Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Galuega 20:1-38

20  Ua uma le vāvāō, ona aami lea e Paulo o le ʻausoo, ua faalaeiau ma faamavae+ atu iā i latou, ona alu atu ai lea o lana malaga i Maketonia.+  Ua alu atu o ia i nisi o nuu ma faalaeiau i le ʻausoo i le tele o upu,+ ona alu atu lea o ia i Eleni.  E tolu masina na nofo ai o ia i inā, auā na faia e tagata Iutaia se taupulepulega+ faasaga iā te ia, a o sauni o ia e folau atu i Suria, ona manatu ai lea o ia e toe foʻi e ui atu i Maketonia.  O ē ua faatasi ma ia, o Sopata+ le atalii o Purou mai i Perea, o Aritako+ ma Sekuno mai i Tesalonia, o Kaio mai i Teipe, ma Timoteo,+ o Tuiko+ ma Tofimo+ mai i le itumalo o Asia.  Na muamua atu i latou na, ma faatali mai iā i matou i Teroa,+  ma ina ua mavae aso o falaoa e lē faafefeteina,+ ona matou tuuvaa atu lea mai i Filipi, ua matou taunuu atu iā i latou i Teroa+ i aso e lima, ona matou nonofo ai lea i inā mo aso e fitu.  O le aso muamua+ o le vaiaso, a o matou faapotopoto faatasi e aai, ona lauga atu lea o Paulo iā i latou ua faapotopoto ai, auā o le a alu ese o ia i le aso e sosoo ai, ma ua faaumiumi foʻi lana lauga seʻia oo i le vaeluapō.  E tele ni molī i le potu i luga+ i le mea ua matou faapotopoto faatasi ai.  O se tasi tama talavou e igoa iā Eutiko, ua nofo o ia i le faamalama. Ua moe o ia a o faaauau pea ona lauga atu Paulo, ae ona ua gase lana moe ua paʻū ai o ia mai i le fogāfale lona tolu, ona latou sii aʻe lea o ia ua oti. 10  A ua alu ifo i lalo Paulo, ua faō i ona luga+ ma fusi iā te ia, ma faapea atu: “Soia le pisapisaō, auā o loo ola o ia.”+ 11  Ona alu aʻe lea o ia i le fogāfale i luga, ua vaevae le falaoa ona aai ai lea, ma talatalanoa mo sina taimi seʻia oo i le tafa o ata, ona faamavae ai lea o ia. 12  Ua latou ave le tama o loo ola, ma ua matuā faamāfanafanaina ai i latou. 13  Ona matou muamua atu lea i le vaa, ma folau atu i Aso, o i inā na matou manatu e ave ai Paulo i le vaa, ae ina ua uma ona ia tuuina mai o faatonuga e faatatau i mea e fai, ona manaʻo lea o ia e savali atu i uta. 14  Ina ua ia taunuu atu iā i matou i Aso, ona matou ave lea o ia i le vaa ma folau atu i Metulene; 15  i le aso na sosoo ai, ona matou folau atu lea ma taunuu i gatai o Kioi, a o le isi aso ua matou ui atu ai i Samo, ma i le aso ua sosoo ai ua matou taunuu atu ai i Meleto. 16  Ua manatu Paulo e lē afe i Efeso,+ ina neʻi umi se taimi e nofo ai i le itumalo o Asia, auā ua fia vave oo atu i Ierusalema+ i le aso o le tausamiga o le Penetekoso pe afai e mafai ai. 17  Ae peitaʻi, ua ia auina atu se feʻau mai i Meleto i toeaina+ o le faapotopotoga i Efeso, ina ia ō mai iā te ia. 18  Ina ua latou oo mai iā te ia, ona ia faapea atu lea: “Ua outou iloa lelei aʻu gaoioiga sa fai mai lava i le uluaʻi aso na ou taunuu atu ai i le itumalo o Asia,+ a o ou faatasi pea ma outou,+ 19  ua ou pologa+ i le Alii ma le lotomaulalo,+ ma loimata, ma puapuaga ua oo iā te aʻu, ona o faufauga leaga+ a tagata Iutaia; 20  ou te leʻi taofia foʻi le taʻuina atu iā te outou o mea aogā, ma aʻoaʻo+ atu iā te outou i luma o le lautele, ma mai i lea fale+ i lea fale. 21  A ua ou molimau māeʻaeʻa+ atu i tagata Iutaia atoa ma Eleni, i le salamō+ i le Atua ma le faatuatua i lo tatou Alii o Iesu. 22  A o lenei, faauta! o le faamalosi mai o le agaga,+ ou te alu atu ai i Ierusalema, e ui ou te lē iloa mea e tutupu iā te aʻu i inā, 23  ae ua molimau mai pea le agaga paia+ iā te aʻu mai i lea aai i lea aai, ua faapea mai, o loo faatali mai noanoataga ma puapuaga iā te aʻu.+ 24  Ae peitaʻi, ua ou manatu e lē tāua loʻu ola  iā te aʻu,+ ae tau lava ina ia ou faauma laʻu tamoʻega,+ ma le faiva+ na ou maua+ mai i le Alii o Iesu, ina ia ou molimau māeʻaeʻa i le tala lelei o le agalelei faifua o le Atua.+ 25  “Faauta! ua ou iloa, o outou uma na ou talaʻia atu i ai le malo, tou te lē toe vāai mai lava i oʻu mata. 26  O le mea lea, ou te fai atu ai iā te outou, ia outou molimau i lenei lava aso, ua mamā aʻu mai i le toto+ o tagata uma, 27  auā ou te leʻi taofia le taʻuina atu iā te outou o le finagalo+ uma o le Atua. 28  O lea, ia outou uaʻi+ iā te outou lava,+ ma le lafu mamoe uma,+ o ē ua tofia i ai outou e le agaga paia e fai ma ovasia,+ ina ia leoleo le faapotopotoga a le Atua,+ lea ua ia faatauina mai i le toto+ o lona lava Alo. 29  Ua ou iloa pe a ou alu ese, ona ō mai lea o luko feʻai+ iā te outou, ma latou te lē faapelepeleina le lafu, 30  ma e maua foʻi iā te outou ni tane latou te faauiga sesē mea,+ ina ia fetoso ese ai soo e mulimuli atu iā i latou.+ 31  “O lea, ia outou mataala ai ma ia manatua, e tolu tausaga+ o oʻu apoapoaʻi+ atu pea ma loimata i tagata taʻitoʻatasi i le ao ma le pō. 32  O lenei ou te tuuina atu ai outou i le Atua,+ ma le upu o lona agalelei faifua, lea e mafai ona atiaʻe+ ai outou ma avatu ai iā te outou le tofi o i latou uma ua faapaiaina.+ 33  Ou te leʻi manaʻo fua i le siliva, po o le auro, po o se ofu o se tasi.+ 34  Ua outou iloa, o galuega a oʻu lava lima ua ou maua ai mea ou te manaʻomia+ atoa ma mea e manaʻomia e i latou ua faatasi ma aʻu. 35  Ua ou faaali atu iā te outou i mea uma lava, o galuega+ faapenei e tatau ona outou fesoasoani atu ai iā i latou ua vaivai,+ ma ia manatua foʻi upu a le Alii o Iesu, ina ua ia fetalai mai, ‘E sili le fiafia e maua i le foaʻi+ atu i lo o le talia mai.’ ” 36  Ina ua ia fai atu nei upu, ona latou tootutuli+ uma lea ma ua ia tatalo. 37  O le mea moni, ua matuā fetagisi i latou uma, ua latou fusi iā Paulo+ ma sogi atu ma le alofa+ iā te ia, 38  auā ua matuā ootia i latou i upu ua ia fai atu ai e faapea, e latou te lē toe vāai lava i ona mata.+ Ona latou momoli+ atu lea o ia i le vaa.

Faamatalaga Pito i Lalo