Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

2 Samuelu 2:1-32

2  Mulimuli ane, ona fesili atu lea o Tavita iā Ieova+ e faapea: “Po ou te alu aʻe ea i se tasi o aai o Iuta?” Ona fetalai mai lea o Ieova iā te ia: “Inā alu aʻe ia.” Ona toe fesili atu lea o Tavita: “Ou te alu aʻe i fea?” Ona ia fetalai mai lea: “I Heperona.”+  Ua ō aʻe Tavita i inā faatasi ma ana avā e toʻalua, o Ainoama+ le Isereelu, ma Apikaila+ le avā a Napalu le Karamelu.  Ua ō aʻe Tavita faatasi ma tagata+ sa iā te ia, e taʻitasi ma lona aiga; ua latou nonofo i aai i laueleele o Heperona.  Ona ō mai lea o tagata o Iuta+ ma faauu+ Tavita i inā e fai ma tupu i le aiga o Iuta.+ Ua latou ō foʻi ma taʻu atu iā Tavita e faapea: “Na tanuina e tagata o Iapese-kiliata ia Saulo.”  Ona aauina atu lea e Tavita o avefeʻau i tagata o Iapese-kiliata,+ ua ia faapea atu iā i latou: “Ia faamanuia Ieova iā te outou,+ auā ua outou alolofa faamaoni+ i lo outou alii o Saulo, ina ua outou tanuina o ia.+  O lenei, ia alofa faamaoni+ ma ia maufaatuatuaina outou e Ieova, ou te taui atu foʻi i lenei mea lelei ua outou faia.+  Ia faamalolosi o outou lima, ma ia avea outou o tagata totoa,+ auā ua maliu lo outou alii o Saulo, a ua faauuina aʻu e le aiga o Iuta e avea ma o latou tupu.”+  A o Apineru+ le atalii o Neru le taʻitaʻiʻau a Saulo, ua ia aveina Isoposeta+ le atalii o Saulo, ua ia avatu o ia i Maanaima+  e fai o ia ma tupu i Kiliata,+ i tagata o Asuri, i Isereelu,+ i Efaraima,+ i Peniamina,+ ma Isaraelu atoa uma lava. 10  E fā sefulu tausaga o Isoposeta le atalii o Saulo ina ua fai o ia ma tupu i Isaraelu, ma e lua tausaga na pule ai o ia. Ae e na o le aiga o Iuta+ na mulimuli atu iā Tavita. 11  O le aofaʻi o aso na avea ai Tavita ma tupu i Heperona i le aiga o Iuta, e fitu tausaga ma masina e ono.+ 12  Ua ō atu Apineru le atalii o Neru ma auauna a Isoposeta, le atalii o Saulo, mai i Maanaima+ e agaʻi atu i Kipeona.+ 13  A o Ioapo+ le tama a Seruia+ ma auauna a Tavita, ua latou ō atu ma mulimuli ane ua fetaiaʻi ma i latou i tafatafa o le vai tāʻele i Kipeona; ona latou nonofo ai lea, o isi i le la itu o le vai tāʻele, a o isi i lenei itu o le vai tāʻele. 14  Ua fai mai Apineru iā Ioapo: “Faamolemole, inā tutulaʻi ia o tauleleʻa, ia latou tauivi i o tatou luma.” Ona faapea atu lea o Ioapo: “Inā tutulaʻi ia i latou.” 15  Ona latou tutulaʻi lea ma ō atu e taʻitoʻasefulu lua le aofaʻi, o tagata o Peniamina ma Isoposeta+ le atalii o Saulo, ma le toʻasefulu lua mai i auauna a Tavita. 16  Ona taufai uu lea e le tasi o le ulu o le tasi, ma tutuʻi e le tasi le itu o le tasi i le pelu, ona latou paʻuʻū uma ai lea i lalo. Ua latou faaigoa ai lea mea o Helekata-asurima, o loo i Kipeona.+ 17  Ua matuā faigatā lava le taua i lenā aso, ona faatoʻilaloina lea o Apineru+ ma tagata Isaraelu i luma o auauna a Tavita. 18  Sa iai i inā le fanau tama e toʻatolu a Seruia,+ o Ioapo,+ o Apisai,+ ma Asaelu;+ o Asaelu foʻi e saoasaoa, e pei o le manu vaefā o le sevi+ o le fanua. 19  Ua tuliloa e Asaelu ia Apineru, ma e leʻi piʻo o ia i le itu taumatau po o le itu tauagavale mai i le mulimuli atu iā Apineru. 20  Ona tepa lea o Apineru i ona tua, ma faapea mai: “O oe ea lenā Asaelu?” Ua fai atu o ia: “O aʻu lenei.” 21  Ona fai mai lea o Apineru iā te ia: “Inā ʻalo ia i lou itu taumatau po o lou itu tauagavale, ma e puʻe ai se tasi o tauleleʻa ma ave+ ana auupega mo oe.” E leʻi manaʻo foʻi Asaelu e ʻaloese mai i le mulimuli atu iā te ia. 22  Ona toe fai mai lea o Apineru iā Asaelu: “Sui lou auala, aua e te mulimuli mai iā te aʻu. Aiseā ou te fasioti ai iā te oe?+ Ona faapefea lea ona ou toe feiloaʻi i lou uso o Ioapo?” 23  A ua musu o ia e ʻaloese; ona tutuʻi lea o ia e Apineru i le manava+ i le muli o le tao, ua ati foʻi le tao i lona tua; ona paʻū lea o ia ma ua oti ai. O i latou uma e ō mai i le mea na paʻū ma oti ai Asaelu, e tutū ai i inā.+ 24  Ua tuliloa e Ioapo ma Apisai ia Apineru. A o goto ifo le lā, ua la oo atu i le aʻega o Ama lea o loo i luma o Kia, i le auala e agaʻi atu i le toafa o Kipeona.+ 25  Ua faapotopoto e le fanauga a Peniamina i latou ma mulimuli atu iā Apineru, ua avea i latou ma ʻau e tasi, ma ua tutū ai i le tumutumu o le tasi aʻega. 26  Ona valaau mai lea o Apineru iā Ioapo e faapea: “Pe e saga ʻai+ pea ea le pelu? Pe e te lē iloa ea e iʻu lava ina oona?+ O afea e te fai atu ai i le nuu ina ia toe foʻi e aua le mulimuli atu i o latou uso?”+ 27  Ua fai atu Ioapo: “O loo soifua le Atua moni,+ pe ana e lē fai mai,+ semanū e taʻitasi le tagata ma toe foʻi i le taeao mai i le mulimuli atu i lona uso.” 28  Ona ili lea e Ioapo o le pū,+ ma ua tutū ai tagata uma, e leʻi toe ō atu e tuliloa iā Isaraelu, ma e latou te leʻi toe tauina foʻi se taua. 29  Ua savavali Apineru ma ona tagata, ua ui atu i Arapa+ i le pō atoa, ua latou sopoʻia Ioritana,+ ua ui atu i le vanu ma taunuu ai i Maanaima.+ 30  A ua toe foʻi atu Ioapo mai i le mulimuli atu iā Apineru, ua ia faapotopoto faatasi foʻi le nuu uma. E toʻasefulu iva foʻi tagata e leʻi iai mai i auauna a Tavita, atoa ai ma Asaelu. 31  Na fasia foʻi e auauna a Tavita tagata o Peniamina ma tagata o Apineru, e toʻatolu selau ono sefulu tagata na feoti ai.+ 32  Ona latou ave lea o Asaelu+ ma tanu i le fanuatanu o lona tamā+ o loo i Peteleema.+ Ona savavali lea o Ioapo ma ona tagata i le pō atoa, ua aoina foʻi i latou i Heperona.+

Faamatalaga Pito i Lalo