Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Esoto 8:1-32

8  Ona fetalai mai lea o Ieova iā Mose: “Ia e alu iā Farao ma e fai atu iā te ia e faapea, ‘O le mea lea ua fetalai mai ai Ieova: “Ia tuu mai loʻu nuu e ō ina ia latou auauna mai iā te aʻu.+  Pe afai e faaauau ona e musu e faatagaina i latou e ō, o le a faamalaia lou laueleele i rane.+  O le a anoanoaʻi rane i le Vaitafe o le Naila, e ō mai ma ulu atu i lou fale, i lou potumoe, i lou moega, i fale o au auauna, i luga o ou tagata, i totonu o au ogaumu ma tanoa e palu ai falaoamata.+  E tuli oso atu rane i ou luga, i luga o ou tagata ma au auauna uma lava.”’”+  Mulimuli ane, ua fetalai mai Ieova iā Mose: “Ia e fai atu iā Arona, ‘Ia faaloaloa lou lima lea e uu ai le tootoo+ i luga o vaitafe, i alāvai o le Naila ma taufusi ina ia ō aʻe ai rane i le laueleele uma o Aikupito.’”  Ona faaloaloa lea e Arona o lona lima i luga o vai o Aikupito, ma ō aʻe ai rane ma ua lilo uma ai le laueleele o Aikupito.  Peitaʻi ua faapea foʻi ona faia e ositaulaga o ē e faia faiga faaagaga i a latou faiga lilo faaagaga ma ua ō aʻe ai rane i le laueleele o Aikupito.+  Ua mavae lea, ona aami lea e Farao o Mose ma Arona ma faapea atu: “Ia oulua ʻaiʻoi atu iā Ieova+ ia aveese rane mai iā te aʻu ma oʻu tagata, auā ua ou malie e tuu atu le nuu ia latou ō e fai taulaga iā Ieova.”+  Ona tali mai lea o Mose iā Farao: “I loʻu faaaloalo ou te fai atu ai, ia e taʻu mai po o afea ou te ʻaiʻoi atu ai mo oe, mo au auauna, ma lou atunuu ina ia tapē ai rane o loo iā te oe ma totonu o ou fale. E na o le Vaitafe o le Naila o le a totoe ai rane.” 10  Ua ia fai atu: “O a taeao.” Ua ia tali mai: “O le a faia e tusa ma lau saunoaga, ina ia e iloa ai e leai se isi e tusa ma Ieova lo matou Atua,+ 11  auā e mou atu rane mai iā te oe, mai i ou fale, mai i au auauna ma ou tagata. E na o le Vaitafe o le Naila o le a totoe ai rane.”+ 12  Ona ō ese lea o Mose ma Arona mai i luma o Farao, ua ʻaiʻoi atu Mose iā Ieova+ ona o rane na Ia faaoo iā Farao. 13  Ua faia e Ieova e tusa ma upu a Mose,+ ma ua amata ona mamate rane i so o se mea ua iai i fale, i lotoā ma fanua. 14  Ua latou faaputu rane, ua oo ina tele lava faaputuga, ma ua elo ai le atunuu.+ 15  Ua iloa e Farao ua maua e le atunuu le mapusaga, ona ia faamaaa lea i lona loto;+ ua ia lē faalogo iā i laʻua e pei lava ona fetalai mai ai Ieova.+ 16  Ona fetalai mai lea o Ieova iā Mose: “Ia fai atu iā Arona, ‘Ia faaloaloa lou tootoo+ ma taia ai le efuefu o le laueleele, ona avea ai lea ma namu* i le atunuu atoa o Aikupito.’” 17  Ona la faia lea faapea. Ua faaloaloa e Arona lona lima o loo uu ai le tootoo, ua ia taia ai le efuefu o le laueleele, ma ua oo atu namu i luga o tagata ma manu. Ua avea le efuefu uma o le laueleele ma namu i le atunuu atoa o Aikupito.+ 18  Ua taumafai ositaulaga e faia faiga faaagaga e faia faapea i a latou faiga lilo faaagaga,+ ina ia maua mai ai foʻi ni namu, ae ua latou lē mafaia lava.+ Ua oo atu namu i tagata atoa ma manu. 19  Ona fai mai lea o ositaulaga o ē e faia faiga faaagaga iā Farao: “O le aao*+ o le Atua!”+ Ae ua maaa pea le loto o Farao,+ ma ua lē faalogo iā i laʻua e pei lava ona fetalai mai ai Ieova. 20  Ua fetalai mai Ieova iā Mose: “Ia e usupō i le taeao ma tū i luma o Farao.+ Pe a sau Farao i le vai ona e fai atu lea iā te ia, ‘O le mea lenei ua fetalai mai ai Ieova: “Ia tuu mai loʻu nuu e ō ina ia latou auauna mai iā te aʻu.+ 21  Ae pe afai e te lē tuu mai loʻu nuu e ō, o le a ou faaoo atu iā te oe, i au auauna, i ou tagata ma i totonu o ou fale o lago taufeū;+ ma o le a matuā tumu ai fale o tagata Aikupito i lago taufeū, atoa ma le laueleele ua nonofo ai i latou. 22  I lenā aso ou te vavaeese ai le laueleele o Kosena, le mea ua nonofo ai loʻu nuu, ia lē oo i ai ni lago taufeū;+ ina ia e iloa ai o aʻu lava o Ieova ma ua iā te aʻu le pule i le lalolagi.+ 23  Ou te faaesea loʻu nuu mai i ou tagata.+ O le a tupu lenei faailoga a taeao.”’” 24  Ua faapea lava ona faia e Ieova; ua lolofi atu le anoanoaʻi o lago taufeū i le fale o Farao, i fale o ana auauna ma le atunuu atoa o Aikupito.+ Ua faaleagaina le atunuu atoa ona o lago taufeū.+ 25  Mulimuli ane, ona aami lea e Farao o Mose ma Arona ma faapea atu: “Ia ō e fai taulaga i lo outou Atua i lenei atunuu.”+ 26  A ua fai mai Mose: “E lē mafai ona matou faia faapea, auā o le mea e matou te faia ai le taulaga iā Ieova lo matou Atua o le mea lea e ʻinoʻino i ai tagata Aikupito.+ Seʻi faapea e matou te faia le taulaga i luma o tagata Aikupito, i le mea e latou te ʻinoʻino i ai; pe e latou te lē fetogia ai iā i matou i maa? 27  E ao ona matou ō i se malaga e tolu aso i le toafa, ma fai ai taulaga iā Ieova lo matou Atua, e pei ona ia fetalai mai ai iā i matou.”+ 28  Ua faapea atu Farao: “O aʻu, ou te tuuina atu outou e ō,+ ma ia outou fai taulaga iā Ieova lo outou Atua i le toafa.+ Ia aua lava neʻi outou ō mamao. Ia oulua ʻaiʻoi atu mo aʻu.”+ 29  Ona tali mai lea o Mose: “Ou te alu ese mai iā te oe, ou te ʻaiʻoi atu foʻi iā Ieova, ma o le a ō ese lago taufeū mai iā Farao, o ana auauna ma ona tagata a taeao. Tau lava ina neʻi toe faaʻoleʻole mai Farao, ma lē tuu mai le nuu e ō e fai taulaga iā Ieova.”+ 30  Ona alu ese lea o Mose mai iā Farao ma ʻaiʻoi atu iā Ieova.+ 31  Ua faia e Ieova e pei o upu a Mose,+ ua ō ese lago taufeū mai iā Farao, o ana auauna ma ona tagata.+ E aunoa ma se lago taufeū ua totoe. 32  Peitaʻi, ua toe faamaaa foʻi e Farao lona loto i lenā taimi ma lē tuu mai ai le nuu e ō.+

Faamatalaga Pito i Lalo

O se ituaiga iniseti e tai pei o le namu ia sa masani ona iai i Aikupito.
Po o “tamatamaʻilima o le Atua.”