Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Galuega 13:1-52

13  Ua iai i le faapotopotoga i Anetioka o perofeta+ ma faiaʻoga, o Panapa ma Simeona o lē ua igoa foʻi iā Nikeru, ma Lukio+ mai i Kurene, ma Manaena, o lē na aʻoʻoga faatasi ma Herota le pule o le itumalo, atoa foʻi ma Saulo.  A o latou auauna atu*+ iā Ieova ma anapopogi, ua faapea mai le agaga paia: “Ia tofia Panapa ma Saulo+ mai i tagata uma, ina ia faia le galuega lea ua ou valaauina ai i laʻua e fai.”  Ona latou anapopogi lea ma tatalo, ma faaee atu o latou lima+ iā i laʻua ma tuuina atu i laʻua e ō.  Ua aauina atu nei tane e ala i le agaga paia, ma ua ō atu i Selukeia ona la folau atu ai lea i Kuperu.  Ua taunuu i laʻua i Salamina ma folafola atu loa le afioga a le Atua i sunako o tagata Iutaia. Ua tautua foʻi Ioane+ iā i laʻua.  Ina ua soo le motu atoa iā i latou e oo atu i Pafo, ona latou fetaui lea ma se tasi tamāloa faataulāitu, o se perofeta pepelo,+ o se tagata Iutaia e igoa iā Paiesu,  ma o loo faatasi o ia ma le suikonesula o Sekio Paulo, o se tamāloa atamai. Ua valaau atu o ia iā Panapa ma Saulo e ō atu iā te ia, auā ua naunau tele lenei tagata e faalogo i le afioga a le Atua.  Ae peitaʻi, ua tetee atu Elima le faataulāitu (o le auala lea e faaliliuina ai lona igoa) iā i laʻua,+ ma ua taumafai e faaliliuese le suikonesula mai i le faatuatua.  Ua faatumulia Saulo o lē ua igoa foʻi iā Paulo, i le agaga paia ma ua pulatoʻa atu iā te ia 10  ma faapea atu: “O oe o le tagata fai mea piʻopiʻo ma mea leaga uma, o oe o le atalii o le Tiapolo.+ E te tetee foʻi i mea tonu uma lava. Pe e te lē tuua ea lou faapiʻopiʻo i ala tonu o Ieova? 11  Faauta! Ua i luga iā te oe le aao o Ieova ma o le a e tauaso, e te lē vaai foʻi i le susulu o le lā mo se taimi.” Ona oo ifo lea iā te ia o se puao mafiafia ma le pōuliuli, ma ua tau tagotago solo e saʻili ni tagata e taʻitaʻia lona lima.+ 12  Ina ua vaai le suikonesula+ i le mea ua tupu, ona talitonu ai lea o ia, ma ua ofo ai i aʻoaʻoga a Ieova. 13  Ona ō loa lea o Paulo ma isi tamāloloa i le vaa mai i Pafo ma taunuu atu i Pereka i Pafulia.+ Ae ua tuua i laʻua e Ioane+ ma toe foʻi+ atu i Ierusalema. 14  Ae peitaʻi, ua la tuua Pereka ma ō atu i Anetioka i Pisitia, ona la ō atu lea i le sunako+ i le aso sapati ma nonofo ai. 15  Ina ua uma ona faitau atu le Tulafono+ ma tusi a Perofeta, ona aauina atu lea e pule+ o le sunako o nisi iā i laʻua, ma faapea atu: “Uso e, afai o iā te oulua ni upu faalaeiau mo tagata, ia taʻu mai ia.” 16  Ona tulaʻi lea o Paulo ma talo+ atu lona lima ma faapea atu: “Isaraelu e, ma outou o ē matataʻu i le Atua, ia faafofoga mai.+ 17  O le Atua o lenei nuu o Isaraelu na filifilia o tatou augātamā, ma na ia faaeaina i latou a o aumau i le nuu o Aikupito. Na ia taʻitaʻieseina i latou mai i inā i lona aao malosi.*+ 18  Na faapalepale foʻi o ia i a latou amioga i le toafa pe tusa ma le fā sefulu tausaga.+ 19  Ina ua uma ona faaumatia nuu e fitu i le laueleele o Kanana, ona ia tufatufaina atu lea o fanua iā i latou e tusa ma o latou tofi,+ 20  ma na tutupu na mea uma pe tusa ma le fā selau lima sefulu tausaga. “Ina ua mavae nei mea, ona ia tuuina atu lea iā i latou o faamasino seʻia oo iā Samuelu le perofeta.+ 21  Ae na amata mai i lenā taimi ona latou talosaga mo se tupu,+ ona tuuina mai lea e le Atua iā i latou o Saulo le atalii o Kiso, o se alii mai i le ituaiga o Peniamina,+ mo tausaga e fā sefulu. 22  Ina ua uma ona aveesea o ia,+ ona ia faatūina lea o Tavita e fai ma tupu,+ o lē na ia molimau i ai ma fetalai atu, ‘Ua ou maua Tavita le atalii o Iese,+ o se tagata ua malie i ai loʻu loto,+ o lē o le a faia mea uma ou te manaʻo i ai.’+ 23  O le fanau+ a lenei tagata ua aumaia ai e le Atua le faaola+ iā Isaraelu e tusa ai ma lana folafolaga, o Iesu lea, 24  ma a o leʻi maliu mai o Ia+ lenā, na talaʻi atu e Ioane+ i tagata Isaraelu uma le papatisoga e fai ma faailoga o le salamō. 25  A o fai le galuega a Ioane, e masani ona faapea ane o ia, ‘O le ā so outou manatu, o ai aʻu? E lē o aʻu o ia. Faauta! o lē e mulimuli mai, e lē aogā aʻu ona ou tatala i ona seevae.’+ 26  “Le ʻauuso e, o outou o fanau a Aperaamo ma i latou foʻi o faatasi ma outou o ē e matataʻu i le Atua, ua auina mai le feʻau o le faaolataga iā i tatou.+ 27  Talu ai e leʻi iloa e tagata o Ierusalema ma o latou taʻitaʻi o Ia lenei,+ peitaʻi a o avea i latou ma faamasino, na latou faataunuuina mea na taʻua e le ʻau Perofeta,+ o mea nei ua faitauina atu i Sapati uma, 28  ma e ui lava latou te leʻi maua se mea e fasiotia+ ai o ia, ae na latou fai atu ma le maumauaʻi iā Pilato ia fasiotia o ia.+ 29  Ina ua uma ona latou faataunuuina mea uma na tusia e faatatau iā te ia,+ ona latou ave ifo lea o ia mai i le laau+ ma tuu i totonu o se tuugamau.+ 30  Ae na toe faatūina o ia e le Atua mai i le oti;+ 31  ma na vaaia o ia i le tele o aso e ē na ō faatasi ma ia mai i Kalilaia e agaʻi atu i Ierusalema, o ē ua molimau atu nei iā te ia i tagata.+ 32  “O le mea lea ma te faailoa atu ai iā te outou le tala lelei i le folafolaga na faia i augātamā,+ 33  lea ua faataunuuina atoatoa e le Atua iā i tatou o a latou fanau, ina ua ia toe faatūina Iesu+ e pei foʻi ona tusia i le salamo lona lua, ‘O oe o loʻu atalii, ua avea aʻu ma ou Tamā i lenei aso.’+ 34  O le mea moni lenei, na ia toe faatūina o ia mai i le oti, e lē oo i ai le pala, ma ua fetalai mai le Atua, ‘Ona o loʻu alofa, ou te foaʻi atu ai iā te outou le alofa faamaoni iā Tavita e moni lava.’+ 35  Na fetalai foʻi o ia i le isi salamo, ‘E te lē tuua lē ua faamaoni iā te oe ia oo i ai le pala.’+ 36  Na usiusitaʻi foʻi Tavita+ i le finagalo o le Atua na faaalia manino mai i lana augātupulaga, ma na moe o ia i le oti ma tanumia faatasi ma ona augātamā, ma na oo foʻi le pala+ iā te ia. 37  Peitaʻi ane, e leʻi oo le pala+ i lē na faatūina e le Atua. 38  “O lenei le ʻauuso e, ia outou iloa e faapea, e ala iā te Ia ua folafola atu ai iā te outou le faamagaloina o agasala;+ 39  ma o mea uma foʻi e leʻi taʻumamāina ai outou e ala i le tulafono a Mose,+ ua taʻumamāina ai o ē e talitonu e ala iā te Ia.+ 40  O le mea lea, ia faaeteete neʻi oo iā te outou o mea ua taʻua e le ʻau Perofeta e faapea, 41  ‘O outou o tagata tauemu, inā vaai mai ia, ma ofo, ma mou ia, auā o loo ou faia se galuega i o outou aso, o se galuega e tou te lē talitonu i ai, e tusa lava pe e faamatala auʻiliʻili+ atu e se tasi iā te outou.’ ” 42  Ina ua latou ō i fafo, ona ʻaiʻoi atu lea o tagata ina ia faamatala atili atu iā i latou nei mea i le isi sapati e sosoo ai.+ 43  Ua taape le fono na faia i le sunako, ma o le toʻatele o tagata Iutaia ma tagata liulotu* o ē e tapuaʻi i le Atua, ua latou mulimuli atu iā Paulo ma Panapa.+ Ua la faalaeiauina+ i latou ina ia faaauau ona latou tumau i le agalelei faifua o le Atua.+ 44  I le isi sapati na sosoo ai, e toetoe lava o tagata uma o le nuu na faapotopoto e faalogo i le afioga a Ieova.+ 45  Ina ua iloa atu e tagata Iutaia le motu o tagata, ona tumu lea o i latou i le lotoleaga.+ Ua latou upuleaga ma tetee atu i mea ua fai atu ai Paulo.+ 46  O lea la, ua tautatala atu ai ma le lototetele Paulo ma Panapa e faapea: “Ua tatau ona faailoa atu muamua iā te outou le afioga a le Atua.+ Seʻi faauta! Ua matou liliu atu i nuu ese,+ ona ua outou teena+ lana afioga, ma tou te lē manatu e tou te mauaina le ola e faavavau. 47  O le mea moni, ua tuu mai e Ieova iā i maʻua poloaʻiga i upu nei, ‘Ua ou tofia oe e avea ma malamalama o nuu ese,+ ina ia avea oe ma faaolataga i tuluʻiga uma o le lalolagi.’ ”+ 48  Ina ua faalogo i ai i latou o nuu ese, ona latou olioli ai lea ma faamamaluina le afioga a Ieova.+ Ua talitonu+ foʻi i latou uma o ē ua saunia o latou loto mo le ola e faavavau. 49  Ua folafolaina atu foʻi le afioga a Ieova i le atunuu atoa.+ 50  A ua faavevesi e tagata Iutaia+ fafine aloaʻia e tapuaʻi i le Atua, ma alii sili o le aai, ma ua latou faatupu le sauāga+ iā Paulo ma Panapa, ma tutuli i laʻua i fafo o le aai. 51  Ona tūtū lea e i laʻua nei le pefu o o la vae iā i latou,+ ma ō atu i Ikonio. 52  Ua faaauau foʻi ona faatumulia le ʻausoo i le olioli+ ma le agaga paia.

Faamatalaga Pito i Lalo

Po o le “auauna atu i le lautele.”
I le gagana Eleni, “a o faaloaloa lona aao.”
Po o “tagata na liliu i le lotu Iutaia.”