Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

2 Samuelu 21:1-22

21  Sa iai se oge+ mo tausaga e tolu i aso o Tavita, e mai lea tausaga i lea tausaga; ma ua fesili atu Tavita iā Ieova. Ona fetalai mai lea o Ieova: “Ua nofosala Saulo ma lona aiga i le toto, auā na ia fasiotia tagata Kipeona.”+  Ona aami lea e le tupu o tagata Kipeona+ ma talanoa atu iā i latou. (O tagata Kipeona, e lē o ni fanauga a Isaraelu, a o tagata na totoe o sa Amorī;+ na tautō foʻi le fanauga a Isaraelu iā i latou,+ a ua saʻili Saulo e fasia+ i latou, ona o lona fuā+ i le fanauga a Isaraelu ma Iuta.)  Ua fai atu Tavita i tagata Kipeona: “O le ā se mea ou te faia iā te outou, o le ā foʻi se mea ou te faia ai se togisala+ ina ia outou faamanuia mai ai i le tofi+ o Ieova?”  Ona fai mai lea o tagata Kipeona iā te ia: “E matou te lē mananaʻo i ni siliva po o ni auro+ mai iā Saulo ma lona aiga, e matou te lē mananaʻo foʻi e fasiotia se tagata i Isaraelu.” Ona ia fai atu lea: “O mea uma ua outou fai mai ai, ou te faia lava mo outou.”  Ona latou fai mai lea i le tupu: “O le tagata na faaumatiaina+ i matou, ma manatu+ e aveesea i matou mai i le nonofo ai i le nuu o Isaraelu,  ia tuuina mai iā i matou o tagata e toʻafitu o ona atalii;+ e matou te faatautauina o latou tino oti+ i luma o Ieova i Kipea+ o Saulo, o lē na filifilia e Ieova.”+ Ona fai atu lea o le tupu: “Ou te avatua lava i latou.”  Ae peitaʻi, na alofa mutimutivale le tupu iā Mefiposeta+ le atalii o Ionatana, le atalii o Saulo, ona o le tautoga+ na la faia iā Ieova, i le va o Tavita ma Ionatana le atalii o Saulo.  Ua ave e le tupu le fanau tama e toʻalua a Risepa+ le afafine o Aia, lea na ia fanaua mai iā Saulo, o Aremoni ma Mefiposeta, ma le fanau tama e toʻalima a Mekala*+ le afafine o Saulo, lea na ia fanaua mai iā Atarielu+ le atalii o Pasili le tagata Meola.  Ona ia avatu lea o i latou i lima o tagata Kipeona, ona latou faatautau lea o o latou tino oti i le mauga i luma o Ieova,+ na paʻuʻū faatasi foʻi le toʻafitu o i latou; ona fasiotia ai lea o i latou i uluaʻi aso o le seleselega, i le amataga o le seleselega o karite.+ 10  Ae peitaʻi, ua ave e Risepa le afafine o Aia+ le ʻie talatala+ ma fofola mo ia i luga o le papa, i le amataga o le seleselega seʻia oo ina maligi ifo i o latou luga le timu mai i le lagi;+ e na te leʻi faataga foʻi manufelelei+ o le lagi e mālōlō ai i o latou luga i le ao, po o manufeʻai+ foʻi o le fanua i le pō. 11  Ona taʻu+ atu lea iā Tavita o le mea ua faia e Risepa le afafine o Aia, le palake a Saulo. 12  Ua alu atu Tavita ma ave ivi o Saulo+ ma ivi o lona atalii o Ionatana, mai i tagata o Iapese-kiliata+ e ona fanua, o ē na gaoia i laʻua mai i le nofoaga faitele o Petesani,+ lea na faatautau+ ai e Filisitia i laʻua i le aso na fasia ai Saulo e Filisitia i Kilepoa.+ 13  Ua ia ave aʻe foʻi mai i inā ivi o Saulo ma ivi o Ionatana lona atalii; ua latou ave aʻe foʻi ma ivi o tagata na faatautauina.+ 14  Ona latou tanu lea o ivi o Saulo ma lona atalii o Ionatana i le nuu o Peniamina, i Sela+ i le fanuatanu o Kiso+ lona tamā, ina ia latou faia ai o mea uma na poloaʻi atu ai le tupu. Ua mavae ia mea, ona faafofoga lea o le Atua i a latou talosaga mo le laueleele.+ 15  Ua toe ō atu foʻi Filisitia+ e tau ma Isaraelu. Ona ō ifo lea o Tavita ma ana auauna faatasi ma ia e tau ma Filisitia; ua oo ina vaivai Tavita. 16  O Isepenopa foʻi o lē na fanau mai iā Rafaimi,+ o le mamafa o lona tao+ e tolu selau sekeli o ʻapamemea, ma na fusia foʻi o ia i le pelu fou, na mafaufau e na te fasia Tavita. 17  Ona faavave atu lea o Apisai+ le tama a Seruia e fesoasoani+ iā te ia, ma taia le Filisitia ma fasiotia ai o ia. O le taimi lenā, na tautō atu ai tagata o Tavita iā te ia, e faapea: “E lē tatau ona e toe alu ma i matou i le taua,+ ina neʻi e tineia+ le malamalama+ o Isaraelu!” 18  Mulimuli ane, ona toe tau ai lea o le taua ma Filisitia i Kopa. Ona fasia ai lea e Sepekai+ le Usa,+ o Sapa lē na fanau mai i le aiga o Rafaimi.+ 19  Ua toe tau le taua ma Filisitia i Kopa, ona fasia lea e Eleana+ le atalii o Ari-oreki le Peteleema o Koliata le Kata, o le fuata o lona tao ua pei o le laau faalava a tagata e lalagaina ʻie.+ 20  Ua toe tau foʻi le taua i Kata,+ sa iai le tagata tino ese e taʻiono tamatamaʻilima i ona lima, e taʻiono foʻi tamatamaʻivae i ona vae, e lua sefulu fā le aofaʻiga; na fanau mai o ia i le tagata Rafaimi.+ 21  Ua faifai+ pea o ia iā Isaraelu. Mulimuli ane, ona fasiotia lea o ia e Ionatana+ le atalii o Semi,+ le uso o Tavita. 22  O i latou nei e toʻafā na fananau mai i le tagata Rafaimi i Kata;+ na fasiotia i latou i le lima o Tavita ma lima o ana auauna.+

Faamatalaga Pito i Lalo

Ua faitauina faapea le tusi Targums: “o le fanautama e toʻalima a Merapa lea na tausia e Mekala le afafine o Saulo.” Faatusatusa i le 2Sa 6:23.