Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Faamasino 16:1-31

16  Ina ua alu atu Samasoni i Kasa,+ sa ia iloa ai se fafine talitane i inā, ona alu atu ai lea o ia i lona fale.+  Ua taʻu atu le tala i tagata Kasa e faapea: “Ua sau Samasoni i inei.” Ona latou siʻosiʻomia lea o ia+ ma faatalitali iā te ia i le pō atoa i le faitotoʻa o le aai.+ Ua latou lē pisa i le pō atoa, ua faapea ane: “E malama aʻe loa le taeao, ona tatou fasiotia lea o ia.”+  Ae peitaʻi, ua taoto pea Samasoni seʻia oo i le vaeluapō, ona tulaʻi lea o ia i le vaeluapō, ua tago atu i faitotoʻa o le pā+ o le aai ma pou e lua i autafa, ua fafaʻi mai faatasi ma le faamau, ona amo lea i lona ua, ma ave aʻe+ i le tumutumu o le mauga e feagai ma Heperona.+  Mulimuli ane, ua alofa o ia i se fafine i le vanu o Soreka, o lona igoa o Talila.+  Ua ō aʻe alii ua pule faatasi+ o Filisitia iā te ia, ma faapea atu: “Ia e faaōleōle+ iā te ia ma vaai po o le ā le pogai o lona malosi tele, ma o le ā se mea e mafai ona fai ina ia faatoʻilalo ai o ia, o le ā foʻi se mea e saisai ai o ia ina ia manumalo ai iā te ia; ona taʻitoʻatasi lea o i matou ma avatu iā te oe o tupe siliva e afe selau.”+  Ua fai mai Talila iā Samasoni: “Seʻi taʻu mai iā te aʻu, Po o le ā le pogai o lou malosi tele, ma o le ā se mea e saisai ai oe ina ia manumalo ai iā te oe?”+  Ona fai atu lea o Samasoni iā te ia: “Afai latou te saisaia aʻu i maea+ fou e fitu e leʻi faamamagoina, ona ou vaivai ai lea ma avea e pei o se tasi tagata.”  Ona avatu lea e alii ua pule faatasi+ o Filisitia iā te ia o maea fou e fitu e leʻi faamamagoina. Mulimuli ane, ua ia saisai ai o ia.  O le taimi lea, o loo lalafi ai i lona potu+ o ē na ō atu e puʻe iā te ia, ona ia fai mai lea iā te ia: “Samasoni e, ua ō mai Filisitia+ iā te oe!” Ona ia motusi ai lea o maea e pei ona motusi o se manoa ua mū i le afi.+ Ua lē iloa lava le pogai o lona malosi.+ 10  Ona fai mai lea o Talila+ iā Samasoni: “Faauta! ua e ʻolegia aʻu auā ua e pepelo mai iā te aʻu.+ Faamolemole seʻi taʻu mai lava iā te aʻu, po o le ā se mea e mafai ona saisai ai oe.” 11  Ona ia fai atu lea iā te ia: “Afai e latou te matuā saisai aʻu i ni maea fou e leʻi faia ai se galuega, ona ou vaivai ai lea ma avea e pei o se tasi tagata.” 12  Ona ave lea e Talila o maea fou ma saisai ai o ia, ma ua faapea mai iā te ia: “Samasoni e, ua ō mai Filisitia iā te oe!” O le taimi lenā o loo lalafi ai i lona potu o ē na ō mai e puʻe o ia.+ Ona ia motusi lea o maea mai i ona lima e pei o se manoa.+ 13  Ua mavae ia mea, ona fai mai lea o Talila iā Samasoni: “Ua e ʻolegia aʻu e oo mai i le aso nei auā ua e pepelo mai iā te aʻu.+ Seʻi taʻu mai iā te aʻu, po o le ā se mea e mafai ona saisai ai oe.”+ Ona ia fai atu lea iā te ia: “Pe afai e te lalaga fili e fitu o loʻu lauulu faatasi ma le ala+ o le ʻie.” 14  Ua ia faamauina i le pine, ona ia fai mai lea iā te ia: “Samasoni e,+ ua ō mai Filisitia iā te oe!” Ua ala o ia na moe, ma liaʻi le pine atoa ma le ala o le ʻie. 15  Ona ia fai mai lea iā te ia: “E faapefea ona e fai mai ‘Ou te alofa iā te oe,’+ ae e lē o iai lou loto iā te aʻu? Ua faatolu ona e ʻolegia aʻu, ae e te leʻi taʻu mai lava iā te aʻu le pogai o lou malosi tele.”+ 16  Talu ai ua ia faamalosi+ iā te ia i ana upu i taimi uma, ma faatauanau pea iā te ia, ona faavaivai ai lea o lona loto, a oti.+ 17  Ua iʻu lava ina faamatala atu e ia o lona lotoatoa+ iā te ia, ua faapea atu: “E leʻi oo lava se tafi+ i loʻu ulu, auā o aʻu o le Naseri i le Atua mai lava i le manava o loʻu tinā.+ Afai e tafi loʻu ulu, ona alu ese ai lea o loʻu malosi mai iā te aʻu, ona ou vaivai ai lea, ma avea ai aʻu e pei o isi tagata uma lava.”+ 18  Ina ua iloa e Talila ua ia faamatala atu iā te ia o lona lotoatoa, ona ia feʻau atu loa lea ma aami i alii ua pule faatasi+ o Filisitia, ua faapea atu: “Inā ō mai ia, auā ua ia faamatala mai iā te aʻu o lona lotoatoa.”+ Ona ō aʻe lea o alii iā te ia, ma avatu tupe i o latou lima.+ 19  Ua ia faamoe Samasoni i ona vae. Ona valaau atu lea i le tagata e sau e sele fili e fitu o lona ulu, ona manumalo loa lea o Talila iā te ia, ma ua alu ese lona malosi mai iā te ia. 20  Ua fai mai o ia: “Samasoni e, ua ō mai Filisitia iā te oe!” Ona ala lea o ia na moe, ma faapea ifo: “Ou te alu atu e pei ona ou faia muamua,+ ma ou faasaʻoloto ai iā te aʻu.” Peitaʻi, e na te leʻi iloa ua tuua o ia e Ieova.+ 21  Ona puʻe lea o ia e Filisitia ma sali ese ona mata,+ ua ave ifo iā te ia i Kasa+ ma saisai i faamau ʻapamemea e lua;+ ua olo foʻi e ia o saito+ i le falepuipui.+ 22  A ua amata ona toe vave tutupu o lauulu o lona ulu i le taimi lava na tafiese ai.+ 23  A ua faapotopoto faatasi alii ua pule faatasi o Filisitia ina ia fai se taulaga tele i lo latou atua o Takono,+ ma fiafia ai, ua latou faapea atu: “O lo tatou atua, ua tuuina mai lo tatou fili+ o Samasoni i o tatou lima!” 24  Ina ua vāai tagata iā te ia, ona latou vivii ai lea i lo latou atua,+ ma ua latou faapea ane, “auā ua tuuina mai e lo tatou atua lo tatou fili+ i o tatou lima, o lē na faaleagaina lo tatou laueleele,+ ma fasia le toʻatele o i tatou.”+ 25  Ina ua oo ina fiafia o latou loto,+ ona latou faapea ane lea: “Ia valaau atu iā Samasoni e sau ina ia tatou toē ai.”+ Ona latou aumai lea o Samasoni mai i le falepuipui ina ia latou toē ai iā te ia;+ ona latou faatū lea iā te ia i le va o pou. 26  Ona fai atu lea o Samasoni i le tamaitiiti o loo uuina lona lima: “Seʻi oʻu tagotago atu i poutū o loo mau ai le fale, seʻi oʻu faalagolago atu i ai.” 27  (I le taimi lea, ua matuā tumu ai le fale i tane ma fafine ma alii uma ua pule faatasi o Filisitia na iai i inā;+ pe e tusa ma le toʻatolu afe o tane ma fafine na iai i le taualuga, o ē na matamata ifo ma toē iā Samasoni.)+ 28  Ona valaau atu lea o Samasoni+ iā Ieova+ e faapea: “Ieova e, le Alii Pule Silisili Ese, faamolemole ia e manatua mai aʻu,+ ma ia e faamalosia+ aʻu i lenei lava taimi, o oe o le Atua moni, seʻi oʻu tauimasui i tagata Filisitia mo se tasi o oʻu mata e lua.”+ 29  Ona faalagolago lea o Samasoni i poutū e lua o loo mau ai le fale, ma ua tago atu lona lima taumatau i le tasi, a o lona lima tauagavale i le isi. 30  Ona fai atu lea o Samasoni: “Ia ou oti+ faatasi ma tagata Filisitia.” Ona punou faamalosi lea o ia, ua solofa ifo le fale i luga o alii ua pule faatasi, ma tagata uma na iai,+ e toʻatele atu tagata na ia fasiotia i le taimi na oti ai, i lo o ē na ia fasiotia a o ola o ia.+ 31  Mulimuli ane, ona ō ifo lea o ona uso ma le aiga uma o lona tamā, ua sii o ia i luga, ma ave aʻe o ia, ua avatu ma tanu i le tuugamau o Manoa+ lona tamā, i le va o Soraa+ ma Esetaola.+ Na faamasino o ia iā Isaraelu i tausaga e lua sefulu.+

Faamatalaga Pito i Lalo