Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

2 Samuelu 19:1-43

19  Mulimuli ane, ona taʻu atu lea iā Ioapo: “Faauta! O loo tagi le tupu, ma o loo faavauvau pea o ia ona o Apisaloma.”+  Ua avea le faaolataga i lenā aso ma mea e faavauvau ai le nuu uma, auā ua faalogo le nuu i lenā aso, e faapea: “Ua tigā le tupu ona o lona atalii.”  Ona ō faananā lea o tagata i lenā aso e ō atu i le aai,+ e pei ona ō faananā o tagata ina ua māsiasi, auā ua latou sosola mai i le taua.  Ua ufiufi e le tupu ona fofoga, ua tagi leotele pea le tupu: “Loʻu atalii e, Apisaloma! Apisaloma loʻu atalii e, loʻu atalii e!”+  Ona ulufale atu lea o Ioapo i le tupu, ua faapea atu: “Ua e faamāsiasi au auauna uma i le asō, o ē na laveaʻia oe i le aso nei,+ o ou atalii,+ o ou afafine,+ o au avā,+ ma au palake,+  ina ua e alofa i ē e ita mai iā te oe a ua e ʻinoʻino i ē e alolofa iā te oe; auā ua e faaali mai i le asō, e leai se aogā o ou alii ma auauna iā te oe, auā ua ou iloa lelei lava, pe ana ola Apisaloma ae feoti i matou uma i le asō, semanū ua lelei lea iā te oe.  O lenei, inā tulaʻi ia ma alu atu e faamalosiau+ i au auauna, auā ou te tautō iā Ieova, afai e te lē alu atu, e leai se tagata e toe nonofo ma oe i le pō nanei;+ ona sili atu lea ona leaga o lenei mea iā te oe, nai lo o mea leaga uma na oo iā te oe talu ina o e tauleʻaleʻa, e oo mai i le taimi nei.”  Ona tulaʻi lea o le tupu ma nofo i le faitotoʻa,+ ua latou taʻu atu foʻi le tala i le nuu uma e faapea: “O loo nofo le tupu i le faitotoʻa.” Ona ō mai lea o le nuu uma i luma o le tupu. A o tagata Isaraelu, ua taʻitasi ma sola i lona fale.+  Ona fefinauaʻi lea o le nuu uma o ituaiga uma o Isaraelu, e faapea: “O le tupu na laveaʻiina i tatou mai i lima o o tatou fili,+ o ia foʻi na laveaʻiina i tatou mai i lima o Filisitia; a o lenei ua sola ese o ia mai i le nuu ona o Apisaloma.+ 10  A o Apisaloma lē na tatou faauuina e pule iā i tatou,+ ua oti o ia i le taua.+ O lenei, aiseā ua outou lē faia ai se mea e toe faafoʻi mai ai le tupu?”+ 11  Ona alu atu lea o le feʻau a le Tupu o Tavita iā Satoka+ ma Aviata+ o ositaulaga, ua faapea atu: “Ia oulua tautatala atu i toeaina o Iuta,+ ia faapea atu, ‘Aiseā ua mulimuli ai outou ona toe faafoʻi mai le tupu i lona fale, auā ua oo mai upu a Isaraelu uma i le tupu i lona fale? 12  O oʻu uso outou; o oʻu ivi ma aano foʻi outou.+ Aiseā la ua outou faatuai ai ona toe faafoʻi mai le tupu?’ 13  Ia oulua fai atu foʻi iā Amase,+ ‘Pe e lē o oe ea o oʻu ivi ma oʻu aano? Ia faapea ona faia e le Atua iā te aʻu, ia faapea foʻi ona ia faaopoopo i ai,+ pe afai e lē avea oe ma taʻitaʻi o le ʻautau i aso uma i oʻu luma nai lo o Ioapo.’ ”+ 14  Ua ia faaliliuina loto o tagata uma o Iuta e pei o se tagata e toʻatasi,+ ona latou aauina atu lea o le feʻau i le tupu: “Inā foʻi mai ia, o oe ma au auauna uma.” 15  Ona toe foʻi lea o le tupu, ma ua oo atu i Ioritana. A ua ō mai Iuta mai i Kilikala+ e ō atu e faafetaiaʻi le tupu, ina ia avatu le tupu i le isi itu o Ioritana. 16  Ona faavave lea o Semi+ le atalii o Kera+ le Peniamina, mai i Pauri,+ ua ō ifo faatasi ma tagata o Iuta e faafetaiaʻi le Tupu o Tavita. 17  Sa faatasi ma ia o tagata e toʻaafe mai i Peniamina. (Na sau foʻi Sipa+ le auauna a le aiga o Saulo ma ona atalii e toʻasefulu lima,+ ma ana auauna e toʻalua sefulu faatasi ma ia, ma na muamua ona latou taunuu i Ioritana, a o leʻi taunuu atu le tupu. 18  Ua ia sopoʻia le asaga+ e avatu le aiga o le tupu i le isi itu, ma faia mea ua lelei i lona finagalo.) A o Semi le atalii o Kera, ua ia faapaʻū faō i luma o le tupu, a o leʻi sopoʻia atu Ioritana.+ 19  Ona ia fai mai lea i le tupu: “Aua neʻi tauia mai e loʻu alii laʻu agasala, ma aua neʻi manatu i le mea sesē na faia e lau auauna,+ i le aso na maliu atu ai loʻu alii le tupu i Ierusalema, aua foʻi neʻi tuuina lenei mea i le finagalo o le tupu.+ 20  Auā ua iloa lelei e lau auauna, o aʻu lea na agasala; o lenei, ua ou sau muamua ai i le asō mai i le aiga uma o Iosefa,+ e alu ifo e faafetaiaʻi i loʻu alii le tupu.” 21  Ona tali vave atu lea o Apisai+ le tama a Seruia,+ ua faapea atu: “Pe e lē o le mea ea lea e tatau ai ona oti o Semi, ona o lona fetuu i lē ua faauuina a Ieova?”+ 22  A ua fai atu Tavita: “O le ā ea se mea e ao ona ou faia iā te oulua+ le fanau a Seruia, auā ua oulua tetee+ iā te aʻu i le asō? Pe e fasiotia ea se tasi i Isaraelu i le asō?+ Po ou te leʻi iloa lelei ea ua avea aʻu ma tupu o Isaraelu i le asō?” 23  Ua fai atu le tupu iā Semi: “E te lē oti lava.” Ona tautō lea o le tupu iā te ia.+ 24  Ua alu ifo Mefiposeta+ le atalii o le atalii o Saulo, e faafetaiaʻi i le tupu; e na te leʻi fufuluina ona vae,+ e leʻi seleina lana ʻavaaluga,+ e leʻi tāina foʻi ona ofu mai i le aso na alu ese ai le tupu, seʻia oo i le aso na toe foʻi mai ai o ia ma le filemu. 25  Ua oo i le aso na alu atu ai o ia i Ierusalema e faafetaiaʻi le tupu, ona fai atu lea o le tupu iā te ia: “Mefiposeta, aiseā na ta lē ō faatasi ai?” 26  Ua fai mai o ia: “Loʻu alii e le tupu, na ʻolegia aʻu e laʻu auauna.+ Auā ua fai ane lau auauna, ‘Seʻi faanofoa le asini mo aʻu ina ia ou tiʻetiʻe ai, ma ō atu faatasi ma le tupu,’ auā ua pipili lau auauna.+ 27  Ua ia faaleaga+ lau auauna i loʻu alii le tupu. A o loʻu alii le tupu, ua pei o se agelu+ a le Atua moni, o lea, ia e faia e tusa ma lou finagalo. 28  Auā e leai se tasi o le aiga uma o loʻu tamā e aogā, na o tagata ua tatau ona feoti i loʻu alii le tupu, a ua e tofia lau auauna e aai faatasi ma i latou i lau laoai.+ O le ā ea se isi mea e tatau ai ona ou toe tagi+ atu ai i le tupu?” 29  A ua fai atu le tupu iā te ia: “Aiseā ua e tautala mai ai i na upu? Ua uma ona ou fai atu, e vaelua e oulua ma Sipa le fanua.”+ 30  Ona fai mai lea o Mefiposeta i le tupu: “Ave mea uma lava mo ia,+ auā o lea ua oo mai ma le filemu loʻu alii le tupu i lona fale.” 31  A ua alu ifo Pasili+ le Kiliata mai i Rokeli, ina ia alu atu o ia i Ioritana faatasi ma le tupu, e momoli atu o ia i Ioritana. 32  Ua toeaina lava Pasili, ua valu sefulu ona tausaga;+ na ia saunia foʻi mo le tupu o meaʻai a o nofo o ia i Maanaima,+ auā o ia o se tagata e mauʻoa+ tele. 33  Ona fai atu lea o le tupu iā Pasili: “Sau ta sopo faatasi atu ma aʻu, ona ou saunia lea o meaʻai e ta te aai faatasi ai ma aʻu i Ierusalema.”+ 34  A ua fai mai Pasili i le tupu: “Pe e toe fia nisi tausaga o totoe o loʻu ola, ou te alu aʻe ai faatasi ma le tupu i Ierusalema? 35  Ua valu sefulu oʻu tausaga i le asō.+ Pe e mafai ea ona ou toe iloa se lelei ma se leaga, pe mafai ea e lau auauna ona iloa le tofo o mea ou te ʻai ai ma mea ou te inu ai,+ pe e mafai foʻi ona ou toe lagona+ le leo o tane ma fafine pepese?+ Aiseā ea e avea ai lau auauna ma faalavelave+ i loʻu alii le tupu? 36  Auā e puupuu lava le ala na aumaia ai e lau auauna le tupu i Ioritana, ae aiseā e toe tauia ai aʻu e le tupu?+ 37  Faamolemole, inā tuu mai ia o lau auauna e toe foʻi atu, ina ia ou oti+ i loʻu aai e latalata i le fanuatanu o loʻu tamā ma loʻu tinā.+ Ae o lau auauna lenei o Kimeama.+ Ia alu atu o ia faatasi ma loʻu alii le tupu; ma ia e faia iā te ia le mea e lelei i lou finagalo.” 38  Ona fai atu lea o le tupu: “O le a ma sopoʻia atu ma Kimeama, ou te faia iā te ia o mea ua e loto i ai; o mea uma foʻi ua e manatu ou te faia, ou te faia lava mo oe.” 39  Ona sopoʻia atu lea e le nuu uma o Ioritana, na maliu atu foʻi ma le tupu; a ua sogi+ atu le tupu iā Pasili ma faamanuia+ atu iā te ia, ona toe foʻi ai lea o ia i lona nuu. 40  Ina ua sopoʻia e le tupu le vaitafe e alu atu i Kilikala,+ na la ō atu faatasi ma Kimeama, atoa ma tagata uma o Iuta, ma le ʻafa o le nuu o Isaraelu, ua latou sopoʻia le vaitafe faatasi ma le tupu. 41  Faauta! ua ō mai tagata uma o Isaraelu i le tupu, ua latou faapea mai i le tupu: “Aiseā na+ ave faananā ai oe e o matou uso, o tagata o Iuta, ina ia latou aumai le tupu ma lona aiga uma, ma tagata uma o Tavita i le isi itu o Ioritana?”+ 42  Ona tali atu lea o tagata uma o Iuta ma tagata o Isaraelu: “Auā e vavalalata lo matou aiga ma le tupu;+ aiseā foʻi ua outou feita ai i lenei mea? Po ua matou aai ea i ni meaʻai a le tupu, po ua aumai foʻi se meaalofa iā i matou?” 43  A ua tali mai tagata o Isaraelu i tagata o Iuta, e faapea: “E sefulu o matou ituaiga i le tupu,+ e oo lava iā Tavita, e sili atu ona tele i matou nai lo o outou. Aiseā la ua outou lē faaaloalo ai iā i matou, ma aiseā na lē muamua+ ai i matou e toe faafoʻi mai le tupu?” A ua sili atu ona malolosi upu a tagata o Iuta, nai lo o upu a tagata o Isaraelu.

Faamatalaga Pito i Lalo