Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Galuega 23:1-35

23  Ua pulatoʻa atu Paulo i alii o le Faamasinoga Sili ma faapea atu: “Alii e, le ʻauuso e, ua ou faia laʻu amio ma se lotofuatiaifo matuā lelei+ i luma o le Atua, ua oo mai lava i le aso nei.”  O le mea lea, ua faatonuina ai e le ositaulaga sili o Anania o ē o loo tutū latalata ane iā te ia, ina ia pō+ i lona gutu.  Ona fai atu lea o Paulo iā te ia: “O oe na le pā ua faapaʻepaʻeina,+ o le a pō atu le Atua iā te oe. Pe e te nofo ea e faamasino mai iā te aʻu e tusa ai ma le Tulafono,+ a o lenā e te solia le Tulafono+ i lou fai atu e pō mai aʻu?”  Ona faapea mai lea o i latou ua tutū ai: “Pe e te tautala lē migao ea i le ositaulaga sili a le Atua?”  A ua fai atu Paulo: “Le ʻauuso e, ou te leʻi iloa o ia o le ositaulaga sili. Auā ua tusia, ‘Aua e te upuvale i se taʻitaʻi o lou nuu.’ ”+  Ua mātauina e Paulo, o le tasi vaega, o le ʻau Satukaio,+ a o isi, o le ʻau Faresaio, ona alaga atu lea o ia i alii o le Faamasinoga Sili e faapea: “Alii e, ma uso e, o aʻu o le Faresaio,+ o le atalii o le ʻau Faresaio. Ua faamasinoina+ aʻu i le faamoemoe o le toetū+ o ē ua oti.”  O lona fai atu o lenei mea, ua mapuna aʻe ai se fefinauaʻiga+ i le va o le ʻau Faresaio ma le ʻau Satukaio, ma ua vaeluaina ai foʻi le motu o tagata.  Auā ua fai mai le ʻau Satukaio+ e leai se toetū,+ e leai foʻi ni agelu, po o agaga, a ua faalauiloa atu e le ʻau Faresaio na mea uma.  Ona feʻei+ lea o tagata, ma ua matuā finau atu nisi o le ʻautusiupu o le vaega a le ʻau Faresaio e faapea: “Matou te leʻi maua se mea sesē ua faia e lenei tagata;+ ae afai ua tautala mai se agaga, po o se agelu iā te ia,—.”+ 10  Ua oo ina faateteleina le fefinauaʻiga, ona fefe ai lea o le alii e pule i ʻau ina neʻi latou saeia Paulo, ona ia poloaʻi lea i fitafita+ ina ia ō ifo ma toso ese o ia mai i tagata, ma avatu o ia i nofoaga o fitafita.+ 11  I lenā pō, ua tū mai ai le Alii iā te ia+ ma fetalai mai: “Ia e lototele!+ Auā e pei ona e molimau māeʻaeʻa+ atu e uiga iā te aʻu i Ierusalema, e ao foʻi la ona e molimau atu i Roma.”+ 12  Ua oo i le aso e sosoo ai, ona taupulepule+ lea o tagata Iutaia ma fai la latou tautoga,*+ e lē toe aai ma feinu seʻia o latou fasiotia Paulo.+ 13  E sili atu i le fā sefulu tamāloloa na taupulepule faatasi i le faia o lenei tautoga; 14  ua latou ō atu i le ʻaufaitaulaga sili+ ma toeaina ma faapea atu: “Ua matou matuā tautō e lē toe aai seʻiloga ua matou fasiotia Paulo. 15  O le mea lea, o outou ma alii o le Faamasinoga Sili, ia outou taʻu manino atu i le alii e pule i ʻau, le māfuaaga e aumai ai o ia iā te outou, e peiseaʻī ua outou fia iloa atili mea e faatatau iā te ia.+ Matou te nofosauni e fasioti iā te ia a o leʻi latalata mai o ia.”+ 16  Ae ina ua iloa e le tama a le tuafafine o Paulo o loo latou faatalitali+ e puʻe o ia, ona alu atu lea i le nofoaga o fitafita, ma faamatala atu lenei tala iā Paulo. 17  Ona valaau atu lea o Paulo i se taʻitaʻiʻau ma faapea atu iā te ia: “Ia avatu lenei tauleʻaleʻa i le alii e pule i ʻau, auā o loo iai se mea ua fia taʻu atu iā te ia.” 18  Ona ave ai lea e lenei tagata o ia i le alii e pule i ʻau ma faapea atu: “Na valaau mai le pagota o Paulo iā te aʻu ma talosaga mai, e aumai lenei tauleʻaleʻa, ona e iai se mea o ia fia taʻu atu iā te oe.” 19  Ona tago lea o le alii e pule i ʻau i lona lima ma taʻitaʻi ese o ia,+ ua na o i laʻua, ona ia fesili atu lea: “O le ā le mea o e fia taʻu mai iā te aʻu?” 20  Ua ia faapea mai: “Ua lotogatasi tagata Iutaia e talosaga atu iā te oe, ia aumai Paulo i luma o le Faamasinoga Sili a taeao, e peiseaʻī ua latou fia iloa atili o mea e faatatau iā te ia.+ 21  Ae aua lava neʻi e talitonu iā i latou, auā e sili atu i le toʻafā sefulu tagata o i latou o loo lamalama+ iā te ia, ma ua faia la latou tautoga e lē toe aai ma feinu seʻia o latou fasiotia o ia.+ Ua latou nofosauni nei ma faatalitali mo se faatagaga mai iā te oe.” 22  Ona tuu atu lea e le alii e pule i ʻau o le tauleʻaleʻa e alu ma faatonuina o ia: “Aua neʻi e taʻuina atu i se tasi o lea ua uma ona e faailoa mai nei mea iā te aʻu.” 23  Ua ia aami ni taʻitaʻiʻau se toʻalua ma faapea atu: “Ia sauni ni fitafita se toʻalua selau e savavali atu i Kaisareia, ma ni tagata tiʻetiʻe solofanua se toʻafitu sefulu, ma ni tagata e tau i tao se toʻalua selau, i le itula e tolu* i le pō. 24  Ia sauni foʻi ni solofanua latou te faatiʻetiʻe ai Paulo, ma momoli saogalemu atu o ia i le kovana o Filiki.” 25  Ua ia tusia foʻi se tusi e faapea: 26  “O aʻu o Kalaotio Lusia, malo lava le soifua i lau afioga le Kovana o Filiki.+ 27  O le tamāloa lenei na puʻeina e tagata Iutaia, ma na toetoe lava a latou fasiotia o ia, ae na ou vave oo mai ma le ʻaufitafita ma laveaʻi o ia,+ auā ua ou iloa o ia o se tagata Roma.+ 28  Na ou aveina o ia i la latou Faamasinoga Sili,+ ona o loʻu fia iloa o le māfuaaga tonu ua latou molia ai o ia. 29  Ua ou iloa ua tuuaʻia o ia ona o finauga e tusa ma la latou Tulafono,+ ae e leai se mea e tasi ua molia mai ai, ua tatau ai ona oti pe e faafalepuipuiina+ o ia. 30  Ae ona ua faailoa mai iā te aʻu le faufauga+ ua faia i lenei tamāloa, ua ou auina vave atu ai o ia iā te oe, ma poloaʻi foʻi i ē ua molia o ia, ina ia fai atu la latou mau faasaga iā te ia i ou luma.”+ 31  Ona ave lea e nei fitafita+ o Paulo e tusa ai ma le faatonuga, ma aumaia o ia i Anipateri i le pō. 32  Ona latou tuu atu lea o tagata tiʻetiʻe solofanua e ō pea ma ia i le aso e sosoo ai, a ua latou toe foʻi atu i le nofoaga o fitafita. 33  Ua taunuu atu tagata tiʻetiʻe solofanua i Kaisareia,+ ua momoli atu le tusi i le kovana, ma tuu atu foʻi Paulo iā te ia. 34  Ua faitau ai o ia, ma fesili atu po o fea le itumalo e sau ai, ona mautinoa+ ai lea e sau o ia mai i Kilikia.+ 35  Ua ia faapea mai: “Ou te matuā faalogologo lelei atu pe a taunuu mai o ē ua molia oe.”+ Ona ia poloaʻi atu lea ina ia leoleoina o ia i le maota o Herota.

Faamatalaga Pito i Lalo

O lona uiga, na latou talitonu e faamalaiaina i latou pe a lē taunuu lenei tautōga.
Pe tusa o le tā o le  9 i le pō e amata mai i le oso aʻe o le lā.