Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

1 Tupu 2:1-46

2  Ua oo ina latalata i le aso e oti ai Tavita;+ ona ia poloaʻi atu lea i lona atalii o Solomona, e faapea:  “O le a ou oti,+ ae ia e faamalosi+ ma ia e faatamatane.+  Ia e usiusitaʻi iā Ieova lou Atua i lou savali i ona ala,+ i le tausia o ana tulafono, o ana poloaʻiga, o iʻuga o ana faamasinoga,+ ma ana faamanatuga, e tusa ma mea ua tusia i le tulafono a Mose,+ ina ia e faautauta i mea uma e te faia ma mea uma e te alu atu i ai;  ina ia faataunuuina e Ieova lana afioga na ia fetalai ai e faatatau iā te aʻu,+ e faapea, ‘Afai e tausia e lau fanau+ lo latou ala i le savavali+ ma le faamaoni+ i oʻu luma, ma o latou lotoatoa,+ ma lo latou malosi atoa, e lē motu lou gafa mai i le nofoālii o Isaraelu.’+  “Ua e iloa lelei foʻi le mea na faia e Ioapo le tama a Seruia iā te aʻu,+ i le mea na ia faia i taʻitaʻiʻau e toʻalua a Isaraelu, o Apineru+ le atalii o Neru ma Amase+ le atalii o Ietero,+ ina ua ia fasiotia i laʻua ma faamaligi ai le toto+ o le taua i le taimi o loo filemu ai, ma tuu ai le toto o le taua i lona fusipaʻu sa i lona puimanava, ma ona seevae sa i ona vae.  Ia e faia e tusa ma lou atamai,+ ma aua neʻi tuuina lona ulusinā e alu ifo ma le filemu+ i le Tuugamau.*+  “Ia e alofa faamaoni i atalii o Pasili+ le Kiliata, ia iai foʻi i latou faatasi ma ē e aai i lau laoai;+ auā na faapena foʻi ona latou fesoasoani+ mai iā te aʻu, a o oʻu sola ese mai iā Apisaloma lou uso.+  “O loo nofo latalata mai iā te oe Semi+ le atalii o Kera le Peniamina mai i Pauri,+ o lē na ia fetuuina aʻu i se fetuu e tigā+ ai i le aso na ou alu atu ai i Maanaima;+ o ia foʻi na alu ifo e faafetaiaʻi aʻu i Ioritana,+ ona ou tautō ai lea iā te ia i le suafa o Ieova, e faapea, ‘Ou te lē fasiotia oe i le pelu.’+  O lenei, aua neʻi lē faasalaina+ o ia, auā o oe o le tagata atamai+ ma ua e iloa lelei le mea e tatau ona e faia iā te ia, ia e tuuina ifo lona ulusinā+ i le Tuugamau ma le toto.”+ 10  Ona taoto lea o Tavita faatasi ma ona augātamā,+ ua tanu foʻi o ia i le Aai a Tavita.+ 11  O aso foʻi na pule ai Tavita i Isaraelu, e fā sefulu tausaga.+ Na ia pule i Heperona+ i tausaga e fitu,+ ae na ia pule i Ierusalema i tausaga e tolu sefulu tolu.+ 12  Ua nofo Solomona i le nofoālii o Tavita lona tamā;+ ma ua oo ina matuā faatumauina lona malo.+ 13  Mulimuli ane, ua alu atu Atonia le tama a Akita iā Patesepa,+ le tinā o Solomona. Ona fai mai lea o Patesepa: “Po ua e sau ea ma le filemu?”+ A ua tali atu o ia: “Ua ou sau ma le filemu.” 14  Ua ia fai atu foʻi: “O loo iai se mea ou te fia taʻu atu iā te oe.” Ona ia fai mai lea: “Inā taʻu mai ia.”+ 15  Ona ia toe faapea atu lea: “Ua e iloa lelei lava na semanū e fai le malo mo aʻu, ma na vaavaai uma mai foʻi Isaraelu iā te aʻu e avea ma tupu;+ a ua suia le malo ma ua avea mo loʻu uso, auā ua finagalo Ieova e fai mo ia.+ 16  O lenei, e tasi lava le mea ou te talosaga atu ai iā te oe. Aua neʻi e liliuese mai iā te aʻu.”+ Ona faapea mai lea o ia: “Inā fai mai ia.” 17  Ua ia fai atu: “Faamolemole, ia fai atu iā Solomona le tupu (auā e na te lē liliuese mai iā te oe) ina ia ona tuuina mai iā te aʻu, o Apiseka+ le Sunema+ e fai ma aʻu avā.” 18  Ona fai mai lea o Patesepa: “Ua lelei! Ou te tautala atu i le tupu mo oe.” 19  Ua alu atu Patesepa i le Tupu o Solomona e talanoa iā te ia mo Atonia.+ Ua tulaʻi+ le tupu e faafetaiaʻi iā te ia, ma ifo mai iā te ia.+ Ona nofo lea o ia i lona nofoālii, ua fai ane foʻi o ia e aumai se nofoa mo le tinā o le tupu, ina ia nofo ai i lona itu taumatau.+ 20  Ona fai atu lea o ia: “E tasi lava si mea lea ou te talosaga atu ai iā te oe. Aua neʻi e liliuese mai iā te aʻu.” Ona fai mai lea o le tupu iā te ia: “Inā fai mai ia loʻu tinā e; auā ou te lē liliuese mai iā te oe.” 21  Ua ia faapea atu: “Ia avatu Apiseka le Sunema, e fai ma avā a Atonia lou uso.” 22  Ona tali mai lea o le Tupu o Solomona, ua faapea mai i lona tinā: “Aiseā ua e talosaga mai ai mo Apiseka le Sunema e ave mo Atonia? Na sili ai foʻi ona e talosaga mai e ave le malo mo ia+ (auā o ia o loʻu uso matua),+ atoa foʻi ma Aviata+ le ositaulaga, ma Ioapo+ le tama a Seruia.”+ 23  Ona tautō ai lea o le Tupu o Solomona iā Ieova, ua faapea mai: “Ia faia lava e le Atua iā te aʻu, ma ia faaopoopo foʻi i ai,+ pe afai o le mea na tautala mai ai Atonia e lamatia ai lona ola.+ 24  O lenei, o loo soifua Ieova+ o lē na ia matuā faatumauina aʻu+ ma faanofoina pea aʻu i le nofoālii o Tavita loʻu tamā,+ o lē na faia se aiga+ mo aʻu, e pei lava ona ia fetalai mai ai,+ o le asō e fasiotia ai lava Atonia.”+ 25  Ona auina atu lea e le Tupu o Solomona o Penaia+ le atalii o Ioiata; ua ia fasi iā te ia, ma ua oti ai.+ 26  Ua fai atu le tupu iā Aviata+ le ositaulaga: “Inā alu ia i Anatota+ i ou fanua! Auā ua tatau ona e oti;+ ae ou te lē faaoo le oti iā te oe i le asō, auā na e ave le atolaau a le Alii Pule Silisili Ese o Ieova+ i luma o Tavita loʻu tamā,+ ma sa e tigā foʻi i le taimi atoa na tigā ai loʻu tamā.”+ 27  Ona tuliese lea e Solomona o Aviata mai i le avea ma ositaulaga a Ieova, ina ia taunuu ai le afioga a Ieova na ia fetalai mai ai e faasaga i le aiga o Eli+ i Sailo.+ 28  Ua oo atu le tala iā Ioapo,+ (auā na naunau Ioapo e mulimuli iā Atonia,+ ae e leʻi naunau e mulimuli iā Apisaloma)+ ona sola lea o Ioapo i le faleʻie+ o Ieova, ma ua taofimau i nifo o le fata faitaulaga.+ 29  Ua taʻu atu le tala i le Tupu o Solomona: “Ua sola Ioapo i le faleʻie o Ieova, ma o loo iai o ia i tafatafa o le fata faitaulaga.” Ona auina atu lea e Solomona o Penaia le atalii o Ioiata, ua faapea atu: “Inā alu ia ma fasi iā te ia!”+ 30  Ona alu atu ai lea o Penaia i le faleʻie o Ieova, ma faapea atu iā te ia: “O le mea lenei ua fetalai mai ai le tupu, ‘Ia e sau i fafo!’” A ua fai mai o ia: “E leai! Auā o i inei+ lava ou te oti ai.” Ona alu lea o Penaia ma taʻu atu lea upu i le tupu, ua faapea atu: “O le upu lenei na fai mai ai Ioapo, na faapea ona tali mai o ia iā te aʻu.” 31  Ona fai mai lea o le tupu iā te ia: “Ia e faia e pei ona fai mai ai o ia, ma fasi iā te ia; ia e tanu foʻi iā te ia, ma aveesea ai mai iā te aʻu ma le aiga o loʻu tamā, le toto+ na faamaligi fua e Ioapo.+ 32  E taui atu lava e Ieova lona toto i lona ulu,+ auā na ia fasia tagata e toʻalua e sili atu le amiotonu ma le lelei nai lo o ia,+ na ia fasiotia i laʻua i le pelu ae e leʻi iloa e loʻu tamā o Tavita,+ o Apineru+ le atalii o Neru le taʻitaʻiʻau o Isaraelu,+ ma Amase+ le atalii o Ietero le taʻitaʻiʻau o Iuta.+ 33  Ia taui atu o la toto i le ulu o Ioapo ma ana fanau i aso uma;+ a ia iai le filemu mai iā Ieova+ i aso uma iā Tavita+ ma lana fanau, ma lona aiga, atoa ma lona nofoālii.” 34  Ona alu aʻe+ lea o Penaia le atalii o Ioiata, ua fasi iā te ia ma oti ai;+ ua tanu o ia i lona fale i le toafa. 35  Ua tofia e le tupu o Penaia+ le atalii o Ioiata, e sui iā te ia e taʻitaʻia le ʻautau;+ a ua tofia e le tupu o Satoka le ositaulaga, e sui iā Aviata.+ 36  Mulimuli ane, ona alu atu lea o le feʻau a le tupu iā Semi,+ ma faapea atu iā te ia: “Ia e faia se fale mo oe i Ierusalema ma e nofo ai i inā, ma aua neʻi e alu ese mai i inā. 37  O le aso e te alu ese ai ma e sopoʻia le ālia o Ketarono,+ ia e iloa lelei e te oti ai lava.+ E i luga o lou ulu lou lava toto.”+ 38  Ona fai mai lea o Semi i le tupu: “Ua lelei au upu. E pei ona fetalai mai o loʻu alii le tupu, e faapea foʻi ona faia e lau auauna.” Na nofo pea Semi i Ierusalema i aso e tele. 39  Mulimuli ane, ua mavae tausaga e tolu, ona sosola atu lea o pologa+ e toʻalua a Semi iā Akisa+ le atalii o Maaka, le tupu o Kata;+ ua ō mai foʻi tagata ua taʻu mai iā Semi, e faapea: “Faauta! O loo iai au pologa i Kata.” 40  Ua tulaʻi faavave Semi, ua faanofoa lana asini ma ua alu atu i Kata iā Akisa e saʻili ana pologa; ona alu atu lea o Semi ma aumai ana pologa mai i Kata. 41  Ua taʻu mai iā Solomona le tala: “Na alu ese Semi mai i Ierusalema e agaʻi atu i Kata, ae ua toe foʻi mai.” 42  Ona feʻau+ atu lea e le tupu o Semi, ua faapea atu iā te ia: “Po ou te leʻi fai atu ea iā te oe ia e tautō mai i le suafa o Ieova, ma ou lapataʻia ai oe+ e faapea, ‘O le aso e te alu ese ai ma e alu atu i se isi mea, ia e iloa lelei e te oti ai lava,’ pe e te leʻi fai mai foʻi iā te aʻu, ‘Ua lelei le upu ua ou faalogo i ai’?+ 43  Aiseā la e te leʻi tausia ai lau tautoga na faia iā Ieova,+ ma le poloaʻiga na ou fai atu ai iā te oe?”+ 44  Ua fai atu le tupu iā Semi: “Ua e iloa lelei lava mea leaga uma na e iloa i lou loto, na e faia i loʻu tamā o Tavita;+ e toe taui atu foʻi e Ieova i lou lava ulu o mea leaga na e faia.+ 45  Ae e manuia le Tupu o Solomona,+ e matuā faatumauina foʻi le nofoālii o Tavita i luma o Ieova e faavavau.”+ 46  Ona poloaʻi atu lea o le tupu iā Penaia le atalii o Ioiata, ua alu atu o ia i fafo ma fasi iā te ia, ma ua oti ai o ia.+ Ua matuā faatumauina le malo i lima o Solomona.+

Faamatalaga Pito i Lalo

Po o “Seoli,” e mai le upu Eperu sheʼohlʹ. Tagaʻi i le Faaopoopoga e 6.