Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Esekielu 44:1-31

44  Ua ia toe aumaia aʻu i le faitotoʻa o le malumalu, o le faitotoʻa pito i fafo e faasaga i sasaʻe,+ ae ua tapuni.+  Ona fetalai mai lea o Ieova iā te aʻu: “E tusa ai ma lenei faitotoʻa, o le a tapunia pea. E lē tatalaina lava, ma e leai se tagata e ui atu i ai; auā ua ulufale mai ai Ieova le Atua o Isaraelu,+ ma e ao ona tapunia pea.  Peitaʻi, o le taʻitaʻi,+ talu ai o ia o le taʻitaʻi, e na o ia lava e nofo ai i lea mea, ina ia ʻai ai meaʻai i luma o Ieova.+ E ulufale mai o ia i le faapaologa o le faitotoʻa, ma e ulufafo atu foʻi o ia i lea lava ala.”+  Ua ia aumaia aʻu i luma o le Fale e ala i le faitotoʻa i le itu i mātū, ina ia ou iloa atu, faauta! ua faatumuina le fale o Ieova i le mamalu o Ieova.+ Ona ou faapaʻū faō ai lea.+  Ona fetalai mai lea o Ieova iā te aʻu: “Le atalii e o le tagata, ia uaʻi atu lou loto,+ ia vaavaai ou mata, ia faalogo ou taliga i mea uma ua ou fai atu ai iā te oe e tusa ai ma aiāiga o le fale o Ieova, e tusa foʻi ma ana tulafono, ia uaʻi atu lou loto i le mea e ulu atu ai i le Fale ma mea uma e ulufafo ai o le malumalu.  Ia e fai atu i le Fouvalega,*+ i le aiga o Isaraelu, ‘O le fetalaiga lenei a le Alii Pule Silisili Ese o Ieova: “Le aiga e o Isaraelu, ua tele naʻuā a outou mea inosia ua faia,+  i lo outou aumaia o tagata mai i isi atunuu e lē peritomeina le loto ma e lē peritomeina foʻi le tino,+ ina ia ō mai i loʻu malumalu e faaleagaina ai, e oo foʻi i loʻu fale; ina ua outou aumai laʻu meaʻai,+ o le gaʻo+ ma le toto,+ a ua latou solia pea laʻu feagaiga ona o a outou mea inosia uma ua outou faia.+  E tou te leʻi tausia le matafaioi o le vaavaaia o aʻu mea paia,+ e tou te leʻi tofia foʻi mo outou nisi e fai ma ē e tausimea i aʻu matafaioi i loʻu malumalu.” ’+  “ ‘O le fetalaiga lenei a le Alii Pule Silisili Ese o Ieova: “E lē ulufale i loʻu malumalu se tagata mai se isi atunuu e leʻi peritomeina le loto ma e leʻi peritomeina foʻi le tino, o lona uiga, o so o se tagata mai se isi atunuu o loo nonofo faatasi ma le fanauga a Isaraelu.” ’+ 10  “ ‘A o le ʻau sa Levī o ē na mamao ese mai iā te aʻu+ ina ua ō ese Isaraelu mai iā te aʻu, ma pupū o latou loto i a latou tupua inosia, e latou te selesele foʻi i āuga o a latou mea sesē.+ 11  Ona avea ai lea o i latou o ni auauna i loʻu malumalu, o ni leoleo e vaavaaia faitotoʻa o le Fale ma auauna i le Fale.+ E fasia e i latou lava o taulaga mū ma le taulaga mo le nuu,+ e latou te tutū foʻi i o latou luma ina ia auauna atu iā i latou.+ 12  Talu ai na latou auauna pea iā i latou i luma o a latou tupua inosia,+ ma ua avea ma mea e tautevateva ai le aiga o Isaraelu ma latou agasala ai,+ o le mea lea ua ou sii ai loʻu lima e faasagatau atu iā i latou,+ ma e latou te selesele i āuga o a latou mea sesē,’ ua fetalai mai ai le Alii Pule Silisili Ese o Ieova. 13  E latou te lē faalatalata mai iā te aʻu ina ia fai le faiva o le ositaulaga iā te aʻu, pe faalatalata mai foʻi i so o saʻu mea paia, i mea e sili ona paia,+ ma e ao ona latou onosaia lo latou faalumaina ma selesele i āuga o a latou mea inosia na fai.+ 14  Ou te faia i latou ma ē e vaavaaia matafaioi o le tausiga o le Fale, e tusa ma lana auaunaga uma ma e tusa ma mea uma e faia i inā.’+ 15  “ ‘A o ositaulaga o le ʻau sa Levī,+ o le fanau a Satoka,+ o ē na vaavaaia le matafaioi o le tausiga o loʻu malumalu ina ua ō ese le fanauga a Isaraelu mai iā te aʻu, o i latou ia o le a faalatalata mai ina ia auauna iā te aʻu,+ ma ia latou tutū i oʻu luma ina ia latou ofo mai iā te aʻu+ le gaʻo+ ma le toto,’+ ua fetalai mai ai le Alii Pule Silisili Ese o Ieova. 16  ‘O i latou ia o le a ulufale mai i loʻu malumalu+ ma latou faalatalata mai i laʻu laulau* ina ia auauna mai iā te aʻu+ ma latou te tausia le matafaioi iā te aʻu.+ 17  “ ‘Pe a latou ulufale mai i faitotoʻa o le lotoā pito i totonu, e ao ona latou ofuina ofu lino, ma e lē tatau ona latou oofu i ofu e faia i fulufulu mamoe, pe a latou auauna i faitotoʻa o le lotoā pito i totonu, ma nofoaga i totonu.+ 18  Ia iai i o latou ulu o ufiulu o ʻie lino,+ ma ia oo o latou ofuvae lino i o latou suilapalapa.+ Ia aua neʻi o latou fusi i latou i ni ofu e afu ai. 19  Pe a latou sauni e ulufafo atu i le lotoā pito i fafo, o le lotoā pito i fafo lava i le nuu, ia latou toese o latou ofu na auauna ai,+ ma e ao ona latou tuu i potu ʻai+ paia ae oofu i isi ofu, ina ia latou lē faapaiaina ai le nuu i o latou ofu.+ 20  E latou te lē sele poo o latou ulu,+ ma ia aua neʻi faauumi o latou lauulu. E ao ona ʻoti o latou lauulu.+ 21  E lē tatau i so o se ositaulaga ona inu se uaina pe a latou ulufale mai i le lotoā pito i totonu.+ 22  E lē tatau foʻi ona latou faaipoipo i se fafine ua oti lana tane,+ po o se fafine ua teteʻa ma lana tane, ae ia faaipoipo i se teine muli o le fanauga o le aiga o Isaraelu,+ po o se fafine ua oti lana tane o lē sa avea ma ositaulaga.’ 23  “ ‘Ia latou aʻoaʻo atu i loʻu nuu i le eseesega o le mea paia ma le mea e lē paia; ma ia aʻoaʻo foʻi ia latou iloa le eseesega o le mea mamā ma le mea e lē mamā.+ 24  A fai se faamasinoga, ia latou tutū ma faamasino atu; e latou te faamasino+ e tusa ma iʻuga o aʻu faamasinoga.+ E ao ona latou tausia aʻu tulafono ma aʻu aiāiga e tusa ma aso o aʻu tausamiga uma,+ ma e ao ona latou faapaiaina oʻu sapati.+ 25  E lē tatau ona alu atu se tagata i se tasi ua oti neʻi lē mamā ai o ia, ae e mafai ona lē mamā tagata ona o se tamā, po o se tinā, po o se atalii po o se afafine, po o se uso po o se tuafafine o lē e leʻi faia sana tane.+ 26  A māeʻa lona faamamāina, ona latou faitau lea o aso e fitu mo ia.+ 27  O le aso foʻi e ulufale ai o ia i le mea paia, i totonu o le lotoā pito i totonu, ina ia auauna ai i le mea paia, e ao ona ia ofo atu lana taulaga o agasala,’+ ua fetalai mai ai le Alii Pule Silisili Ese o Ieova. 28  “ ‘E tusa ma lo latou tofi: O aʻu o lo latou tofi.+ Aua tou te avatu se mea e fai ma o latou tofi i Isaraelu: O aʻu o lo latou tofi. 29  O i latou ia o le a aai i taulaga i meaʻai, i taulaga o agasala ma taulaga o le nofosala.+ O mea uma ua faaagaga i Isaraelu, o a latou mea ia.+ 30  O mea aupito lelei uma o uluaʻi fua ua matua o fua eseese uma, o a outou foaʻi o mea eseese uma, e fai ma ositaulaga ia mea;+ o uluaʻi fua o a outou fatu ua tuʻininii, e ao ona outou avatu i le ositaulaga,+ ina ia oo mai ai se faamanuiaga i lou aiga.+ 31  E lē tatau ona aai ositaulaga i se tino ua mate fua, po o so o se manulele po o se manu o le vao ua saeia e isi manu.’+

Faamatalaga Pito i Lalo

Po o “tagata fouvale.”
Po o le “fata faitaulaga.”