Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Faaaliga 2:1-29

2  “Ia e tusi i le agelu+ o le faapotopotoga i Efeso:+ O mea nei ua fai mai ai lē o loo uu i lona lima taumatau fetu e fitu,+ o lē o loo savali i le ogatotonu o tuugāmolī+ auro e fitu,  ‘ua ou iloa au galuega,+ ma lou tautigā, ma lou tumau, ma e te lē faapalepale i tagata leaga, ma ua e tofotofoina+ o ē ua faapea mai o ni aposetolo+ ae e leai lava, ua e iloa foʻi o i latou o ni tagata pepelo.  Ua e faaalia foʻi lou tumau,+ ua e onosaia le tele o faigatā ona o loʻu igoa,+ ma ua e lē faavaivai.+  Ae peitaʻi, o le mea lenei ua ou lē fiafia ai iā te oe, ona ua e tuua le uluaʻi alofa sa iā te oe.+  “‘Ia manatua le mea na e tuua, ma ia salamō+ ma toe foʻi e faia au galuega muamua. Afai e te lē salamō ai, ou te alu atu iā te oe+ ma aveesea lau tuugāmolī+ mai i lona tulaga.  Ae peitaʻi, o loo iai se mea lelei iā te oe, ona ua e ʻinoʻino+ i galuega a le lotu Nikalaitai,+ lea foʻi ou te ʻinoʻino i ai.  O lē ua iai taliga, inā faalogo mai ia i mea ua fai mai ai le agaga+ i faapotopotoga: O lē e manumalo+ ou te faataga o ia e ʻai i fua o le laau o le ola,+ o loo i le parataiso a le Atua.’  “Ia e tusi foʻi i le agelu+ o le faapotopotoga i Semurana: O mea nei ua fai mai ai o ‘Lē e muamua ma Lē e mulimuli,’+ o lē na oti a ua toe ola mai,+  ‘ua ou iloa lou puapuaga ma lou mativa, (ae peitaʻi ua e tamaoaiga)+ ma upuleaga a i latou o ē ua faapea mai o i latou o tagata Iutaia+ ae e leai lava, a o le sunako* o Satani i latou.+ 10  Aua e te fefe i mea o le a e tigā ai.+ Faauta! E faaauau ona lafoina e le Tiapolo+ nisi o outou i le falepuipui, ma e matuā tofotofoina ai outou,+ ma faapuapuagatia+ ai outou i aso e sefulu. A ia e faamaoni seʻia oo i le oti,+ ona ou avatu lea iā te oe o le pale o le ola.+ 11  O lē ua iai taliga, inā faalogo+ mai ia i mea ua fai mai ai le agaga+ i faapotopotoga: O lē ua manumalo+ e lē afāina lava o ia i le oti faalua.’+ 12  “Ia e tusi foʻi i le agelu o le faapotopotoga i Perekamo: O mea nei ua fai mai ai lē ua iai le pelu umī e maʻai uma ona itu,+ 13  ‘ua ou iloa le mea o loo e nofo ai, o le mea lea o loo iai le nofoālii o Satani; a ua e taofimau pea i loʻu igoa+ ma e te leʻi faafitia lou faatuatua iā te aʻu+ e oo lava i aso o Anetipa laʻu molimau+ faamaoni, o lē na fasiotia+ a o faatasi ma outou i le mea o loo nofo ai Satani. 14  “‘Ae ui i lea, o mea nei ua ou lē fiafia ai iā te oe, ona ua iā te oe o ē ua taofimau i le aʻoaʻoga a Palaamo,+ o lē na aʻoaʻo iā Palako+ ina ia tuu se mea e tausuai ai i luma o le fanauga a Isaraelu, ina ia aai i mea ua faataulaga mo tupua, ma faia le faitaaga.+ 15  E faapena foʻi ona iā te oe i latou ua taofimau i aʻoaʻoga a le lotu Nikalaitai.+ 16  O le mea lea inā salamō+ ia. Afai e leai, ona ou vave alu atu lea iā te oe, ma ou tau+ le taua ma i latou i le pelu umī e alu atu mai i loʻu gutu.+ 17  “‘O lē ua iai taliga, inā faalogo mai ia i mea ua fai mai ai le agaga i faapotopotoga:+ O lē e manumalo+ ou te tuuina atu iā te ia nisi o manai+ ua natia, ou te tuuina atu foʻi iā te ia se tamaʻi maa paʻepaʻe, ma e tusia se igoa+ fou i luga o le tamaʻi maa, lea e lē iloa e se tasi seʻi vaganā ai lē ua mauaina.’+ 18  “Ia e tusi foʻi i le agelu o le faapotopotoga i Tuatira:+ O mea ia ua faapea mai ai le Atalii+ o le Atua, o lē e pei o le afi mumū ona mata,+ ma ona vae e pei o le ʻapamemea lelei,+ 19  ‘ua ou iloa au galuega, ma lou alofa,+ o lou faatuatua, o lau faiva ma lou tumau, ma ua sili atu au galuega+ i le taimi nei nai lo o le taimi muamua.+ 20  “‘Ae ui i lea, o le mea lenei ua ou lē fiafia ai iā te oe, ona ua e tuu pea le fafine o Iesepela,+ o lē ua ia taʻua o ia lava o se perofeta fafine, ma ua ia aʻoaʻoina+ ma faasesēina aʻu pologa+ e fai le faitaaga,+ ma aai i mea ua faataulaga mo tupua.+ 21  Na ou tuu atu le avanoa iā te ia ina ia salamō+ ai, ae peitaʻi e lē o manaʻo o ia e salamō i lana faitaaga.*+ 22  Faauta! ua toeitiiti ona ou taia lea o ia i se faamaʻi leaga, atoa ma i latou ua mulilulua faatasi ma ia i se puapuaga tele, seʻi vaganā ai ua latou salamō mai i ana galuega. 23  Ou te fasiotia foʻi lana fanau i se faamaʻi oti, ina ia iloa ai e faapotopotoga uma o aʻu o lē e suʻesuʻeina faalogona loloto ma manatu,* ma ou te taui atu iā te outou taʻitoʻatasi e tusa ma a outou galuega.+ 24  “‘Ae peitaʻi, ou te fai atu i isi uma o outou o i Tuatira, o i latou uma o ē e lē o mulimuli i lenei aʻoaʻoga, ma ua latou lē iloa le mea ua taʻua e i latou o “mea loloto a Satani”:+ Ou te lē toe tuu atu se isi lava avega mamafa+ iā te outou. 25  Ae ui i lea ia outou taofimau i le mea ua iā te outou+ seʻia ou alu atu. 26  O lē foʻi e manumalo ma mulimuli i aʻu galuega seʻia oo i le iʻuga,+ ou te tuuina atu iā te ia le pule i atunuu,+ 27  ma e pule* foʻi o ia i tagata i le tootoo uʻamea,+ ina ia faaumatia i latou e pei ona nutililiiina o ipu ʻele,+ e pei ona ou maua mai i loʻu Tamā, 28  ou te avatu foʻi iā te ia le fetu ao.+ 29  O lē ua iai taliga, inā faalogo mai ia i mea ua fai mai ai le agaga+ i faapotopotoga.’+

Faamatalaga Pito i Lalo

O “sunako” o fale ia e faia ai fonotaga.
Tagaʻi i le Faaopoopoga e 8.
I le gagana Eleni, “o fatu gaʻo ma fatu.”
I le gagana Eleni, “e leoleoina.”