Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Esoto 25:1-40

25  Ua fetalai mai Ieova iā Mose+ e faapea:  “Ia e fai atu i le fanauga a Isaraelu, ia latou aumaia ni foaʻi mo aʻu: Ia taʻitasi tagata uma ma foaʻi e tusa ma le mea ua manatu i ai lona loto ma ia outou aumaia ia foaʻi mo aʻu.+  O foaʻi nei ia outou aumaia mai iā i latou: o auro,+ o siliva+ ma ʻapamemea,+  o filo lanu moana, o fulufulu mamoe ua vali violē, o mea ua vali mūmū sesega, o ʻie lino lelei, o fulufulu ʻoti,+  o paʻu mamoe poʻa ua vali mūmū, o paʻu takesa,* o laau o le setima;+  o suāuu mo molī,+ o le suāuu pasama+ e faauu ai,+ ma le suāuu e fai ai foʻi le mea manogi lelei e mū;+  o maa soama, o maa e teuteu ai le efota+ ma le ufifatafata.*+  E ao ona latou faia se faleʻie paia mo aʻu, auā ou te nofo faatasi ma i latou.+  O mea uma ua ou faaali atu iā te oe, o le ata lea o le faleʻie paia ma le ata o mea uma o le a iai, o le auala lenā ia outou faia ai.+ 10  “Ia latou faia foʻi se Atolaau mai i laau o le setima,+ e lua ma le ʻafa kupita* lona umi, e kupita ma le ʻafa lona lautele, ma le kupita ma le ʻafa lona maualuga. 11  Ia e ufiufi i le auro māoʻi.+ Ia e ufiufi ai totonu ma fafo ma e faia se teuteu auro e faataamilomilo ai.+ 12  Ia e tunu ma fai ai ni mama auro se fā mo le Atolaau ma tuu i luga aʻe o ona vae e fā, e lua mama i le tasi itu ma mama e lua i le isi itu.+ 13  Ia e fai amo i laau o le setima ma ufiufi ai i auro.+ 14  Ia e sulu amo i totonu o mama o loo i itu o le Atolaau ina ia mafai ai ona amo e i latou le Atolaau. 15  E ao ona tuu ai pea amo i mama o le Atolaau. E lē tatau ona aveeseina.+ 16  E ao ona tuu i totonu o le Atolaau o papamaa ou te avatu iā te oe e fai ma molimau.+ 17  “E ao ona e faia se ufiufi i auro māoʻi, e lua ma le ʻafa kupita lona umi ma le kupita ma le ʻafa lona lautele.+ 18  E ao ona e faia ni kerupi auro se lua. Ia e fausia i auro e ala i le faaaogāina o le samala ma tuu i pito e lua o le ufiufi o le atolaau.+ 19  Ia faia le tasi kerupi i le tasi pito ma le isi kerupi i le isi pito.+ Ia outou faia kerupi i luga o le ufiufi i ona pito e lua. 20  E ao ona fālō i luga o la apaʻau e lua, ma faamalumalu le ufiufi o le atolaau i o la apaʻau, ma e faafesagaʻi o la mata.+ Ia faasaga i lalo mata o kerupi i le ufiufi. 21  Ia e tuu le ufiufi+ i luga o le Atolaau, ma ia e tuu i le Atolaau o papamaa ou te avatu iā te oe e fai ma molimau. 22  Ou te faaali atu aʻu iā te oe i inā ma ou te tautala atu iā te oe mai i luga o le ufiufi+ o le atolaau, mai i le va o kerupi e lua o loo i luga o le atolaau o le feagaiga,* o mea uma ou te poloaʻi atu ai iā te oe mo le fanauga a Isaraelu.+ 23  “E ao ona e faia se laulau+ i laau o le setima, e lua kupita lona umi, e kupita lona lautele ma e kupita ma le ʻafa lona maualuga. 24  E ao ona e ufiufi i le auro māoʻi ma faia ni ona teuteu auro e faataamilomilo ai.+ 25  Ia e faia se laupapa e tusa lona lautele ma le lautele o le alofilima* e faataamilo i autafa o le laulau, ma se teuteu auro e soo ai.+ 26  E ao ona e faia ni mama auro se fā ma tuu mama i tulimanu e fā, o vae ia e fā o le laulau.+ 27  E ao ona latalata mama i le laupapa e soo ai, e fai ma lagolago i amo e amo ai le laulau.+ 28  E ao ona e faia amo mai i laau o le setima ma ufiufi ai i le auro, ma e ao ona latou amoina le laulau.+ 29  “E ao ona e faia ona ipu mafolafola, o ipu, o fagu, ma ipu faaofuofu e latou te faaaogā e liligi ai taulaga o meainu. Ia e faia na mea i le auro māoʻi.+ 30  E ao foʻi ona e laulauina i luga o le laulau o le falaoa e laulauina i luma, ma ia lē aunoa i oʻu luma.+ 31  “E ao ona e faia se tuugāmolī i le auro māoʻi. Ia faia le tuugāmolī i le auro e ala i le faaaogāina o le samala.+ E ao ona iai ona ʻau, o ona lālā, o ona ipu, o ona pona ma fuga, ma e fesootaʻi ona vaega uma. 32  E ono lālā e falala mai i le ʻau, e tolu lālā o le tuugāmolī i le tasi itu a o le isi tolu lālā o le tuugāmolī e oso aʻe mai i le isi itu.+ 33  E tolu ipu e foliga e pei o ni fua o le sekati o loo i le lālā e tasi, e sosoo pona ma fuga, ma o le isi lālā e iai ipu e tolu e foliga e pei o le fua o le sekati, e sosoo pona ma fuga.+ O le auala lenei e falala mai ai lālā e ono mai i le tuugāmolī. 34  O le ʻau o le tuugāmolī e iai ipu e fā e foliga e pei o fua o le sekati, e sosoo pona ma fuga.+ 35  E oso aʻe lālā e lua mai i le pona i lalo ifo o ia lālā, e oso aʻe isi lālā e lua mai i le pona i lalo o ia lālā, e oso mai foʻi isi ona lālā e lua mai i le pona i lalo o ia lālā, auā o ia lālā e ono e oso aʻe mai i le tuugāmolī.+ 36  O pona ma lālā e falala mai i le ʻau o le tuugāmolī. E faia uma i le auro māoʻi e tasi e ala i le faaaogāina o le samala.+ 37  E ao ona e faia ni molī se fitu mo le tuugāmolī; e ao foʻi ona tutu molī ma faamalamalama ai mea i ona luma.+ 38  E faia foʻi i le auro māoʻi ona iofi ma ona salefu.*+ 39  E ao ona faia e ia le tuugāmolī ma mea uma e faaaogā ai i le taleni* o le auro māoʻi. 40  Ia faamautinoa ua e faia e tusa ma le ata sa faaali atu iā te oe i le mauga.+

Faamatalaga Pito i Lalo

Atonu e faasino atu le upu Eperu i se manu o le sami lea e taʻua i le faa-Peretania o le seal.
O se taga faatafafā na suʻi ai teuteu lea na tautau i le fatafata o le Ositaulaga Sili.
E tusa le kupita ma le 44.5 senitimita (17.5 inisi).
Po o le “molimau.”
E pe ā ma le 7.4 senitimita (2.9 inisi).
O se mea e pei o se tamaʻi suō e aveese ai malala mai i le afi.
Pe ā ma le 34.2 kilokalama (1101 aunese).