Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Esoto 40:1-38

40  Ona fetalai mai lea o Ieova iā Mose e faapea:  “O le masina muamua,+ i le aso muamua o lea masina, e te faatū ai le faleʻie paia o le feiloaʻiga.+  E te tuu le atolaau o le feagaiga+ i totonu ma taofia ai le ō atu i le Atolaau i le ʻie puipui.+  E te avane foʻi i inā le laulau+ ma tuu ai mea e ao ona iai, e te avane le tuugāmolī+ ma tutu ona molī.+  E te tuu le fata faitaulaga auro e faamū ai mea manogi+ i luma o le atolaau o le feagaiga, ma tautau le ʻie pupuni i le faitotoʻa o le faleʻie paia.+  “E te tuu le fata faitaulaga+ e fai ai taulaga mū, i luma o le faitotoʻa o le faleʻie paia o le feiloaʻiga,  e te tuu foʻi le faatanoa i le va o le faleʻie o le feiloaʻiga ma le fata faitaulaga ma sasaa i ai ni vai.+  E te faia le lotoā+ e faataamilomilo ai ma tautau le ʻie pupuni+ o le faitotoʻa o le lotoā.  E te ave le uu e faauu ai+ ma faauu le faleʻie paia ma mea uma ua iai,+ e te faapaia le faleʻie paia ma ana mea uma e faaaogā ai, ina ia avea o se mea paia. 10  E te faauu foʻi le fata faitaulaga e fai ai taulaga mū ma ona mea uma e faaaogā ai ma faapaia le fata faitaulaga+ ina ia avea ma fata faitaulaga e sili ona paia.+ 11  E te faauu foʻi le faatanoa ma lona tulaga ma faapaia ai. 12  “Ona e aumaia lea o Arona ma ona atalii ia lata ane i le faitotoʻa o le faleʻie o le feiloaʻiga, ma e ao ona latou tāʻeele ai i le vai.+ 13  E te faaofuina Arona i ofu paia+ ma faauu iā te ia,+ ma faapaia iā te ia, ina ia auauna mai o ia o se ositaulaga iā te aʻu. 14  Mulimuli ane, e te aumaia ona atalii ma e te faaofuina i latou i ofu talaloa.+ 15  E te faauuina i latou e pei ona e faauu ai i lo latou tamā,+ ina ia latou auauna mai ai o ni ositaulaga iā te aʻu, ma e aogā pea lo latou faauuina o ni ositaulaga i o latou tupulaga o loo mulimuli mai.”+ 16  Ona faia lea e Mose e tusa ma mea uma lava na poloaʻi mai ai Ieova iā te ia.+ Ua faapea lava ona ia faia. 17  Ua oo i le masina muamua, o le tausaga lona lua, i le aso muamua o le masina, ua faatūina ai le faleʻie paia.+ 18  Ina ua faia e Mose le faleʻie paia, ua ia tuu i lalo o lagolago,+ ua faatulaga auivi laupapa,+ ua sulu ai pou faalava+ ma faatutū poutū.+ 19  Ona ia fofola lea o le ufiufi+ i luga o le faleʻie paia ma fofola ai foʻi le ufiufi mulimuli o le faleʻie i luga aʻe o le isi ufiufi+ e pei ona poloaʻi mai ai Ieova iā Mose. 20  Mulimuli ane, ua ia ave o papamaa ua fai ma Molimau+ ma teu i totonu o le Atolaau,+ ma sulu amo+ o le Atolaau ma tuu le ufiufi+ i luga o le Atolaau.+ 21  Ona ia avatu lea o le Atolaau i totonu o le faleʻie paia ma tautau le ʻie puipui+ e vaelua ai ma taofia ai le ō atu i le atolaau o le feagaiga,+ e pei ona poloaʻi mai ai Ieova iā Mose. 22  Ona ia tuu ai lea o le laulau+ i totonu o le faleʻie o le feiloaʻiga, i le itu i mātū o le faleʻie paia, i fafo o le ʻie puipui, 23  ma ua ia faatulaga faaputuga o falaoa+ i luga o le laulau i luma o Ieova, e pei ona poloaʻi mai ai Ieova iā Mose. 24  Ona ia tuu lea o le tuugāmolī+ i totonu o le faleʻie o le feiloaʻiga, i luma o le laulau, i le itu i saute o le faleʻie paia. 25  Ua ia tutu foʻi molī+ i luma o Ieova, e pei ona poloaʻi mai ai Ieova iā Mose. 26  Ona ia tuu lea o le fata faitaulaga auro+ i totonu o le faleʻie o le feiloaʻiga i luma o le ʻie puipui, 27  ina ia faamūina ai e ia o mea manogi lelei i luga o le fata faitaulaga,+ e pei ona poloaʻi mai ai Ieova iā Mose. 28  Mulimuli ane, ua ia tautau le ʻie pupuni+ o le faitotoʻa o le faleʻie paia. 29  Ua ia tuu le fata faitaulaga+ e fai ai taulaga mū i luma o le faitotoʻa o le faleʻie paia o le feiloaʻiga, ina ia faia ai e ia o taulaga mū+ ma taulaga i meaʻai, e pei ona poloaʻi mai ai Ieova iā Mose. 30  Ona ia tuu lea o le faatanoa i le va o le faleʻie o le feiloaʻiga ma le fata faitaulaga, ma sasaa i ai ni vai mo le fufuluina o vae ma lima.+ 31  Ua fufulu e Mose, o Arona ma ona atalii o latou lima ma vae i vai. 32  Ua latou fufulu+ ai pe a latou ō atu i totonu o le faleʻie o le feiloaʻiga, pe faalatalata atu foʻi i le fata faitaulaga, e pei ona poloaʻi mai ai Ieova iā Mose. 33  Mulimuli ane, ua ia faia le lotoā+ faataamilo i le faleʻie paia, o le fata faitaulaga ma tautau ʻie pupuni o le faitotoʻa o le lotoā.+ Ua faamāeʻaina e Mose le galuega. 34  Ua ufitia le faleʻie o le feiloaʻiga i le ao+ ma ua tumu le faleʻie paia i le pupula o Ieova. 35  Ua lē mafai ona alu Mose i totonu o le faleʻie o le feiloaʻiga, ona ua iai le ao+ i luga aʻe ma ua tumu le faleʻie paia+ i le pupula o Ieova. 36  Pe a siitia le ao mai i luga o le faleʻie paia, ona tapena lea o faleʻie o le fanauga a Isaraelu, ma faaauau la latou malaga+ i se isi mea. 37  Peitaʻi pe afai e lē siitia le ao, ona lē tapenaina lea o o latou faleʻie ma ō, seʻi vaganā ua oo i le aso ua siitia ai le ao.+ 38  Auā ua iai le ao a Ieova i luga o le faleʻie paia i le ao, a ua iai pea i ona luga le afi i le pō, ma ua vāai i ai aiga uma o Isaraelu, a o faagasolo la latou malaga+ i lea mea ma lea mea.

Faamatalaga Pito i Lalo