Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Esoto 20:1-26

20  Ona fetalai mai lea o le Atua i nei upu uma ua faapea mai:+  “O aʻu o Ieova o lou Atua,+ o lē na aveesea oe mai i le atunuu o Aikupito, o le mea na e nofo pologa ai.+  Aua neʻi fai mo oe ni atua+ ese e faasagatau mai iā te aʻu.  “Aua neʻi e faia se tupua ua tā po o se faatusa o se mea o i le lagi i lugā, po o se mea i lalo nei i le laueleele, po o se mea i le vai i lalo o le laueleele.+  Aua e te ifo i ai pe auauna i ai,+ auā o aʻu o Ieova lou Atua, o le Atua e manaʻo e tapuaʻi mai e tau lava o aʻu,+ o lē na te faasalaina atalii ona o mea sesē a o latou tamā, e oo i le tupulaga e tolu ma le fā, o i latou o ē e ʻinoʻino mai iā te aʻu;+  ae ou te faaalia le alofa faamaoni i afe o tupulaga, o ē e alolofa mai iā te aʻu ma tausi i aʻu poloaʻiga.+  “Aua e te faaaogā ma le lē tatau+ le suafa o Ieova lou Atua, auā e lē faasaoina e Ieova mai i le faasalaga, o lē e faaaogā ma le lē tatau lona suafa.+  “Ia manatua ma tausia le aso sapati ma faapaiaina,+  ia e galue ma faia au galuega uma i aso e ono.+ 10  Ae o le aso lona fitu, o le sapati lea iā Ieova lou Atua.+ Aua e te faia ai se galuega, o oe, o lou atalii, ma lou afafine, o lau tane pologa, ma lau teine pologa, o au manu lalata foʻi, ma le tagata ese o loo aumau ma oe i le aai.+ 11  Auā na faia e Ieova i aso e ono o le lagi ma le lalolagi, o le sami ma mea uma lava o loo iai,+ ona amata ai lea ona mālōlō o ia i le aso lona fitu.+ O le mea foʻi lea, na faamanuia ai e Ieova le aso sapati ma faapaiaina ai.+ 12  “Ia e āva i lou tamā ma lou tinā+ ina ia faaumiumi ai ou aso i le laueleele o le a foaʻi atu e Ieova lou Atua iā te oe.+ 13  “Aua e te fasioti tagata.*+ 14  “Aua e te mulilua.+ 15  “Aua e te gaoi.+ 16  “Aua e te molimau pepelo i lou tuaoi.+ 17  “Aua e te manaʻo i le fale o lou tuaoi. Aua foʻi e te manaʻo i le avā a lou tuaoi,+ o lana tane pologa, ma lana teine pologa, o lana povi poʻa, ma lana asini, po o se isi lava mea a lou tuaoi.”+ 18  Ua faalogo le nuu i faititili ma le taalili o le pū, ua latou vaaia foʻi le emo o uila ma le asu mai i le mauga. Ua iloa atu nei mea e le nuu, ona latou gatete ai lea ma tutū mamao atu.+ 19  Ua latou faapea mai iā Mose: “Ia e tautala mai iā i matou, a o matou faalogo atu; ae aua le fetalai mai le Atua iā i matou neʻi o matou feoti.”+ 20  Ua faapea atu Mose i le nuu: “Aua tou te fefefe, auā ua afio mai le Atua moni e tofotofoina outou,+ ina ia faaauau ona outou matataʻu iā te ia ma outou lē agasala ai.”+ 21  Ua tutū mamao pea le nuu, a o faalatalata atu Mose i le ao pogisa e mafiafia lea o loo iai le Atua moni.+ 22  Ua toe fetalai mai Ieova iā Mose:+ “O le mea lenei e te fai atu ai i le fanauga a Isaraelu, ‘Ua outou iloa, na ou tautala atu iā te outou mai i le lagi.+ 23  Aua neʻi outou faia ni atua siliva ma tapuaʻi mai ai iā te aʻu, aua foʻi tou te faia ni atua auro mo outou.+ 24  Ia e faia mo aʻu se fata faitaulaga mai i le eleele,+ ina ia e fai ai taulaga, o taulaga mū ma taulaga faifaatasi,* o lau lafu mamoe ma au lafumanu.+ Ou te alu atu iā te oe ma faamanuia atu iā te oe i mea uma ou te filifilia ina ia manatua ai loʻu igoa.+ 25  Afai foʻi e te faia se fata faitaulaga i maa mo aʻu, aua e te faia i maa ua uma ona teu. Pe afai e te vaneina i le tofi, ona e faaleagaina ai lea o le fata faitaulaga.+ 26  Aua neʻi faia ni faasitepu e alu atu ai i loʻu fata faitaulaga, ina neʻi iloa atu ou totogasā.’

Faamatalaga Pito i Lalo

Ua faasino atu le fasioti tagata i lenei mau i le fasioti tagata faamoemoeina ma le solitulafono.
Po o “taulaga o le filemu.” O lona uiga o taulaga ua faaalia ai ua maua e le tagata na faia le taulaga le filemu ma le Atua.