Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Esoto 14:1-31

14  Ona fetalai mai ai lea o Ieova iā Mose e faapea:  “Ia e fai atu i le fanauga a Isaraelu, ina ia toe foʻi e faatutū o latou faleʻie i luma o Peairota i le va o Mekatala ma le sami e feagai ma Paalasefona.+ Ia faatutū o outou faleʻie i luma o lea aai e lata ane i le sami.  Ona faapea ifo lea o Farao e faatatau i le fanauga a Isaraelu, ‘Ua latou feoaʻi solo ma le lē mautonu i le laueleele. Ua siʻomia pea i latou i le toafa.’+  O le mea lea, ou te tuu ai pea Farao e faamaaa i lona loto,+ e na te tuliloa i latou, ma e faamamaluina ai aʻu i le faatoʻilaloina o Farao ma ana ʻautau;+ ma e iloa ai e tagata Aikupito, o aʻu lava o Ieova.”+ Ua faapea lava ona faia e tagata Isaraelu.  Mulimuli ane, ua logotala le tupu o Aikupito, ua sosola le nuu. Ona suia lea o le loto o Farao ua faapena foʻi i ana auauna e faatatau i le nuu,+ ua latou faapea ane: “O le ā lenei mea ua tatou faia, i lo tatou tuuina atu o tagata Isaraelu e ō ma lē toe avea ma a tatou pologa?”+  Ua ia saunia ana kariota o le taua, ma ua ia ave ona tagata faatasi ma ia.+  Ua ia ave foʻi o kariota+ faapitoa e ono selau, ma isi kariota uma a Aikupito, ma fitafita o ē e tiʻetiʻe i kariota taʻitasi.  Ua tuu pea e Ieova o Farao le tupu o Aikupito e faamaaa i lona loto,+ ma ua ia tuliloa tagata Isaraelu, a o ō ese atu le fanauga a Isaraelu ma sisii i luga o latou lima.*+  Ua tuliloa e tagata Aikupito i latou, o kariota a Farao, o ana ʻautau tiʻetiʻe solofanua,+ ma ana ʻautau, ua tau lalata atu iā Isaraelu a o nonofo i latou i faleʻie i autafa o le sami, e lata ane i Peairota e feagai ma Paalasefona.+ 10  Ina ua latalata atu Farao, ona tetepa aʻe lea o le fanauga a Isaraelu, ma iloa ai tagata Aikupito o loo tuliloa mai i latou; ua matuā fefefe le fanauga a Isaraelu ma alalaga atu iā Ieova.+ 11  Ua latou faapea mai iā Mose: “Po ua leai ni fanuatanu i Aikupito ua e aumaia ai i matou e feoti i le toafa?+ O le ā lenei mea ua e faia iā i matou i le aveese o i matou mai i Aikupito? 12  Pe e matou te leʻi fai atu ea iā te oe i Aikupito, ‘Ia tuu pea i matou e auauna i tagata Aikupito’? Auā e sili iā i matou le auauna i tagata Aikupito, nai lo o le feoti i le toafa.”+ 13  Ona faapea atu lea o Mose i le nuu: “Aua tou te fefefe.+ Ia outou laulaututū ma vāai i le faaolataga mai iā Ieova, o le a faia e ia mo outou i le aso nei.+ Auā o tagata Aikupito ua outou vāai i ai i le asō, e tou te lē toe vāai lava i ai.+ 14  E tau Ieova mo outou,+ a o outou laulaututū ma faalologo.” 15  Ua fetalai mai Ieova iā Mose: “Aiseā e te alaga soo mai ai iā te aʻu?+ Ia e fai atu i le fanauga a Isaraelu, ia tapena o latou faleʻie ma sauni e ō. 16  A o oe, ia e sii i luga lou tootoo+ ma faaloaloa lou lima i le sami, ma vaelua ai le sami,+ ina ia ui atu ai le fanauga a Isaraelu i le ogatotonu o le sami i le eleele mātūtū.+ 17  A o aʻu, ou te tuu ai pea o tagata Aikupito ia faamaaa i o latou loto,+ ina ia tuliloa pea i latou, ma ou faamamaluina ai aʻu i le faatoʻilaloina o Farao, o ana ʻautau, o ana kariota o le taua ma ana ʻautau tiʻetiʻe solofanua.+ 18  E iloa ai e tagata Aikupito, o aʻu lava o Ieova, pe a faamamaluina aʻu i le faatoʻilaloina o Farao, o ana kariota o le taua ma ana ʻautau tiʻetiʻe solofanua.”+ 19  Ona alu ese lea o le agelu+ a le Atua moni na muamua atu i tagata Isaraelu, ma alu i o latou tua, ua mou ese le ao mai i luma o le ʻaumalaga ma ua tū i o latou tua.+ 20  Ua oo le ao i le va o tagata Aikupito ma tagata Isaraelu.+ Ua avea ma ao pogisa i le tasi itu. A ua avea ma malamalama i le pō i le isi itu.+ Ua lē oo atu tagata Aikupito i tagata Isaraelu i le pō atoa. 21  Ua faaloaloa e Mose lona lima i luga o le sami;+ ona faapogaia lea e Ieova le sami e alu i tua e ala i le agi malosi mai o le matagi mai i sasaʻe i le pō atoa, ma liua le alititai i le eleele mātūtū,+ ma vaeluaina ai le sami.+ 22  Ona savavali ai lea o le fanauga a Isaraelu i le ogatotonu o le sami i le eleele mātūtū,+ a ua avea le sami ma pā maualuga i lo latou itu taumatau ma lo latou itu tauagavale.+ 23  Ua tuliloa i latou+ e tagata Aikupito ma ua ō atu i le ogatotonu o le sami, o solofanua uma a Farao, o ana kariota o le taua, ma ana ʻautau tiʻetiʻe solofanua. 24  Ua oo i le leoleoga o le taeao* ua silasila ifo Ieova i tagata Aikupito mai i le afi ma le ao faaniutū,+ ma ua ia faapogaia le fenumiaʻi o tagata Aikupito.+ 25  Ua ia aveesea uili o a latou kariota ona tosogatā ai lea;+ ma ua fai ane tagata Aikupito: “Inā tatou sosola ese ia mai iā Isaraelu, auā o loo tau Ieova mo i latou faasaga i tagata Aikupito.”+ 26  Ona fetalai mai lea o Ieova iā Mose: “Ia faaloaloa lou lima i luga o le sami,+ ina ia toe foʻi mai ai le sami i luga o tagata Aikupito, o a latou kariota o le taua ma a latou ʻautau tiʻetiʻe solofanua.” 27  Ua faaloaloa e Mose lona lima i luga o le sami, ma ua toe foʻi mai le sami i lona tulaga masani a o tafa mai ata o le taeao. Ua tau sosola ese tagata Aikupito neʻi maua i latou, ae ua lafo e Ieova tagata Aikupito i totonu o le sami.+ 28  Ua faaauau pea ona toe foʻi mai le sami.+ Mulimuli ane, ua ufitia ai kariota o le taua ma ʻautau tiʻetiʻe solofanua uma a Farao, o i latou ua ō atu i le sami e tuliloa tagata Isaraelu.+ Ua leai lava ma se tasi ua totoe.+ 29  A o le fanauga a Isaraelu, na latou savavali i le alititai mātūtū i le ogatotonu o le sami,+ ma na avea le sami ma pā maualuga i lo latou itu taumatau ma lo latou itu tauagavale.+ 30  O lea, i lenā aso na faaolaina ai e Ieova Isaraelu mai i lima o tagata Aikupito,+ ma iloa ai e Isaraelu tagata Aikupito ua feoti i le matafaga.+ 31  Ua iloa ai foʻi e Isaraelu le aao malosi o Ieova ina ua ia gaoioi faasaga i tagata Aikupito; ua matataʻu le nuu iā Ieova ma ua faatuatua iā Ieova ma lana auauna o Mose.+

Faamatalaga Pito i Lalo

O lona uiga, na ō ese atu le fanauga a Isaraelu i le lototetele ma le manumalo.
O le leoleoga lona tolu ma le leoleoga mulimuli lea e tusa ma tagata Eperu, mai i le itula e 2 i le taeao e oo i le itula e 6 i le taeao.