Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Esoto 38:1-31

38  Ua ia faia le fata faitaulaga e fai ai taulaga mū, i laau o le setima. E lima kupita le umi, ma e lima kupita le lautele, e faatafafā, ma e tolu kupita lona maualuga.+  Ua ia faia ona seu+ i ona tulimanu e fā. Ua lālā mai i tua ona seu. Ona ia ufiufi lea i le ʻapamemea.+  Ua ia faia o mea uma e faaaogā i le fata faitaulaga, o ʻapa, o suō, o ipu faaofuofu, o tui ma salefu. Ua ia faia o ia mea uma i le ʻapamemea.+  Ua ia faia foʻi mo le fata faitaulaga se lagolago i mea valavala ʻapamemea i lalo o le augutu, ma ua oo i le ogatotonu o le fata faitaulaga.+  Ua ia tunu ma fai ai mama e fā ma ua tuu i pito e fā o le fata faitaulaga e lata ane i le lagolago i mea valavala, e fai ma mea e lagolago ai amo.  Mulimuli ane ua ia faia amo mo le fata faitaulaga i laau o le setima, ma ufiufi i le ʻapamemea.+  Ona ia sulu lea o amo i mama i itu o le fata faitaulaga ina ia amo ai.+ Ua ia faia ai o se pusa i laupapa e pu totonu.+  Ua ia faia le faatanoa ma lona tulaga i le ʻapamemea,+ e faaaogā ai faata* a auauna fafine o ē na faia le galuega na faatulagaina, i le faitotoʻa o le faleʻie o le feiloaʻiga.+  Ona ia faia lea o le lotoā.+ Ua iai ni ʻie e tautau ai ua faia i le ʻie lino ua lelei ona milo ona filo, i le itu e faasaga i Nekepi, o le itu lea i saute, ma e selau kupita le uumi.+ 10  O ona poutū e lua sefulu ma lagolago e lua sefulu e ʻapamemea. E siliva pine o pou ma sooga.+ 11  E selau kupita i le itu i mātū. E ʻapamemea ona poutū e lua sefulu ma ona lagolago e lua sefulu. E siliva pine o poutū ma sooga.+ 12  A o le itu i sisifo e lima sefulu kupita le uumi o mea tautau. E sefulu ona poutū ma lagolago e sefulu.+ E siliva pine o poutū ma sooga. 13  Ae e lima sefulu kupita i le itu i sasaʻe, i le mea e oso aʻe ai le lā.+ 14  E sefulu lima kupita le uumi o ʻie tautau i le tasi itu. E tolu ona poutū ma lagolago e tolu.+ 15  E sefulu lima kupita foʻi le uumi o ʻie tautau i le isi itu o le faitotoʻa o le lotoā. E tolu ona poutū ma lagolago e tolu.+ 16  O ʻie tautau uma ua faataamilomilo i le lotoā, ua faia i ʻie lino ua lelei ona milo. 17  O lagolago o poutū ua faia i le ʻapamemea. E siliva pine o poutū ma sooga, o tumutumu e ufiufi i le siliva, e siliva foʻi sooga o poutū uma o le lotoā.+ 18  O le ʻie pupuni o le faitotoʻa o le lotoā o le galuega lea a se tagata e lalaga ʻie, ua faia i filo lanu moana, o fulufulu mamoe ua vali lanu violē, o mea ua vali mūmū sesega ma ʻie lino ua lelei ona milo ona filo,+ e lua sefulu kupita lona umi, e lima kupita le maualuga i mea uma, e tutusa foʻi ma ʻie tautau o le lotoā.+ 19  E ʻapamemea ona poutū e fā ma ona lagolago e fā. E siliva ona pine, ma ua ufiufi tumutumu ma sooga i le siliva. 20  E ʻapamemea pine uma o le faleʻie paia, ma pine o le lotoā lea o loo faataamilomilo ai.+ 21  O mea nei o le faitauga o mea o le faleʻie paia, o le faleʻie paia ua iai le Atolaau o le Feagaiga,*+ lea na faitauina ona o le poloaʻiga a Mose, e ala i galuega a le ʻau sa Levī+ i le taʻitaʻiga a Itamaro,+ le atalii o Arona le ositaulaga. 22  Ua faia e Pesaleli+ le atalii o Auri, le atalii o Huro, mai i le ituaiga o Iuta mea uma na poloaʻi mai ai Ieova iā Mose. 23  Ua faatasi ma ia o Oliavu+ le atalii o Aisamako, mai i le ituaiga o Tanu, o se tufuga, ma o se tagata e suʻi teuteu, ma o sē foʻi e lalaga i filo lanu moana, i fulufulu mamoe ua vali lanu violē, i mea ua vali mūmū sesega ma ʻie lino lelei. 24  O auro uma na faaaogā i le galuega o le mea paia, e tutusa ma le aofaʻiga o auro o le taulaga lūlū,+ e lua sefulu iva taleni, e fitu selau tolu sefulu o sekeli+ e tusa ma le fua masani o le mea paia.+ 25  O le siliva mai i ē na lesitalaina i le faapotopotoga, e selau taleni, ma sekeli e afe fitu selau fitu lima, e tusa ma le fua masani o le mea paia. 26  O le ʻafa o le sekeli mo le tagata e toʻatasi o le ʻafa o le sekeli lea e tusa ma le fua masani o le mea paia, o tagata taʻitoʻatasi o lē ua aofia i ē ua lesitalaina, e lua sefulu tausaga agaʻi i luga le matutua,+ e ono selau ma le tolu afe, lima selau lima sefulu le aofaʻiga.+ 27  E selau taleni siliva na faaaogā e tunu ma fai ai lagolago o le mea paia ma lagolago o le ʻie puipui. E selau lagolago na faia i taleni e selau, o le taleni e tasi i le lagolago e tasi.+ 28  O sekeli foʻi e afe fitu selau fitu sefulu lima, na ia faia ai o pine mo poutū, ma ufiufi ai tumutumu o poutū ma sosoo faatasi ai. 29  O ʻapamemea o le taulaga lūlū, e fitu sefulu taleni ma sekeli e lua afe fā selau. 30  Ona ia faia lea o lagolago o le faitotoʻa o le faleʻie o le feiloaʻiga, o le fata faitaulaga ʻapamemea, o le lagolago i mea valavala ʻapamemea, ma mea uma e faaaogā mo le fata faitaulaga, 31  o lagolago o le lotoā lea e faataamilomilo ai, o lagolago o le faitotoʻa o le lotoā, o pine uma o le faleʻie paia, ma pine+ uma o le lotoā lea e faataamilomilo ai.

Faamatalaga Pito i Lalo

O lona uiga, “o faata uʻamea ua uma ona faaiila lelei e iloa ai ni ata o mea.”
Po o le “Molimau.”