Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Esoto 22:1-31

22  “Pe afai e gaoi e se tamāloa se povi poʻa, po o se mamoe ma ia fasia pe e faatau atu foʻi, e na te totogi atu i povi poʻa e lima mo le povi poʻa e tasi, ma mamoe e fā mo le mamoe e tasi.+  (“Pe afai e maua se gaoi+ o osofaʻia+ se fale, ae ua tā o ia ma oti ai, e lē nofosala i le toto lē na tāina o ia.+  Ae afai e osofaʻia e ia le fale ae ua alu aʻe le lā, e nofosala i le toto lē na tāina o ia.) “Ia matuā avatu se totogi e le tagata gaoi. Afai e leai se mea o iā te ia, ona ia faatau atu lea o ia mo mea ua ia gaoia.+  Afai e maua lava i lona lima mea ua gaoia, po o se povi poʻa, po o se asini, po o se mamoe, o loo ola, e tatau ona faalua ona totogi atu.  “Pe afai e faapogaia e se tamāloa le ʻaina o mea uma o se fanua po o se togāvine, e ala i le faataaloa o ana manu ave avega i le fanua o se isi tagata, e ao ona ia totogi+ atu i faaeleeleaga e sili ona lelei mai i lona lava fanua, po o fua e sili ona lelei o lona lava togāvine.  “Afai e tutu e se tasi se afi ma oo atu i laau tuitui ma sosolo atu i fusi saito, ma togāsaito,* pe mū atoa+ le fanua, e toe totogi atu lava e lē na tutuina le afi mea ua mū.  “Afai e avatu e se tamāloa i lona tuaoi ni tupe po o ni mea e na te vaavaaia,+ ae ua gaoia mai i le fale o le tuaoi, afai e maua le gaoi, e ao ona ia faaluaina mea e totogi atu.+  Afai e lē maua le gaoi, ona aumaia lea o lē e ona le fale ma faalatalata atu i le Atua moni,+ ina ia iloa ai pe na tago o ia i oloa a lona tuaoi.  Ae e tusa ai ma soligatulafono+ uma lava e faatatau i se povi poʻa, o se asini, o se mamoe, o se ofu po o so o se mea ua leiloa, ia e mafai ona faapea mai se tasi, ‘O aʻu mea nei!’ e ao ona aumaia la laʻua mataupu i luma o le Atua moni.+ O lē e faailoa mai e le Atua o le tagata leaga, e ao ona faaluaina e ia o mea e totogi atu i lona tuaoi.+ 10  “Pe afai e avatu e se tamāloa i lona tuaoi se asini, po o se povi poʻa, po o se mamoe, po o se manu e lata e na te vaavaaia, ae ua mate po ua pipili pe puʻea e aunoa ma le iloa e se tasi, 11  o lea, o le tamāloa na avatu i ai mea e na te vaavaaia, e ao ona tautō+ i le suafa o Ieova e na te leʻi tago i oloa a lona tuaoi;+ ma e ao i lē e ana mea ona talia, ma e lē avatua e lē na vaavaaia mea se totogi. 12  Ae afai e moni ua gaoia mai iā te ia a o ia vaavaaia, e ao ona totogi atu e ia i lē e ana ia manu.+ 13  Afai e saeia lava lea manu e se manu o le vao,+ e ao ona ia aumaia e fai ma faamaoniga.+ Auā o se mea e saeia e se manu o le vao, e lē tatau ona ia avatua se totogi. 14  “Ae afai e faanoi e se tasi se manu i lona tuaoi,+ ae ua pipili pe e mate ae e lē o iai lē e ona lea manu, e ao lava ona ia totogi atu mo lea manu.+ 15  Afai o iai lē e ona lea manu, e lē totogiina atu se mea. Ae afai ua fuafua e totogi mo le faaaogāina o le manu, e totogi e na o le tau e faaaogā ai. 16  “Afai e faasee e se tamāloa se taupou e leʻi faamau, ma ua la momoe faatasi ma ia,+ e ao lava ona ia ave o ia e fai ma ana avā i le totogiina o le tau o le teine faaipoipo.+ 17  Afai e matuā musu lona tamā e avatu o ia iā te ia, e ao ona ia totogi atu pea le tupe e tusa ma le tau o le teine muli.+ 18  “Aua e te tuu se fafine faataulāitu ia ola pea.+ 19  “O so o se tasi e feusuaʻi ma se manu, ia fasiotia lava o ia.+ 20  “O se tasi e fai taulaga i se isi atua, e tatau ona faaumatia o ia, auā e na o Ieova e ao ona fai taulaga i ai.+ 21  “Aua e te faatigā i se tagata ese ua aumau pe faasauā iā te ia,+ auā na avea outou ma tagata ese na aumau i Aikupito.+ 22  “Aua tou te faapuapuagatia se fafine ua oti lana tane po o se tama ua leai sona tamā.+ 23  Afai e te faapuapuagatia lava iā te ia, ae e matuā alaga mai o ia iā te aʻu, ou te faalogo lava i lana alaga;+ 24  ona ou matuā ita ai lea,+ ma ou te fasiotia outou i le pelu, e avea a outou avā ma fafine ua feoti a latou tane, ma o outou atalii ua leai ni tamā.+ 25  “Afai e te nonō atu tupe i se tasi o oʻu tagata, o lē ua puapuagatia e te lua felataʻi,+ e lē tatau ona avea oe o sē e fai pisinisi i le nonōina o tupe. Aua foʻi tou te fai atu iā te ia i se totogi faasili.+ 26  “Afai e te ave le ofu o lou tuaoi e fai ma mea e faamau ai se aitalafu,+ e tatau ona e toe faafoʻi atu iā te ia i le taimi e goto ai le lā. 27  Auā e na o le pau lea o le mea e ufiufi ai lona tino.+ O le ā le mea e moe ai pe afai e lē avatua i ai le ofu mo lona tino? Ona ia tagi mai lea iā te aʻu, ma ou te faalogo lava iā te ia, auā ou te alofa fua.+ 28  “Aua e te fetuu i le Atua,+ pe faamalaia se taʻitaʻi ua iā te outou.+ 29  “Aua e te faatuai i le avatuina o le tele o au uluaʻi faaeleeleaga,+ o le tele foʻi o lau suāvine ma lau suāolive. O le ulumatua a ou atalii e te aumaia iā te aʻu.+ 30  Ia faapenei ona e faia i lau tamaʻi povi poʻa ma lau tamaʻi mamoe:+ Ia tuu pea i lona tinā i aso e fitu.+ Ae i le aso lona valu, ia e aumaia ai iā te aʻu. 31  “Ia fai outou ma oʻu tagata paia;+ ia aua neʻi outou aai i le aano o se manu ua saeia i le fanua e se manu o le vao.+ Ia lafo i taʻifau e aai ai.+

Faamatalaga Pito i Lalo

Pe e faasino atu foʻi i le karite (barley).