Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Esoto 30:1-38

30  “E te faia se fata faitaulaga e faamū ai mea manogi;+ e te faia i le laau o le setima.  E kupita lona umi e kupita foʻi lona lautele, e fai faatafafā, ma e lua kupita lona maualuga. E lālā mai i tua ona seu.+  E ao ona e ufiufi i le auro māoʻi o lona pito i luga, o ona itu uma ma ona seu; e ao foʻi ona e faia se teuteu auro e faataamilomilo ai.+  E te faia foʻi ni mama auro se lua mo le fata faitaulaga. I le pito i lalo o le teuteu i ona itu e lua e te faia ai, o itu ia e lua e faafesagaʻi, auā e fai ma lagolago i amo ia e amo ai.+  E te faia amo i laau o le setima ma ufiufi ai i le auro.+  E te tuuina ai i luma o le ʻie puipui e latalata i le atolaau o le feagaiga,+ i luma o le ufiufi o le Atolaau,* o i inā ta te feiloaʻi ai.+  “E ao iā Arona ona ia faamūina mea manogi+ lelei.+ E na te faamūina i taeao uma pe a ia saunia molī.+  Pe a tutu e Arona molī i le afiafipō* e na te faamūina ai. O se mea manogi e lē aunoa i luma o Ieova i o outou tupulaga o loo mulimuli mai.  Aua tou te faamū ai mea manogi e faasāina,+ pe faia ai se taulaga mū, po o se taulaga i meaʻai ma aua foʻi tou te sasaa taulaga i meainu i le fata faitaulaga. 10  E ao ona faia e Arona e faatasi i le tausaga o le togisala i luga o seu o le fata faitaulaga.+ E na te faia e faatasi i le tausaga lenei togisala mo le fata faitaulaga, i le toto o le taulaga o agasala+ i o outou tupulaga o loo mulimuli mai. O se mea e sili ona paia iā Ieova.” 11  Ua fetalai atili mai Ieova iā Mose e faapea: 12  “Pe a faitau le aofaʻiga o atalii o Isaraelu ina ia iloa lo latou faitau aofaʻi,+ e ao ona taʻitoʻatasi ona latou avatu se togiola mo lona ola iā Ieova pe a faia le faitauga o i latou,+ ina ia leai ai se mala e oo iā i latou pe a faia le faitauga o i latou.+ 13  O mea nei e avatu e i latou uma o ē ua aofia i ē ua faitauina: o le ʻafa sekeli e tusa ma le fua masani o le mea paia.+ O le lua sefulu kire* e tutusa lea ma le sekeli. O le ʻafa sekeli o le foaʻi lea iā Ieova.+ 14  E taʻitoʻatasi i latou ma avatu le foaʻi iā Ieova, o ē ua aofia i ē ua lesitalaina e lua sefulu tausaga ma ē e matutua atu.+ 15  E lē tatau ona tele mea e avatu e tagata mauʻoa, e lē tatau foʻi i tagata matitiva ona avatu mea e itiiti ifo i le ʻafa sekeli,+ pe a faia le foaʻi iā Ieova e fai ma togisala mo o outou ola.+ 16  E te aumaia foʻi tupe siliva o le togisala mai i atalii o Isaraelu ma avatu mo le auaunaga i le faleʻie o le feiloaʻiga,+ ina ia fai ma faamanatuga i luma o Ieova mo atalii o Isaraelu, ina ia faia ai le togisala mo o outou ola.” 17  Ua toe fetalai mai Ieova iā Mose e faapea: 18  “E te faia se faatanoa i le ʻapamemea ma lona tulaga i le ʻapamemea e faamamā ai,+ e te tuu foʻi i le va o le faleʻie o le feiloaʻiga ma le fata faitaulaga ma sasaa i ai ni vai.+ 19  E ao iā Arona ma ona atalii ona fufulu ai o latou lima ma o latou vae.+ 20  Pe a latou ulu atu i le faleʻie o le feiloaʻiga, e latou te mulumulu i le vai ina neʻi feoti i latou, pe a latou faalatalata atu foʻi i le fata faitaulaga e auauna i le faia o se taulaga i le afi ma alu aʻe ai le asu iā Ieova.+ 21  E ao ona latou fufulu o latou lima ma o latou vae ina neʻi feoti i latou,+ ia fai ai ma tuutuuga mo i latou i se taimi umi, o ia ma lana fanau ma o latou tupulaga o loo mulimuli mai.”+ 22  Ua toe fetalai mai Ieova iā Mose e faapea: 23  “A o oe, ia e ave o mea manogi e sili ona lelei:+ o muro+ ua sisina ma ua toʻa e lima selau iunite, ia e ave le ʻafa o lenā aofaʻiga o le kinamoni+ e suamalie e lua selau lima sefulu iunite, o le kani*+ e manaia lona manogi e lua selau lima sefulu iunite, 24  ma le kesia*+ e lima selau iunite e tusa ma le fua masani o le mea paia+ ma le sinu+ e tasi o le uu olive. 25  Ona e faia mai ai lea o le uu paia e faauu ai, o le uu manogi o se uu ua palu faafefiloi, o le galuega a se tagata fai uu manogi.+ E tatau ona avea ma uu paia e faauu ai.+ 26  “E te faauu ai le faleʻie o le feiloaʻiga+ ma le atolaau o le feagaiga, 27  o le laulau ma mea uma e faaaogā ai, o tuugāmolī ma mea uma e faaaogā ai, o le fata faitaulaga e mū ai mea manogi, 28  o le fata faitaulaga e fai ai taulaga mū ma mea uma e faaaogā ai, o le faatanoa ma lona tulaga. 29  E ao ona e faapaia ia mea ina ia paia ai.+ O se tasi e paʻi i ia mea e tatau ona paia o ia.+ 30  E te faauu iā Arona+ ma ona atalii,+ e te faapaia foʻi iā i latou ina ia auauna mai iā te aʻu o ni ositaulaga.+ 31  “E te fai atu i atalii o Isaraelu e faapea, ‘E fai pea lenei uu ma uu paia e faauuina ai iā te aʻu i o outou tupulaga o loo mulimuli mai.+ 32  Aua le uuina ai le tino o se tagata, ma aua tou te faaaogā lenei fua e faia ai se isi uu. O se mea e paia lenei uu. E ao ona avea pea o se mea e paia iā te outou. 33  O so o se tasi na te faia se uu manogi faapea ma uu ai se tagata ese* e tatau ona fasiotia o ia.’ ”+ 34  Ua toe fetalai mai Ieova iā Mose: “Ia e aoao mai ni mea manogi:+ o mea sisina o le natafa, o le sekeleta, o le pulu kalipana ua manogi lelei ma le lipano lelei.*+ E ao ona tutusa fua o ia mea. 35  Ia e palu faatasi ia mea ma faia ai se mea manogi,+ o se paluga faafefiloi o mea manogi, o le galuega a se tagata fai uu manogi, e faamasima,+ e mamā ma o se mea paia. 36  E te tuʻi i nisi o ia mea e fai ai se pauta lelei ma tuu se vaega i luma o le Atolaau* i le faleʻie o le feiloaʻiga,+ ta te feiloaʻi ai.+ E ao ona avea ma mea e sili ona paia iā te outou. 37  O le mea manogi e te faia mai i lenei fua, aua neʻi faia mo outou.+ Ae e paia pea lea mea iā te oe mo Ieova.+ 38  O se tasi e faia se mea faapea ina ia sogisogi i lona manogi e tatau ona fasiotia o ia.”+

Faamatalaga Pito i Lalo

Po o le “Molimau.”
I le gagana Eperu, i “le va o afiafi e lua.” O lona uiga o le va o le goto o le lā ma le pō.
 O le mamafa o le “kire” e 0.57 kalama (0.01835 aunese).
O le upu faa-Peretania o le calamus.
O le “kesia” o le laau o le kinamoni po o mea eseese e maua mai ai.
O lona uiga, “o se tasi e lē mai i le aiga o Arona.”
 O le “natafa” o se mea manogi e sinasina mai i se laau. O le “sekeleta,” atonu e fai mai i ni laau manogi po o ni figota. O le “lipano” o se mea manogi taugatā lea e manaia lona manogi pe a faamūina. E paʻepaʻe ma e tai pei o le sua o le laau o le pulu.
Po o le “Molimau.”