Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Galuega 21:1-40

21  Ua matou faamavae atu iā i latou ma loimata, ona matou tuuvaa lea ma folau saʻo atu i Ko, ae i le aso e sosoo ai, ua matou ō atu ai i Roto, ona ō atu ai lea i Patara.  Ina ua matou maua le vaa e malaga atu i Foinie, ona matou ō lea i ai, ma folau atu loa.  Ua matou vaaia le motu o Kuperu+ i le itu tauagavale, a ua matou folau loa ma agaʻi atu i Suria,+ ona matou taula lea i Turo, auā o i inā e laʻu ese ai le uta+ a le vaa.  Ua matou saʻili, ona maua ai lea o soo ma matou nonofo ai i inā mo aso e fitu. Ae peitaʻi, e ala i le agaga,+ ua latou fai atu ai pea iā Paulo, e aua neʻi alu atu i Ierusalema.  Ina ua uma ia aso, ona matou ō lea ma faaauau la matou malaga; ae ua momoli i matou e i latou uma faatasi ma fafine ma tamaiti i tua atu o le aai. Ona matou tootutuli+ lea i le matafaga ma tatalo,  ma faatofā+ le tasi i le isi, ona matou ō lea i luga o le vaa, a ua toe foʻi i latou i o latou aiga.  Ona faaiʻu lea o la matou folauga mai i Turo, ma taunuu atu i Tolumai, ua matou feiloaʻi ma le ʻauuso ma nonofo ai ma i latou i le aso e tasi.  I le aso e sosoo ai, ua matou malaga ma taunuu atu i Kaisareia.+ Ona matou ō atu lea i le fale o Filipo, o le faievagelia, o se tasi o tane e toʻafitu+ na uluaʻi filifilia, ma nonofo ai ma ia.  O lenei tamāloa, e toʻafā ona afafine, o ni taupou, ma latou te faia valoaga.+ 10  A o matou nonofo ai i inā mo ni aso, ona malaga mai ai lea o se perofeta e igoa iā Akapo+ mai i Iutaia, 11  ma sau iā i matou ma tago i le fusi o Paulo, ua fusifusi ai ona lava vae ma ona lima ma faapea mai: “Ua faapea mai le agaga paia, ‘O le tagata e ana lenei fusi, o le a faapena ona fusifusia+ o ia e tagata Iutaia i Ierusalema, ma tuuina+ atu o ia i lima o tagata o nuu ese.’ ” 12  Ina ua matou faalogo i lenei mea, ona matuā ʻaiʻoi atu lea o i matou atoa ai ma i latou i lea nuu, ia aua lava neʻi alu+ aʻe o ia i Ierusalema. 13  Ua tali mai Paulo: “Aiseā ua outou fetagisi+ ai ma faavaivai mai i loʻu loto?+ Ia outou matuā mautinoa, ua ou nofosauni e lē gata e saisaia aʻu, ae ia ou oti+ foʻi i Ierusalema ona o le suafa o le Alii o Iesu.” 14  Ina ua lē mafai ona taofia o ia, ona matou lotomalilie lea ma faapea atu: “Ia faia le finagalo+ o Ieova.” 15  Ua mavae ia aso, ona matou sauni lea mo le malaga ma ō aʻe ai i Ierusalema.+ 16  Ua matou ō foʻi ma nisi soo mai i Kaisareia,+ ina ia momoli i matou i le tagata lea e talimālō iā i matou, o Nasona mai i Kuperu, o se tasi o uluaʻi soo. 17  Ina ua matou taunuu i Ierusalema,+ ona talia fiafia+ lea o i matou e le ʻauuso. 18  Ae i le aso na sosoo ai, ona matou asiasi lea ma Paulo iā Iakopo;+ ma o loo iai i inā toeaina uma. 19  Ona ia faafeiloaʻi lea o i latou, ma faamatala auʻiliʻili+ atu mea ua faia e le Atua i nuu ese e ala i lana talaʻiga.+ 20  Ina ua latou faalogo i lenei mea ona latou faamamaluina lea o le Atua, ma latou faapea atu iā te ia: “Lo matou uso e, ua e iloa o loo iai le faitau afe o tagata Iutaia o ē talitonu; ma ua maelega i latou uma i le Tulafono.+ 21  A ua latou faalogo i talafeaveaʻi e uiga iā te oe e faapea, ua e aʻoaʻo tagata Iutaia uma o loo i nuu ese e fulitua iā Mose,+ ma taʻu atu iā i latou e aua neʻi peritomeina+ a latou fanau, pe faia foʻi tū masani. 22  O le ā la se mea e ao ona fai i ai? E mautinoa lava e faalogo i latou ua e taunuu atu. 23  O lea la, ia e faia le mea lenei matou te fai atu ai: E toʻafā tamāloloa ua iā i matou ua faia ni a latou tautoga. 24  Ia ave+ nei tamāloloa ma faamamāina oe faatasi ma i latou, ma totogi a latou tupe faaalu,+ ina ia mafai ai ona sele mamā o latou lauulu.+ Ona iloa ai lea e tagata uma, e sesē talafeaveaʻi ua latou faalogo i ai e uiga iā te oe, peitaʻi ua saʻo lava lau amio ma ua e tausia foʻi le Tulafono.+ 25  Na matou faia se faaiʻuga ma aauina atu i tagata talitonu i nuu ese e faapea, e tatau ona latou ʻaloese mai i mea ua faataulagaina mo tupua,+ ma le toto,+ ma mea titina,+ ma le faitaaga.”+ 26  I le aso ua sosoo ai, ona ave lea e Paulo o tamāloloa, ua faamamāina e ia o ia lava faatasi ma i latou,+ ua ulu atu i le malumalu, ma faailoa atu le taimi e faaiʻuina+ ai aso mo le faamamāina, ma le taimi e ao ai ona fai le taulaga+ mo i latou taʻitoʻatasi.+ 27  Ua lata ina faaiʻuina aso e fitu,+ ona faavevesi+ ai lea e tagata Iutaia mai i Asia o le motu o tagata, ina ua latou vaaia o ia i le malumalu, ma ua latou puʻe iā te ia, 28  ma alalaga atu: “Tagata o Isaraelu e, fesoasoani mai ia! O le tagata lenei, ua ia aʻoaʻoina tagata+ uma i so o se mea e tetee ai i tagata, ma le Tulafono, ma lenei nofoaga. Ua ia aumaia foʻi tagata Eleni i lenei malumalu, ma ua faaleagaina ai lenei nofoaga paia.”+ 29  Auā na latou vāai iā Tofimo+ mai i Efeso, o faatasi ma ia i le aai, ae ua manatu i latou, na aumai o ia e Paulo i le malumalu. 30  Ua matuā vevesi+ le aai uma, ma ua lolofi ane tagata uma, ua latou puʻe iā Paulo ma toso mai o ia i fafo mai i le malumalu.+ Ona tapuni loa lea o faitotoʻa. 31  A o latou taumafai e fasioti o ia, a ua oo atu le faamatalaga i le alii e pule i ʻau e faapea, ua matuā vevesi+ le aai atoa o Ierusalema; 32  ona taufetuli ifo lea o ia ma fitafita, ma taʻitaʻiʻau iā i latou.+ Ina ua latou vāai atu i le alii e pule i ʻau,+ ma fitafita, ona tuu loa lea o le fasiga o Paulo. 33  Ona alu atu lea o le alii e pule i ʻau ma puʻe o ia, ma faatonuina ina ia saisaitia o ia i ni filifili se lua,+ ma ua fesili atu foʻi po o ai lenei tagata, ma po o le ā foʻi se mea ua ia faia. 34  Ua feʻei atu nisi o le motu o tagata i le tasi mea, a o isi i le isi mea.+ Talu ai ua lē mafai ona ia iloa le mea tonu ona o le pisapisaō, ona ia faatonuina lea ina ia avatu o ia i le nofoaga o le ʻaufitafita.+ 35  Ae ina ua alu aʻe o ia i le faasitepu, ua iʻu ina ave o ia e fitafita ona o le sauā tele o le motu o tagata; 36  a ua mulimuli atu pea le motu o tagata e toʻatele, ma feʻei atu: “Ia fasioti o ia!”+ 37  Ina o le a taʻitaʻi atu o ia i le nofoaga o fitafita, ona fai atu lea o Paulo i le alii e pule i ʻau: “Pe e mafai ona fai atu saʻu tala iā te oe?” Ua fai mai o ia: “Pe e te iloa tautala i le gagana Eleni? 38  Pe e lē o oe ea o le tagata Aikupito lea na māfua ai ona tupu le fouvalega+ i aso ua mavae, ma taʻitaʻia le toʻafā afe tagata fasioti tagata i le toafa?” 39  Ona fai atu lea o Paulo: “O le mea moni, o aʻu o le Iutaia,+ na ou fanau i Taso+ i Kilikia, o aʻu o se tagatānuu o se aai lauiloa. Ou te ʻaiʻoi atu iā te oe, e tuu mai aʻu seʻi ou tautala atu i tagata.” 40  Ina ua uma ona avatu le faatagaga, ona tū lea o Paulo i le faasitepu ma talo+ atu lona lima i tagata. Ona matuā fifilemu lea o tagata uma, a ua ia tautala atu iā i latou i le gagana Eperu+ e faapea:

Faamatalaga Pito i Lalo