Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Esoto 2:1-25

2  I na aso, na fai avā ai se tamāloa mai i le ituaiga o Levi, i se afafine o Levi.+  Ua tō le fafine ma fanau mai se tama tama. Ua iloa e ia ua aulelei lana tama, ona ia natia+ lea o ia mo le tolu masina.+  Ua lē toe mafai ona ia natia o ia,+ ona ia aumaia lea o se ato kome,* ua ia puluti i le tā,*+ ma tuu ai i totonu le tama, ona faaopeopea lea i le mea ua iai laau o ū+ e lata ane i le auvai o le vaitafe o le Naila.  Ua tū mamao atu lona tuafafine e vaai po o le ā se mea e tupu iā te ia.+  Mulimuli ane, ona alu ifo ai lea o le afafine o Farao e tāʻele i le Vaitafe o le Naila, ae ua savavali ana auauna fafine i autafa o le Vaitafe o le Naila. Ona ia vaaia lea o se ato i le ogatotonu o laau o ū. Ua faavave ona ia auina atu lana teine pologa e aumai le ato.+  Ina ua ia tatala le ato ona ia iloa ai lea o le tamaitiiti, ma o loo tagi o ia. Ona ootia lea o ia i le alofa iā te ia,+ e ui ua ia faapea ane: “O se tamaitiiti lenei a tagata Eperu.”  Ona fai mai lea o lona tuafafine i le afafine o Farao: “Ou te alu ea e aami se failele Eperu e sau iā te oe e na te tausi le tama mo oe?”  Ua fai atu le afafine o Farao iā te ia: “Inā alu ia!” Ona alu loa lea o le teineitiiti ma aami le tinā o le tamaitiiti.+  Ua fai atu le afafine o Farao iā te ia: “Ia e ave lenei tamaitiiti ma tausi iā te ia mo aʻu, ae ou te avatu pea iā te oe lou totogi.”+ Ona ave lea e le fafine o le tamaitiiti ma tausi iā te ia. 10  Ua matua le tamaitiiti. Ona ia avatu lea o ia i le afafine o Farao, ma ua fai o ia ma ana tama;+ ua ia faaigoa iā te ia o Mose* ma ua faapea ane: “Auā na ou ave aʻe o ia mai i le vai.”+ 11  Ua oo i aso ua matua ma malosi ai Mose, ona ia alu atu lea e asiasi i ona uso, ma vaai i avega mamafa o loo latou tauaveina;+ ma ua ia iloa atu ai se tagata Aikupito o loo fasia se tagata Eperu, o se tasi o ona uso.+ 12  Ua fetilofaʻi solo ma ua leai se tasi na te iloa atu. Ona ia tā lea i le tagata Aikupito ma oti ai, ma ua ia nanā o ia i le oneone.+ 13  Ae i le aso na sosoo ai, ua alu atu o ia ma iloa ai ni tamāloloa Eperu se toʻalua o loo fetauaʻi. Ona ia fai atu lea i lē ua sesē: “Aiseā ua e tā ai i lou tuaoi?”+ 14  Ua ia tali mai: “O ai na tofia oe e fai ma perenise ma faamasino iā i maʻua?+ Po ua e fuafua ea e fasioti iā te aʻu e pei ona e fasiotia o le tagata Aikupito?”+ Ua fefe Mose ma faapea ifo: “E lē taumatea ua iloa lenei mea!”+ 15  Ua logotala Farao e uiga i lenei mea, ma ua ia fia fasioti iā Mose;+ ae ua sola+ Mose mai iā Farao ma alu atu e nofo i le laueleele o Mitiana;+ ina ua oo o ia i inā ona ia nofo lea e lata ane i se vaieli. 16  E toʻafitu afafine o le ositaulaga+ o Mitiana, ma e pei ona masani ai, ua latou ō mai ma asu aʻe vai e faatumu ai faatanoa e faainu ai le lafu a lo latou tamā.+ 17  E pei ona masani ai, e ō mai leoleo mamoe ma tutuliese i latou ma a latou lafu. Ona tulaʻi lea o Mose ma fesoasoani i ia fafine ma faainu i a latou lafu.+ 18  Ua latou ō mai i le fale i lo latou tamā o Reuelu,+ ma ua ia fai atu ma le ofo: “Aiseā ua outou vave mai ai i le fale i lenei aso?” 19  Ua latou fai mai: “Ua laveaʻi i matou e se tagata Aikupito+ mai i lima o leoleo mamoe, ma ua ia asu aʻe foʻi vai mo i matou ma ia faainu ai le lafu.” 20  Ona ia fai atu lea i ona afafine: “O fea la o iai o ia? Aiseā ua outou lē ō mai faatasi ai ma ia? Inā ō atu ma aami o ia ina ia ʻai sana meaʻai.”+ 21  Mulimuli ane, ua malie Mose e nofo faatasi ma le tamāloa, ma ua ia avatu lona afafine o Sepora+ e fai ma avā a Mose. 22  Mulimuli ane ua ia fanaua se tama tama, ma ua faaigoa e Mose o ia o Keresoma,*+ auā ua ia faapea ane: “Ua ou aumau i le nuu ese.”+ 23  Ua mavae atu le tele o aso, ona oti ai lea o le tupu o Aikupito,+ ae ua faaauau ona mafatia le fanauga a Isaraelu ona o le nofo pologa, ua feoi ona o tulaga leaga,+ ma ua oo atu la latou alaga mo se fesoasoani i le Atua moni, ona o lo latou nofo pologa.+ 24  Ua oo ina faafofoga+ le Atua i lo latou feoi+ ma ua ia manatua lana feagaiga na faia ma Aperaamo, o Isaako ma Iakopo.+ 25  Ua silasila ifo le Atua i le tulaga o le fanauga a Isaraelu ma ua liuliualo mai le Atua iā i latou.

Faamatalaga Pito i Lalo

Po o se pusa laʻitiiti faatafafā o le laau o le ū.
I le gagana Eperu, o le “pulu emeri, ma le pulu safeta.”
O lona uiga, “Ave Aʻe” po o “Laveaʻi Mai i le Vai.”
O lona uiga, “O le Tagata Ese e Aumau i Inā.”