Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Galuega 16:1-40

16  Ua taunuu o ia i Teipe atoa foʻi ma Lusa.+ Faauta! o loo iai i inā le soo e igoa iā Timoteo,+ o le tama a se fafine Iutaia e talitonu, ma o le Eleni lona tamā,  ua taʻuleleia o ia e uso i Lusa ma Ikonio.  Ua faailoa atu e Paulo lona manaʻo ina ia la ō faatasi ma lenei alii, ona ia ave lea o ia e peritome+ ona o tagata Iutaia i na nofoaga, auā ua latou iloa uma o le Eleni lona tamā.  A o latou ō atu i aai, ua latou tuuina atu iā i latou i inā o poloaʻiga na faia e le ʻauaposetolo ma toeaina i Ierusalema,+ ina ia latou tausia.  O le mea lea, ua faaauau ai ona faamalosia le faatuatua+ o faapotopotoga, ma faatuputeleina ai mai i lea aso i lea aso.  Ua latou ui atu i Ferukia ma le atunuu o Kalatia,+ auā ua faasāina i latou e le agaga paia ona talaʻi atu le upu i le itumalo o Asia.  Ina ua ō ifo foʻi i Musia, ua latou taumafai e ō atu i Pitunia,+ peitaʻi e leʻi faatagaina i latou e Iesu e ala i le agaga.  Ua latou pasia Musia ma ō ifo i Teroa.+  Ua maua e Paulo se faaaliga+ i le pō: o loo tū se tasi tamāloa Maketonia ma ʻaiʻoi ane iā te ia: “Ia e sau i Maketonia e fesoasoani mai iā i matou.” 10  Ina ua uma ona ia vaaia le faaaliga, ona matou sauni lea e ō i Maketonia.+ Ua matou manatu ua faatonuina i matou e le Atua e folafola atu le tala lelei iā i latou. 11  Ua matou folau saʻo atu mai i Teroa e agaʻi atu i Samotake, ona matou ō atu saʻo lea i Neapoli i le aso e sosoo ai, 12  ona matou tuua lea o i inā ma agaʻi atu i Filipi,+ o se kolone o Roma, o le laumua lea o le itumalo o Maketonia.+ Ona matou nonofo ai lea i lenei aai mo ni nai aso. 13  Ua oo i le sapati, ona matou ō atu lea i tua o le pā i autafa o se vaitafe, lea ua matou manatu o se nofoaga e fai ai tatalo. Ua matou nonofo i lalo ma talanoa atu i fafine ua potopoto ai i inā. 14  Ua faalogo se tasi fafine e igoa iā Litia, o sē e faatauina atu ʻie violē mai i le aai o Tuatira,+ ma o sē e tapuaʻi i le Atua. Ua tatalaina e Ieova lona loto+ e talia mea ua fai atu ai Paulo. 15  Ina ua papatisoina+ o ia ma lona aiga, ona augani mai lea o ia: “Afai e tou te manatu ua ou faamaoni iā Ieova, ia ō mai e nonofo i loʻu fale.”+ O lona tauanau mai ua matou ō atu ai.+ 16  A o matou agaʻi atu i le mea e fai ai tatalo, ona matou fetaui ai lea ma se tasi auauna teine ua iai se agaga,+ o se temoni e vavalo.+ Ua maua e ona matai le tele o oloa+ e ala i lona faia o nei valovaloga. 17  Ua mulimuli solo mai lenei teine iā Paulo ma i matou, ma ua alaga+ e faapea: “O nei tane o pologa a le Atua Silisili Ese, o ē ua folafolaina atu iā te outou le ala i le faaolataga.” 18  Ua ia faia lenei mea mo le tele o aso. Ua oo ina fiu Paulo+ ma ua liliu atu ma faapea atu i le agaga: “Ou te faatonu atu iā te oe i le suafa o Iesu Keriso, inā alu ia i fafo mai iā te ia.”+ Ona alu ai loa lea o ia i fafo i lea lava taimi.+ 19  Ina ua iloa e ona matai ua leai se faamoemoe e latou te toe maua ai ni oloa,+ ona latou puʻea loa lea o Paulo ma Sila ma fetoso i laʻua i le maketi* i ē e taʻitaʻi,+ 20  ma avatu i alii faamasino ma faapea atu: “Ua matuā faalavelave+ mai nei tagata i lo tatou aai, o i laʻua o ni Iutaia, 21  ma ua la folafolaina atu tū+ e faasā ona tatou talia pe faia foʻi, ona o i tatou o ni tagata Roma.” 22  Ona tetee atu lea o le motu o tagata iā i laʻua. Ina ua uma ona saei ese e alii faamasino o la ofu, ona faatonuina lea e sasa i laʻua i laau.+ 23  Ua matuā sasaina i laʻua,+ ona latou tuu atu lea o i laʻua i le falepuipui, ma faatonu le leoleo o le falepuipui, ina ia matuā vaavaai lelei i laʻua.+ 24  Ona o lenei faatonuga, ua ia tuu ai i laʻua i le potu pito i totonu o le falepuipui,+ ma faamau o la vae i laau.+ 25  Ae i le vaeluapō,+ ua tatalo ai Paulo ma Sila ma usu viiga i le Atua;+ ma ua faalogo foʻi i ai isi pagota. 26  Ona faafuaseʻi lea ona lūlū se mafuiʻe malosi, ma ua lūlūina ai faavae o le falepuipui. Ua matalatala ai faitotoʻa uma, ma mamulu+ ai mea ua saisaitia ai i latou uma. 27  Ona ala lea i luga o le leoleo o le falepuipui, ma iloa ai ua matalatala faitotoʻa. Ua seʻi aʻe lana pelu o le a pule i lona ola,+ auā ua manatu ua sosola+ pagota. 28  Peitaʻi, ua alaga Paulo ma faapea atu: “Aua neʻi e faia lenā mea iā te oe,+ o loo matou iai uma lava i inei!” 29  Ua ia fai atu e aumai ni molī ma ua oso mai i totonu, ona faapaʻū+ atu lea i luma o Paulo ma Sila, ma ua gatete o ia. 30  Ua ia aumaia i laʻua i fafo ma faapea mai: “Lua susuga e, o le ā se mea e ao ona ou faia+ ina ia faaolaina ai aʻu?” 31  Ua la tali atu: “Ia e talitonu i le Alii o Iesu Keriso, ona faaolaina+ ai lea o oe ma lou aiga.”+ 32  Ua la taʻu atu le afioga a Ieova iā te ia ma lona aiga.+ 33  Ua ia aveina foʻi i laʻua i lea lava taimi o le pō, ma mulumulu o la manuʻa, ona papatisoina+ ai loa lea o ia ma lona aiga atoa. 34  Ua ia aumaia i laʻua i lona fale ma laulau atu meaʻai mo i laʻua. Ua matuā olioli o ia ma lona aiga auā o lea ua ia talitonu i le Atua. 35  Ina ua ao, ona aauina mai lea e alii faamasino+ ia leoleo e faapea mai: “Inā tatala atu ia na tagata.” 36  Ona taʻu mai lea e le leoleo o le falepuipui a latou upu iā Paulo e faapea: “Ua aauina mai e alii faamasino ia tagata e tatala iā te oulua. O lea la, inā ō mai ia, ma ia lua ō ma le filemu.” 37  Ae ua faapea atu Paulo iā i latou: “Ua latou sasaina i maʻua i luma o tagata, o i maʻua o tagata Roma+ e leai se sala, ma tuuina i maʻua i le falepuipui; a o lenei po ua mananaʻo ea e tatala faalilolilo i maʻua? E leai! Ia fai i ai e ō mai e tatala i maʻua.” 38  Ua taʻu atu e leoleo nei faamatalaga i alii faamasino. Ona fefefe ai lea o i latou ina ua faalogo o ni tagata Roma+ i laʻua. 39  O le mea lea, ua latou ō mai ai ma ʻaiʻoi mai iā i laʻua, ma tatalaina i laʻua. Ua latou talosaga mai foʻi ina ia la tuua le aai. 40  Peitaʻi, ua la tuua le falepuipui ma ō atu i le fale o Litia, ma ina ua la feiloaʻi atu i le ʻauuso, ua la faalaeiau+ atu iā i latou, ona la ō ai loa lea.

Faamatalaga Pito i Lalo

O le upu “maketi” i inei, e faasino atu i se nofoaga o fefaatauaʻiga ma o se nofoaga e fai ai foʻi fono.