Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Esoto 3:1-22

3  Ua fai Mose ma leoleo mamoe o le lafu a le tamā o lana avā,+ o Ietero*+ le ositaulaga i Mitiana. A o ia tataʻi atu le lafu i le itu i sisifo o le toafa, ona ia oo atu lea i le mauga o le Atua moni,+ e taʻua o Horepa.+  Ona faaali mai lea o le agelu a Ieova iā te ia i se afi mumū i le laau tuitui.+ A o ia vaai atu pea, faauta, o loo mumū pea le laau tuitui ae e lē o liu efuefu.  Ua faapea ifo Mose: “Seʻi oʻu afe ane ou te matamata i lenei mea mataʻutia, pe aiseā ua lē liu efuefu ai le laau tuitui.”+  Ua silasila mai Ieova ua ia afe ane e matamata i ai, ona valaau mai lea o le Atua iā te ia mai i le laau tuitui ma fetalai mai: “Mose! Mose e!” ua ia tali atu: “O aʻu lenei.”+  Ona ia fetalai mai lea: “Aua e te sōsō mai i inei. Ia aveese ou seevae mai i ou vae, auā e paia le eleele o loo e tū ai.”+  Ua ia toe fetalai mai: “O aʻu o le Atua o lou tamā, le Atua o Aperaamo, le Atua o Isaako, ma le Atua o Iakopo.”+ Ona pupuni lea e Mose o ona mata, auā ua fefe o ia e vaai atu i le Atua moni.  Ua fetalai mai Ieova: “Ua ou iloa lava le sauāina o loʻu nuu o loo i Aikupito, ma ua ou faalogo i lo latou ōi ona o ē e tutuli faamalosi i latou e faia galuega; ua ou iloa puapuaga o loo mafatia ai i latou.+  Ou te alu ifo e laveaʻi iā i latou mai i lima o tagata Aikupito+ ma aumai i latou mai i lenā atunuu ae avatu i se atunuu e lelei ma telē, i le laueleele o loo tafe ai le suāsusu ma le meli,+ i le mea o loo nonofo ai le ʻau Kanana, o le ʻau Hetī, o le ʻau Amorī, o le ʻau Perise, o le ʻau Hivī ma le ʻau Iepusē.+  O lenei, ua oo mai iā te aʻu le alaga o le fanauga a Isaraelu ma ua ou iloa sauāga o loo faasauā ai tagata Aikupito iā i latou.+ 10  O lea, inā sau ia, ou te auina atu oe iā Farao, ma ia e aumaia loʻu nuu o le fanauga a Isaraelu mai i Aikupito.”+ 11  Peitaʻi ua fai atu Mose i le Atua moni: “O ai aʻu ou te alu atu ai iā Farao ma ou aumai le fanauga a Isaraelu mai i Aikupito?”+ 12  Ona ia fetalai mai lea: “Auā ou te faatasi ma oe,+ ma o le faailoga lenei e iloa ai, o aʻu na auina atu oe:+ Pe a mavae lou aumaia o le nuu mai i Aikupito, ona outou auauna ai lea i le Atua moni i lenei mauga.”+ 13  Ae ua faapea atu Mose i le Atua moni: “Ae faapefea pe a ou alu atu i le fanauga a Isaraelu ma ou faapea atu iā i latou, ‘O le Atua o o outou augātamā ua na auina mai aʻu iā te outou,’ ae latou te faapea mai iā te aʻu, ‘O ai lona suafa?’+ O le ā la laʻu tala e fai atu iā i latou?” 14  Ua fetalai mai le Atua iā Mose: “E AVEA AʻU MA LĒ OU TE LOTO I AI.”+ Ua ia toe fetalai mai: “Ia faapenei ona e fai atu i le fanauga a Isaraelu, ‘E AVEA AʻU MA LĒ OU TE LOTO I AI, o ia lea ua na auina mai aʻu iā te outou.’ ”+ 15  Ua toe fetalai mai le Atua iā Mose: “Ia faapenei ona e fai atu i le fanauga a Isaraelu, ‘Ua auina mai aʻu iā te outou e Ieova le Atua o o outou augātamā, le Atua o Aperaamo,+ le Atua o Isaako,+ ma le Atua o Iakopo.’+ O loʻu igoa lenā e faavavau,+ e manatua ai aʻu i lea tupulaga ma lea tupulaga.+ 16  Ia e alu ma faapotopoto toeaina o Isaraelu, ma e fai atu iā i latou, ‘Na faaali mai iā te aʻu Ieova le Atua o o outou augātamā,+ o le Atua o Aperaamo, o Isaako ma Iakopo, ma faapea mai: “Ou te matuā uaʻi+ atu iā te outou, ma mea ua faia iā te outou i Aikupito. 17  Ua ou faapea atu, Ou te aumaia outou mai i le mea na sauāina+ ai outou e tagata Aikupito, i le laueleele o le ʻau Kanana, o le ʻau Hetī, o le ʻau Amorī,+ o le ʻau Perise, o le ʻau Hivī ma le ʻau Iepusē,+ o le laueleele lea e tafe ai le suāsusu ma le meli.” ’+ 18  “E latou te faalogo i lou leo,+ ma e ao ona outou ō, o oe ma toeaina o Isaraelu, i le tupu o Aikupito, ma outou fai atu iā te ia, ‘Na matou feiloaʻi+ ma Ieova le Atua o tagata Eperu,+ o lea, faamolemole ua matou fia ō, i se malaga e tusa ma le tolu aso i le toafa, ma matou faia ai taulaga iā Ieova lo matou Atua.’+ 19  Ae o aʻu, ua ou iloa e lē tuuina e le tupu o Aikupito outou e ō seʻiloga o le lima malosi.+ 20  O lea, ou te faaoo atu loʻu lima+ ma taia ai Aikupito i aʻu gaoioiga mamana ou te faaoo i ai; a mavae lea ona ia aauina atu lea o outou.+ 21  Ou te faagaeeina le fiafia i loto o tagata Aikupito i lenei nuu; ma pe a outou ō, e lē savalivali fua se tasi.+ 22  E taʻitasi le fafine ma talosaga atu i lona tuaoi ma le fafine ua nofo aumau i lona fale, i mea siliva, i mea auro ma ofu, e faaofu ai o outou atalii ma afafine; ma outou faamativaina ai tagata Aikupito.”+

Faamatalaga Pito i Lalo

O Ietero e igoa foʻi iā Reuelu. Tagaʻi i le Eso 2:18; Nu 10:29.