Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

2 Tupu 15:1-38

15  O le tausaga lona lua sefulu fitu o le nofoaiga a Ierepoamo le tupu o Isaraelu, na fai ai ma tupu Asaraia*+ le atalii o Amasia+ le tupu o Iuta.  E sefulu ono ona tausaga ina ua fai o ia ma tupu, ma e lima sefulu lua tausaga na pule ai o ia i Ierusalema.+ O le igoa o lona tinā o Iekalia mai i Ierusalema.  Na ia faia pea mea ua tonu i le silafaga a Ieova, e tusa ma mea uma na faia e lona tamā o Amasia.+  E na o mea maualuluga e leʻi aveesea.+ Ae na faia pea e le nuu o taulaga ma faamū taulaga i mea maualuluga.+  Mulimuli ane, ona taia lea e Ieova le tupu i se mala,+ ma ua avea ai pea o ia ma lepela+ e oo lava i le aso na oti ai, sa nofo pea o ia i lona fale e na te leʻi toe faia ona tiute tauave,+ a o Iotama+ le atalii o le tupu na pule i le aiga, ua ia faamasinoina+ foʻi tagata o le nuu.  A o le olaga uma o Asaraia ma mea uma na ia faia, po ua lē o tusia ea i le tusi+ e faatatau i olaga o tupu o Iuta?  Ua taoto Asaraia faatasi ma ona augātamā,+ ma ua latou tanu o ia faatasi ma ona augātamā i le Aai a Tavita; ona pule lea o Iotama lona atalii e sui iā te ia.+  O le tausaga lona tolu sefulu valu o le nofoaiga a Asaraia+ le tupu o Iuta, na fai ai ma tupu Sakaria+ le atalii o Ierepoamo i Isaraelu i Samaria mo masina e ono.  Na ia faia pea mea leaga i le silafaga a Ieova, e pei ona faia e ona augātamā.+ E leʻi liliuese o ia mai i agasala a Ierepoamo+ le atalii o Nepata, lea na ia faapogaia ai Isaraelu e agasala.+ 10  Ona foua+ lea o ia e Saluma le atalii o Iapese, ua fasia+ o ia i Ipelamo+ ma fasioti foʻi iā te ia, ona pule ai lea o ia e sui iā te ia. 11  A o le olaga uma o Sakaria, ua tusia i le tusi+ e faatatau i olaga o tupu o Isaraelu. 12  O le afioga lenā a Ieova+ na ia fetalai atu ai iā Ieu e faapea:+ “E nonofo ou atalii+ i le nofoālii o Isaraelu e oo atu i le fā o tupulaga.” Ua faapea lava ona fai.+ 13  A o Saluma le atalii o Iapese, na fai o ia ma tupu i le tausaga lona tolu sefulu iva o le pulega a Usia+ le tupu o Iuta, ma na faaauau ona pule o ia mo le masina atoa i Samaria.+ 14  Ona alu aʻe lea o Manaema+ le atalii o Kati mai i Tiresa,+ ma alu atu i Samaria ma fasia Saluma+ le atalii o Iapese i Samaria ma ua oti ai o ia; ona pule lea o ia e sui iā te ia. 15  A o le olaga uma o Saluma ma lana fouvalega+ lea na fouvale ai, ua tusia ia i le tusi e faatatau i olaga o tupu o Isaraelu. 16  Ona lepetia lea e Manaema o Tipasa ma mea uma sa iai, ma ona oganuu e amata mai i Tiresa auā e latou te leʻi tatalaina ona faitotoʻa, ona alu aʻe lea o ia ma faaumatia. Ua ia faatiau foʻi fafine totō uma sa iai.+ 17  O le tausaga lona tolu sefulu iva+ o le nofoaiga a Asaraia le tupu o Iuta, na fai ai Manaema le atalii o Kati ma tupu o Isaraelu mo tausaga e sefulu i Samaria. 18  Na faia pea e ia o mea leaga i le silafaga a Ieova.+ E leʻi liliuese o ia mai i agasala uma a Ierepoamo+ le atalii o Nepata, lea na ia faapogaia ai Isaraelu e agasala+ i ona aso uma lava. 19  Ua sau foʻi Pula+ le tupu o Asuria+ i le nuu. Ona avatu+ lea e Manaema iā Pula o taleni siliva e afe,+ e fesoasoani mai ai iā te ia ina ia faatumauina le malo iā te ia.+ 20  Ona avatu lea e Manaema o siliva na maua mai iā Isaraelu, mai i tagata mauʻoa uma,+ ma tuuina atu i le tupu o Asuria o sekeli siliva e taʻilima sefulu a le tagata e toʻatasi. Ona toe foʻi ai lea o le tupu o Asuria, e leʻi nofo ai i le nuu. 21  A o le olaga uma o Manaema,+ ma mea uma na ia faia, po ua lē o tusia ea i le tusi+ e faatatau i olaga o tupu o Isaraelu? 22  Mulimuli ane, ua taoto Manaema faatasi ma ona augātamā, ona pule lea o Pekasia+ lona atalii e sui iā te ia. 23  O le tausaga lona lima sefulu o le nofoaiga a Asaraia le tupu o Iuta, na fai ai Pekasia le atalii o Manaema ma tupu o Isaraelu i Samaria mo tausaga e lua.+ 24  Ua faia pea e ia o mea leaga i le silafaga a Ieova.+ E leʻi liliuese o ia mai i agasala a Ierepoamo+ le atalii o Nepata, lea na ia faapogaia ai Isaraelu e agasala.+ 25  Ona foua+ lea o ia e Peka+ le atalii o Remalia lona fesoasoani,+ ua ia fasiotia foʻi o ia i Samaria i le ʻolo o loo i le fale o le tupu+ faatasi ai ma Arakopo ma Arie, na iā te ia foʻi o tagata e toʻalima sefulu mai i Kiliata. Ua ia fasiotia o ia, ma pule ai e sui iā te ia. 26  A o le olaga uma o Pekasia ma mea uma na ia faia, ua tusia ia i le tusi+ e faatatau i olaga o tupu o Isaraelu. 27  O le tausaga lona lima sefulu lua o le nofoaiga a Asaraia le tupu o Iuta, na fai ai Peka+ le atalii o Remalia+ ma tupu o Isaraelu i Samaria mo tausaga e lua sefulu. 28  Na ia faia pea mea leaga i le silafaga a Ieova.+ E leʻi liliuese o ia mai i agasala a Ierepoamo+ le atalii o Nepata, lea na ia faapogaia ai Isaraelu e agasala.+ 29  I aso o Peka le tupu o Isaraelu, na sau ai Tikila-pilesa+ le tupu o Asuria+ ma faoa Iono,+ o Apelapete-maaka,+ o Ianoka, o Ketesa,+ o Hasora,+ o Kiliata,+ ma Kalilaia,+ o le nuu uma o Nafatali,+ ma ave faapagota i latou i Asuria.+ 30  Mulimuli ane, ona taupulepule lea o Hosea+ le atalii o Ele e fouvale+ iā Peka le atalii o Remalia, ua fasia o ia+ ma ua oti ai; ona ia pule lea e sui iā te ia i le tausaga lona lua sefulu o le pulega a Iotama+ le atalii o Usia. 31  A o le olaga uma o Peka, ma mea uma na ia faia, ua tusia ia i le tusi+ e faatatau i olaga o tupu o Isaraelu. 32  O le tausaga lona lua o le nofoaiga a Peka le atalii o Remalia le tupu o Isaraelu, na fai ai ma tupu Iotama+ le atalii o Usia+ le tupu o Iuta. 33  E lua sefulu lima ona tausaga ina ua fai o ia ma tupu, ma e sefulu ono tausaga na pule ai o ia i Ierusalema. O le igoa o lona tinā o Ierusa le afafine o Satoka.+ 34  Na ia faia pea mea ua tonu i le silafaga a Ieova.+ Na ia faia e tusa ma mea uma na faia e Usia lona tamā.+ 35  E na o mea maualuluga e leʻi aveesea. Ae na faia pea e le nuu o taulaga ma faamū taulaga i mea maualuluga.+ O ia na fausia le faitotoʻa pito a luga o le fale o Ieova.+ 36  A o le olaga uma o Iotama ma mea na ia faia, po ua lē o tusia ea i le tusi e faatatau i olaga o tupu o Iuta?+ 37  O aso na, na aauina+ mai ai e Ieova o Resina+ le tupu o Suria, ma Peka+ le atalii o Remalia e siitaua iā Iuta. 38  Mulimuli ane, ona taoto lea o Iotama faatasi ma ona augātamā, ma ua tanu o ia faatasi ma ona augātamā i le Aai a Tavita lona augātamā;+ ona pule lea o Aasa+ lona atalii e sui iā te ia.

Faamatalaga Pito i Lalo

E igoa foʻi iā Usia.