Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

1 Tupu 18:1-46

18  Ua mavae aso e tele,+ ona oo mai lea o le afioga a Ieova iā Elia i le tausaga lona tolu, ua faapea mai: “Inā alu ia ma faailoa atu oe iā Aapo, auā ua ou manatu e faatotō ifo le timu i luga o le fogāeleele.”+  Ona alu lea o Elia e faailoa atu o ia iā Aapo, a o matuā faateteleina+ le oge i Samaria.  Ona valaau atu lea o Aapo iā Opetaia, o lē e pule i le aiga.+ (Sa matuā mataʻu+ foʻi Opetaia iā Ieova.  Ina ua fasiotia e Iesepela+ perofeta a Ieova,+ ona ave lea e Opetaia o perofeta e toʻaselau ma faalalafi i latou e taʻitoʻalima sefulu i se ana, ma ia avatu iā i latou o meaʻai ma vai i inā.)+  Ona fai atu lea o Aapo iā Opetaia: “Inā alu ia i le nuu i vaipuna uma ma ālia uma. Atonu tatou te maua ai ni mutia+ ina ia faasaoina ai ola o solofanua ma asini,* ina neʻi iai ni manu e mamate.”+  Ona la vaeluaina lea o le nuu e la te feoaʻi ai. Ua alu Aapo na o ia i le tasi ala, a ua alu Opetaia na o ia i le isi ala.+  A o alu atu Opetaia i le ala, vaai! ua sau Elia e faafetaiaʻi o ia.+ Ina ua ia iloa o ia, ona faapaʻū faō+ lea o ia ua faapea mai: “Po o oe ea lea o loʻu alii+ o Elia?”  Ona ia fai atu lea iā te ia: “O aʻu lenei. Inā alu ia ma fai atu i lou alii,+ ‘O loo i inei Elia.’”  A ua ia fai mai: “O le ā ea laʻu agasala+ ua fai, ua e tuuina ai lau auauna i lima o Aapo ina ia fasiotia ai aʻu? 10  O loo soifua Ieova lou Atua,+ e leʻi iai se nuu po o se malo e leʻi aauina atu i ai e loʻu alii nisi e saʻili iā te oe. Ma ua latou fai mai, ‘E lē o iai o ia i inei,’ na ia faatautō le malo ma le nuu, ina ia faapea mai ua latou lē maua oe.+ 11  A o lenei ua e fai mai, ‘Inā alu ia ma fai atu i lou alii: “O loo i inei Elia.”’ 12  Pe a ou alu ese mai iā te oe, ona ave lea o oe e le agaga+ o Ieova i se mea ou te lē iloaina; ou te alu ma taʻu atu iā Aapo, ae na te lē maua oe, ona ia fasiotia+ lava lea o aʻu, peitaʻi, na mataʻu lau auauna iā Ieova mai lava i lona talavou.+ 13  Pe e leʻi taʻuina atu ea i loʻu alii le mea na ou faia ina ua fasiotia e Iesepela perofeta a Ieova, na ou faalalafi nisi o perofeta e toʻaselau a Ieova, e taʻitoʻalima sefulu i se ana,+ ma avatu pea meaʻai ma vai iā i latou?+ 14  A o lenei ua e fai mai, ‘Inā alu ia ma fai atu i lou alii: “O loo i inei Elia.”’ E na te fasiotia lava aʻu.”+ 15  Ae peitaʻi, ua faapea atu Elia: “O loo soifua+ Ieova o ʻau+ o lē o loo oʻu tū ai i ona luma, o le asō ou te faailoa atu ai aʻu iā te ia.” 16  Ona alu atu lea o Opetaia e faafetaiaʻi iā Aapo ma taʻu atu iā te ia; o lea, ua sau Aapo e faafetaiaʻi iā Elia. 17  Ina ua iloa atu e Aapo o Elia, ona fai atu loa lea o Aapo iā te ia: “Po o oe ea lenā, o lē e aumaia faafitauli iā Isaraelu?”+ 18  A ua ia faapea mai: “Ou te leʻi aumaia faafitauli+ iā Isaraelu, a o oe ma le aiga o lou tamā,+ auā ua outou tuua poloaʻiga a Ieova,+ a ua e mulimuli atu pea iā Paala.+ 19  O lenei, ia aauina atu nisi e faapotopoto mai Isaraelu uma iā te aʻu i le Mauga o Karamelu,+ faapea le toʻafā selau lima sefulu o perofeta a Paala,+ atoa foʻi ma perofeta e toʻafā selau e tapuaʻi i le pou paia,+ o ē o loo aai i le laulau a Iesepela.”+ 20  Ona aauina atu lea e Aapo o nisi i le fanauga uma a Isaraelu, ma faapotopoto faatasi perofeta+ i le Mauga o Karamelu. 21  Ua faalatalata atu Elia i le nuu uma, ua faapea atu: “O le ā ea le umi e tou te faalētonu ai i manatu eseese e lua?+ Afai o Ieova o le Atua moni, ia outou mulimuli atu iā te ia;+ ae afai o Paala, ia outou mulimuli atu iā te ia.” E leʻi fai mai foʻi e le nuu se upu e tali mai ai iā te ia. 22  Ona toe faapea atu lea o Elia i le nuu: “E na o aʻu lava le perofeta a Ieova o loo totoe,+ a o perofeta a Paala, e toʻafā selau lima sefulu i latou. 23  Ia latou aumaia iā i matou ni tamaʻi povi poʻa se lua, ma ia latou filifili mo i latou se tamaʻi povi poʻa se tasi, ma ia latou penaina, ma faaee i luga o fafie ae aua neʻi avane i ai se afi. A o aʻu, ou te saunia le isi tamaʻi povi poʻa, ma ou faaee i luga o fafie, ou te lē avane i ai se afi. 24  Ia outou valaau atu i le igoa o lo outou atua,+ a o aʻu, ou te valaau atu foʻi i le suafa o Ieova; o le Atua e tali mai i le afi,+ o le Atua moni lea.”+ Ona tali mai lea o le nuu uma, ua faapea mai: “Ua lelei lenā mea.” 25  Ona fai atu lea o Elia i perofeta a Paala: “Ia outou filifili se tamaʻi povi poʻa se tasi ma sauni muamua, auā e toʻatele outou; ia outou valaau i le igoa o lo outou atua, ae aua neʻi outou avane i ai se afi.” 26  Ua latou ave le tamaʻi povi poʻa na ia tuuina atu iā i latou. Ona latou saunia lea, ma ua latou valaau atu pea i le igoa o Paala, e mai i le taeao e oo i le aoauli, e faapea: “Paala e, ia e faafofoga mai iā i matou!” A ua leai se leo,+ ua leai foʻi se tasi e tali mai.+ Ua latou taufai osooso ma sisiva faataamilo i le fata faitaulaga na latou faia. 27  Ua oo i le aoauli, ona tauemu+ lea o Elia iā i latou, ua faapea atu: “Ia outou valaau leotetele atu ia, auā o ia o se atua;+ atonu o loo manatunatu i se mea, ma po o alu i le faleese.+ Po o moe foʻi, ma e ao ona fafagu iā te ia!”+ 28  Ona latou valaau leotetele lea, ma selei+ i latou i naifi ma tatui i tao e tusa ma la latou tū, ua oo lava ina tafe mai le toto i o latou tino. 29  Ina ua mavae le tū tonu o le lā, ua faaauau ona latou gaoioi e pei o ni perofeta,+ seʻia oo i le taimi e ofo atu ai taulaga i meaʻai, a ua leai se leo, e leai foʻi se tasi na tali mai, ma e leai se tasi na faalogo mai.+ 30  Ua fai atu Elia i le nuu uma: “Inā faalatalata mai ia iā te aʻu.” Ona faalatalata lea o le nuu uma iā te ia. Ona ia toe faia lea o le fata faitaulaga a Ieova lea na soloia i lalo.+ 31  Ua ave e Elia maa e sefulu lua e tusa ma le aofaʻi o ituaiga o le fanauga a Iakopo, o lē na oo mai ai le afioga a Ieova,+ e faapea: “O le a faaigoa oe iā Isaraelu.”+ 32  Ua ia faia i maa se fata faitaulaga+ i le suafa o Ieova,+ ma eli se ʻautu e faataamilo i le fata faitaulaga, pe tusa ma le telē o se fanua ua lūlūina i sea e lua o fatu. 33  Ua mavae lenā, ona ia faatulaga lea o fafie,+ ma penapena le tamaʻi povi poʻa ma tuu ai i luga o fafie. Ona ia faapea atu lea: “Inā faatutumu mai ia ni faguvai lapopoʻa se fā, ma sasaa i luga o le taulaga mū, ma luga o fafie.” 34  Ona ia fai atu lea: “Ia toe fai.” Ona latou toe faia lea. A ua ia fai atu: “Ia fai faatolu.” Ona latou faia faatolu lea. 35  Ua tafe atu le vai ua soo ai le fata faitaulaga, ua ia faatumu foʻi le ʻautu i le vai. 36  Ua oo i le taimi+ e fai ai le taulaga i meaʻai, ona faalatalata atu lea o le perofeta o Elia i le fata faitaulaga, ua faapea atu: “Ieova e, le Atua o Aperaamo,+ o Isaako,+ ma Isaraelu,+ ia faailoa atu i le asō o oe o le Atua i Isaraelu,+ o aʻu foʻi o lau auauna, ma o lau afioga+ ua ou faia ai nei mea uma. 37  Ieova e, ia e tali mai iā te aʻu, ia e tali mai iā te aʻu, ina ia iloa ai e lenei nuu o oe o Ieova+ o le Atua moni, o oe foʻi ua e toe faaliliuina mai o latou loto.”+ 38  Ona paʻū ifo lea o le afi+ a Ieova ma ua faaumatia+ ai le taulaga mū, o fafie, o maa, o le efuefu, ma ua mitiia ai foʻi le vai sa i le ʻautu.+ 39  Ina ua iloa e le nuu uma, ona latou faapaʻuʻū faō loa lea,+ ma faapea ane: “O Ieova o le Atua moni! O Ieova o le Atua moni!” 40  Ua fai atu Elia iā i latou: “Ia pupuʻe i perofeta a Paala! Aua lava neʻi iai se tasi o i latou e sola!” Ona latou pupuʻe lea o i latou, ma ua ave ifo e Elia i le ālia o Kisona,+ ma fasiotia ai i latou i inā.+ 41  Ua fai atu Elia iā Aapo: “Inā alu aʻe ia, ia e ʻai ma inu;+ auā ua gogolo mai timuga tetele.”+ 42  Ua alu aʻe Aapo e ʻai ma inu. A o Elia, ua alu aʻe o ia i le tumutumu o le Mauga o Karamelu ma punou i le eleele,+ ua tuu foʻi ona foliga i le va o ona tulivae.+ 43  Ona ia fai atu lea i lana auauna: “Inā alu aʻe ia faamolemole. Ia vaavaai agaʻi i le sami.” Ona alu aʻe lea o ia ma vaai, ona ia fai mai lea: “E leai lava se mea.” Ona ia fai atu lea, “Inā toe alu ia,” ia foʻi faafitu.+ 44  Ina ua foʻi faafitu o ia, ona ia fai mai lea: “Faauta! O loo alu aʻe mai i le sami se ao itiiti e pei o le alofilima o se tagata.”+ Ona ia fai atu lea: “Ia e alu aʻe ma fai atu iā Aapo, ‘Inā sauni ia!+ Ia e alu ifo, ina neʻi taofia oe i timuga tetele!’” 45  Ua oo ina pogisa le lagi i ao, ma le matagi,+ ma ua maligi ifo timuga tetele.+ A ua tiʻetiʻe pea Aapo, ua alu atu i lona ala i Isereelu.+ 46  Sa iai pea le aao o Ieova iā Elia,+ ona ia fusi lea i lona sulugātiti,+ ma tamoʻe atu e muamua i luma o Aapo, ua oo atu lava i Isereelu.+

Faamatalaga Pito i Lalo

Po o le “miula,” lea e maua mai i le upu Eperu e faasino atu i le tama a le asini poʻa ma le solofanua fafine.