona ua leai se vao e ʻaai ai.+  E ui lava ina molimau a matou mea sesē iā i matou, Ieova e, ia e gaoioi ona o lou suafa;+ auā ua tele lava a matou gaoioiga lē faamaoni;+ ua matou agasala ai iā te oe.+  O oe lenā le faamoemoega o Isaraelu,+ o le Faaola+ iā te ia i taimi o puapuaga,+ aiseā ua avea ai oe e pei o se tagata ese i le nuu, ua pei foʻi o se tagata malaga ua afe ane e mālōlō i le pō?+  Aiseā ua avea ai oe e pei o se tagata ua fememeaʻi, e pei foʻi o se tagata malosi ua lē mafaia ona faaola?+ A o oe, Ieova e, o loo e iā i matou,+ ua taʻua foʻi i matou i lou suafa.+ Aua e te tuulafoaʻiina i matou. 10  O le mea lenei ua fetalai mai ai Ieova e faatatau i lenei nuu: “Ua latou fiafia e feoaʻi solo;+ ua latou lē taofia o latou vae.+ O lea, ua lē fiafia ai Ieova iā i latou.+ Ua manatua ai nei e ia a latou mea sesē, ma e tauia e ia a latou agasala.”+ 11  Ona fetalai mai lea o Ieova iā te aʻu: “Aua e te tatalo mai mo se lelei o lenei nuu.+ 12  Pe a latou anapopogi, ou te lē faalogo atu i la latou alaga;+ ma pe a latou ofoina mai le taulaga mū ma le taulaga i meaʻai, ou te lē fiafia i ai;+ auā ou te faaumatia i latou i le pelu, o le oge, ma le faamaʻi.”+ 13  Ona ou faapea atu ai lea: “Auē, Ieova e, le Alii Pule Silisili Ese! Ua fai mai le ʻauperofeta iā i latou, ‘E tou te lē iloa atu le pelu, e leai foʻi se oge e oo iā te outou, ae ou te avatua iā te outou le filemu moni i lenei mea.’ ”+ 14  Ona fetalai mai lea o Ieova iā te aʻu: “Ua vavalo perofeta i mea pepelo i loʻu igoa.+ Ou te leʻi aauina atu i latou, ou te leʻi poloaʻi atu iā i latou pe tautala atu foʻi iā i latou.+ A ua latou tautatala faavaloaga atu iā te outou i le faaaliga pepelo, o le valovaloga, o le mea e lē aogā,+ ma le faaʻoleʻole o o latou loto.+ 15  O le mea lea, ua fetalai mai ai Ieova e faatatau i perofeta o ē o loo vavalo i loʻu igoa, o ē ou te leʻi aauina atu, ma o ē foʻi ua faapea mai e leai se pelu po o se oge e oo mai i lenei nuu, ‘E faaumatia lava na perofeta i le pelu ma le oge.+ 16  A o le nuu o ē o loo latou vavalo atu i ai, e avea ma nuu ua lafoaʻiina i auala o Ierusalema ona o le oge ma le pelu, e leai se tasi e tanuina i latou, o i latou, o a latou avā, o o latou atalii, ma o latou afafine.+ Ou te sasaa atu ai i luga iā i latou le malaia.’+ 17  “O le upu lenei e te fai atu iā i latou, ‘Ia tafe ifo loimata i oʻu mata i le pō ma le ao, ma aua lava neʻi mapu i latou,+ auā ua matuā leaga le manuʻa o le tama teine taupou o loʻu nuu,+ o se manuʻa e matuā ogaoga lava.+ 18  Afai ou te alu atu i le fanua, faauta, o i latou ua fasiotia i le pelu!+ Afai foʻi ou te sau i le aai, faauta foʻi, ua iai faamaʻi ona o le oge!+ Auā ua feoaʻi solo le perofeta ma le ositaulaga i se nuu e la te lē iloa.’ ”+ 19  Po ua e matuā teena ea Iuta,+ po ua e inosia foʻi Siona?+ Aiseā ua e taia ai i matou, ua lē faamālōlōina ai i matou?+ Na matou faamoemoe mo le filemu, ae e leai se mea lelei na maua; na faamoemoe foʻi mo le taimi e faamālōlōina ai, faauta! o le mataʻu!+ 20  Ieova e, ua matou iloa a matou amioga leaga, o le mea sesē a o matou augātamā,+ auā ua matou agasala atu iā te oe.+ 21  Aua e te tuulafoaʻiina i matou ona o lou suafa;+ aua foʻi e te ʻinoʻino i lou nofoālii mamalu.+ Ia e manatua; aua e te tatalaina lau feagaiga ma i matou.+ 22  Po o iai ea se tupua e lē aogā+ a atunuu e na te mafaia ona faatotōina ifo le timu, pe e mafai foʻi e le lagi ona tuuina mai ni timuga tetele?+ Pe e lē o Oe ea lea, Ieova e, lo matou Atua?+ E matou te faamoemoe atu iā te oe, auā o oe lava na e faia nei mea uma.+

Faamatalaga Pito i Lalo