Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Esera 6:1-22

6  Ua fai atu le faatonuga a le tupu o Tariu, ona latou faia lea o se suʻesuʻega i le fale o faamaumauga+ o oloa na tuuina i inā i Papelonia.  Ona maua lea o se tusi tāʻai i Akemeta i le nofoaga malupuipuia sa i le itumalo o Metai,+ ma o upu faamanatu nei na tusia ai:  “I le tausaga muamua o le tupu o Kuresa,+ na avatu ai se faatonuga e le tupu o Kuresa e faatatau i le fale o le Atua i Ierusalema: Ia toe fausia le fale e fai ma mea e latou te ofo atu ai taulaga,+ ma ia matuā faamausalīina ona faavae, o lona maualuga e ono sefulu kupita, o lona lautele foʻi e ono sefulu kupita,+  ia fai ni atu maa tetele+ se tolu ma se atu laupapa+ e tasi; ma ia tuuina atu le tupe e totogi ai mai i le fale o le tupu.+  O mea+ auro foʻi ma mea siliva o le fale o le Atua na aveina e Nepukanesa+ mai i le malumalu sa i Ierusalema, ma ave i Papelonia, ia toe faafoʻi atu ina ia taunuu i le malumalu o loo i Ierusalema i lona tulaga, ma ia tuu ai i le fale o le Atua.+  “O lenei, Tatenai e,+ le kovana i tala atu o le Vaitafe,+ ma Setara-posenai e,+ ma a latou aumea, o isi kovana+ e i tala atu o le Vaitafe, ia outou taumamao ese mai i inā.+  Tuu ai pea le galuega o le fale o le Atua.+ O le a toe fausia e le kovana o tagata Iutaia ma toeaina o tagata Iutaia le fale lenā o le Atua i luga o lona tulaga.  Ua ou tuuina atu se faatonuga+ i le mea e tou te faia i nei toeaina o tagata Iutaia, mo le toe fausiaina o le fale lenā o le Atua; ma o lafoga foʻi mai i oloa+ a le tupu i tala atu o le Vaitafe, ia vave ona totogi+ ai nei tagata ina neʻi taofia le galuega.+  A o mea e manaʻomia, o tamaʻi povi poʻa,+ faapea ma mamoe poʻa+ ma tamaʻi mamoe+ mo taulaga mū i le Atua o le lagi, o saito,+ o masima,+ o uaina,+ ma suāuu,+ ia tuuina atu pea na mea i lea aso ma lea aso, aua neʻi misia, e pei ona fai mai ai le ʻauositaulaga o loo i Ierusalema; 10  ina ia faaauau+ ai pea ona latou faia taulaga+ e finagalo malie i ai le Atua o le lagi, ma tatalo atu ai ina ia faafualoa le soifua o le tupu ma ona atalii.+ 11  Ua ou tuuina atu foʻi le faatonuga e faapea, o se tasi e na te solia+ lenei poloaʻiga, ia aumai se laau+ mai i lona fale ma tutuʻi+ ai o ia i luga o le laau, ma ia faia foʻi lona fale ma faleese o tagata uma ona o lenei mea.+ 12  Ia faatoʻilalo foʻi e le Atua o lē na tuuina lona suafa+ i lona fale, o so o se tupu ma tagata e faaloaloa atu lona lima e solia ai ma faaleagaina+ lenā fale o le Atua, o loo i Ierusalema. O aʻu o Tariu, ua ou tuuina atu le faatonuga. Ia faia lava e aunoa ma le faatuai.” 13  Ona faavave lea ona faia e le kovana o Tatenai i tala atu o le Vaitafe,+ o Setara-posenai+ ma a latou aumea, e pei ona poloaʻi mai ai le tupu o Tariu. 14  Ua faia foʻi e toeaina+ o Iutaia le fale,+ ma ua taulau manuia ona o valoaga a Hakai+ le perofeta, ma Sakaria+ le atalii o le atalii o Ito,+ ua latou faia ma faamāeʻa e tusa ai ma le faatonuga a le Atua o Isaraelu,+ ma e tusa ai foʻi ma le faatonuga a Kuresa,+ o Tariu,+ ma Aretaseta+ le tupu o Peresia. 15  Ua latou faamāeʻaina lenei fale i le aso lona tolu o le masina o Atara,+ i le tausaga lona ono o le nofoaiga a le tupu o Tariu. 16  Ona faapaiaina+ lea ma le olioli tele o lenei fale o le Atua, e le fanauga a Isaraelu, o le ʻauositaulaga, o le ʻau sa Levī,+ ma isi tagata uma o ē na aveina faapagota+ muamua. 17  Ua latou avatu foʻi mo le faapaiaina o lenei fale o le Atua, o povi poʻa e selau, o mamoe poʻa e lua selau, o tamaʻi mamoe e fā selau, ma mo le taulaga o agasala a Isaraelu uma, o ʻoti poʻa e sefulu lua e tusa ma le aofaʻiga o ituaiga o Isaraelu.+ 18  Ua latou tofia le ʻauositaulaga i o latou vasega ma le ʻau sa Levī foʻi i o latou vaega,+ mo le auaunaga a le Atua o loo i Ierusalema, e tusa ai ma le mea ua tusia i le tusi a Mose.+ 19  Ona faia lea e tagata na aveina faapagota muamua, o le paseka+ i le aso lona sefulu fā o le masina muamua.+ 20  Auā ua faamamāina+ faatasi le ʻauositaulaga ma le ʻau sa Levī, ua mamā uma i latou, ona latou fasia lea o manu+ o le paseka mo ē uma na aveina faapagota muamua, ma o latou uso le ʻauositaulaga, atoa ma i latou lava. 21  Ona aai+ lea o le fanauga a Isaraelu o ē na toe foʻi mai i le aveina faapagota, ma i latou uma na vavaeese mai iā i latou mai i le lē mamā+ o tagata o isi atunuu, e saʻili atu iā Ieova le Atua o Isaraelu.+ 22  Ua latou faia foʻi ma le olioli le faamanatuina o falaoa e lē faafefeteina+ mo aso e fitu; auā na faapogaia e Ieova lo latou olioli, ma ua ia liliuina+ le loto o le tupu o Asuria iā i latou, ina ia faamalosia o latou lima i le galuega o le fale o le Atua moni, o le Atua o Isaraelu.

Faamatalaga Pito i Lalo