Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

2 Samuelu 17:1-29

17  Ua fai atu Aitofele iā Apisaloma: “Faamolemole, seʻi oʻu filifilia ni tagata se toʻasefulu lua afe, ma matou ō atu e tuliloa iā Tavita i le pō nanei.+  Ou te alu atu iā te ia a o vaivai ma lē lavā o ia,+ ou te faamataʻu iā te ia; ona sosola ese lea o le nuu uma ua iā te ia, ona ou fasia lea o le tupu ina ua na o ia.+  Ona ou toe faafoʻisia mai lea o tagata uma iā te oe. O le toe foʻi mai o tagata uma, e faalagolago i le tagata o loo e saʻilia; ma o le a filemu foʻi tagata uma.”  Ua matuā tonu lava le upu i le manatu o Apisaloma,+ ma manatu o toeaina uma o Isaraelu.  A ua fai ane Apisaloma: “Faamolemole, inā valaau atu ia iā Usai+ le Araki, seʻi o tatou faalogo i sana upu.”  Ona alu ane lea o Usai iā Apisaloma. Ua fai mai Apisaloma iā te ia: “O upu nei na fai mai ai Aitofele. Pe e tatou te faia ea? Afai e leai, inā e fai mai ia.”  Ona fai atu lea o Usai iā Apisaloma: “E lē lelei le fautuaga na fautua atu ai Aitofele e tusa ma lenei mea!”+  Ua fai atu Usai: “Ua e silafia lava o lou tamā ma ona tagata, o toa+ i latou, ua tigā foʻi o latou loto+ e pei o se pea fafine ua leiloloa lana toloaʻi i le fanua;+ o lou tamā foʻi o le tagata e tau,+ e lē moe o ia i le pō faatasi ma le nuu.  Faauta! O loo lafi+ nei o ia i se lua po o se isi nofoaga; ma afai e na te osofaʻia muamua i latou, o le a salalau atu le tala e faapea, ‘Ua faatoʻilaloina le nuu o loo mulimuli atu iā Apisaloma!’ 10  E oo lava i le tagata toa o lē e pei lona loto o le loto o le leona,+ e vaivai lava o ia;+ auā ua iloa e Isaraelu uma o lou tamā o se tagata malosi,+ e faapea foʻi tagata totoa uma o loo faatasi ma ia.+ 11  Ae ou te fautua atu: Ia faapotopoto mai iā te oe o Isaraelu uma, e amata mai i Tanu seʻia oo i Peresepa,+ e pei o le oneone o le sami lo latou toʻatele,+ ma ia e afio atu lava oe i le taua.+ 12  Ona tatou oo atu ai lea i se tasi o nofoaga e mautinoa e maua ai o ia,+ e tatou te oo atu ai iā te ia e pei ona totō ifo o le sau+ i le eleele; e lē totoe ai foʻi se tagata e tasi, o ia ma tagata uma ua iā te ia. 13  Ae afai e lafi o ia i se aai, inā ave ia e Isaraelu uma o maea i lenā aai, ona tatou toso ifo lea o le aai i le ālia, seʻia leai lava se tamaʻi maa e totoe ai.”+ 14  Ona fai ane lea o Apisaloma ma tagata uma o Isaraelu, e faapea: “E sili atu ona lelei+ le fautuaga a Usai le Araki nai lo o le fautuaga a Aitofele!” O Ieova lava ia na poloaʻi+ mai ia faalēaogāina le fautuaga+ a Aitofele e ui ina lelei,+ ina ia faaoo e Ieova le mala+ iā Apisaloma. 15  Mulimuli ane, ua fai atu Usai i ositaulaga o Satoka+ ma Aviata: “Na faapea ma faapea le fautuaga a Aitofele iā Apisaloma ma toeaina o Isaraelu; na faapea ma faapea foʻi laʻu fautuaga. 16  O lenei, ia auina faavave atu se feʻau e taʻu atu iā Tavita,+ e faapea, ‘Aua e te nofo i fanua laugatasi o le toafa i le pō nei, a ia e sopo atu+ ina neʻi faaumatia+ le tupu ma le nuu uma o iā te ia.’ ” 17  A o tutū Ionatana+ ma Aimaasu+ i Enerokelu,+ ua alu atu se auauna fafine ma taʻu atu iā i laʻua. Ona la ō atu lea, auā e tatau ona la taʻu atu i le Tupu o Tavita; ona e leʻi mafai ona la ō ma faailoa atu i laʻua i le aai. 18  A ua iloa i laʻua e se tauleʻaleʻa ma ua ia taʻu atu iā Apisaloma. Ona la vave ō ese lea ma ō atu i le fale o se tagata i Pauri,+ o lē e iai se vaieli i lona lotoā; ona la ō ifo lea i ai. 19  Ona ave lea e lana avā o se mea ma fofola e ufiufi ai le gutu o le vaieli, ma na ia faaputu ai fatu saito ua uma ona olo;+ e leʻi iloa foʻi e se tasi lea mea. 20  Ona ō atu lea o auauna a Apisaloma i le fale o le fafine, ma faapea atu iā te ia: “O fea o iai Aimaasu ma Ionatana?” Ua tali mai le fafine iā i latou: “Ua la sopoʻia le vaitafe.”+ Ua latou saʻili pea a ua latou lē maua i laʻua,+ ona toe foʻi lea i Ierusalema. 21  Ina ua latou ō ese atu, ona la ō aʻe lea mai i le vaieli, ua ō ma taʻu ane i le Tupu o Tavita, ua faapea mai iā Tavita: “Inā outou tutulaʻi ia ma sopoʻia faavave atu le vaitafe; auā o le fautuaga+ lea a Aitofele ua fai faasaga iā te outou.” 22  Ona tulaʻi loa lea o Tavita ma tagata uma ua iā te ia, ua latou sopoʻia atu Ioritana seʻia malama aʻe le taeao,+ seʻia oo ina latou sopo uma atu i le isi itu o Ioritana. 23  Ua iloa e Aitofele e leʻi faia e pei ona ia fautua atu ai,+ ona ia faanofoa lea o le asini, ua tiʻetiʻe ai ma alu atu i lona fale i lona aai.+ Ua ia poloaʻi atu i lona aiga,+ ona ia nonoa lea o lona ua+ ma ua oti ai.+ Ua tanu+ o ia i le fanuatanu o ona augātamā. 24  Ua oo atu Tavita i Maanaima,+ a ua sopoʻia atu e Apisaloma le vaitafe o Ioritana, o ia ma tagata uma o Isaraelu o faatasi ma ia. 25  Ua tofia e Apisaloma Amase+ e sui iā Ioapo+ i le ʻautau; o Amase o le atalii o le tagata e igoa iā Ietera+ le Isaraelu, o lē na momoe ma Apikaila+ le afafine o Naasa, le uso o Seruia le tinā o Ioapo. 26  Ua tolauapi Isaraelu ma Apisaloma i le nuu o Kiliata.+ 27  Ina ua oo atu Tavita i Maanaima, ona avatu lea e Sopi le atalii o Naasa mai i Rapa+ o le fanauga a Amoni,+ o Makiro+ le atalii o Amueli+ mai i Lotapara, ma Pasili+ le Kiliata mai i Rokeli,+ 28  o moega, o ipu, o ipu omea, o saito, o karite, o falaoamata,+ o saito tunu,+ o pi,+ o atasema,+ o saito tao, 29  o meli,+ o pata,+ o mamoe, ma suāsusu toʻa o povi, ia na latou aumaia mo Tavita ma tagata ua iā te ia e aai ai,+ auā ua latou faapea ane: “Ua fia aai tagata, ua lē lavavā ma ua fia feinu foʻi i le toafa.”+

Faamatalaga Pito i Lalo