Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

2 Samuelu 3:1-39

3  Ua faaumiumi pea ona faia le taua i le va o le aiga o Saulo ma le aiga o Tavita;+ a ua malosi pea Tavita,+ a o le aiga o Saulo, ua tauau ina vaivai.+  I le taimi lenā, na fanau ai atalii+ o Tavita i Heperona,+ o lana ulumatua, o Amanono+ le tama a Ainoama+ le Isereelu.  O lona atalii lona lua, o Kiliava+ le tama a Apikaila+ le avā a Napalu le Karamelu, o lona tolu, o Apisaloma+ le tama a Maaka o le afafine o Talemai+ le tupu o Kasuri.  O lona fā, o Atonia+ le tama a Akita,+ o lona lima, o Sefatia+ le tama a Apitala.  O lona ono, o Itereamu+ o le tama a Ekeli le avā a Tavita. O i latou nei na fananau mai iā Tavita i Heperona.  A o faaauau le taua i le va o le aiga o Saulo ma le aiga o Tavita, na faamalosia ai pea e Apineru+ lona tulaga i le aiga o Saulo.  Na iai le palake a Saulo o lona igoa o Risepa,+ o le afafine o Aia.+ Mulimuli ane, ua fai mai Isoposeta+ iā Apineru: “Aiseā na lua momoe ai ma le palake+ a loʻu tamā?”  Ona matuā ita+ ai lea o Apineru i upu a Isoposeta, ua faapea atu iā te ia: “Po o aʻu ea o se taʻifau+ a le nuu o Iuta? Ua ou alofa faamaoni pea e oo mai i le asō i le aiga o Saulo lou tamā, o ona uso, ma ana uō mamae, ou te leʻi tuuina atu foʻi oe i lima o Tavita; a o lenei ua e tuuaʻia aʻu ua ou faia le mea sesē i se fafine i le asō.  Ia faapea lava ona faia e le Atua iā Apineru, ia faaopoopo foʻi i ai,+ e pei ona tautō o Ieova iā Tavita,+ pe afai ou te lē faia faapea iā te ia, 10  ina ia aveesea le malo mai i le aiga o Saulo, ma faatumauina le nofoālii o Tavita iā Isaraelu ma Iuta, e amata mai i Tanu e oo i Peresepa.”+ 11  Ua lē mafai ona ia toe fai atu se upu e tali atu ai iā Apineru, ona ua fefe iā te ia.+ 12  Ona aauina faavave atu lea e Apineru o avefeʻau iā Tavita, e faapea: “O ai e ona le nuu?” Ua ia toe faapea atili mai: “Ia e osia se feagaiga ma aʻu, faauta! e ta te ʻau faatasi ma oe e faaliliu atu Isaraelu uma lava i lau itu.”+ 13  Ona ia tali atu lea e faapea: “Ua lelei! Ou te osia se feagaiga ma oe. Ae e na o le tasi le mea lea ou te talosaga atu ai iā te oe, ‘E lē mafai ona e vaai i oʻu mata,+ seʻiloga ua e aumai muamua Mekala+ le afafine o Saulo, pe a e sau e vaai aʻu.’ ” 14  Ua aauina atu foʻi e Tavita o avefeʻau iā Isoposeta+ le atalii o Saulo, ua faapea atu: “Ia tuu mai laʻu avā o Mekala, o lē na ma faamau i paʻu* e selau o tino+ o Filisitia.” 15  Ona alu atu lea o le feʻau a Isoposeta, ma aumai o ia mai i lana tane o Paletieli+ le atalii o Laisa. 16  Ua savavali pea o ia ma lana tane, ua tagi lana tane a o mulimuli atu iā te ia, ua oo atu i Pauri.+ Ua fai atu Apineru iā te ia: “Inā alu ia, ma toe foʻi!” Ona toe foʻi ai lea o lana tane. 17  I le taimi lea, ua oo atu ai upu a Apineru i toeaina o Isaraelu, e faapea: “O ananafi ma i le taimi ua teʻa,+ na outou naunau ai e saʻili iā Tavita e fai ma tupu iā te outou. 18  O lenei, ia outou faia lava auā ua fetalai Ieova iā Tavita, ‘O le lima o Tavita+ laʻu auauna, ou te faaolaina ai loʻu nuu o Isaraelu mai i lima o Filisitia, ma lima o o latou fili uma.’ ” 19  Ona tautala atu lea o Apineru i taliga o Peniamina,+ ua tautala atu foʻi Apineru i taliga o Tavita i Heperona i mea uma ua lelei iā Isaraelu, atoa ma le aiga uma o Peniamina. 20  Ina ua oo atu Apineru iā Tavita i Heperona, faatasi ai ma tagata e toʻalua sefulu, ona faia lea e Tavita o se faigaʻai+ mo Apineru ma tagata na iā te ia. 21  Ua fai mai Apineru iā Tavita: “Seʻi oʻu tulaʻi ma ou alu e faapotopoto faatasi mai Isaraelu uma i loʻu alii le tupu, ina ia o latou osia se feagaiga ma oe, ma avea ai oe ma tupu iā i latou uma e tusa ai ma lou finagalo.”+ Ona auina ese atu lea e Tavita o Apineru, ua alu o ia ma le filemu.+ 22  Ua foʻi mai auauna a Tavita ma Ioapo mai i le tuliloaga, ma ua latou aumaia foʻi le vete+ tele. A ua lē o iai Apineru faatasi ma Tavita i Heperona, auā na ia tuuina atu o ia e alu, ma ua alu o ia ma le filemu. 23  Ua ō mai Ioapo+ ma le ʻautau uma na iā te ia, ma ua latou taʻu atu iā Ioapo e faapea: “Na sau Apineru+ le atalii o Neru+ i le tupu, ma ua auina ese atu o ia e le tupu, ua alu o ia ma le filemu.” 24  Ona alu atu lea o Ioapo i le tupu, ua faapea atu: “O le ā lau mea ua fai?+ Faauta! Na sau Apineru iā te oe. Aiseā ua e auina ese atu ai o ia ina ia alu ma le manuia? 25  Ua e iloa lelei lava Apineru le atalii o Neru, na sau o ia e faavalea iā te oe, ma mataʻi au gaoioiga uma+ ina ia iloa ai mea uma o loo e faia.”+ 26  Ona alu ese lea o Ioapo mai iā Tavita, ua ia aauina atu ni avefeʻau iā Apineru, ua latou faafoʻi+ mai o ia mai i le vaieli o Sira; ae e leʻi iloa e Tavita. 27  Ina ua toe foʻi mai Apineru i Heperona,+ ona taʻitaʻi lea o ia e Ioapo i totonu o le pā, ina ia tautala lemū ma ia.+ O i inā na ia tutuʻi ai iā te ia i le manava,+ ma ua oti ai ona o le toto o lona uso o Asaelu.+ 28  Mulimuli ane, ina ua faalogo i ai Tavita, ona ia faapea ane lea: “Ou te mamā aʻu ma loʻu malo i le silafaga a Ieova i aso uma, i le toto+ o Apineru le atalii o Neru. 29  Ia faafoʻi mai le toto i luga o le ulu+ o Ioapo ma le aiga uma o lona tamā, aua le teʻa mai i le aiga o Ioapo+ se tane ua alu lona sua,+ po o se lepela,+ po o se tane o loo totoo i le mea lalaga ʻie,+ pe paʻū i le pelu, po o se tasi e fia ʻai!”+ 30  O Ioapo foʻi ma Apisai+ lona uso, ua la fasiotia Apineru,+ auā na ia fasiotia Asaelu lo laʻua uso i le taua i Kipeona.+ 31  Ona fai atu lea o Tavita iā Ioapo ma tagata uma na iā te ia: “Inā saeia ia o outou ofu,+ ma ia lavalava i ʻie talatala+ ma tagiauē ona o Apineru.” Ua mulimuli atu foʻi le tupu o Tavita i tua ane o le fata. 32  Ua latou tanu Apineru i Heperona; ona tagi leotele ai lea o le tupu i le tuugamau o Apineru, ua fetagisi foʻi le nuu uma.+ 33  Ua pese le tupu ona o Apineru, ua faapea atu: “Ua oti ea Apineru e pei o se tagata valea?+ 34  Ua lē noanoatia ou lima,+ E leʻi faamauina foʻi ou vae i ni faamau ʻapamemea.+ Ua e paʻū foʻi e pei ona paʻū o se tasi i luma o le fanauga a ē e amiolētonu.”+ Ona toe fetagisi+ ai lea o le nuu uma ona o ia. 35  Mulimuli ane, ua ō atu le nuu uma e avatu meaʻai+ iā Tavita e faamāfanafana ai o ia i lenā lava aso, a ua tautō Tavita e faapea: “Ia faia e le Atua iā te aʻu+ ma ia faaopoopo i ai, pe afai ou te ʻai i se falaoa po o se isi lava mea a o leʻi goto le lā!”+ 36  Ua iloa e le nuu uma, ua lelei foʻi lea iā i latou. E pei o mea uma na faia e le tupu, ua lelei foʻi ia i le nuu uma.+ 37  Ua iloa e le nuu uma ma Isaraelu uma i lenā aso, e lē o le tupu na pogai ai ona fasiotia Apineru le atalii o Neru.+ 38  Ua fai atu le tupu i ana auauna: “Pe tou te lē iloa ea ua maliu i le asō se perenise, ma o se alii sili i Isaraelu?+ 39  E ui ina faauuina+ aʻu e fai ma tupu, ae ua ou vaivai i le asō, ma ua matuā faigatā iā te aʻu+ nei tagata, o le fanau tama a Seruia.+ Tau ina ia taui atu e Ieova i lē na faia le mea leaga, e tusa ai ma lana amioleaga.”+

Faamatalaga Pito i Lalo

O le “paʻu” lenei e faasino atu i le paʻu o totogasā o tamāloloa.