Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Galuega 18:1-28

18  Ua mavae nei mea, ona tuua lea e ia o Atenai ae alu atu i Korinito.  O i inā ua ia maua ai se tasi tagata Iutaia e igoa iā Akula,+ na fanau i Pono ma e leʻi leva ona sau mai i Italia,+ ma lana avā e igoa iā Pisila,* ona o le faatonuga a Kalaotio+ ina ia ō ese tagata uma o Iutaia mai i Roma. Ona alu atu lea o ia iā i laʻua  ma nofo ai i lo la fale, ma ua latou galulue+ faatasi auā e tutusa a latou galuega, o ni tagata fai faleʻie.  Peitaʻi, o sapati uma, e lauga atu ai o ia i sunako,+ ma faatalitonu ai tagata Iutaia ma Eleni.  Ua ō mai Sila+ ma Timoteo+ mai i Maketonia, a ua matuā tinoū Paulo e talaʻi atu le upu i tagata Iutaia, e faamaonia ai o Iesu o le Keriso.+  Ae ua latou tetee mai pea ma fai mai upuleaga,+ ona ia lūlū lea o ona ofu+ ma faapea atu iā i latou: “Ia i luga o o outou ulu lo outou toto.+ Ua ou mamā aʻu.+ E amata atu nei ona ou alu i tagata o nuu ese.”+  Ona tuua ai lea e ia o i inā, ae alu atu i le fale o le tagata tapuaʻi i le Atua e igoa iā Titi Iuso, o lē e sosoo lona fale ma le sunako.  A o Kiripo+ le pule o le sunako, ua talitonu o ia i le Alii, atoa foʻi ma lona aiga uma. E toʻatele foʻi tagata i Korinito o ē na faalogo i le feʻau, ua talitonu ma papatisoina i latou.  Ona fetalai mai lea o le Alii iā Paulo+ i le pō i se faaaliga: “Aua e te fefe, a ia tautala atu pea ma aua le mapu e talaʻi, 10  auā ou te faatasi ma oe+ ma e leai se tagata e faia se mea leaga e te manuʻa ai; auā e toʻatele oʻu tagata i lenei aai.” 11  Ona nofo ai lea o ia i inā mo le tausaga ma masina e ono, ua aʻoaʻo atu iā i latou le afioga a le Atua. 12  A o fai Kaliona ma suikonesula+ o Akaia, ua lotogatasi tagata Iutaia e tetee atu iā Paulo, ma taʻitaʻi atu o ia i luma o le nofoa faamasino+ 13  ma faapea atu: “Ua faatalitonu+ e lenei tamāloa tagata ina ia tapuaʻi i le Atua, i se auala e lē tusa ma le tulafono.” 14  Peitaʻi, a o tau tautala atu Paulo, ona fai mai lea o Kaliona i tagata Iutaia: “Tagata Iutaia e, ana faapea o se mea sesē po o se mea leaga na ia faia, semanū ou te faalogo atu iā te outou. 15  Ae afai o ni finauga i ni lauga, ma ni igoa,+ ma la outou tulafono,+ faitalia outou. Ou te lē manaʻo e fai aʻu ma faamasino i na mea.” 16  Ona ia tutuliese lea o i latou mai i le nofoa faamasino. 17  Ua latou puʻe iā Sosene+ le pule o le sunako, ma sasa iā te ia i luma o le nofoa faamasino. Ae e leʻi popole lava i ai Kaliona i na mea. 18  Ua nofo ai pea i inā Paulo i aso e tele. Ona faamavae lea o ia i le ʻauuso, ma folau atu i Suria faatasi ai ma Pisila ma Akula, ma ua ʻoti faapupuu+ lona ulu i Kenikerea+ ona o lana tautoga na fai. 19  Ua latou taunuu i Efeso, ona ia tuua ai lea o i laʻua i inā, ae alu atu o ia i le sunako+ ma felafolafoaʻi ai ma tagata Iutaia. 20  E ui lava ina latou talosaga atu pea iā te ia ina ia toe nofo mo sina taimi, ae e leʻi mafai o ia 21  a ua faamavae+ atu ma faapea atu iā i latou: “Ou te toe foʻi mai iā te outou pe a finagalo i ai Ieova.”+ Ona folau atu ai lea o ia mai i Efeso 22  ma alu ifo i Kaisareia. Ua alu aʻe o ia ma feiloaʻi i le faapotopotoga,* ona alu ifo lea o ia i Anetioka. 23  Ua mavae ni nai aso o iai o ia i inā, ona alu atu lea mai i lea nuu i lea nuu i le atunuu atoa o Kalatia+ ma Ferukia,+ ua faamalosi+ i le ʻausoo uma. 24  Ua taunuu ane i Efeso se tagata Iutaia e igoa iā Apolo+ na fanau i Alesania, o se tagata mauupu ma e poto i Tusitusiga Paia.+ 25  Ua aʻoaʻoina* lenei tagata i le ala o Ieova ma ua tumu o ia i le agaga,+ ua ia tautala atu ma aʻoaʻo atu ma le saʻo i mea e uiga iā Iesu, ae e na o le papatisoga+ a Ioane e iloa e ia. 26  Ua tautala atu ma le lototele lenei tagata i le sunako. Ina ua faalogo Pisila ma Akula+ iā te ia, ona la ave lea o ia, ma faamatala atili atu ma le saʻo iā te ia le ala o le Atua. 27  Ua naunau o ia e alu atu i Akaia, ona tusi atu lea o uso i soo ma apoapoaʻi atu iā i latou ina ia talileleia mai o ia. Ina ua taunuu atu o ia i inā, ona fesoasoani tele+ lea o ia iā i latou ua talitonu, ona o le agalelei faifua+ o le Atua. 28  Ua ia matuā faamaonia le sesē o tagata Iutaia i luma o le nuu, a o ia faaalia mai i Tusitusiga Paia,+ o Iesu o le Keriso lea.+

Faamatalaga Pito i Lalo

O lē ua igoa foʻi iā “Piseka.”
E foliga mai na alu aʻe o ia i Ierusalema.
I le gagana Eleni, “na tuugutu mai aʻoaʻoga iā te ia.”