Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Esekielu 3:1-27

3  Ua ia fetalai mai iā te aʻu: “Le atalii e o le tagata, inā e ʻai ia i le mea ua i ou luma. Ia ʻai lenei tusi tāʻai+ ma e alu atu, ma tautala atu i le aiga o Isaraelu.”  Ona faamaga lea o loʻu gutu, ma ua ia fafaga mālie aʻu i le tusi tāʻai.+  Ua ia toe fetalai mai iā te aʻu: “Le atalii e o le tagata, inā tali ia o lou manava i lenei mea, ina ia tumu ai lou laualo i le tusi tāʻai ua ou avatu iā te oe.” Ona ou ʻai ai lea ma ua suamalie i loʻu gutu e pei o le meli.+  Ua ia toe fetalai mai iā te aʻu: “Le atalii e o le tagata, ia e alu atu i le aiga o Isaraelu,+ ma taʻu atu aʻu upu iā i latou.  Auā e lē auina atu oe i se nuu e faigatā ona malamalama i la latou gagana,+ pe e faigatā foʻi le auala e tautatala ai,+ ae i le aiga o Isaraelu,  e lē o nuu e tele e faigatā ona malamalama i a latou gagana, pe e faigatā foʻi le auala e tautatala ai, o a latou upu e lē faigofie ona e malamalama ai.+ Ana ou auina atu oe iā i latou na, semanū latou te faalogo iā te oe.+  A o le aiga o Isaraelu, e latou te lē fia faalogo iā te oe, auā latou te lē fia faalogo mai foʻi iā te aʻu;+ o le aiga o Isaraelu uma ua ulu malō ma loto malō.+  Faauta! ua ou faia ou foliga ia malō e pei o o latou foliga,+ ma lou muāulu ia malō e pei o o latou muāulu.+  Ua ou faia lou muāulu e pei o se taimane, ia sili ona malō nai lo o se maa malō.+ Aua lava e te fefe iā i latou,+ aua foʻi e te mataʻu i o latou foliga,+ auā o i latou o le aiga fouvale.”+ 10  Ua ia toe fetalai mai iā te aʻu: “Le atalii e o le tagata, o upu uma ua ou fai atu ai iā te oe, ia faalogo ai ou taliga+ ma talia i lou loto. 11  Ia e alu atu i tagata na ave faapagota, i tagata o lou nuu,+ ma ia e fai atu iā i latou ma faapea atu iā i latou, ‘O le fetalaiga lenei a le Alii Pule Silisili Ese o Ieova,’ e tusa lava pe e latou te faalogo mai pe e leai.”+ 12  Ua sii aʻu e le agaga+ ma ua ou faalogoina i oʻu tua le taalili o le agi malosi o le savili, e faapea:+ “Ia faamanū atu i le mamalu o Ieova mai i lona afioaga.”+ 13  Ua iai foʻi ma le taalili o apaʻau o foafoaga agaga ua fepaʻiaʻi,+ ma le paʻō o uili i o latou autafa,+ ma le taalili o le agi malosi o le savili. 14  Ua sii aʻu e le agaga+ ma aveina aʻu, o lea ua ou alu ai ma le tigā ma le ita o loʻu loto, a ua malosi mai le aao o Ieova i oʻu luga.+ 15  Ona ou alu atu lea i tagata ua ave faapagota i Teleapipa, o ē o loo nonofo+ i autafa o le vaitafe o Kepara,+ ona ou nofo lea i le mea o loo latou nonofo ai; ona ou nofo ai pea lea ma le meia i inā iā i latou, mo aso e fitu.+ 16  I le faaiʻuga o aso e fitu, ua oo mai iā te aʻu le afioga a Ieova, e faapea: 17  “Le atalii e o le tagata, ua ou faia oe ma tagata vāai i le aiga o Isaraelu,+ ia e faalogo mai i upu a loʻu gutu, ma e tatau foʻi ona e avatua se lapataʻiga iā i latou mai iā te aʻu.+ 18  Pe a ou fai atu i lē e amioleaga, ‘O le a e oti lava,’+ ae e te lē lapataʻi atu iā te ia ma tautala atu i ai ina ia lapataʻia ai lē e amioleaga ia liliuese mai i ona ala leaga, ina ia faasaoina ai o ia,+ e oti lenā tagata amioleaga i lana amiolētonu,+ a o lona toto ou te taui atu lea iā te oe i lou lava lima.+ 19  A o oe, pe afai e te lapataʻia lē e amioleaga ae e lē liliuese o ia mai i lana amioleaga+ ma lona ala leaga, e oti o ia i lana lava mea sesē;+ a o oe, ua e faasaoina lou lava ola.+ 20  Afai e liliuese lē ua amiotonu mai i lana amiotonu+ ae fai mea lē tonu, ona ou tuuina atu lea i ona luma o se mea e tautevateva ai o ia,+ e oti o ia ona e te leʻi lapataʻia o ia. O le a oti o ia ona o lana agasala,+ ma e lē manatuaina foʻi ana galuega amiotonu na faia,+ a o lona toto ou te taui atu lea iā te oe.+ 21  A o oe, afai e te lapataʻia lē e amiotonu ina ia lē agasala ai lea tagata amiotonu,+ ma e lē agasala ai o ia, ona ola pea lea o ia auā na lapataʻia+ o ia, a o oe, ua e faasaoina lou lava ola.”+ 22  Ua oo mai le aao o Ieova i oʻu luga i lea mea, ma ua ia fetalai mai iā te aʻu: “Inā tulaʻi ia ma e alu i le vanu laugatasi,+ o i inā, ou te tautala atu ai iā te oe.” 23  Ona ou tu lea ma alu atu i le vanu laugatasi, faauta! ua tū i inā le mamalu o Ieova,+ e pei o le mamalu lea na ou vaaia i tala ane o le vaitafe o Kepara,+ ona ou faapaʻū faō ai lea.+ 24  Ua faatumuina aʻu i le agaga,+ ona faatūina ai lea o aʻu i luga i oʻu vae,+ ua fetalai mai le Atua iā te aʻu, ua faapea mai: “Alu ia, inā nofo i totonu o lou fale. 25  A o oe le atalii e o le tagata, faauta! o le a latou saisaia iā te oe i maea ma noanoa oe, ina ia lē mafai ai ona e alu atu iā te i latou.+ 26  Ou te faapipii aʻe foʻi lou laulaufaiva i lou gutu,+ ma o le a e gūgū lava,+ e lē avea oe ma se tagata e na te avatu le aʻoaʻiga+ iā i latou, auā o i latou o le aiga fouvale.+ 27  Pe a ou tautala atu iā te oe, ou te tatala lou gutu, ma e te fai atu iā i latou,+ ‘O le fetalaiga lenei a le Alii Pule Silisili Ese o Ieova.’ O lē e faalogo, inā faalogo mai ia,+ a o lē e lē faalogo, ia aua neʻi faalogo o ia, auā o i latou o le aiga fouvale.+

Faamatalaga Pito i Lalo