Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Galuega 27:1-44

27  Ina ua maua le tonu o le a matou folau atu i Italia,+ ona latou tuuina atu lea o Paulo, ma nisi o pagota i se taʻitaʻiʻau o le vaega a Aokuso e igoa iā Iulio.  Ua matou feosofi i se vaa mai i Atamutiu, lea o le a folau atu i nuu tū matafaga o le itumalo o Asia, ma ua matou folau atu ai faatasi ma Aritako,+ o se tagata Maketonia mai i Tesalonia.  I le isi aso, ua matou taunuu atu ai i Saitonu, ma ua agalelei+ tele Iulio iā Paulo, ua tuu atu o ia e alu i ana uō ma fiafia ai i la latou tausiga.+  Ua matou tuuvaa ese atu ma folau atu i gatai ane o Kuperu, auā ua ese le itu ua agi mai ai le matagi;  ma ua matou folau atu i le vasa e lata i Kilikia ma Pafulia, ona matou taula ai lea i le taulaga i Mura i Lukia.  O i inā ua maua ai e le taʻitaʻiʻau se vaa mai i Alesania+ e folau atu i Italia, ona ia faaee lea o i matou i lea vaa.  E tele aso ua mavae ona o le telegese o la matou folauga, na faigatā ai ona matou taunuu i Nitoi. Ae ona o le matagi, ua matou folau ai i gatai ane o Kereta i Salamone,  ma e ui ina faigatā, ae ua matou folau atu i gatai ane o le talafatai, ma matou taunuu ai i le taulaga e taʻua o le Ava Matagofie, lea e lata ane i le aai o Lasea.  Ua mavae le tele o aso, ma ua faigatā foʻi ona folau i luga o le vasa, auā ua mavae foʻi le anapogi i le aso o le togisala,+ ona fautua atu lea o Paulo, 10  ua faapea atu iā i latou: “Alii e, ua ou manatu e tele ni mea e faaleagaina ma e tele foʻi mea e maʻimau i lenei folauga, e lē gata i le uta ma le vaa, ae faapea foʻi ma o tatou ola.”+ 11  Ae ua faalogo le taʻitaʻiʻau i le kapeteni ma lē e ona le vaa, ae e leʻi faalogo i mea na fai atu ai Paulo. 12  Talu ai ua lē lelei lenei taulaga e taula ai le vaa i le tau mālūlū, ona manatu ai lea o le toʻatele e folau ese atu, ma taumafai e oo atu i Foinike ma nonofo ai i le tau mālūlū, o se taulaga i Kereta e feagai ma le itu i mātū i sasaʻe, e feagai foʻi ma le itu i saute i sasaʻe. 13  Ae ina ua agi mālie mai le matagi mai i saute, ona latou manatu lea, ua lelei la latou fuafuaga, ona sisi aʻe lea o le taula ma folau i gatai ane i le talafatai o Kereta. 14  Peitaʻi, e leʻi leva lava ae agi mai loa se matagi malosi+ e taʻua o Eurokuto.* 15  A o matuā felafoaʻiina le vaa, ua lē mafai ai ona faasaga i le matagi, ona matou tuu atu ai lea ma ua lelea. 16  Ona matou folau atu lea i gatai ane o se tasi o motu itiiti e taʻua o Kalauta, ma sa faigatā ona matou taofiofia le tulula+ i le taumuli o le vaa. 17  Ae ina ua uma ona sisi aʻe i luga le tulula, ona latou faaaogā lea o mea e saisai ifo ai le vaa; ma ona o le fefefe neʻi lafoia le vaa i oneone feaveaʻi o Siritusi, ua latou tuu ifo ai i lalo maea, ma ua lelea ai le vaa. 18  Talu ai ua matuā felafoaʻiina i matou e le matagi malosi, i le aso e sosoo ai, ua latou lafoaʻi ese ai isi mea mai i le vaa ina ia faamāmā+ ai; 19  ma i le aso lona tolu, ona lafoaʻi ai lea e o latou lava lima ia maea ma isi mea faigaluega o le vaa. 20  Ua tele aso e lē o toe vaaia le lā ma fetu, ma ua agi malosi mai foʻi le matagi,+ ma ua oo ina mou atu lo matou faamoemoe e laveaʻiina i matou. 21  Ua umi se taimi matou te leʻi aai, ona tū lea i luga o Paulo i o latou+ luma ma faapea atu: “Alii e, pe ana outou faalogo i laʻu fautuaga e aua le folau ese mai i Kereta, semanū e lē leaga le vaa ma maʻimau ai mea.+ 22  Ae ou te fautua atu iā te outou, ina ia faamalolosi, auā e lē maʻimau se ola o se tasi o outou, ae na o le vaa. 23  Auā o le pō nei na tū mai ai iā te aʻu se agelu+ a le Atua, o lē o loo oʻu tapuaʻi i ai, ma o lē ou te avatu i ai le auaunaga paia,+ 24  ma faapea mai, ‘Paulo e, aua e te fefe. E tatau ona e tulaʻi i luma o Kaisara,+ faauta, e laveaʻiina e le Atua ola o i latou uma o loo folau faatasi ma oe.’ 25  Alii e, ia outou faamalolosi, auā ou te talitonu i le Atua,+ e taunuu lava mea ua faailoa mai iā te aʻu. 26  Peitaʻi, e tatau ona lafoia i tatou i se motu.”+ 27  Ua oo i le pō lona sefulu fā, ua felafoaʻiina pea i matou i le sami Ateria. I le vaeluapō ua manatu ai le ʻauvaa ua latou latalata atu i le laueleele. 28  Ona latou fua lea o le loloto ma iloa ai e lua sefulu gafa;* ua latou toe sōsō atu teisi, ona toe fua lea ma iloa ai ua sefulu lima gafa le loloto. 29  Ona o le fefefe neʻi tuʻia le vaa i papa, ua latou lafo ai taula e fā mai i le taumuli ma talotalo seʻia ao ia. 30  Ua taumafai le ʻauvaa e sosola ese mai i le vaa, ma tuu ifo i le sami le tulula, e peiseaʻī ua latou lafo i lalo taula mai i le taumua o le vaa, 31  ona fai atu lea o Paulo i le taʻitaʻiʻau ma fitafita: “Afai e lē nonofo pea na tagata i le vaa, e lē mafai ona laveaʻiina+ outou.” 32  Ona selei ese lea e fitafita o maea o le tulula+ ma tafea ese ai. 33  Ua lata ina ao, ona fautua atu lea o Paulo i tagata uma ina ia aai, ma faapea atu: “O le aso lona sefulu fā lenei o outou mataala pea e aunoa ma se meaʻai ma tou te leʻi aai lava. 34  Ou te faalaeiau atu iā te outou, e lelei ona outou aai ina ia outou ola ai; auā e leai so outou lauulu+ e paʻū.” 35  Ina ua uma ona ia fai atu o lenei mea, ona ia tago lea i le falaoa, ua faafetai+ i le Atua i o latou luma, ua vaevae ma ʻai ai. 36  Ona fiafia lea o i latou uma ma aai loa. 37  E toʻalua selau fitu sefulu ono i matou uma lava na iai i le vaa. 38  Ina ua latou maoona, ona latou lafoaʻi lea o saito i le sami, ina ia faamāmā+ ai le vaa. 39  Ua oo ina ao ae ua latou lē iloa le igoa o le nuu, a ua latou vaaia se faga ma se matafaga, ona latou filifili lea pe e mafai ona latou avatu le vaa i le matafaga.+ 40  Ua latou selei ese o taula ma faapaʻuʻū i le sami, ua talai fusi o foeuli, ma sisi le la taumua i le matagi, ona agaʻi atu lea i le matafaga. 41  Ua tau le vaa i le faga oneone, ona paʻulia ai lea ma ua mau ai le taumua, ua lē mafai ona toe mamulu, a ua matuā malepe+ lava le taumuli. 42  Ona taupulepule lea o fitafita e fasiotia pagota, ina neʻi feʻausi ese atu ma sosola ai. 43  Peitaʻi, ua manaʻo le taʻitaʻiʻau e faaola iā Paulo, ma ia taofia le mea ua latou taupulepule e fai. Ona ia faatonuina lea o ē e iloa feʻausi, ina ia feosofi i le sami ma muamua atu i uta, 44  a o ē ua totoe, ia latou pipii i laupapa ma isi mea mai i le vaa ma ō atu ai i uta. Ua oo atu foʻi ma le saogalemu i latou uma lava i uta.+

Faamatalaga Pito i Lalo

O le matagi e agi mai i le itu i mātū i sasaʻe.
O le gafa e tasi pe tusa ma le 1.8 mita; 6 futu.