Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Faaaliga 22:1-21

22  Ua ia faaali mai foʻi iā te aʻu se vaitafe o le vai o le ola,+ e manino e pei o se tioata, o loo tafe mai i le nofoālii o le Atua ma le Tamaʻi Mamoe+  i le ogatotonu o lona ala tele. Ua iai i itu taʻitasi o le vaitafe laau+ o le ola o loo fua mai i fuata e taʻisefulu lua, ma e fua mai ai ni fua i masina taʻitasi.+ O lau foʻi o laau e faamālōlōina ai nuu.+  E lē toe iai se malaia.+ Ae e iai i le aai le nofoālii o le Atua+ ma le Tamaʻi Mamoe,+ ma e tuuina atu foʻi e ana pologa le auaunaga paia+ iā te ia;  latou te vaai atu foʻi i ona fofoga,+ e i o latou muāulu foʻi lona suafa.+  E lē toe iai se pō,+ latou te lē manaʻomia foʻi se molī e faamalamalama ai, po o le susulu o le lā, auā e faamalamalamaina+ i latou e Ieova le Atua, o le a pule foʻi i latou o ni tupu e faavavau, faavavau lava.+  Ona fai mai lea o ia iā te aʻu: “O upu nei e faamaoni ma moni;+ ioe, o Ieova le Atua o lē ua fetalai mai e ala i ana perofeta,+ na ia auina mai lana agelu ina ia faaali mai i ana pologa o mea ua toeitiiti ona tutupu lea.+  Faauta! Ou te vave alu atu.+ E fiafia lē e tausi i upu o le valoaga o loo i lenei tusi tāʻai.”+  O aʻu o Ioane o lē na faalogo ma vaai i nei mea. Ina ua ou faalogo ma vaai i ai, ona ou faapaʻū ai lea i vae o le agelu e tapuaʻi iā te ia,+ o lē na faailoa mai iā te aʻu nei mea.  A ua ia fai mai iā te aʻu: “Ia e faaeteete! Aua e te faia lenā mea! Ua na o aʻu o se uso a pologa iā te oe, ma o se tasi o ou uso o ē o ni perofeta,+ ma o se tasi foʻi o i latou o ē e tausi i upu o lenei tusi tāʻai. Ia tapuaʻi i le Atua.”+ 10  Ua ia faapea mai foʻi iā te aʻu: “Aua neʻi faamaufaailogaina* upu o le valoaga o loo i lenei tusi tāʻai, auā ua latalata le taimi atofaina.+ 11  O lē e faia le amiolētonu, ia faia pea e ia le amiolētonu;+ o lē e amio palapalā, ia faia pea e ia o mea palapalā;+ a o lē e amiotonu+ ia amiotonu pea o ia, ma o lē e paia ia paia pea o ia.+ 12  “‘Faauta! E vave ona ou alu atu,+ ua iā te aʻu foʻi le taui,+ e taui atu ai i tagata taʻitoʻatasi e tusa ma ana galuega.+ 13  O aʻu o le Alefa ma le Omeka,*+ o lē e muamua ma lē e mulimuli,+ o le amataga ma le gataaga. 14  E fiafia i latou ua tatā o latou ofu talaloa,+ ina ia faatagaina ai i latou e aai i fua o laau o le ola,+ ma ia mafai ai foʻi ona latou ulu atu i le aai i ona faitotoʻa.+ 15  O loo i fafo o taʻifau,+ ma ē e faia faiga faaagaga,+ ma ē e faitaaga,+ ma ē e fasioti tagata, ma ē e ifo i tupua, ma ē e fiafia i le pepelo ma faia pea le tala pepelo.’+ 16  “‘O aʻu o Iesu, na ou auina atu laʻu agelu e molimau iā te outou i nei mea ina ia aogā i faapotopotoga. O aʻu o le aa+ ma le fanau a Tavita,+ o le fetu ao pupula.’”+ 17  Ua fai mai pea le agaga+ ma le tamaʻitaʻi faaipoipo:+ “Inā sau ia!”+ Ia fai atu foʻi so o se tasi e faalogo: “Inā sau ia!” Ia sau foʻi so o se tasi e fia inu;+ ma o so o se tasi e manaʻo i ai, ia ave fua le vai o le ola.+ 18  “Ua ou molimau atu i tagata uma e faalogo i upu o le valoaga o loo i lenei tusi tāʻai: Afai e faaopoopo+ e se tasi ni upu i nei mea, e faaopoopoina foʻi e le Atua iā te ia o mala+ ua tusia i lenei tusi tāʻai; 19  afai foʻi e aveesea e se tasi se upu mai i upu o le tusi tāʻai o lenei valoaga, e aveesea foʻi e le Atua lona tofi mai i laau o le ola+ ma le aai paia,+ o mea ia ua tusia i lenei tusi tāʻai. 20  “Ua faapea mai foʻi lē e molimau i nei mea, ‘Ioe; ou te vave alu atu.’”+ “Amene! Inā maliu mai ia le Alii e, Iesu.” 21  Tau ina ia iai i le ʻaupaia le agalelei faifua o le Alii o Iesu Keriso.+

Faamatalaga Pito i Lalo

O lona uiga “aua le natia.”
O lona uiga “o le Amataga ma le Gataaga.” O le Alefa ma le Omeka o le mataʻitusi muamua ma le mataʻitusi mulimuli lea o le alafapeta Eleni.