Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Esekielu 34:1-31

34  Ua oo mai foʻi le afioga a Ieova iā te aʻu e faapea:  “Le atalii e o le tagata, ia e faia valoaga e faasagatau atu i leoleo mamoe o Isaraelu. Ia faia valoaga, ma ia e fai atu iā i latou, i leoleo mamoe, ‘O le fetalaiga lenei a le Alii Pule Silisili Ese o Ieova: “Oi talofa i leoleo mamoe o Isaraelu,+ o ē ua fafagaina i latou lava!+ Pe e lē o le lafu ea e ao ona fafaga e leoleo mamoe?+  Ua outou ʻai le gaʻo,+ ma ua outou faaofu iā te outou i fulufulu o mamoe. Ua outou fasia+ manu pepeti.+ Ua outou lē fafagaina le lafu.  Ua outou lē faamalosia ē ua mamaʻi,+ ua outou lē faamālōlō i lē ua maʻi, ua outou lē fusifusia i se ʻie lē ua gau, ua outou lē toe aumaia lē ua tulia, ua outou lē saʻilia lē ua sē,+ a ua outou pule iā i latou ma le pulepuletutū ma le sauā.+  Na oo ina faataapeapeina i latou ona ua leai so latou leoleo mamoe,+ na fai i latou ma meaʻai a manufeʻai o le fanua, ma na faataapeapeina pea i latou.+  Na fesēaʻi pea aʻu mamoe i mauga uma ma i luga o aʻega maualuluga uma;+ ma ua faataapeapeina aʻu mamoe+ i le fogāeleele uma, ma e leai se tasi na saʻili i ai, e leai foʻi se isi na suʻeina ina ia maua.  “ʻ“O lea, o outou leoleo mamoe inā faalogo mai ia i le afioga a Ieova,  ʻ“O loo ola aʻu,” o le fetalaiga lenei a le Alii Pule Silisili Ese o Ieova, “talu ai ua fai aʻu mamoe ma mea e faoa ma faia pea aʻu mamoe ma meaʻai mo manufeʻai uma o le fanua, auā ua leai se leoleo mamoe, ma e leʻi suʻeina foʻi e aʻu leoleo mamoe aʻu mamoe a ua fafaga pea e leoleo mamoe i latou lava,+ ae e latou te leʻi fafagaina aʻu mamoe,”’  o le mea lea, o outou leoleo mamoe, inā faalogo mai ia i afioga a Ieova. 10  O le fetalaiga lenei a le Alii Pule Silisili Ese o Ieova, ‘O lenei, ou te faasagatau atu i leoleo mamoe,+ ma ou te toe aumaia aʻu mamoe mai i o latou lima ma faamuta lo latou fafagaina o aʻu mamoe,+ e lē toe fafagaina e leoleo mamoe i latou lava;+ ae ou te laveaʻiina aʻu mamoe mai i o latou gutu, ma e lē avea i latou ma meaʻai mo i latou.’”+ 11  “‘O le fetalaiga lenei a le Alii Pule Silisili Ese o Ieova: “O aʻu lenei, o aʻu lava, o le a ou saʻili i aʻu mamoe ma tausia i latou.+ 12  O le a ou tausiaina aʻu mamoe e pei o se leoleo mamoe i lana lafu+ i le aso o loo iai o ia faatasi ma ana mamoe ua taapeape solo;+ o le a ou laveaʻiina i latou mai i mea uma ua faataapeapeina i ai i le aso o le faamalumalu ma le pogisa.+ 13  Ou te aumaia+ i latou mai i nuu, ma aoaoina i latou mai i atunuu ma avatu i latou i lo latou eleele,+ ma fafaga i latou i mauga o Isaraelu, o loo i autafa o ālia ma autafa o mea e ʻaināina e le nuu.+ 14  O le a ou fafagaina i latou i laufanua lauolaola, e fai ma o latou nofoaga mauga maualuluga o Isaraelu.+ O le a latou taooto ai i nofoaga lelei,+ ma o le a latou aai ai i laufanua lauusiusi i luga o mauga o Isaraelu.” 15  “ʻ“Ou te fafagaina aʻu mamoe,+ ou te faataooto foʻi i latou i lalo,”+ ua fetalai mai ai le Alii Pule Silisili Ese o Ieova. 16  “O le a ou saʻilia lē ua sē,+ ou te toe aumaia lē ua tulia, ou te fusifusia i se ʻie lē ua gau, o le a ou faamalosia lē ua maʻi, a o lē ua peti+ ma malosi ou te faaumatia o ia. Ou te fafaga iā te ia i le faamasinoga.”+ 17  “‘A o outou o aʻu mamoe, o le fetalaiga lenei a le Alii Pule Silisili Ese o Ieova: “Ou te faamasinoina i lea mamoe ma lea mamoe, o mamoe poʻa ma ʻoti poʻa.+ 18  Po o se mea faatauvaa ea iā te outou lo outou aai i laufanua sili ona lelei,+ a o isi o outou laufanua uma ua outou solia i o outou vae, ma ua outou feinu i vai mamā a ua outou faapalapalā vai o totoe i le tatū ai o o outou vae? 19  A o aʻu mamoe, pe e tatau ea ona latou aai i laufanua ua solia e o outou vae, ma feinu i vai ua faapalapalā i le tatū i ai o o outou vae?” 20  “‘O lea, o le fetalaiga lenei a le Alii Pule Silisili Ese o Ieova iā i latou: “O aʻu lenei, o aʻu lava, ou te faamasinoina le mamoe peti ma le mamoe paee, 21  talu ai ua outou tulei atu pea i le itu ma le tauʻau ma ua outou sua i o outou seu o ē uma ua mamaʻi seʻia outou faataapeapeina i latou i fafo.+ 22  O le a ou faaolaina aʻu mamoe ma e lē toe faia i latou ma mea e faoa;+ ma ou te faamasino i lea mamoe ma lea mamoe. 23  Ou te faatūina iā i latou se leoleo mamoe e toʻatasi,+ e na te fafagaina i latou, o laʻu auauna lea o Tavita.*+ O le a ia fafagaina i latou, ma o le a fai o ia ma o latou leoleo mamoe.+ 24  O aʻu o Ieova, o le a avea aʻu ma o latou Atua,+ ma e fai Tavita laʻu auauna ma taʻitaʻi i lo latou lotolotoi.+ O aʻu o Ieova, ua ou fai atu ai. 25  “ʻ“Ou te osia se feagaiga o le filemu ma i latou,+ o le a ou faapogaia le lē toe iai o manufeʻai uma i le laueleele,+ ma o le a latou nonofo i le toafa ma le saogalemu ma momoe i le vaomatua.+ 26  Ou te faia i latou ma mea e siʻomia ai loʻu mauga ma mea e manuia ai,+ o le a ou faatotō ifo foʻi timuga i lona lava taimi. O le a iai timuga o faamanuiaga.+ 27  O le a fua mai e laau o le fanua ona fua,+ e fua mai foʻi e le laueleele ona fua,+ ma o le a nonofo i latou i le eleele ma le saogalemu.+ O le a latou iloa ai o aʻu lava o Ieova pe a ou gausia a latou amo,+ ma ou te laveaʻiina i latou mai i lima o ē na faapologaina i latou.+ 28  O le a lē toe avea i latou ma mea e faoa e nuu;+ e lē toe faatamaʻia foʻi i latou e manufeʻai o le laueleele, ma o le a latou nonofo ma le saogalemu, e leai se isi e faamataʻu i ai.+ 29  “ʻ“O le a ou faatūina mo i latou se faatoʻaga taʻutaʻua,+ o le a lē toe feoti i latou i le fia aai i le laueleele,+ ma o le a lē toe faalumaina i latou e nuu.+ 30  ‘O le a latou iloa ai o aʻu lava o Ieova lo latou Atua, ua ou faatasi ma i latou,+ ma o i latou o loʻu nuu, o le aiga o Isaraelu,’ ua fetalai mai le Alii Pule Silisili Ese o Ieova.”’+ 31  “‘O outou o aʻu mamoe,+ o mamoe o loo oʻu leoleoina ma fafagaina, o tagata lava outou. O aʻu o lo outou Atua,’ ua fetalai mai ai le Alii Pule Silisili Ese o Ieova.”

Faamatalaga Pito i Lalo

O lona uiga “o sē e tupuga mai iā Tavita.”