Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Esoto 16:1-36

16  Mulimuli ane, ona latou tuua lea o Ailima,+ ma ua oo atu le faapotopotoga atoa o le fanauga a Isaraelu i le toafa o Sina,+ lea o loo i le va o Ailima ma Sinai. O le aso lona sefulu lima foʻi lea o le masina lona lua, talu ona latou ō ese mai i le atunuu o Aikupito.  Ua muimui le faapotopotoga atoa o le fanauga a Isaraelu iā Mose ma Arona i le toafa.+  Ua faapea mai pea le fanauga a Isaraelu iā i laʻua: “Maʻimau pe ana matou feoti+ lava i le aao o Ieova i Aikupito a o matou aai i aano o manu,+ ma matou aai foʻi i falaoa ma maoona ai, a o lenei ua oulua aumaia i matou i lenei toafa ina ia fasiotia ai lenei faapotopotoga atoa i le oge.”+  Ona fetalai mai lea o Ieova iā Mose: “O le a ou faatotō ifo meaʻai mai i le lagi mo outou;+ e tatau ona ō atu le nuu ma ao mai e tusa ma mea e talafeagai ma le tagata i aso taʻitasi,+ ina ia ou tofotofoina ai i latou, pe e latou te savavali i laʻu tulafono pe e leai.+  A o le aso lona ono,+ e latou te saunia mea e ave i le aiga, e ao ona faaluaina i mea latou te aoina i lea aso ma lea aso.”+  Ua faapea atu Mose ma Arona i le fanauga a Isaraelu: “O le afiafipō e tou te iloa ai o Ieova lava na aumaia outou mai i Aikupito.+  O le taeao e tou te iloa ai le mamalu o Ieova,+ auā ua faafofoga Ieova i lo outou muimui atu iā te ia. Aiseā e tou te muimui mai ai iā i maʻua? Auā e lē tāua i maʻua.”  Ua toe faapea atu Mose: “I le afiafipō e foaʻi mai e Ieova iā te outou aano o manu e aai ai, a o le taeao e na te foaʻi mai ai falaoa e maoona ai, auā ua faafofoga Ieova i a outou muimuiga, na outou muimui ai iā te ia. O ai i maʻua? E lē o i maʻua ua outou muimui i ai, a o Ieova.”+  Ua fai atu Mose iā Arona: “Ia fai atu i le faapotopotoga atoa o le fanauga a Isaraelu, ‘Ia faalatalata mai i luma o Ieova auā ua ia faafofoga i lo outou muimui.”+ 10  Ina ua faatoʻā uma ona talanoa atu Arona i le faapotopotoga atoa o le fanauga a Isaraelu, ua latou liliu ma faasaga atu i le toafa, faauta foʻi! ua faaali mai le mamalu o Ieova i le ao.+ 11  Ua fetalai atili mai Ieova iā Mose, e faapea: 12  “Ua ou faalogo i muimuiga a le fanauga a Isaraelu.+ Ia tautala atu iā i latou, e faapea, ‘E tou te aai i le aano o manu i le afiafipō a o le taeao e tou te maoona ai i le falaoa;+ ma o le a outou iloa ai o aʻu o Ieova o lo outou Atua.’ ”+ 13  Ua oo i le afiafipō, ona oo mai ai lea o salu*+ ma ufitia ai le togālauapi, a o le taeao ua iai le sau i le eleele lea e siʻomia ai le togālauapi.+ 14  Mulimuli ane, ua mou atu le sau, ae i luga o le fogāeleele o le toafa, ua iai mea manutinuti,+ e itiiti e pei o le sautoʻa+ i luga o le eleele. 15  Ina ua vāai i ai le fanauga a Isaraelu, ona latou faapea ane lea o le tasi i le isi: “O le ā lenei mea?” Auā ua latou lē iloa po o le ā lea mea. Ua faapea atu Mose iā i latou: “O le meaʻai lea ua foaʻi mai e Ieova iā te outou, e tou te aai ai.+ 16  O le afioga lenei na poloaʻi mai ai Ieova, ‘Ia ao mai nisi o nei mea, e tusa ma le meaʻai e maʻona ai le tagata. Ia outou ave le fua e tusa ma le omera*+ mo tagata taʻitoʻatasi e tusa ma le aofaʻi o tagata o loo i o outou faleʻie.’ ” 17  Ua faapena ona faia e le fanauga a Isaraelu; ua ao ia mea, ua tele mea e ao e isi a ua itiiti isi. 18  Ua latou fua e tusa ma le omera, o lē e tele mea ua ia aoina, e leai se mea ua totoe ma lē ua itiiti ana mea ua lava lelei.+ Ua latou ao e tusa ma le mea e maʻona ai le tagata. 19  Ona faapea atu lea o Mose iā i latou: “Aua neʻi tuua e se tasi se mea mo le taeao.”+ 20  A ua lē faalogo i latou iā Mose. Ae ina ua tuu e nisi tagata ni mea mo le taeao, ua tumu i ilo ma elo ai;+ ona ita ai lea o Mose iā i latou.+ 21  Ua latou aoina i lea taeao+ ma lea taeao, e tusa ma le mea e maʻona ai le tagata. A vevela le lā ona liusuavai ai lea. 22  O le aso lona ono, ua faaluaina meaʻai ua latou aoina,+ e lua omera mo le tagata e toʻatasi. Ona ō mai lea o taʻitaʻi o le faapotopotoga ma taʻu mai nei mea iā Mose. 23  Ua ia faapea atu iā i latou: “O le fetalaiga lenei a Ieova. O taeao o le sauniga o le sapati, o le sapati paia iā Ieova.+ O mea e mafai ona outou tao, ia tao,+ ma mea e mafai ona tunu, ia tunu, a o mea uma ua totoe ia teu mo outou mo a taeao.” 24  Ona latou teu ai lea o ia mea seʻia oo i le taeao, e pei ona fai atu ai Mose; e leʻi elo lava pe e iai foʻi ni ilo.+ 25  Ua faapea atu Mose: “Ia aai i lenei meaʻai i le asō, auā o le asō o le sapati+ lea iā Ieova. E tou te lē maua ai i le fanua nei mea i le asō. 26  E ono aso e tou te aoina ai, ae o le aso lona fitu o le sapati lea.+ O lea aso, e leai ai se mea e maua ai.” 27  Peitaʻi i le aso lona fitu, ua ō atu ai nisi o tagata ina ia ao mai ni mea, a ua lē maua e i latou se mea.        28  Ona fetalai mai ai lea o Ieova iā Mose: “O le ā le umi e tou te lē tausia ai aʻu poloaʻiga ma aʻu tulafono?+ 29  Ia utagia lenei mea, ua tuuina mai e Ieova le sapati+ iā te outou. O le mea lea, ua ia foaʻi mai ai iā te outou i le aso lona ono o meaʻai mo aso e lua. Ia nofo le tagata ia i lona faleʻie+ i le aso lona fitu. Ia aua neʻi alu ese se tasi mai i le mea e nofo ai.” 30  Ona tausia lea e tagata o le sapati i le aso lona fitu.+ 31  Ua faaigoa e tagata Isaraelu lenei mea o le “manai.”* Ua paʻepaʻe e pei o le fatu o le koriano, o lona tofo e pei o falaoa mafolafola ua iai le meli.+ 32  Ua faapea atu Mose: “O le afioga lenei a Ieova na ia poloaʻi mai ai, ‘Ia ao le fua e tusa ma le omera o lenei meaʻai ina ia teuina mo o outou tupulaga+ o loo mulimuli mai, ina ia latou vāai ai i le meaʻai na ou fafagaina ai outou i le toafa, ina ua ou aumaia outou mai i Aikupito.’ ”+ 33  Ua faapea atu Mose iā Arona: “Ia tago i se fagu ma tuu ai le manai e tusa ma le omera ma tuuina i luma o Ieova e fai ma mea e teuina mo o outou tupulaga o loo mulimuli mai.”+ 34  E pei ona poloaʻi mai ai Ieova iā Mose, ona ave lea e Arona o lenei mea ma tuu i luma o le Atolaau*+ ina ia teu ai. 35  Na aai le fanauga a Isaraelu i le manai mo tausaga e fā sefulu,+ seʻia oo atu i latou i le laueleele ua ʻainā.+ O le manai na latou aai ai seʻia oo ina latou ō atu i le tuaoi o le atunuu o Kanana.+ 36  O le omera o le tasi vaesefulu o le efa.*

Faamatalaga Pito i Lalo

O se tamaʻi manulele peti e tusa ma le 18 senitimita (7 inisi) lona umī. E lelei mo le tausami.
O le fua o le “omera” e pe ā ma le 2.2 lita (2 kuata).
Atonu o le uiga o lenei upu ‘O le ā lenei mea?’ (Faa-Eperu, man hu?) Tagaʻi i le fuai e 15.
I le gagana Eperu, o le “Molimau” lea e fai ma faamanatuga. E foliga mai o se pusa na teu ai pepa tāua.
O le fua o le “efa” pe tusa ma le 22 lita (20 kuata).