Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Esekielu 16:1-63

16  Ua toe oo mai le afioga a Ieova iā te aʻu e faapea:  “Le atalii e o le tagata, ia faailoa+ atu iā Ierusalema ana mea inosia.+  E ao ona e fai atu, ‘O loo faapea ona fetalai mai o le Alii Pule Silisili Ese o Ieova iā Ierusalema: “O lou tupuaga ma lou fanau mai, e mai i Kanana.+ O lou tamā o le sa Amorī,+ a o lou tinā o le sa Hetī.+  O lou fanau mai, i le aso na e fanau+ mai ai e leʻi tipiesea ai le uso, e leʻi faatāʻeleina oe i le vai ma faamamā ai, e leʻi miliina foʻi oe i le masima, ma e leʻi afīfīina lava oe i se ʻie.  E leai se isi na faapelepele iā te oe e faia se mea o ia mea ona o le alofa iā te oe,+ ae ua lafoina oe i le fogāeleele, auā na inosia oe i le aso na e fanau mai ai.  “ʻ“Na ou ui ane i le mea na e iai ma ou iloa ai oe ua e tafiti solo i lou toto, ona ou fai atu lea iā te oe a o e iai i lou toto, ‘Inā ola ia!’+ ioe, na ou fai atu iā te oe a o e iai i lou toto, ‘Inā ola ia!’  Na ou matuā faatoʻateleina oe e pei o le lauolaola o le fanua, ina ia e matua+ ma tupu umī, ma teuina oe i teuga e sili ona matagofie.+ Ua popona ou susu ma ua uumi lou lauulu, a o oe sa e telenoa ma lē lavalavā.”’  “‘Na ou ui ane i le mea na e iai ma ou iloa ai oe, faauta! o lou taimi, o le taimi talafeagai lea e faaalia i ai le alofa.+ Ona ou faaʻafu lea o oe i loʻu pito ofu+ ina ia ufiufi ai lou lē lavalavā, na ou faia se tautoga iā te oe ma osia ai foʻi le feagaiga ma oe,’+ ua fetalai mai ai le Alii Pule Silisili Ese o Ieova, ‘ma na fai oe mo aʻu.+  Na ou faatāʻele foʻi oe i le vai+ ma faamamā ese le toto mai iā te oe ma uu oe i le suāuu.+ 10  Ona ou faaofu lea iā te oe i ofu ua teuteuina,+ ma faaseevae oe i paʻu takesa*+ na faapulupulu oe i le ʻie lino lelei,+ ma ufiufi oe i ʻie taugatā. 11  Na ou teuteuina oe i teuga matagofie, ma tuu taulima+ i ou lima ma se asoa+ i lou ua. 12  Na ou tuu foʻi se mama i lou isu+ ma tautaliga i ou taliga,+ ma se pale matagofie i lou ulu.+ 13  Ua e teuteuina pea oe i auro ma siliva, o ou laʻei foʻi o ʻie lino lelei ma ʻie taugatā, atoa ma le ofu ua teuteuina.+ Ua e ʻai i le falaoamata lelei ma le meli, ma le suāuu,+ ua oo ina e matuā lalelei lava, ma ua oo ina talafeagai ona e mauaina se malo.’”+ 14  “‘Ua oo foʻi ina taʻua oe e nuu ona o lou lalelei, na atoatoa ona lelei ona o loʻu matagofie lea na ou tuuina atu i ou luga,’+ ua fetalai mai ai le Alii Pule Silisili Ese o Ieova.” 15  “‘A ua e faatuatuaina lou lalelei,+ ma avea ai oe ma se fafine talitane ona o lou taʻutaʻua,+ ua e faia foʻi au gaoioiga faatalitane i ē uma na ui ane;+ ua fai foʻi mo ia lou lalelei. 16  Ona e ave ai lea o nisi o ou ofu ma faia mo oe ni mea maualuluga+ e lanu eseese, ma e talitane ai i ia mea,+ o mea e lē tatau ona oo mai, e lē tatau lava ona tutupu. 17  Ua e ave foʻi au mea matagofie mai i laʻu auro ma laʻu siliva na ou avatu iā te oe,+ ma e faia ai mo oe ni faatusa o tane+ ma e talitane ai ma ia faatusa.+ 18  Ua e ave foʻi ou ofu ua teuteuina ma ufiufi ai ia mea; ua e tuu foʻi laʻu suāuu ma laʻu mea manogi+ i luma o ia faatusa. 19  O laʻu meaʻai lea na ou avatu iā te oe, o le falaoamata lelei, o le suāuu ma le meli na ou avatu iā te oe e te ʻai ai,+ na e tuu foʻi i luma o ia faatusa e fai ma mea manogi+ e faamalieina ai, ma faaauau pea ona faia faapea,’ ua fetalai mai ai le Alii Pule Silisili Ese o Ieova.” 20  “‘Ua e ave ou atalii ma ou afafine o ē na e fanaua mai iā te aʻu,+ ma fai ai taulaga iā i latou ina ia faaumatia ai,+ po ua lē lava ea au gaoioiga faatalitane? 21  Ua e fasiotia laʻu fanau,+ ma ua e avatu i latou i nei faatusa e ala i le faaui ane o i latou i le afi.+ 22  O au mea inosia uma ma au faiga faatalitane, ua e lē manatua ai aso o lou teineitiiti, a o oe sa e telenoa ma lē lavalavā; ma tafiti i lou toto.+ 23  Ua uma foʻi ona e faia au amioleaga uma (“oi talofa, oi talofa iā te oe,”+ ua fetalai mai ai le Alii Pule Silisili Ese o Ieova) 24  ona e fai ai lea mo oe o se mea maupuʻepuʻe, ma faia foʻi mo oe o mea maualuluga i nofoaga faitele uma.+ 25  Ua e faia au mea maualuluga i fetaulaʻiga o auala,+ ua e faia foʻi lou lalelei ma mea inosia,+ ua e talia ē uma e ui ane ai,+ ma faateleina au faiga faatalitane.+ 26  Ua e talitane i atalii o Aikupito,+ ua tuʻinanau tele foʻi ou tuaoi i feusuaʻiga,+ ma ua e faia pea amioga faatalitane ina ia faatigā mai ai iā te aʻu. 27  Faauta! ou te faaloaloa atu loʻu lima e faasagatau atu iā te oe,+ ou te faaitiitia foʻi au meaʻai+ ma tuuina atu oe i manaʻoga+ o fafine ua ʻinoʻino iā te oe,+ o afafine o Filisitia,+ o fafine ua māsiasi ona o au amioga matagā.+ 28  “‘Ua e talitane foʻi i atalii o Asuria ona ua lē faamalieina oe,+ ma ua e faia pea faiga faatalitane ma i latou a ua lē faamalieina lava oe. 29  Ua e faateleina pea au faiga faatalitane i Kanana,+ e oo foʻi i tagata Kaletaia;+ ae ua lē faamalieina ai lava oe. 30  Ua matuā tumu aʻu i le ita+ tele iā te oe,’ ua fetalai mai ai le Alii Pule Silisili Ese o Ieova, ‘ona o lou faia o nei mea uma, o galuega a le fafine+ talitane pule sauā!+ 31  Ina ua e fausia mea maupuʻepuʻe i fetaulaʻiga o auala uma, ua e faia foʻi au mea maualuluga i nofoaga faitele uma, ae e lē pei oe o le fafine talitane masani, auā ua e ʻinoʻino i le totogi. 32  O le avā e na te faia le mulilua, e momoe o ia ma tane ese ae e lē o lana lava tane.+ 33  E masani ona avatu meaalofa i fafine talitane uma,+ a o oe, ua e avatu meaalofa iā i latou o ē o mananaʻo tele iā te oe,+ ua e avatu meaalofa i se auala faaalatua, ina ia latou ō mai ai iā te oe mai i itu uma, ona o au faiga+ faatalitane. 34  Ua ese lava oe mai i isi fafine i au faiga faatalitane, e leai se faiga faatalitane ua faia e pei ona e faia, ua e avatu le totogi nai lo o le totogi mai o oe, o le mea lea ua matuā ese ai lenei faiga.’ 35  “O lea, le fafine talitane e,+ inā faalogo mai ia i afioga a Ieova.+ 36  O le fetalaiga lenei a le Alii Pule Silisili Ese o Ieova, ‘Talu ai ua e faaalia lou tuʻinanau tele i feusuaʻiga,+ ua aliali mai ou itutino sā+ i au faiga faatalitane iā i latou e mananaʻo tele iā te oe,+ ma i au tupua inosia uma,+ e oo lava i le toto o lau fanau, ua e avatu i na mea,+ 37  o lea, ou te faapotopoto faatasi ai i latou uma ua mananaʻo tele iā te oe o ē na e faamalieina ma i latou uma ua e alofa i ai, atoa ma i latou uma ua e ʻinoʻino i ai, o le a ou aoaoina faatasi i latou e faasagatau atu iā te oe mai i itu uma ma faaaliali ou itutino sā iā i latou, ma e latou te vāai ai i ou itutino sā uma.+ 38  “‘Ou te faasalaina oe i faamasinoga o fafine mulilulua,+ ma fafine faamasaatoto,+ ou te avatu foʻi iā te oe le toto o le ita tele ma le fuā.+ 39  O le a ou tuuina oe i o latou lima, ma o le a latou soloia au mea maupuʻepuʻe+ ma lepetia ou mea maualuluga,+ e latou te toese ou ofu+ ma ave au mea matagofie+ ma tuua telenoa ma lē lavalavā oe. 40  E latou te aumaia se faapotopotoga+ e faasagatau iā te oe, e fetogia foʻi oe i maa+ ma fasiotia oe i a latou pelu.+ 41  E latou te susunuina ou fale i le afi+ ma latou faaoo le faasalaga iā te oe i luma o mata o fafine e toʻatele;+ o le a ou faamutaina le avea o oe ma fafine talitane,+ o le a e lē toe avatu foʻi se totogi. 42  O le a ou faaiʻuina loʻu ita tele iā te oe,+ e liliuese foʻi loʻu fuā mai iā te oe;+ ona ou filemu ai lea ma lē toe tigā ai loʻu loto.’ 43  “‘Talu ai e te leʻi manatua aso o lou teineitiiti+ ma e faatigā mai iā te aʻu ona o ia mea uma,+ o aʻu, o le a ou taui atu iā te oe e tusa ma ou ala,’+ ua fetalai mai ai le Alii Pule Silisili Ese o Ieova, ‘ma o le a e lē toe faia ai amioga matagā faatasi ma au mea inosia uma. 44  “‘Faauta! O i latou uma e latou te fai atu se faaupuga+ masani faasaga iā te oe, e latou te faaaogāina se faaupuga masani e faapea: “E soo le tama teine i lona tinā!”+ 45  O oe o le tama teine a lou tinā,+ o lē e ʻinoʻino i lana tane+ ma lana fanau tama. O oe foʻi o le uso o ou uso, o ē na ʻinoʻino i a latou tane ma a latou fanau tama. O lo outou tinā o le sa Hetī,+ a o lo outou tamā o le sa Amorī.’”+ 46  “‘O lou uso matua o Samaria+ lea, ma ona tamaʻi aai,+ o lē ua nofo i lou itu tauagavale, ae o lou uso e laʻitiiti iā te oe, o lē e nofo i lou itu taumatau o Sotoma+ lea, ma ona tamaʻi aai.+ 47  E te leʻi savali i o latou ala, pe faia e tusa ma a latou mea inosia.+ Ae i se taimi itiiti ua sili ai ona leaga mea ua e faia nai lo o i latou.+ 48  Ua fetalai mai le Alii Pule Silisili Ese o Ieova: ‘O loo ola aʻu, o lou uso o Sotoma, e leʻi faia e ia ma ona tamaʻi aai e pei o mea na e faia, o oe ma ou tamaʻi aai.+ 49  Faauta! O le mea sesē lenei a lou uso o Sotoma: O le mimitavale,+ o le tele o meaʻai,+ o le ola saʻoloto ma le lē popole+ lea na iā te ia ma ona tamaʻi aai,+ e na te leʻi faamalosia ai foʻi le lima o lē ua puapuagatia+ ma lē ua mativa.+ 50  Ona latou faaauau pea lea ona faualuga+ ma faia amioga inosia i oʻu luma,+ ma mulimuli ane oʻu aveesea i latou ina ua ou iloa ua talafeagai.+ 51  “‘A o Samaria,+ e leʻi faia e ia le ʻafa o au agasala, ae ua e faateleina pea au mea inosia e sili atu i lo o i latou, ma ua foliga mai ai e amiotonu ou uso ona o au mea inosia uma ua e faia pea.+ 52  O oe foʻi, ia e onosaia lou faalumaina pe a e faamaonia le amiotonu o ou uso. Auā o au agasala na e faia ua sili atu ona leaga nai i lo o mea na latou faia, ua sili foʻi ona amiotonu i latou nai lo o oe.+ E faamāina foʻi oe ma ia e onosaia lou faalumaina, ona o oe ua foliga mai ai ua sili atu ona amiotonu ou uso.’ 53  “‘O le a ou aoaoina o latou tagata na ave faapagota,+ o ē na ave faapagota o Sotoma ma ona tamaʻi aai, o ē na ave faapagota o Samaria ma ona tamaʻi aai; o le a ou aoaoina foʻi ou tagata na ave faapagota faatasi ma i latou,+ 54  ina ia e onosaia ai lou faalumaina;+ ma ia e lagona ai le faalumaina ona o mea uma na e faia, i lou faamāfanafanaina o i latou.+ 55  O le a toe foʻi ou lava uso o Sotoma ma ona tamaʻi aai i o latou tulaga na iai muamua, o le a toe foʻi Samaria ma ona tamaʻi aai i lo latou tulaga na iai muamua, ma o le a toe foʻi oe ma ou tamaʻi aai i lo outou tulaga na iai muamua.+ 56  E leʻi taʻua i lou gutu lou uso o Sotoma i aso o lou mimitavale,+ 57  a o leʻi faaalialia lou amioleaga,+ e pei o le taimi na faalumaina ai oe e tama teine a Suria+ atoa ma i latou i ona itu uma, o tama teine a Filisitia+ o i latou ia ua ʻinoʻino iā te oe i itu uma.+ 58  E te selesele āuga o au amioga matagā+ ma au mea inosia,’+ ua fetalai mai ai Ieova.” 59  “O le fetalaiga lenei a le Alii Pule Silisili Ese o Ieova, ‘Ou te faia iā te oe e tusa ma mea ua e faia,+ auā ua e ʻinoʻino i le tautoga i lou solia o laʻu feagaiga.+ 60  O aʻu foʻi, ou te manatua laʻu feagaiga na osia ma oe i aso o lou teineitiiti+ ma ou te faia ma oe se feagaiga e tumau.+ 61  Ona e manatua ai lea o ou ala+ ma lagona ai le mā pe a e talia ou uso, o ē e matutua iā te oe atoa ma ē e lāiti iā te oe, ou te tuuina atu i latou e fai ma au tama teine,+ ae e lē faapea ona o se feagaiga ua osia ma oe.’+ 62  “‘O aʻu foʻi, o le a ou osia laʻu feagaiga ma oe;+ ma o le a e iloa ai o aʻu lava o Ieova, 63  ina ia e manatua ai, ma e mā+ ai ma lē toe iai se māfuaaga e te tautala+ ai ona o lou mā, pe a ou faamagaloina*+ oe i mea uma ua e faia,’ ua fetalai mai ai le Alii Pule Silisili Ese o Ieova.”

Faamatalaga Pito i Lalo

Atonu e faasino atu i se manu o le sami lea e taʻua i le faa-Peretania o le seal. E taitutusa lona lapoʻa ma le mumua.
I le gagana Eperu, o le “togisala.”