Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Galuega 5:1-42

5  Ae peitaʻi, o se tasi tagata e igoa iā Anania ma lana avā o Safaira, na faatau atu so la fanua,  ma na nanā se isi vaega o le tau o le fanua, a ua ia avatu na o se vaega i le ʻauaposetolo,+ ma na iloa foʻi e lana avā lenei mea.  Ona fai atu lea o Peteru: “Anania e, aiseā ua faatupu ai e Satani+ i lou loto lenei mea, ua e pepelo+ ai i le agaga paia,+ ma ua e nanā se vaega o le tau o le fanua?  A o iā te oe le fanua, pe e leʻi avea ea ma ou fanua, ma ina ua uma foʻi ona faatau atu, pe e te leʻi pule ai pea i le tau? Aiseā ua e fuafua ai i lou loto e faia lenei gaoioiga? Ua e lē pepelo+ ai i tagata, a o le Atua.”+  Ina ua faalogo i nei upu, ona paʻū ai lea o Anania i lalo ma ua oti ai.+ Ona matuā fefefe+ ai lea o i latou uma na faalogo i lenei mea.  A ua tutū i luga tauleleʻa ma taataʻai o ia i ʻie,+ ua ave iā te ia i fafo ma tanu.  Ina ua mavae sina taimi puupuu e tusa ma le tolu itula, ae sau loa lana avā, na te leʻi iloa le mea ua tupu.  Ua fai atu Peteru iā te ia: “Seʻi e taʻu mai iā te aʻu, po o le tau lea na lua faatau ai le fanua?” Ua ia fai mai: “Ioe, o le tau lenā.”  Ona fai atu lea o Peteru iā te ia: “Aiseā ua oulua loto faatasi ai e tofotofo+ i le agaga o Ieova? Faauta! O na e tutū mai i le faitotoʻa i latou na tanuina lau tane, ma e latou te ave foʻi iā te oe.” 10  Ona paʻū loa lea o ia i ona vae ma oti ai.+ Ina ua ō mai i totonu tauleleʻa, ua latou maua o ia ua oti, ona latou ave lea o ia ma tanu i tafatafa o lana tane. 11  Ona matuā fefefe ai lea o le faapotopotoga atoa ma i latou uma ua faalogo i lenei mea. 12  Ua faia foʻi e lima o aposetolo le tele o faailoga ma mea ofoofogia i tagata,+ ma ua i le faapaologa+ o Solomona i latou uma ma le lotogatasi. 13  E moni, e leai lava se tasi o i latou na lototele e aufaatasi atu iā i latou,+ ae peitaʻi ua viiviia i latou e tagata.+ 14  Ua faaopoopoina pea le toʻatele o tane ma fafine+ o ē ua talitonu i le Alii. 15  Ona latou avatu ai lea o tagata mamaʻi ma faataooto i tamaʻi moega ma fata i ala tetele, ina ia mafai ona lafoia i ai le ata o Peteru i luga o nisi o i latou+ a o savali ane. 16  Ua ō mai foʻi le toʻatele mai i aai ia e siʻomia ai Ierusalema, ua aumai tagata mamaʻi ma ē ua puapuagatia i agaga leaga, ma ua faamālōlōina ai i latou uma. 17  Ona ō mai lea o le ositaulaga sili ma i latou uma ua faatasi ma ia, o le lotu lea a le ʻau Satukaio, ua tutumu i latou i le lotoleaga,+ 18  ua latou pupuʻe i aposetolo ma tuu i latou i le falepuipui.+ 19  Peitaʻi, na tatala e le agelu+ a Ieova faitotoʻa o le falepuipui+ i le pō, ma aumai i latou i fafo ma faapea atu: 20  “Inā ō ia outou ma tutū i le malumalu, ma taʻutaʻu atu pea i tagata mea uma e uiga i lenei olaga.”+ 21  Ua faalogo atu i nei mea, ona latou ulufale atu lea i le malumalu i le tafa o ata, ma amata ona aʻoaʻo atu. Ina ua taunuu mai le ositaulaga sili ma i latou ua faatasi ma ia, ona latou faapotopoto lea o le Faamasinoga Sili ma le fono a toeaina o le fanauga a Isaraelu,+ ma aauina atu i le falepuipui e aumai i latou. 22  Ae ina ua ō atu leoleo i le falepuipui, latou te leʻi maua i latou. Ona latou toe foʻi lea ma faamatala atu 23  e faapea: “Ua matou maua atu o loo loka le falepuipui ma faamau uma faitotoʻa, o loo tutū foʻi leoleo i faitotoʻa, ae ina ua tatala ua matou iloa ai, e leai nisi o iai i totonu.” 24  Ina ua faalogo le taʻitaʻiʻau o le malumalu ma le ʻaufaitaulaga sili i nei upu, ona fememeaʻi lea o i latou po o le ā o le a iʻu i ai nei mea.+ 25  Peitaʻi ua taunuu mai se tasi tamāloa ma faamatala iā i latou, ua faapea mai: “Faauta! O tamāloloa ia na outou tuuina i le falepuipui, o loo tutū i le malumalu ma aʻoaʻo atu i tagata.”+ 26  Ona ō lea o le taʻitaʻiʻau ma ana leoleo e aumai i latou, ae e leʻi faasauā iā i latou ona o le fefefe+ neʻi fetogia i latou e tagata i maa. 27  Ona latou aumaia lea o i latou ma faatutū i le potu o le Faamasinoga Sili. Ua fesiligia i latou e le ositaulaga sili 28  ma faapea mai: “Na matou matuā fai atu+ iā te outou, e matuā sā lava ona toe aʻoaʻo atu i lenā igoa,+ ae faauta! ua outou faatumu Ierusalema i a outou aʻoaʻoga, ma ua outou maumauaʻi e tuuina mai i o matou luga le toto+ o lenā tagata.” 29  Ua tali mai Peteru ma isi aposetolo: “E tatau ona matou usiusitaʻi i le Atua o le pule, nai lo o tagata.+ 30  Ua faatūina+ e le Atua o o tatou augātamā Iesu, o lē na outou fasiotia i le faatautauina o ia i le laau.+ 31  Ua faaeaina o ia e le Atua i lona itu taumatau+ o le Sui Sili+ ma o le Faaola,+ ina ia mafai ai ona salamō+ Isaraelu, ma maua ai le faamagaloga o agasala.+ 32  O i matou o molimau i nei mea,+ faapea foʻi le agaga paia,+ lea ua tuuina mai e le Atua iā i latou e usiusitaʻi iā te ia, o le pule.” 33  Ina ua latou faalogo i lenei mea, ona matuā tigā ai lea ma mananaʻo e fasioti iā i latou.+ 34  A ua tulaʻi mai se tagata o le Faamasinoga Sili, o se Faresaio e igoa iā Kamalielu,+ o le faiaʻoga o le Tulafono e faaaloalogia e tagata uma, ma faatonu atu ina ia tuu atu i fafo nei tamāloloa mo sina taimi.+ 35  Ona ia faapea atu lea iā i latou: “Tagata o Isaraelu e,+ ia outou faaeteete i le mea ua outou mananaʻo e fai i nei tamāloloa. 36  Auā i aso ua mavae, na tulaʻi mai ai Tiuta ma faapea mai, o ia o se tagata tāua,+ ma e toʻatele tane pe e tusa ma le toʻafā selau na auai i lana vaega.+ Ae na fasiotia o ia ma faataapeapeina i latou uma na usiusitaʻi iā te ia, ma lē taulau ai na taumafaiga. 37  Ua mavae atu o ia ae tulaʻi mai Iuta le Kalilaia i aso o le tusigāigoa,+ ma na ia taaʻina atu tagata e mulimuli atu iā te ia. Ae na oti foʻi lenā tagata, ma na faataapeapeina foʻi i latou uma na usiusitaʻi iā te ia. 38  O le mea lea ou te fai atu ai iā te outou, Aua tou te aiā i nei tagata, ae tuu ai pea i latou, (auā afai e mai i tagata lenei fuafuaga ma lenei galuega, e soloia,+ 39  ae afai e mai i le Atua,+ e lē mafai ona outou soloia;+) ina neʻi mea ane ua outou fai taua i le Atua.”+ 40  Ona latou faalogo lea iā te ia, ma aumai le ʻauaposetolo, ua sasa i latou+ ma faatonu atu, e aua neʻi toe tautatala i le suafa o Iesu,+ ma tuu atu loa i latou e ō. 41  Ona ō ese ai lea o i latou mai i luma o le Faamasinoga Sili, ua olioli+ ina ua taʻuaogāina i latou ia faaleagaina ona o lona suafa.+ 42  Ua lē aunoa ona latou aʻoaʻo+ atu i aso uma lava, ma folafola atu le tala lelei e uiga iā Iesu le Keriso,+ i le malumalu ma mai i lea fale i lea fale.+

Faamatalaga Pito i Lalo