Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

2 Samuelu 11:1-27

11  Ina ua toe aulia mai le tausaga+ i le taimi e faia ai osofaʻiga a tupu,+ ona aauina atu lea e Tavita o Ioapo ma ana auauna, ma Isaraelu uma, ina ia latou ō atu e faatamaʻia le fanauga a Amoni,+ ma vagaia Rapa+ a o nofo Tavita i Ierusalema.  Ua oo i le tasi afiafi ina ua tulaʻi Tavita mai i lona moega, ma fesavaliaʻi solo i luga+ o le fale o le tupu; ona ia iloa+ atu lea mai i luga o le fale o se fafine o loo tāʻele, ua matuā lalelei+ lava.  Ona auina atu lea e Tavita o se tasi e fesili po o ai le fafine,+ a ua fai ane se tasi: “Pe e lē o Patesepa+ ea lea le afafine o Eliamu,+ o ia o le avā a Uria+ le sa Hetī?”+  Mulimuli ane, ua aauina atu e Tavita o avefeʻau ina ia aami iā te ia.+ Ua sau o ia iā te ia+ ma ua la momoe,+ a o faamamā e le fafine o ia mai i lona leaga.+ Mulimuli ane, ua ia toe foʻi i lona fale.  Ua tō le fafine. Ona ia auina atu lea o se feʻau iā Tavita, e faapea: “Ua ou tō.”  Ona auina atu lea e Tavita o le feʻau iā Ioapo, e faapea: “Ia auina mai iā te aʻu Uria le sa Hetī.” Ona auina mai lea e Ioapo o Uria iā Tavita.  Ina ua sau Uria iā te ia, ua fesili atu Tavita po o ā mai Ioapo ma le nuu, ma po o ā mai foʻi le taua.  Mulimuli ane, ua fai atu Tavita iā Uria: “Inā alu ifo ia i lou fale e mulumulu ou vae.”+ Ona alu ai lea o Uria i fafo mai i le fale o le tupu, ua mulimuli atu iā te ia le meaalofa mai i le tupu.  A ua taoto Uria i le faitotoʻa o le fale o le tupu faatasi ai ma auauna uma a lona alii, ae e leʻi alu ifo o ia i lona fale. 10  Ona latou taʻu atu lea iā Tavita e faapea: “E leʻi alu ifo Uria i lona fale.” Ua fai atu Tavita iā Uria: “Pe e te leʻi sau ea mai i le malaga? Aiseā ua e lē alu ifo ai i lou fale?” 11  Ona fai mai lea o Uria iā Tavita: “O le Atolaau,+ ma Isaraelu, ma Iuta, o loo nonofo i latou i fale lauvao, ma o loo tolauapi foʻi i le fanua o loʻu alii o Ioapo ma auauna a loʻu alii,+ po ou te alu ea i loʻu fale e ʻai ma inu, ma momoe ma laʻu avā?+ Ua e soifua oe,+ ou te lē faia lava lenei mea!” 12  Ua fai atu Tavita iā Uria: “Ia e nofo i inei i le asō, ae ou te auina ese atu oe a taeao.” Ona nofo ai pea lea o Uria i Ierusalema i lenā aso, ma le aso na sosoo ai. 13  Ua valaauina o ia e Tavita ina ia ʻai ma inu i ona luma. Ua ia faaonā iā te ia.+ Ona alu atu lea o ia e taoto i lona moega faatasi ai ma auauna a lona alii, ae e leʻi alu ifo o ia i lona fale. 14  Ua oo i le taeao, ona tusia lea e Tavita o se tusi+ iā Ioapo, ma auina atu e ave e Uria. 15  Ua ia tusi i le tusi e faapea:+ “Ia outou tuuina Uria i muaʻau o le taua pe a vevela le taua,+ ona outou tuumuli lea mai iā te ia, ina ia fasia o ia ma oti ai.”+ 16  A o leoleoina pea e Ioapo le aai, na ia tuuina Uria i le mea na ia iloa o loo iai tagata totoa.+ 17  Ina ua ō mai tagata o le aai e tau ma Ioapo, ona paʻuʻū lea o nisi o tagata o auauna a Tavita, ua oti ai foʻi Uria le sa Hetī.+ 18  Ona auina atu lea e Ioapo o se tasi e taʻu atu tala uma o le taua iā Tavita. 19  Ua ia fai atu i le avefeʻau e faapea: “A uma loa ona e taʻu atu tala uma o le taua i le tupu, 20  pe afai e matuā ita le tupu ma fetalai mai iā te oe, ‘Aiseā na outou soona faalatalata ai i le aai e tau ai? Pe e tou te leʻi iloa ea e latou te tafana mai i luga o le pā? 21  O ai ea na fasiotia Apimeleko+ le atalii o Ierupese?+ Pe e lē o le fafine ea na ia lafo ifo se maa e olo ai saito i ona luga,+ mai i luga o le pā ma oti ai o ia i Tipesa?+ Aiseā na outou soona faalatalata ai i le pā?’ Ona e faapea atu lea, ‘Ua oti foʻi lau auauna o Uria le sa Hetī.’”+ 22  Ona sau lea o le avefeʻau ma taʻu mai iā Tavita mea uma na auina mai ai o ia e Ioapo. 23  Ua fai mai le avefeʻau iā Tavita: “Na malolosi atu tagata iā i matou, na latou siitaua mai iā i matou i le fanua; a ua matou tetee atu pea iā i latou e oo lava i le faitotoʻa o le pā. 24  Na tafana mai pea e tagata fanafana ū au auauna mai i luga o le pā,+ ua feoti ai nisi o auauna a le tupu; ma ua oti ai foʻi lau auauna o Uria le sa Hetī.”+ 25  Ona fai atu lea o Tavita i le avefeʻau: “O lau tala lenei e fai iā Ioapo, ‘Aua e te atuatuvale ona o lenei mea, auā e fasiotia ma e lē faailogaina+ e le pelu se tasi. Ia e faamalosi e tau ma le aai ma ia faatoʻilaloina.’+ Ia e faalaeiau iā te ia.” 26  Ua faalogo le avā a Uria ua oti Uria lana tane, ona ia tagiauē+ ai lea ona o lana tane.+ 27  Ina ua mavae le taimi e faavauvau ai,+ ona auina atu loa lea e Tavita o le feʻau ma aumai o ia i lona fale, ua fai foʻi o ia ma ana avā.+ Mulimuli ane, ua ia fanaua lona atalii, ae ua leaga+ i le silafaga+ a Ieova le mea na faia e Tavita.

Faamatalaga Pito i Lalo