Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Esekielu 40:1-49

40  O le tausaga lona lua sefulu lima talu ona ave faapagota i matou,+ i le amataga o le tausaga, i le aso lona sefulu o le masina, i le tausaga lona sefulu fā talu ona faaumatia le aai,+ o lea lava aso ua iai le aao o Ieova i oʻu luga,+ ua ia auina atu ai aʻu i se isi mea.+  E ala i faaaliga mai i le Atua, ua ia aumaia aʻu i le laueleele o Isaraelu ma tuu mālie aʻu i se mauga maualuga+ ua iai se mea e pei o se fausaga o se aai i le itu i saute.+  Ona ia avatu lea o aʻu i inā, faauta foʻi! ua iai se tagata. O ona foliga ua pei o foliga o le ʻapamemea,+ ua iai se maea ua faia i le laau o le lino i lona lima, ma se ū+ e fua ai, ma ua ia tū foʻi i le faitotoʻa.  Ua faapea mai le tagata iā te aʻu: “Le atalii e o le tagata,+ inā vaavaai ia ou mata, ia faalogo mai ou taliga, ma ia tuu i lou loto mea uma ou te faaali atu iā te oe, auā ua aumaia oe i inei ina ia faaali atu ia mea iā te oe. Ia e taʻu atu mea uma o loo e vaai i ai i le aiga o Isaraelu.”+  Faauta foʻi! ua iai se pā ua siʻomia ai itu uma o le fale. Ua iai foʻi i le lima o le tagata se ū e fua ai, e ono kupita, e tusa lea o le fua o le kupita ma le alofilima.* Ona ia fuaina lea o le lautele o le mea na fausia; e tasi le ū; ma o le maualuga e tasi foʻi le ū.  Ua alu atu o ia i le faitotoʻa o loo faasaga ona luma i le itu i sasaʻe+ ma alu atu i luga o ona faasitepu. Ua ia fua le mea e ulu atu ai o le faitotoʻa,+ e tasi le ū le lautele, o le isi mea e ulu atu i ai e tasi le ū le lautele.  O le potu o leoleo e tasi le ū le umi ma lona lautele e tasi le ū, o le va o potu taʻitasi+ o leoleo e lima kupita; ma le mea e ulu atu ai o le faitotoʻa, i tala ane o le faapaologa o le faitotoʻa o loo i totonu e tasi le ū.  Ua ia fua le faapaologa o le faitotoʻa o loo i totonu, e tasi le ū.+  Ona ia fuaina lea o le faapaologa o le faitotoʻa, e valu kupita; o ona poutū i autafa e lua kupita; ma le faapologa o le faitotoʻa o loo i totonu. 10  O potu o leoleo o le faitotoʻa, e faasasaga i sasaʻe e tolu i lenei itu ma e tolu i le isi itu. E tutusa le fua o ia potu e tolu, ma e tutusa foʻi fua o poutū i autafa i lenei itu ma le isi itu. 11  Ona ia fuaina lea o le lautele o le mea e ulu atu ai i le faitotoʻa, e sefulu kupita; a o le umi o le faitotoʻa e sefulu tolu kupita. 12  O pā i luma o potu o leoleo e tasi le kupita, ma e tasi le kupita i itu uma o pā. O le potu o le leoleo e ono kupita i lenei itu, ma e ono kupita foʻi i le isi itu. 13  Ua ia fuaina le faitotoʻa mai i le taualuga o le tasi potu o leoleo e oo i le taualuga o le isi potu o leoleo, e lua sefulu lima kupita le lautele;+ e faafesagaʻi faitotoʻa. 14  Ona ia fuafua lea o poutū i autafa e ono sefulu kupita, e oo foʻi i poutū i autafa o faitotoʻa i itu uma o le lotoā. 15  E amata mai i luma o le faitotoʻa i le mea e ulu atu ai, e oo atu i luma o le faapaologa o le faitotoʻa i totonu, e lima sefulu kupita. 16  Ua iai faamalama e faasolo ina lauiti auivi pe a agaʻi i tua+ i potu o leoleo, ma poutū i autafa o loo i totonu o le faitotoʻa i itu uma, e faapena foʻi faapaologa. O loo i totonu faamalama i itu uma ma ua iai ata o pama i poutū i autafa.+ 17  Ua ia faasolosolo ona avatu aʻu i le lotoā pito i fafo, ua iai foʻi potu ʻai+ i inā ma ua iai le paepae e soo ai le lotoā. E tolu sefulu potu ʻai i le paepae.+ 18  E tutusa le umi o le paepae i autafa o le faitotoʻa ma le umi o faitotoʻa, o le paepae pito i lalo. 19  Ua ia fuaina le lautele mai i luma o le faitotoʻa pito i lalo e oo atu i luma o le lotoā pito i totonu. E selau kupita mai i le faitotoʻa i le itu i sasaʻe, e faapena foʻi mai i le faitotoʻa i le itu i mātū. 20  E iai le faitotoʻa i le lotoā pito i fafo lea e faasaga ona luma i le itu i mātū. Ua ia fuaina lona umi ma lona lautele. 21  E tolu ona potu o leoleo i lenei itu, e tolu foʻi i le isi itu. O ona poutū i autafa ma lona faapaologa ua tutusa ma le fua o le faitotoʻa muamua. E lima sefulu kupita lona umi ae e lua sefulu lima kupita lona lautele. 22  E tutusa foʻi le fua o ona faamalama, o lona faapaologa ma ona ata o pama+ ma le fua o mea o loo i le faitotoʻa, e faasaga ona luma i le itu i sasaʻe. E ō aʻe foʻi tagata i ona faasitepu e fitu, ma ua iai foʻi lona faapaologa i luma o ia mea. 23  Ua faafesagaʻi le faitotoʻa o le lotoā pito i totonu ma le faitotoʻa i le itu i mātū; e faapea foʻi i le itu i sasaʻe. Ua ia fua mai i le faitotoʻa i le isi faitotoʻa e selau kupita. 24  Ua ia faasolosolo ona avatu aʻu i le itu i saute, ua iai foʻi se faitotoʻa i inā e faasaga i le itu i saute,+ ua ia fuaina ona poutū i autafa ma lona faapaologa ma ua tutusa fua ma isi faitotoʻa. 25  Ua iai i lea mea ma lona faapaologa o faamalama i itu uma e pei o ia faamalama. E lima sefulu kupita le umi, ae e lua sefulu lima kupita le lautele. 26  E fitu foʻi faasitepu e ui aʻe ai,+ ma o loo i luma o ia mea o lona faapaologa. E iai ata o pama i ona poutū i autafa, o le tasi i lenei itu ma le tasi i le isi itu. 27  Ua iai le faitotoʻa o le lotoā pito i totonu e faasaga i le itu i saute. Ua ia fua mai i le faitotoʻa i le isi faitotoʻa e agaʻi i saute e selau kupita. 28  Ua faasolosolo ona ia avatu aʻu i le lotoā pito i totonu e ala i le faitotoʻa i le itu i saute. Ua ia fuaina le faitotoʻa i le itu i saute ma ua tutusa le fua ma isi faitotoʻa. 29  Ua tutusa le fua o ona potu o leoleo, o ona poutū i autafa, ma lona faapaologa ma isi faitotoʻa. Ua iai i lea mea ma lona faapaologa o faamalama i itu uma. E lima sefulu kupita le umi, ma e sefulu lima kupita le lautele.+ 30  Ua iai faapaologa i faitotoʻa uma; e sefulu lima kupita le umi, ma e lima kupita le lautele. 31  O lona faapaologa e faasaga i le lotoā pito i fafo, ua iai ata o pama i luga o ona poutū i autafa,+ e valu faasitepu e alu aʻe ai.+ 32  Ua faasolosolo ona ia avatu aʻu i le lotoā pito i totonu e ala i le itu i sasaʻe, ma ua ia fuaina le faitotoʻa ma ua tutusa le fua ma isi faitotoʻa. 33  Ua tutusa le fua o ona potu o leoleo, o ona poutū i autafa, ma lona faapaologa ma isi faitotoʻa, ua iai i lea mea ma lona faapaologa o faamalama i itu uma. E lima sefulu kupita le umi, ae e lua sefulu lima kupita le lautele. 34  O lona faapaologa e faasaga i le lotoā pito i fafo, ua iai ata o pama i luga o ona poutū i autafa i lenei itu ma le isi itu. E valu faasitepu e alu aʻe ai. 35  Ua ia avatu aʻu i le faitotoʻa i le itu i mātū,+ ua ia fuaina ma ua tutusa le fua ma isi faitotoʻa,+ 36  o ona potu o leoleo, o ona poutū i autafa, ma lona faapaologa. Ua iai i lea mea o faamalama i itu uma. E lima sefulu kupita le umi, ae e lua sefulu lima kupita le lautele. 37  Ua faasaga ona poutū i autafa i le lotoā pito i fafo, ua iai ata o pama i luga o ona poutū i autafa i lenei itu ma le isi itu.+ E valu faasitepu e alu aʻe ai. 38  Ua iai foʻi se potu ʻai ma le mea e ulu atu ai i tala ane o poutū i autafa o faitotoʻa. O i inā e latou te faamamā ai i le vai taulaga mū.*+ 39  E lua laulau i lenei itu ma laulau e lua i le isi itu i le faapaologa o le faitotoʻa, ina ia fasia ai manu mo le taulaga mū+ ma le taulaga o agasala+ ma taulaga o le nofosala.+ 40  Pe a alu aʻe se isi i le mea e ulu atu ai i le faitotoʻa i le itu mātū, ua iai laulau e lua i le tasi itu. Ua iai foʻi laulau e lua i le isi itu e latalata i le faapaologa o le faitotoʻa. 41  E fā laulau i lenei itu ma e fā laulau i le isi itu i tafatafa o le faitotoʻa, e valu laulau, o luga o ia laulau e latou te fasi ai manu. 42  Na vaneina mai i maa laulau e fā mo le taulaga mū. O le umi e tasi le kupita ma le ʻafa, o le lautele e tasi le kupita ma le ʻafa, o le maualuga e tasi le kupita. O luga o ia mea e latou te tuu ai meafaigaluega e faaaogā i le fasiga o le taulaga mū ma le taulaga. 43  O fata mo le tuuina o mea e tusa ma le fua o le alofilima e tasi, ua mau lelei i pā puipui o loo siʻomia ai; ma latou te tuuina le aano o le taulaga i luga o laulau.+ 44  O le potu ʻai a le ʻaufaipese ua i fafo o le faitotoʻa i totonu,+ i totonu o le lotoā pito i totonu, lea o loo i tafatafa o le faitotoʻa i mātū. E faasasaga pito i luma o ia potu i le itu i saute. E iai le tasi i le itu o le faitotoʻa o le itu i sasaʻe. E faasaga le pito i luma i le itu i mātū. 45  Ua ia faapea mai iā te aʻu: “O le potu ʻai lenei o loo faasaga ona luma i le itu i saute, mo le ʻauositaulaga o ē o loo vaavaaia matafaioi o le tausiga o le fale.+ 46  O le potu ʻai lea e faasaga ona luma i le itu i mātū, e mo ositaulaga o ē e vaavaaia matafaioi o le fata faitaulaga.+ O i latou ia o atalii o Satoka,+ o ē e mai i atalii o Levi, o loo ō atu iā Ieova ina ia auauna iā te ia.”+ 47  Ua ia fuaina le lotoā pito i totonu. E faatafafā, ma o le umi e selau kupita, ae o le lautele e selau kupita. A o le fata faitaulaga o loo i luma o le fale. 48  Ona ia avatu lea o aʻu i le faapaologa o le fale,+ ua ia fua poutū i autafa o le faapaologa, e lima kupita i lenei itu ma e lima foʻi kupita i le isi itu. O le lautele o le faitotoʻa, e tolu kupita i lenei itu ma e tolu kupita i le isi itu. 49  O le umi o le faapaologa e lua sefulu kupita, ma le lautele e sefulu tasi kupita. E latou te ō aʻe i faasitepu. Ua iai poutū i tala ane o pou i autafa, e tasi i lenei itu ma le tasi i le isi itu.+

Faamatalaga Pito i Lalo

O le kupita e tusa ma le 44.5 senitimita (17.5 inisi) ma le lautele o le alofilima e 7.4 senitimita (2.9 inisi) e tutusa ma le 51.8 senitimita (20.4 inisi) o le fua lenā o le kupita umī. O lea la, o le “ū e fua ai e ono kupita” e tusa ma le 3.11 mita (10.2 futu).
O lenei taulaga na faaumatia atoa i le afi.