Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Ieremia 10:1-25

10  Le aiga o Isaraelu e, inā faalogo mai ia i le afioga a Ieova ua fetalai mai ai iā te outou.  O le mea lenei ua fetalai mai ai Ieova: “Aua lava neʻi o outou aʻoaʻo i le ala o atunuu,+ aua foʻi neʻi matataʻu i faailoga o le lagi, auā ua matataʻu i ai atunuu.+  Auā o tū a nuu+ ua na o se mea e faatauvaa, auā ua na o se laau+ o le vaomatua na tātuu i lalo e se tasi, o le galuega na faia e lima o le tufuga i le mātau.+  Ua faamatagofie e se tasi i le siliva ma le auro.+ Ua latou faamauina i fao ma samala, ina ia lē toe maluelue ai.+  Ua pei i latou o se faatagata taufaafefe i le togākukama, e lē mafai ona tautala.+ E fesiitaʻi i latou auā e lē mafai ona savavali.+ Aua le fefefe ona o i latou, auā e leai se mea leaga e mafai ona latou faia, e lē mafai foʻi ona latou faia se mea lelei.”+  Ieova e, e leai lava se isi e pei o oe.+ E sili oe, ma o lou suafa foʻi e sili ona malosi ia.+  O ai ea sē e lē mataʻu iā te oe,+ le Tupu o atunuu e,+ auā ua ono iā te oe; auā e leai lava se isi e tusa ma oe i tagata atamamai uma o atunuu ma o latou malo uma.+  O i latou uma lava, e lē mafaufau lelei ma ua valelea.+ O le laau, ua na ona apoapoaʻi atu i mea faatauvaa.+  Ua aumaia mai i Tasesa+ le siliva ua tuʻi faamafolafola, o le auro foʻi mai i Upasa,+ o le galuega a le tufuga, ma galuega a lima o le tufuga fai uʻamea; o o latou ofu ua faia i le filo lanu moana ma le fulufulu mamoe ua vali i le lanu mūmū violē. O galuega uma na a tagata tomai.+ 10  A o Ieova, o le Atua moni lea.+ O ia o le Atua soifua+ ma o le Tupu e faavavau.+ O le a lūlūina le lalolagi i lona toʻatamaʻi,+ ma e leai foʻi se atunuu e mafai ona tatali lona toʻasā.+ 11  Ia faapea ona outou fai atu iā i latou: “O atua e leʻi faia+ le lagi ma le lalolagi, o atua na o le a faaumatia mai i le lalolagi+ ma lalo ifo o lenei lagi.” 12  O Ia na faia le lalolagi i lona mana,+ o Lē na matuā faatumauina le laueleele i lona atamai,+ ma o Lē foʻi na fofola le lagi i lona faautauta.+ 13  Pe a tulei mai lona siʻufofoga, ona taalili ai lea o vai i le lagi,+ ma ua ave aʻe e ia o ausa mai i le tuluʻiga o le lalolagi.+ Ua faia foʻi e ia faitotoʻa mo le timu,+ ma ua aumaia e ia le matagi mai i ona fale teuoloa.+ 14  Ua lē mafaufau lelei tagata uma, ua leai so latou poto.+ Ua māsiasi foʻi tufuga fai uʻamea uma ona o le faatusa ua tā;+ auā o le mea pepelo lana faatusa uʻamea,+ ma e leai foʻi se ola o iā i latou.+ 15  E faatauvaa i latou, o se galuega ua amusia.+ E fano i latou i le aso e asia ai.+ 16  E lē pei le Tofi o Iakopo+ o nei mea, auā o ia o le Mataisau o mea uma,+ ma o Isaraelu foʻi o le tootoo o lona tofi.+ O Ieova o ʻau o lona suafa lea.+ 17  Inā faapotopoto ia lau avega mai i le eleele,+ o oe na le fafine o loo nofo ma le mafatia.+ 18  Auā o le mea lenei ua fetalai mai ai Ieova: “Ou te fetogi i fafo tagata o loo nonofo i le eleele ona o lenei mea,+ ma ou te faapuapuagatia iā te i latou ina ia o latou iloa ai.”+ 19  Oi talofa iā te aʻu ona o loʻu manuʻa!+ Ua matuā leaga lava loʻu manuʻa. Ma ua ou faapea ane: “O loʻu maʻi lava lenei, ma ou te tauaveina lava.+ 20  Ua faatafunaina loʻu lava faleʻie, ma ua motu lua maea o loʻu faleʻie.+ Ua ō ese laʻu fanau mai iā te aʻu, ma ua leai i latou.+ Ua leai se isi e toe fofolaina atu loʻu faleʻie, pe faatūina foʻi ʻie puipui o loʻu faleʻie. 21  Auā ua lē mafaufau lelei leoleo mamoe,+ ma ua latou lē saʻili atu iā Ieova.+ O le mea lea ua latou gaoioi ai e aunoa ma le tofā mamao, ma ua taapeape ai a latou lafumanu uma.”+ 22  Faalogo! O le tala! Ua oo mai le tala, o le patapatatū leotele foʻi mai i le nuu i le itu i mātū,+ ina ia avea aai o Iuta ma mea ua faagaogaoina, o le mea e nonofo ai taʻifau ʻaivao.+ 23  Ieova e, ua ou iloa lelei, e lē o i le tagata lona ala. E lē o i le tagata foʻi e savali, ona faatonuina le mea e ui ai o ia.+ 24  Ieova e, ia e faasaʻo mai iā te aʻu i lou faamasinotonu;+ ae e lē i lou toʻasā,+ ina ia aua neʻi e faaumatiaina aʻu.+ 25  Ia e sasaa atu lou toʻasā i luga o atunuu+ o ē e lē o amanaʻiaina oe,+ ma luga o aiga o ē e lē o valaau atu i lou suafa.+ Auā ua latou ʻaina Iakopo.+ Ioe, ua latou ʻaina lava o ia, ua latou taumafai pea e faaumatia o ia;+ ua latou faatafunaina foʻi le mea e mau ai o ia.+

Faamatalaga Pito i Lalo